အကောင်းဆုံး ဂုဏ်ပြုလက်ဆောင်ပေးခြင်းပဲ ဖြစ်တယ်
မော်ရှေ့ ဆောင်လမ်းပြခဲ့တဲ့ လမ်းအတိုင်း ချီတက်ခြင်းဟာ
အကောင်းဆုံး ဂုဏ်ပြုလက်ဆောင်ပေးခြင်းပဲ ဖြစ်တယ်
မြစမ်းအေး
တရုတ်ပြည်သူ့သမ္မတနိုင်ငံကို ထူထောင်သူခေါင်းဆောင်ကြီး ဥက္ကဋ္ဌမော်ရဲ့ ၁၃၀ နှစ်မြောက် မွေးနေ့အခါသမယကို တရုတ်ပြည်ကွန်မြူနစ်ပါတီ တရုတ်ဒေသန္တရအစိုးရများနဲ့တရုတ်ပြည်သူများဟာ နိုင်ငံတဝန်း အထိမ်းအမှတ်ပြု ဂုဏ်ပြုကျင်းပကြပါတယ်။
ပေကျင်း ရှန်ဟဲ နဲ့ မော်စီတုန်းရဲ့ မွေးရပ်ဇာတိ တရုတ်ပြည်အလယ်ပိုင်း ဟူနန်ပြည်နယ် ရှောက်စန်း Shaoshan မြို့ နဲ့တကွ၊ တရုတ်ပြည်အရှေ့ပိုင်း ကျန်းရှီးပြည်နယ် ကျင်ကန်းစန်းလို၊ တရုတ်ပြည်အနောက်မြောက် ရှန်းရှီးပြည်နယ် ယင်အန်းလို အလေးအမြတ်ထားရာ ဒေသများတွင်၊ အဆင့်မြင့်အရာရှိများနဲ့ အကျိုးဆောင်များမှ အထိမ်းအမှတ်အခမ်းအနားများ ကျင်းပခြင်းဖြင့်၊ တရုတ်ပြည်တင်မက ကမ္ဘာမှာပါ ဘက်စုံလှုပ်ရှားထကြွလာစေခဲ့တဲ့ မော်စီတုန်းအတွေးအခေါ် စိတ်ဓာတ်နဲ့ သမိုင်းမော်ကွန်းကို ဂုဏ်ပြု အထိမ်းအမှတ်ပြုကြပါတယ်။
တရုတ်ပြည်ကွန်မြူနစ်ပါတီ ဗဟိုကော်မတီမှ ရဲဘော်မော်စီတုန်း အနှစ် ၁၃၀ မြောက် မွေးနေ့အထိမ်းအမှတ် အခမ်းအနားတရပ်ကို အင်္ဂါနေ့ (၂၆ ဒီဇင်ဘာ) မှာ ပြုလုပ်ခဲ့ပါတယ်။ တရုတ်ပြည်ကွန်မြူနစ်ပါတီ ဗဟိုကော်မတီ အထွေထွေအတွင်းရေးမှူး၊ သမ္မတနဲ့၊ ဗဟိုစစ်ကော်မရှင် ဥက္ကဋ္ဌရှီကျင်းဖျင်က ပေကျင်းမြို့ ပြည်သူ့ခန်းမဆောင်ကြီးတွင် ကျင်းပတဲ့ အောက်မေ့ဖွယ် အခမ်းအနားမှာ အရေးကြီးမိန့်ခွန်းတရပ် ပြောကြားပါတယ်။
ရှီက ရဲဘော်မော်စီတုန်း ရှေ့ဆောင်ခဲ့တဲ့ လမ်းကြောင်းအတိုင်း ချီတက်ဖို့နဲ့၊ တရုတ်ပြည်ကို ကြံ့ခိုင်တောင့်တင်းတဲ့နိုင်ငံ အမျိုးသားဘက်စုံပြန်လည်နိုးထပြီး ခေတ်မီဖွံ့ဖြိုးတိုးတက်တဲ့နိုင်ငံ အဖြစ် တည်ဆောက်ဖို့ အရေးကြီးကြောင်း ပြောပါတယ်။
မော်စီတုန်းအတွေးအခေါ်ဟာ မိမိတို့ပါတီရဲ့ အဖိုးမဖြတ်နိုင်တဲ့ စိတ်ဓာတ်ရတနာဖြစ်ပြီး မိမိတို့ရဲ့ ပြုမူဆောင်ရွက်မှုအပေါ် ရေရှည်ထိန်းကျောင်း ပေးနေမှာဖြစ်ပြီး၊ ရဲဘော်မော်စီတုန်းအပေါ် အကောင်းဆုံး အထိမ်းအမှတ်ပြုခြင်းဟာ သူရှေ့ဆောင်ညွှန်ပြခဲ့တဲ့ လမ်းအတိုင်း ဆက်လက်ဖြစ်ပေါ်တိုးတက်အောင် ချီတက်ခြင်းပဲ ဖြစ်ကြောင်း ပြောပါတယ်။
ရှီနဲ့တကွ တရုတ်ပြည်ကွန်မြူနစ်ပါတီ ပေါလစ်ဗျူရို အမြဲတမ်းကော်မတီများ အဆင့်မြင့်ခေါင်းဆောင်များဟာ အခမ်းအနားမစမီ မော်စီတုန်းဂူဗိမာန်မှာ စုဝေးပြီး ဦးသုံးကြိမ်ညွှတ် ဂါရဝပြုကြပါတယ်။
မော်ရဲ့မွေးရပ်မြေ ရှောက်စန်း Shaoshan မြို့လေးမှာလည်း တနင်္လာနေ့ နံနက် ၆ နာရီမှ အင်္ဂါနေ့ ညနေ ၇ နာရီအထိ အတောအတွင်း ခရီးသွားဧည့်သည် ၁၁၁,၅၇၀ လာရောက်ကြပြီး၊ ဒါဟာ ၂၀၂၂ ကထက် ၇၁၇.၉၈% တိုးလာတာဖြစ်ပါတယ်။
