ဗမာပြည်ကွန်မြူနစ်ပါတီ ပြောရေးဆိုခွင့်ရှိသူ ရဲဘော်ဖိုးသံချောင်းနှင့် အလွတ်သတင်းထောက် (ကို)သက်ထွေးနိုင် ဆက်သွယ်မေးမြန်းချက်
THN ။ ။ ဗမာပြည်မှာ သက်တမ်းအရှည်ကြာဆုံး ပါတီဖြစ်တဲ့ ဗမာပြည်ကွန်မြူနစ်ပါတီက အခုဗမာပြည်ရဲ့ နောက်ဆုံး နိုင်ငံရေးဖြစ်စဉ်၊ ၂၀၂၁ စစ်အာဏာသိမ်းမှုကြောင့် အကျယ်ပြန့်ဆုံး ပေါ်လာတဲ့ နွေဦးတော်လှန်ရေးဖြစ်စဉ်မှာ ပါတီအနေနဲ့ ဘယ်လိုအခန်းကဏ္ဍမှာ ပါဝင်နေတယ်ဆိုတာ အရင်ဆုံး သိလိုပါတယ်ဗျ။
ရဲဘော်ဖိုးသံချောင်း။ ။ ကျနော်တို့အနေနဲ့ ဒီ နွေဦးတော်လှန်ရေး ဖြစ်ပေါ်လာပြီဆိုကတည်းက ထောက်ခံတယ်ဆိုတဲ့သဘောထား ဖော်ပြခဲ့ပါတယ်။ ကျန်တဲ့သူတွေကိုလည်း အဲလိုပဲ ပြောခဲ့ပါတယ်။ တတ်နိုင်သလောက် ပါဝင်ခဲ့ပါတယ်။ ကျနော်တို့ရဲ့ လက်နက်ကိုင်အင်အားစုဖြစ်တဲ့ PLA ကလည်း တတ်နိုင်တဲ့အခန်းကဏ္ဍကနေ တတ်နိုင်တဲ့ နေရာဒေသတွေမှာ ပါဝင်လှုပ်ရှားနေတာပါပဲ။ ကျနော်တို့က အကုန်လုံး အစီအစဉ်ရှိရှိ၊ ရည်ရွယ်ချက်ရှိရှိနဲ့ လုပ်နေတာပါ။
THN ။ ။ တချိန်က ပါတီသမိုင်းကို နည်းနည်းသွားချင်ပါတယ်။ ပါတီရဲ့ အဓိက အလှည့်အပြောင်းကြီးဖြစ်ခဲ့တဲ့ ၁၉၈၉ ခု ပါတီပြိုကွဲခဲ့တယ်လို့ အများအားဖြင့် ပြောကြတာပေါ့။ အဲဒီနောက်ပိုင်း ပါတီအနေနဲ့ ဘယ်လိုပုံစံ ရှင်သန်ခဲ့လဲ၊ အဲဒီအချိန်က စစ်အာဏာရှင်တိုက်ဖျက်ရေးမှာ ဘယ်လိုအခန်းကဏ္ဍကနေ ရှိခဲ့လဲ။ အဲဒါကို ပြောပြနိုင်သလောက် သိလိုပါတယ်ဗျ။
ရဲဘော်ဖိုးသံချောင်း။ ။ ကျနော် အကုန်မပြောနိုင်တောင်မှ တချို့တော့ ပြောပါမယ် နော။ အုံကြွမှုပဲပြောပြော ပါတီက ခွဲထွက်မှုတွေ ဖြစ်ပြီးတဲ့နောက်မှာ ကျနော်တို့ပါတီဟာ ဖွဲ့စည်းထားတဲ့တပ်လည်း မရှိတော့ UG ပါတီအနေနဲ့ ပြောင်းပြီး လှုပ်ရှားရပါတယ်။ ဗမာပြည်မှာ ဖြစ်ပေါ်တဲ့ လှုပ်ရှားမှုတိုင်းလိုလိုမှာပဲ ကျနော်တို့အင်အားစုတွေဟာ ပုံသဏ္ဌာန်အမျိုးမျိုးနဲ့ ပါဝင်နေခဲ့တာရှိပါတယ်။ အခုနောက်ဆုံး နွေဦးတော်လှန်ရေးမှာ လက်နက်ကိုင်တပ်ဖွဲ့အနေနဲ့ PLA အနေနဲ့ရော၊ တခြား မြေအောက်လှုပ်ရှားမှုတွေအနေနဲ့ရော၊ ပြည်ပမှာလည်း အတတ်နိုင်ဆုံး ဆက်သွယ်တာတွေ လုပ်ကိုင်တာတွေ ရှိပါတယ်။
