ဗမာပြည်ရဲ့ ဒီမိုကရေစီတော်လှန်ရေး
ကိုထွေး
(၈၅ နှစ်မြောက် ဗမာပြည်ကွန်မြူနစါပါတီ မွေးနေ့အထိမ်းအမှတ် အရေးတော်ပုံဂျာနယ်မှာ ထည့်သွင်းဖော်ပြမယ့်ဆောင်းပါး)
ဗမာပြည်ရဲ့ လက်ရှိဒီမိုကရေစီတော်လှန်ရေးမှာ လူမျိုးပေါင်းစုံ ပြည်သူလူထုကြီးတရပ်လုံးပါဝင်နေမှုဟာ ထူးခြားထင်ရှားပါတယ်။
လူမျိုးပေါင်းစုံပြည်သူလူထုကြီးဟာ ၄၈ ကစခဲ့တဲ့ပြည်တွင်းစစ် (၇၆) နှစ်အတွင်း ဖြတ်သန်းခဲ့ကြရင်းက သင်ခန်းစာအမျိုးမျိုး ဘဝအတွေ့အကြုံမျိုးစုံကြုံတွေ့ခဲ့ပြီး လက်တွေ့သဘောပေါက်မှုအရ၊ စစ်တပ်လက်ဝါးကြီးအုပ် စစ်ဗျူရိုကရက်အရင်းရှင်စနစ်နဲ့ စစ်အစိုးရတွေကို ပြတ်သားစွာဆန့်ကျင်တိုက်ပွဲဝင်မှရမယ်လို့ သဘောပေါက်လာမှုရဲ့ ရလဒ် ဖြစ်ပါတယ်။ ထို့အတူ နှစ်(၇၀) ကျော်ဖြတ်သန်းခဲ့မှုအတွင်း နိုင်ငံရေးအင်အားစုအသီးသီးရဲ့တိုက်ပွဲဝင်မှု၊ နိုင်ငံရေးလမ်းစဉ်အမျိုးမျိုးနဲ့ လှုံ့ဆော်စည်းရုံးခဲ့မှုမျိုးစုံတွေကို တွေ့ကြုံခံစား ဖြတ်သန်းလာခဲ့တဲ့အတွေ့အကြုံတွေအရ သဘောပေါက်မှုရဲ့ရလဒ်လည်းဖြစ်တယ်။
ဒီအဖိနှိပ်ခံလူမျိုးပေါင်းစုံ ပြည်သူလူထုကြီးတရပ်လုံးဆိုတာရဲ့လူတန်းစားပါဝင်မှုကို လေ့လာကြည့်မယ်ဆိုရင်၊ အလုပ်သမား၊ လယ်သမား၊ လူလတ်တန်းစားနဲ့ ပြည်ချစ်အရင်းရှင်များအဖြစ်တွေ့နိုင်ပြီး ဒီလူတန်းစားအသီးသီးဟာ ဗမာပြည်တွင်းက လူမျိုးအသီးသီးမှာရှိနေကြတာဖြစ်ပါတယ်။ ကချင်၊ ကရင်၊ ရှမ်း၊ ဝ၊ ရခိုင်၊ ချင်း၊ မြန်မာ စသဖြင့်လူမျိုးတိုင်းမှာ ဒီလူတန်းစား (၄) ရပ်ရှိနေတာ တွေ့နိုင်ပါတယ်။ ၁၉၈၉ နောက်ပိုင်း လူမျိုးစု လက်နက်ကိုင်အင်အားစုအသီးသီး စစ်အုပ်စုနဲ့ အပစ်အခတ် ရပ်စဲရေးလုပ်ပြီးနောက် ဒေသဖွံ့ဖြိုးရေးလုပ်ကြတဲ့ဖြစ်စဉ်အတွင်း စီးပွားရေးလုပ်ငန်းမျိုးစုံမှာ ရင်းနှီးမြှုပ်နှံလုပ်ကိုင်ခွင့်တွေရကြပြီးနောက် ဒီလူတန်းစားတည်ရှိမှုအနေအထားကို ပိုကြည့်လို့မြင်သာလာပါတယ်။ ဒီ အဖိနှိပ်ခံပြည်သူလူထုဟာ စစ်တပ်လက်ဝါးကြီးအုပ်အရင်းရှင်စနစ်ရဲ့ လက်ဝါးကြီးအုပ်စီးပွားရေးစနစ်အတွင်းမှာ ကိုယ်ပိုင်စီးပွားရေးများ ပျက်စီး၊ လက်လုပ်လက်စား လုပ်စားလို့လည်း ဝမ်းမဝ၊ လယ်ယာလုပ်ငန်းမှာ ပေါ်လစီအမျိုးမျိုးချမှတ်ပြီး ဖိနှိပ်သွေးစုပ်မှုများလုပ်တာကြောင့် ဝမ်းမဝ၊ နွားရောင်း လယ်ပေါင် ဘဝပျက်ကြရတဲ့အခြေအနေဆိုးတွေ ကြုံခဲ့ကြရပြီး နိုင်ငံခြားထွက်အလုပ်ရှာကြရတဲ့ဘဝ ရောက်ခဲ့ကြရတာဖြစ်ပါတယ်။