ဒီလိုခရီးသွားဧည့်သည် တိုးလာတာဟာ တရုတ်ပြည်သူများမှ ဥက္ကဋ္ဌမော်အပေါ် အလေးအမြတ်ပြု တန်ဖိုးထားမှုရဲ့ ရိုးရှင်းတဲ့ ဖော်ပြမှုဖြစ်ပြီး ဒါဟာရပ်တံ့သွားမှာ မဟုတ်ပါ။
တချိန်က တော်လှန်ရေး အမာခံဒေသများဖြစ်ခဲ့တဲ့ ကျင်ကန်းစန်း နဲ့ ယင်အန်း တို့မှာလည်း ဒေသအစိုးရများနဲ့ ပြည်သူများက အထိမ်းအမှတ်ပြုပွဲများ ဂုဏ်ပြုကျင်းပကြပါတယ်။
Sina Weibo, China X-like စတဲ့ ဆိုရှယ်မီဒီယာ များမှာလည်း ဥက္ကဋ္ဌမော် ၁၃၀ နှစ် မြောက်မွေးနေ့အထိမ်းအမှတ် hashtags မှတ်ချက်ရေး အထိမ်းအမှတ်ပြုမှုပေါင်း (မူရင်းဆောင်ပါးရေးချိန်အထိ) သန်း ၃၀၀ လောက် ရှိပါတယ်။
မျက်မှောက်ကာလတိုင် မော်ကို ကြီးမားစွာ ဂုဏ်ပြုအောက်မေ့ရတဲ့ အကြောင်းက အမေရိကန်နဲ့ အပေါင်းပါတချို့ရဲ့ တရုတ်ပြည်အပေါ် ရန်လိုမှုနဲ့ ဖိအားကို ရင်ဆိုင်နေရချိန်မှာ၊ မော်ရဲ့ သတ္တိ ဉာဏ်အမြော်အမြင်၊ ဗိုလ်ကျလွှမ်းမိုးမှုနဲ့ နယ်ချဲ့စနစ်ကို ဆန့်ကျင်ရာမှာ ပိုင်းဖြတ်ချက်ရှိမှုကြောင့် ဖြစ်ပါတယ်။
ရှီကပြောကြားရာမှာ “မော်ဟာ သူ့မျိုးဆက်ခေတ်မှာ တရုတ်ပြည်သူများကို ဦးဆောင်ပြီး တရုတ်ပြည်သူများရဲ့ ကံကြမ္မာနဲ့ နိုင်ငံတော်ရဲ့ အသွင်အပြင်ကို အလုံးစုံပြောင်းလဲစေခဲ့တဲ့ ကြီးမြတ်တဲ့ပုဂ္ဂိုလ်ကြီး ဖြစ်ပါတယ်”။ “သူဟာ ကမ္ဘာ့အဖိနှိပ်ခံ အမျိုးသားများ လွတ်မြောက်ရေးနဲ့ လူသားဖြစ်ပေါ်တိုးတက်မှုအတွက် ထူးခြားစွာ ကောင်းမှုပြုခဲ့တဲ့ ကြီးမြတ်တဲ့ နိုင်ငံတကာ့ဝါဒီတဦးလည်း ဖြစ်ပါတယ်” ။
မော်ဟာ ပြည်သူလူထုကို ဦးဆောင်ပြီး ရှေ့တန်းရောက် ဆိုရှယ်လစ်စနစ်နဲ့ မချေဖျက်နိုင်တဲ့ အမျိုးအစားသစ် ပြည်သူ့တပ်မတော်တရပ်ကို ထူထောင်ခဲ့တယ်။ တရုတ်အမျိုးသားများနဲ့ တရုတ်ပြည်သူများအပေါ် မော်ရဲ့ သမိုင်းဆိုင်ရာ ဖြည့်ဆည်းမူဟာ ချေဖျက်လို့မရ သမိုင်းတွင်နေမှာဖြစ်တယ်လို့ ရှီကပြောပါတယ်။
တရုတ်ပြည် ရဲ့ယ်မင်(ပြည်သူ့)တက္ကသိုလ် Renmin University of China နိုင်ငံတကာလေ့လာရေးဌာန တွဲဘက်ဌာနမှူး Jan Canion က “မော်ခေတ်မှာ နှစ် ၃၀ အတွင်း တရုတ်ပြည်စက်မှုလုပ်ငန်း အောင်မြင်စွာ ထူထောင်နိုင်ခဲ့ကြောင်း၊ အနောက်နိုင်ငံများမှာ နှစ်ပေါင်း ၃၀၀ လောက် ဖြတ်သန်းခဲ့ရကြောင်း၊ မော်ခေတ်ကုန်ဆုံးပြီးနောက် တရုတ်ပြည်ဟာ ပြည့်စုံတဲ့စက်မှုလုပ်ငန်းစနစ် ရှိလာပြီး၊ နျူကလီးယားအင်အားနိုင်ငံနဲ့ အာကာသလေ့လာရေး စွမ်းရည်ပြည့်ဝလာကြောင်း” မှတ်ချက်ပြုပါတယ်။
ရည်ညွှန်း။ Pushing forward the cause pioneered by Mao best way to pay tribute: Xi. Global Times. Dec 26, 2023.