THN ။ ။ ၁၉၈၉ မှာ ပါတီကနေ ခွဲထွက်သွားကြတဲ့ ကိုးကန့်၊ မိုင်းလား… ဒီတပ်ဖွဲ့တွေအပေါ် အဲဒီအင်အားစုတွေအပေါ် ဆရာတို့သဘောထားကို သိလိုပါတယ်ဗျ။
ရဲဘော်ဖိုးသံချောင်း။ ။ အဲဒီဟာတွေနဲ့ပတ်သက်လို့ ရဲဘော်ထွန်း (ထိုကာလ ပါတီအထွေထွေအတွင်းရေးမှူး) က ကျနော်တို့ကိုပြောတယ်… သူတို့ကို ရန်သူ့ဆီ တွန်းပို့တာ မဖြစ်ဖို့၊ လူထုဆန့်ကျင်ရေးအဖွဲ့အစည်းတွေ ဖြစ်မသွားဖို့ လုပ်ဖို့လိုတယ်လို့ တိုက်တွန်းခဲ့ပါတယ်။ လက်တွေ့အရလည်း ကျနော်တို့အထင်တော့ ကိုးကန့်ဟာ သူတို့ရဲ့ လက်တွေ့အရကိုပဲ ဒီစစ်အုပ်စုအပေါ် နားလည်လာပြီ၊ သူတို့ အတိုက်ခံရတာတွေ၊ ဗုံးကျဲခံရတာတွေ၊ အမြောက်နဲ့ထုခံရတာတွေ ရှိလာတော့ သူတို့လည်း သိလာပြီ၊ နားလည်လာပြီ။ စစ်အစိုးရအပေါ်မှာ နားလည်သဘောပေါက်လာပြီလို့ ကျနော်ထင်ပါတယ်။ ကျနော်တို့ကတော့ သူတို့အပေါ်မှာ တချိန်တုန်းက ခံတုတ်ကျင်းတခုထဲမှာ အတူတူ တိုက်ဖော်တိုက်ဖက်ဟောင်းတွေလို့ပဲ သဘောထားပါတယ်။ သူတို့နဲ့ လက်တွဲလုပ်နိုင်ပါတယ်။ အဲလိုလုပ်နိုင်တဲ့အဖွဲ့အစည်းလို့ပဲ စိတ်ထဲမှာ မှန်းထားပါတယ်။
THN ။ ။ သူတို့နဲ့ဆက်ဆံရေး တစုံတရာကော ပြောပြလို့ရနိုင်မလား။
ရဲဘော်ဖိုးသံချောင်း။ ။ ပြောပြလို့တော့ မရဘူးဗျ။ တစုံတရာ ရှိသလောက်တော့ ရှိပါတယ်။
THN ။ ။ ၁၉၈၈ မှာတော့ ဗမာပြည်ကွန်မြူနစ်ပါတီအနေနဲ့ ၄၈၂၈ ဆိုတဲ့ UG လှုပ်ရှားမှုတွေလည်း ကျနော်တို့ ကြားသိရတယ်။ ၈၉ ပြိုကွဲပြီးနောက်ပိုင်းမှာလည်း DPA ဆိုတဲ့ အင်အားစုတခုအနေနဲ့လည်း ဖွဲ့စည်းလှုပ်ရှားခဲ့တယ်ဆိုတာလည်း သိခဲ့ရပါတယ်။ ကျနော်တို့ကိုယ်နှိုက်လည်း DPA က ရဲဘော်တွေနဲ့ အလယ်ပိုင်းမှာ ဆုံဖူးပါတယ်။ အခု အာဏာသိမ်းတဲ့အခါမှာ PLA တပ်မတော် ပေါ်လာတာ တွေ့ရပါတယ်။ အဲတော့ PLA က DPA ရဲ့ အဆက်လား၊ အဲဒီအခြေအနေကိုလည်း သိလိုပါတယ်ဗျ။
ရဲဘော်ဖိုးသံချောင်း။ ။ PLA က DPA ရဲ့အဆက်လို့တော့ ပြောလို့မရပါဘူး။ PLA က သီးသန့်ဖွဲ့စည်းတာပါ။ မြေအောက်ဖွဲ့စည်းထားပြီး ဖြေးဖြေးဖြေးဖြေး အခုအခါကျမှ ထွက်ရပ်လာတာ ဖြစ်ပါတယ်။ နောက်ဆုံးအာဏာသိမ်းမှု မဖြစ်ခင်ကတည်းက PLA က အားစုနေ တာစူနေပြီဆိုတာတော့ ပြောလို့ရပါတယ်။ DPA ကနေ PLA ပြောင်းသွားတာလို့ အဲလို အတိအကျကြီး ပြောလို့မရပါဘူး။