အဖိနှိပ်ခံပြည်သူလူထုကိုဖိနှိပ်ထားတဲ့ အုပ်စိုးသူစစ်အုပ်စုရဲ့လူတန်းစားဖွဲ့တည်မှုကိုကြည့်ရင်တော့ အုပ်စိုးသူ စစ်အုပ်စုဟာ စစ်ဗျူရိုကရက်အရင်းရှင်လူတန်းစားဖြစ်ပြီး သူတို့ရဲ့အကျိုးစီးပွားကို တိုးတက်သထက်တိုးတက်အောင်လုပ်ဖို့၊ အရင်းရှင်လူတန်းစားထဲက သူတို့နဲ့ ရင်းနှီးသူ၊ မိတ်ဖက်ဖြစ်သူများကိုအခြေခံကာပေါင်းစည်းပြီး အရင်းရှင်စီးပွားရေးစနစ်ကို စစ်တပ်လက်ဝါးကြီးအုပ်အရင်းရှင်စနစ်ပုံစံနဲ့ ကျင့်သုံးအကောင်အထည်ဖော်ကာ ကျန်အဖိနှိပ်ခံပြည်သူများကို ဖိနှိပ်သွေးစုပ်ခဲ့တာဖြစ်ပါတယ်။
စစ်အုပ်စုရဲ့ စစ်တပ်ကိုကြည့်ရင် စစ်တပ်ရဲ့ထိပ်ပိုင်းရာထူးတွေကိုယူပြီး အစိုးရလုပ်နေတဲ့ စစ်ဗျူရိုကရက် အရင်းရှင်လူတန်းစားများနဲ့ အောက်ခြေတပ်မှူးတပ်သာများအဖြစ် ရှိနေတာ အထင်အရှားမြင်ရပါလိမ့်မယ်။ အစိုးရအာဏာနဲ့ စစ်အာဏာကိုင်ပြီး ကိုယ့်စိတ်ကြိုက်စီးပွားရေးကို ကိုယ့်ရင်းနှီးသူတွေနဲ့လုပ်ကိုင်ရင်း ချမ်းသာလာကြတဲ့ ဗိုလ်ချုပ်ကြီးတွေ မမြင်ချင်အဆုံးပါ။ အထင်ရှားဆုံး ဗိုလ်ချုပ်မှူးကြီးမင်းအောင်လှိုင်ရဲ့ ချမ်းသာကြွဝလာမှုကို ကြည့်လိုက်ရင် အထင်ရှားဆုံးဖြစ်ပါလိမ့်မယ်။ အောက်ခြေတပ်မှူးတပ်သားတွေကတော့ ရတဲ့လခနဲ့ အသက်စွန့်အသေခံပြီး ဒီစစ်အုပ်စုစစ်ဗိုလ်ချုပ်တွေရဲ့စည်းစိမ်ဥစ္စာတွေကို ကာကွယ်နေကြရတာ လက်ရှိကာလမှာ အထင်အရှား မြင်နေကြရတာဖြစ်ပါတယ်။
တဖက်မှာ လူတန်းစား (၄) ရပ် ရှိနေတဲ့ လူမျိုးပေါင်းစုံ အဖိနှိပ်ခံပြည်သူတွေကတော့ ဒီနေ့အထိ သူတို့လိုချင်တဲ့ အမျိုးသားတန်းတူရေးနဲ့ သွေးစည်းညီညွတ်ရေး၊ ဒီမိုကရေစီအပြည့်အဝရရှိရေး၊ လက်ဝါးကြီးအုပ် ဖိနှိပ်သွေးစုပ်ခံရမှုကလွတ်မြောက်ပြီး လွတ်လပ်မျှတစွာ လုပ်ကိုင်စားသောက်ရှင်သန်နိုင်တဲ့ ဘဝရရှိရေးရည်မှန်းချက်ကို မရောက်ရှိနိုင်ကြသေးပါဘူး။ စစ်အုပ်စုပေးသမျှ ဘဝရှင်သန်ခွင့်ရှိနေရတဲ့ အခြေအနေကနေလွတ်မြောက်ဖို့ တိုက်ပွဲဝင်နေကြရဆဲအခြေအနေမှာပဲရောက်နေကြရတာ ဖြစ်ပါတယ်။
ဒီအခြေအနေဟာ လက်ရှိဆင်နွှဲနေကြတဲ့၊ ဒီမိုကရေစီတော်လှန်ရေးပါပဲ။ ဒီလို အင်အားစုအသီးသီးက ကိုယ်စီနိုင်ငံရေးရည်မှန်းချက်တွေနဲ့ ဗမာပြည်သစ်ပေါ်ပေါက်ဖို့တိုက်ပွဲဝင်နေတဲ့တော်လှန်ရေးဟာ ဒီနေ့ဗမာပြည်ရဲ့ ဒီမိုကရေစီတော်လှန်ရေးပဲ ဖြစ်ပါတယ်။
ဒီနေရာမှာ ဗမာပြည်ဒီမိုကရေစီတော်လှန်ရေးနဲ့ဆက်စပ်နေတဲ့ ပါတီအတွင်းရေးမှုးရဲအစီရင်ခံစာကို တင်ပြချင်ပါတယ်။
၁၉၉၄ ခုနှစ် ဩဂုတ်လ(၁၅)ရက်နေ့က အထွေထွေအတွင်းရေးမှူးရဲ့“ပြည်တွင်းငြိမ်းချမ်းရေးနှင့်တည်ငြိမ်ရေးမှတတိုင်းပြည်လုံးဖွံ့ဖြိုးရေးသို့“ဆိုတဲ့နိုင်ငံရေးအစီရင်ခံစာဖြစ်ပါတယ်။ဒီအစီရင်ခံစာထဲမှာ—“ကျွန်တော်တို့ပါတီဟာ ဗမာပြည်မှာ ဒီမိုကရေစီ ထွန်းကားရေးအတွက် ဒီမိုကရေစီတော်လှန်ရေးကို အဦးဆုံးဆင်နွဲခဲ့တဲ့ပါတီဖြစ်ပါတယ်။ကျွန်တော်တို့ရဲ့ဒီမိုကရေစီဟာ လူတန်းစား၄ရပ်(အလုပ်သမား၊ လယ်သမား၊ လူလတ်တန်းစားနဲ့ပြည်ချစ်အရင်းရှင်)အတွက်ဒီမိုကရေစီ ဖြစ်ပါတယ်။ တနည်းအားဖြင့် ပြည်သူ့ဒီမိုကရေစီဖြစ်ပါတယ်။ ဒါကိုဘယ်တုန်းကမှလျှို့ဝှက်ထားတာ မဟုတ်ပါဘူး။ ” တဆက်တည်း“ ပြည်သူ့ဒီမိုကရေစီမဟုတ်ဘဲ အခြေခံဒီမိုကရေစီအခွင့်အရေးများအတွက်သာ တိုက်တဲ့တိုက်ပွဲတိုင်းကိုလည်း၊ ဘယ်သူကတိုက်တိုက် တက်တက်ကြွကြွထောက်ခံမှာ ဖြစ်ပါတယ်။ဘာကြောင့်လဲဆိုတော့ အခြေခံဒီမိုကရေစီရှိနေတာဟာ စစ်အစိုးရရှိနေတာထက် အလုပ်သမား၊ လယ်သမား၊ လူလတ်တန်းစားနဲ့ပြည်ချစ်အရင်းရှင်များအတွက် အကျိုးရှိလို့ပါ။ ” လို့တင်ပြခဲ့ပါတယ်။ ဒါ့အပြင် ပါတီရဲ့သဘောထားကိုလည်း တဆက်တည်းတင်ပြရာမှာ“ကွန်မြူနစ်ဝါဒဆန့်ကျင်ရေးအယူအဆရှိကြတာ ရှိပါ၊ ဒါကိုမကန့်ကွက်ပါဘူး၊ကွန်မြူနစ်ဝါဒနဲ့ပါတီတည်ရှိခွင့်ကို အသိအမှတ်မပြုတာကိုတော့ ကျွန်တော်တို့လက်မခံနိုင်ပါ။ကျွန်တော်တို့ပေါ်လစီက ကွန်မြူနစ်နဲ့ကွန်မြူနစ်ဆန့်ကျင်သူတို့ အခြေခံဒီမိုကရေစီဘောင်အတွင်းမှာ ငြိမ်းချမ်းစွာယှဉ်ပြိုင်ဖို့ဖြစ်ပါတယ်။ အခြေခံဒီမိုကရေစီအခွင့်အရေးခံစားခွင့်ကို ခြွင်းချက်ထားတာ ကျွန်တော်တို့သဘောမတူနိုင်ပါ။” လို့တင်ပြခဲ့ပါတယ်။
ဒီတော်လှန်ရေးဟာ စစ်အုပ်စုအုပ်စိုးမှုကို အရင်ဆုံးတိုက်ခိုက်ဖြိုချပစ်ပြီးမှသာ မိမိတို့လူမျိုးပေါင်းစုံအဖိနှိပ်ခံပြည်သူလူထုများမျှော်လင့်တဲ့ နိုင်ငံရေးအခြေအနေကိုအကောင်အထည်ဖော်နိုင်မှာ ဖြစ်တယ်ဆိုတာ(၇၆)နှစ်ပြည်တွင်းစစ်အတွေ့အကြုံများအရ မြင်သာပါတယ်။ ဒါ့ကြောင့် တော်လှန်ရေးအားစုအားလုံးလက်တွဲပြီး စစ်အုပ်စုတိုက်ခိုက်ဖြိုချနိုင်ရေးကို ဦးတည်လုံးပန်းသွားရေးဟာ ဒီနေ့ဗမာပြည်ဒီမိုကရေစီတော်လှန်ရေးရဲ့အရေးအကြီးဆုံးလုပ်ငန်းတာဝန်ပဲဖြစ်ပါတယ်။