THN ။ ။ ဗမာပြည်ကွန်မြူနစ်ပါတီအနေနဲ့ လက်နက်ကိုင်တော်လှန်ရေးမှာ PLA ဆိုတဲ့ တပ်မတော်နဲ့အတူ သက်ဝင်လှုပ်ရှားပြီလို့ ပြောနိုင်မလား၊ အဲလိုပြောရင် မှန်ပါသလား။
ရဲဘော်ဖိုးသံချောင်း။ ။ PLA လှုပ်ရှားတာကလည်း တမျိုးလို့ပြောလို့ရပါတယ်။ တခြားသဏ္ဌာန်တွေနဲ့ အဖွဲ့အစည်းတွေကြားမှာ လှုပ်ရှားနေတာတွေ၊ ရန်သူ့နယ်မြေမှာ လှုပ်ရှားနေတာတွေလည်း ရှိပါတယ်ခင်ဗျ။
THN ။ ။ အခုအချိန်မှာ ပါတီရဲ့ ဦးဆောင်မှုကို ဘယ်လိုဖွဲ့စည်းထားတယ်လို့ ကျနော်တို့သိရမလဲဗျ။ အရင်တုန်းက ဥက္ကဋ္ဌ ခေါင်းဆောင်တယ်။ နောက် အတွင်းရေးမှူး ခေါင်းဆောင်တယ်လို့ သိရတယ်။ အခုအခြေအနေမှာ ဘယ်လိုပုံစံတွေနဲ့သွားပြီးတော့ လူငယ်တွေနဲ့ အစားထိုးတာတွေ ရှိလား။ အဲဒီအပိုင်းကော ဘယ်လိုပြောပြနိုင်မလဲဗျ။
ရဲဘော်ဖိုးသံချောင်း။ ။ အခုစနစ်ကတော့ အတွင်းရေးမှူး ခေါင်းဆောင်တဲ့စနစ်ပါ။ မှန်ပါတယ် အရင်မျိုးဆက် ခေါင်းဆောင်ကြီးများဟာ အနည်းအကျဉ်းဆိုရုံမျှပဲ ကျန်တော့တဲ့အတွက် ကျနော်တို့အနေနဲ့ မျိုးဆက်သစ်တွေ ဝင်ပြီးတော့ တာဝန်ယူနေကြတာတွေ ရှိပါတယ်။ ကျနော်တို့လည်း အသက်တွေက မငယ်ကြတော့ဘူးဆိုတော့ နောက်မျိုးဆက်ကို လွှဲပေးဖို့ စဉ်းစားထား ပြင်ဆင်ထားတာတွေ ရှိပါတယ်။
THN ။ ။ အခုလက်ရှိ တော်လှန်ရေးလမ်းကြောင်းမှာ ပါတီရဲ့ PLA တပ်မတော်အနေနဲ့က နယ်မြေတည်ဆောက်ရေးနဲ့ မဟာမိတ်စုဖွဲ့မှုကိုရော ဘယ်လိုအစီအမံတွေရှိလဲဗျ။ အဲဒါ ပြောပြနိုင်မလား။
ရဲဘော်ဖိုးသံချောင်း။ ။ အတိအကျမသိဘူးဗျ ။ နယ်မြေတည်ဆောက်ရေးဆိုတာ။ တတ်နိုင်သလောက် လက်တွဲပြီး တိုက်နေတာပဲ။ အဓိက က ဘုံရန်သူကို ဖြိုဖျက်ရေးဟာ အဓိကဖြစ်တဲ့အတွက် ဘယ်သူနဲ့မဆို တွဲမယ်ဆိုတဲ့ပုံစံနဲ့ပဲ တွဲနေတာပဲ။ တုံ့ပြန်မှုအမျိုးမျိုးကိုတော့ ကြုံရတာပဲ။ ခင်ဗျားတို့လည်း ကြားပြီးသားဖြစ်မှာပါ။ ဘယ်လိုပဲဖြစ်စေ ကျနော်တို့ သွားရာလမ်းကြောင်း၊ ချီတက်ရာလမ်းကြောင်းကို မလျှော့ဘဲနဲ့ ကျနော်တို့ ဆက်လက်ချီတက်မယ်လို့ ဆုံးဖြတ်ချက် ပိုင်းဖြတ်ချက် ရှိပါတယ်။
THN ။ ။ PLA ရဲ့ အင်အားကိုရော ထုတ်ဖော်ပြောလို့ရနိုင်မလားဗျ။
ရဲဘော်ဖိုးသံချောင်း။ ။ အဲဒါတွေ ကျနော်ပြောလို့မရဘူးဗျ။ PLA က တပြည်လုံး အနှံ့အပြားရှိတာဆိုတော့ ပြောဖို့ခက်ပါတယ်။ ကျနော်တို့ ဗဟိုမှာကိုပဲ စာရင်းအတိအကျရှိဖို့ဆိုတာ ခက်ပါတယ်။ ပြောက်ကျားဒေသတွေမှာလည်း ရှိပါတယ်။ ဗမာပြည် တောင်ဖျားကနေ မြောက်ဖျားအထိရှိလို့ အတိအကျပြောဖို့ကတော့ ခက်ပါတယ်ခင်ဗျ။
THN ။ ။ ခေတ်အဆက်ဆက် လွတ်လပ်ရေးရပြီးနောက်ပိုင်း ဦးနုရဲ့ ပါလီမန်ဒီမိုကရေစီက စခဲ့တယ်ပေါ့။ ဦးနေဝင်း၊ ပြီးတော့ နဝတ၊ နအဖ၊ ဦးသိန်းစိန်၊ NLD ၊ လက်ရှိ စစ်ကောင်စီပေါ့။ ဒီအစိုးရအဆက်ဆက်မှာ ပြည်တွင်းစစ် အဆုံးမသတ်သေးဘူး၊ တော်လှန်တဲ့ဘက်ကလည်း ခုထက်ထိ အောင်မြင်မှု ပြတ်ပြတ်သားသားမရှိနိုင်သေးတဲ့အခြေအနေပေါ့။ အဲဒီ ခေတ်အဆက်ဆက် တော်လှန်မှုနဲ့ အဆုံးမသတ်နိုင်သေးတဲ့ အခြေအနေအပေါ် ကွန်မြူနစ်ပါတီအနေနဲ့ နိဂုံးချုပ်ချက်အကျဉ်း သိလိုပါတယ်။
ရဲဘော်ဖိုးသံချောင်း။ ။ အဲဒါ အလွယ်လေးတော့ ပြောလို့မရဘူးဗျ။ အဲဒါက အရှုပ်ကြီး။ ဟုတ်တယ်၊ တော်လှန်ရေးဟာ ကာလတွေ အများကြီးရှည်ကြာခဲ့တာ ဒါ အမှန်ပဲ ဝန်ခံတယ်။ အဲဒါက ပြည်တွင်းပြည်ပ အကြောင်းရင်းတွေ အများကြီးရှိပါတယ်။ ပြည်ပအင်အားစုတွေနဲ့လည်း ပတ်သက်ပါတယ်။ ပြည်တွင်းကဟာတွေနဲ့လည်း ပတ်သက်တယ်။ အလွယ်တကူ ဘယ်သူ့ကြောင့်၊ ဘယ်ဝါ့ကြောင့်၊ ဘယ်အဖြစ်အပျက်ကြောင့်၊ ဘယ်ကိစ္စကြောင့် အဲလို တခုနှစ်ခုကို ထောက်ပြလို့ မရပါဘူး။ နိုင်ငံတကာအခြေအနေအကြောင်းထဲ ကွန်မြူနစ်အုပ်စုကြီး အားနည်းသွားတာ၊ ကွဲတာတွေ ပေါ်လာတာ၊ ဆိုဗီယက်နဲ့တရုတ်နဲ့ ကွဲတာ၊ အဲဒီကနေတဆင့် ဆိုဗီယက် တခုလုံး ပြိုပျက်သွားတာမျိုး အဲဒါ နိုင်ငံတကာပေါ့။ နောက်ပြီးကျတော့ အမေရိကန်ရဲ့အခန်း၊ အမေရိကန်နဲ့တရုတ်က ပခုံးချင်းယှဉ်လာနိုင်တဲ့ကိစ္စ အဲဒါတွေက နိုင်ငံတကာအခြေအနေနဲ့ ပတ်သက်ပါတယ်။ ပြည်တွင်းမှာလည်းပဲ ဒီစစ်အုပ်စုကို ဘယ်သူကမှ မချိုးနှိမ်နိုင်တဲ့ကိစ္စ၊ ကျနော်တို့မျက်စိအောက်တင် ဦးနုကိုယ်တိုင် ပြည်ပ ထွက်ပြေးရတဲ့ထိဖြစ်ပြီးတော့ ဒီစစ်အုပ်စုကို မွေးခဲ့တဲ့လူတွေတောင်မှ ထွက်ပြေးရတဲ့အခြေအနေ ရောက်သွားတာမျိုး ပဋိပက္ခအပြောင်းအလဲတွေ အများကြီးရှိပါတယ်။ အတိအကျ ဘာကြောင့်မို့လို့ တခုနှစ်ခုလောက် လက်ညှိုးထိုးပြလို့ မရဘူးထင်ပါတယ်။
THN ။ ။ ဦးနုတုန်းကဆိုရင် ‘ရန်ကုန်အစိုးရ’ပေါ့၊ အဲဒါပြီးနောက်ပိုင်းဆို အခု စစ်ကောင်စီဟာ အဆိုးရွားဆုံးပေါ့။ သူ့ကို တော်လှန်တိုက်ခိုက်နေတာတွေကို ရင်ဆိုင်ရတာ အခက်အခဲလည်း ကြီးနေတယ်။ ဆိုတော့ ဒီနေ့နိုင်ငံရေး အခင်းအကျင်းပုံစံက ဘယ်လိုအဖြေထွက်မယ်လို့ ဆရာတို့ သုံးသပ်နိုင်မလဲ။ ဥပမာ စစ်တပ်က ‘ရန်ကုန်အစိုးရ’တုန်းကလိုမျိုး ပြန်တိုက်ခိုက်လာနိုင်မလား။ အပေးအယူလုပ်ပြီး အဖြေရှာသွားမလား၊ နောက်တခုက စစ်တပ်က လုံးဝပြိုကျသွားမလား၊ နောက်တခုက တော်လှန်ရေးအဖွဲ့တွေနဲ့ စစ်ကောင်စီအကြားမှာ ကိုယ့်နယ်မြေ သူ့နယ်မြေနဲ့ နယ်မြေပိုင်ဆိုင်မှုပုံစံနဲ့ပဲ ကာလကြာရှည်တခုထိ ဖြစ်သွားမလား။ ဆရာတို့အနေနဲ့ လက်ရှိနိုင်ငံရေးအခင်းအကျင်းကို ဖြစ်လာနိုင်ခြေ ဘာဖြစ်မယ်လို့ ပြောနိုင်မလဲ။
ရဲဘော်ဖိုးသံချောင်း။ ။ အဲဒီလိုတော့ ကျနော်တို့မှာ ဆုံးဖြတ်တာမျိုး စည်းဝေးတာမျိုး မရှိပါဘူး။ ကျနော်တို့က ဒီဟာမျိုးက ဗေဒင်တွက်သလို တွက်လို့ကောင်းတဲ့ဟာမျိုးလို့လည်း မထင်ပါဘူး။ လက်တွေ့အခြေအနေအပြောင်းအလဲတွေအပေါ်မှာ လိုက်ပါပြီးတော့ ကိုယ်က မှန်ကန်တဲ့ဘက်က ရပ်တည်မှု၊ ပြည်သူလူထုဘက်က ရပ်တည်မှု အဲဒါ အရေးကြီးတယ်လို့ထင်ပါတယ်။ အဲဒီအတွက်ပဲ ကျနော်တို့ ကြိုးစားပါတယ်။ ဗေဒင်တွက်သလို အဲဒီအတိုင်း စိုက်လိုက်မတ်တပ်လုပ်နေရင် ကျနော်တို့ဟာ တရားသေဖြစ်သွားမယ်။ အဲဒီအတိုင်းမဖြစ်ဘဲ တခြားလိုဖြစ်ရင်လည်း ကျနော်တို့တတွေ ဦးတည်ချက်ပြောင်းပြီး ကိုးရိုးကားရားတွေ ဖြစ်ကုန်မှာပါ။ ကျနော်တို့က ကြိုပြီးပြောထားတာထက် ဒီနေ့စစ်တပ်ဟာ ဘယ်တုန်းကမှနဲ့မတူအောင် သူတို့ထဲမှာ စိတ်ဓာတ်တွေကျနေတယ်၊ ပြိုကွဲနေတယ်၊ အဲဒါကတော့ အမှန်ပါပဲ။ အဲဒီကနေ ကျနော်တို့ ဘာဆက်လုပ်မယ်ဆိုတာ ညီညွတ်ရေးတည်ဆောက်ရေး၊ ဖြစ်နိုင်ရင် တပ်ပေါင်းစုတည်ဆောက်ရေး၊ အဲဒါကို ကျနော်တို့ လုံးပန်းကြဖို့ပဲ လိုတယ်လို့ထင်ပါတယ်။
THN ။ ။ တပ်ပေါင်းစု ပေါ်ထွန်းရေးကို အင်တာဗျူးတွေမှာ ဆရာတို့ အလေးထားပြောနေတာရှိတယ်။ အခုလည်း ဆရာပြောသွားတယ်။ တပ်ပေါင်းစုပုံစံနဲ့သွားဖို့က အရေးကြီးတယ်လို့။ ဒီနေရာမှာ တခုရှိတာက နွေဦးတော်လှန်ရေး ပေါ်လာတဲ့အခါမှာ အင်အားစု အတော်များများက စုပေါင်းပြီးတော့ ဖက်ဒရယ်ဒီမိုကရေစီချာတာကိုပါ အတည်ပြုနိုင်တဲ့ အမျိုးသားညီညွတ်ရေး အတိုင်ပင်ခံကောင်စီ (NUCC)ဆိုတာ စုဖွဲ့နိုင်ခဲ့တယ်။ ဒီ NUCC လောက်နဲ့ အလုပ်မဖြစ်ဘူးလားဆရာ။ အဲဒီအပေါ် ဘာများပြောလိုပါသလဲ။
ရဲဘော်ဖိုးသံချောင်း။ ။ NUCC တခုတည်းနဲ့တော့ မရသေးဘူး။ NUCC ကို ဝန်းရံကြတဲ့ အင်အားစုတွေလည်း များများမရှိသေးဘူး။ NUCC လုပ်နေကိုင်နေပုံ ကျနော် အားမရသေးဘူးဗျ။ ဒီထက်ပိုပြီး ကျယ်ပြန့်တဲ့၊ ဒီထက်ပိုပြီး ခိုင်မာညီညွတ်တဲ့၊ သိပ်သည်းတဲ့ တပ်ပေါင်းစုတရပ် ပေါ်ထွက်ဖို့ လိုသေးတယ်လို့ ထင်ပါတယ်။ ပိုကောင်းတယ်လို့ ထင်ပါတယ်။
THN ။ ။ နွေဦးတော်လှန်ရေးမှာ တပ်ဦးမှာရှိနေတယ်လို့ပြောရမယ့် အမျိုးသားညီညွတ်ရေးအစိုးရ (NUG) တပ်ဖွဲ့တွေရှိတယ်၊ တချို့ဒေသတွေမှာ အုပ်ချုပ်ရေးအဖွဲ့တွေ ဖွဲ့ထားပြီးပြီ။ ဒါနဲ့ပတ်သက်ရင် တော်တော်များများ ဝေဖန်မှုတွေ ရှိနေပါတယ်၊ NUG နဲ့ ပတ်သက်ပြီးတော့ပေါ့။ တချို့ဆိုရင် NUG ကို ပြုပြင်ပြောင်းလဲဖို့ လိုအပ်နေပြီလို့ ပြောတာတွေရှိတယ်ဗျ။ NUG အနေနဲ့ ဒီအတိုင်း ဆက်သွားလို့ အဆင်ပြေနိုင်လား၊ ဒါမှမဟုတ် ဘယ်လိုပြုပြင်ပြောင်းလဲမှုလုပ်ဖို့လိုမယ်လို့ သုံးသပ်ချက် ပေးချင်လဲဆရာ။
ရဲဘော်ဖိုးသံချောင်း။ ။ NUG မှ မဟုတ်ပါဘူး၊ ကျနော်တို့ပါတီ အပါအဝင် ဘယ်သူမဆို လူတယောက်ချင်းအနေနဲ့ပဲဖြစ်စေ၊ အဖွဲ့အစည်းအနေနဲ့ဖြစ်စေ ငါ ဘယ်တော့မှမမှားဘူးဆိုဆိုတာ ချထားလို့မဖြစ်ပါဘူး။ တကွေ့ကွေ့တချိန်ချိန်မှာတော့ ကိုယ့်ကိုယ်ကိုဝေဖန် ပြုပြင်ပြောင်းလဲရတာ ရှိကြတာချည်းပါပဲ။ အလားတူပဲ NUG လည်း သူတို့ချင်းချင်း ဆွေးနွေးဝေဖန်ရင်းနဲ့ ပြုပြင်ပြောင်းလဲ တိုးတက်အောင် လုပ်လာနိုင်လိမ့်မယ်လို့ မျှော်လင့်ပါတယ်ခင်ဗျ။
THN ။ ။ အခုက လက်နက်ကိုင်တော်လှန်ရေးကို အားလုံးက အင်နဲ့အားနဲ့ တိုက်ပွဲဝင်နေတဲ့ အနေအထားမှာ အဓိကကတော့ လက်နက်ခဲယမ်းက ရေရှည်မှာ အခရာကျမယ်လို့ ထင်ပါတယ်။ ဘာလို့လဲဆိုတော့ ဆရာတို့တုန်းကရော၊ ဦးနု တောခိုတုန်းကရော ပြည်ပရဲ့ အထောက်အပံ့ တစုံတရာ တော်တော်များများရတယ်လို့ ကျနော်တို့ လေ့လာသိရှိရပါတယ်။ အုဒီတုန်းကတောင် ဒီစစ်အုပ်စုကို မတွန်းလှန်နိုင်ခဲ့ဘူး။ အခုအနေအထားကလည်း တခြားတိုင်းပြည်တခုခုက ခဲယမ်းအထောက်အပံ့ဆိုတာ မတွေ့ရဘူး။ ခုဟာက အလှူခံပြီးတော့ တော်လှန်နေရတာကိုး။ ဆိုတော့ အဲဒီလိုမျိုး တခြားနိုင်ငံတခုခုက လက်နက်ခဲယမ်း အထောက်အပံ့ အများအပြားမရှိဘဲနဲ့ ရေရှည်မှာ တော်လှန်အောင်ပွဲဝင်နိုင်ဖို့ဆိုတာ လက်တွေ့ကျမလား။ အဲဒါ မဖြစ်နိုင်ဘူးဆိုတဲ့ သုံးသပ်ဝေဖန်မှုတွေလည်း ရှိပါတယ်။ အဲဒီအပေါ် ဆရာ့အနေနဲ့ ဘယ်လိုသုံးသပ်ချက်ပေးချင်လဲဗျ။
ရဲဘော်ဖိုးသံချောင်း။ ။ ကျနော့်တဦးချင်း အမြင်ကတော့ အခုအခါမှာ တခြားနိုင်ငံတွေက တကယ် ထိထိရောက်ရောက် ရုပ်ဝတ္ထုအရ အားပေးတာ မရှိသေးပါဘူး။ အဲဒါ အမှန်ပါပဲ။ ဒါပေမယ့် အဲလိုမရှိဘဲနဲ့ အောင်မြင်ခဲ့တဲ့ တော်လှန်ရေးတွေ တိုက်ပွဲတွေလည်း ကျနော်တို့ တွေ့ဖူးပါတယ်။ သမိုင်းမှာ ရှိခဲ့ဖူးပါတယ်။ ရုပ်ဝတ္ထုအရ ထောက်ပံ့မှုမရှိဘဲနဲ့ သူတို့ဟာသူတို့ ပြည်သူလူထုထောက်ခံမှုချည်းနဲ့ အောင်ပွဲရခဲ့တာပါ။ အဲလိုပဲ ကျနော်တို့ ဗမာပြည်မှာလည်း ဒီနေ့ ဗမာပြည်ပြည်သူလူထုကြီးက အင်မတန် တက်ကြွပြီးတော့ အင်မတန် အမှန်ဘက်ကို မြင်နေတဲ့အခါမျိုးမှာ ကျနော်တို့ချင်း မပြိုကွဲဖို့ အင်မတန်မှ အရေးကြီးတယ်လို့ထင်ပါတယ်။ အဲဒါမှ ကျနော်တို့မျှော်မှန်းချက်တွေ အောင်မြင်နိုင်မယ်လို့ ထင်ပါတယ်ခင်ဗျ။
THN ။ ။ နောက်တခုက တော်လှန်ရေးသမိုင်းတလျှောက် အမဲစက်တွေဖြစ်ခဲ့တဲ့အရာ၊ အဲဒါကိုလည်း သိလိုပါတယ်။ ၁၉၆၇က ဆိုရင် ကွန်မြူနစ်ပါတီမှာ ပြုပြင်ပြောင်းလဲရေးတွေ ကြီးကြီးမားမား လုပ်တယ်။ အဲဒါကို မဆလ ပြောတာက ‘ဖြုတ်-ထုတ်-သတ်’လမ်းစဉ်လို့ ပြောတယ်။ နောက် ၈၈ ကျောင်းသားတွေ တောခိုတုန်းကလည်း ပါဂျောင်ကိစ္စလို လူသတ်မှုတွေ ရှိခဲ့ဖူးတယ်။ အခု နွေဦးတော်လှန်ရေးမှာလည်း အချင်းချင်း သတ်ဖြတ်မှုတွေ တွေ့နေရတယ်။ နိုင်ငံတကာအဖွဲ့အစည်းတွေကလည်း လူ့အခွင့်အရေးရှုထောင့်ကနေ ဒလန်ရှင်းလင်းရေးကိစ္စတွေကို ထောက်ပြနေတယ်။ အဲလိုမျိုး အမဲစက်တွေအပေါ် ဘယ်လိုသဘောထားမျိုး ပေးချင်လဲ။ အဲဒါတွေကို ကျော်လွှားနိုင်ဖို့ ဘာတွေလိုအပ်မယ်လို့ ဆရာပြောချင်လဲဗျ။
ရဲဘော်ဖိုးသံချောင်း။ ။ တခြားအဖွဲ့အစည်းတွေရဲ့ကိစ္စတော့ မပြောလိုပါဘူး။ ကျနော်တို့ပါတီရဲ့ကိစ္စတော့ ကျနော် အတိအကျပြောနိုင်တာရှိပါတယ်။ အဲဒါ ဘာလဲဆိုတော့ တခုက ‘ဖြုတ်-ထုတ်-သတ်’ဆိုတဲ့ အသုံးအနှုန်းကအစ အဲဒါတွေအားလုံးက စစ်အစိုးရနဲ့ သူတို့ဆီသွားပြီး တပည့်ခံတဲ့ ကျနော်တို့ဆီက လက်နက်ချတွေက ပုံကြီးချဲ့ကားပြောတဲ့၊ နိုင်ငံရေးအရေ တိုက်ခိုက်ဖို့ ထုတ်သုံးလာတဲ့ စကားလုံးတွေလို့ပဲ ကျနော် ဆိုချင်ပါတယ်။ ကျနော်တို့ပါတီကိုယ်တိုင်ကလည်း အဲဒီတုန်းက လုပ်ခဲ့တာတွေဟာ မှားတယ်ဆိုတဲ့အကြောင်း တရားဝင် ထုတ်ပြောပြီးပါပြီ။ ကျနော်တောင်မှ ကျနော်ရေးတဲ့ စာတွေထဲမှာ၊ ဆောင်းပါးတွေထဲမှာ ကျနော်နဲ့ပတ်သက်တဲ့ဟာတွေ ပါပါတယ်။ ပါတီက၊ ပါတီခေါင်းဆောင်တွေက အဲဒီကိစ္စတွေကို ကျနော်နဲ့တွေ့တွေ့ချင်း ပြောတယ်ဆိုတဲ့အကြောင်းတွေ ကျနော် ထည့်ရေးဖူးပါတယ်။ ခုလိုကာလမှာလည်းပဲ ဒီလိုဖြစ်တာဟာ တချို့ကတော့ အကြောင်းအမျိုးမျိုးရှိတယ်လို့ထင်ပါတယ်။ တခုချင်းကိုလည်း အသေးစိတ် မသိရတဲ့အတွက် သူများကို အပြစ်အလွယ်တကူမတင်လိုပါဘူး။ ကိုယ့်ဟာကိုယ်ပဲ ပြုပြင်၊ ကိုယ့်ဟာကိုယ်ပဲ နားလည်အောင် အမှန်တရားကို ဖော်ထုတ်နိုင်ကြလိမ့်မယ်လို့ မျှော်လင့်ပါတယ်။
THN ။ ။ PLA ဆိုရင် ရှမ်းမြောက်ဒေသမှာ ညီနောင် ၃ ဖွဲ့နဲ့အတူ ပူးပေါင်းပြီး တိုက်ပွဲဝင်နေတယ်လို့ သိရပါတယ်။ မိခင်အဖွဲ့အစည်းဖြစ်တဲ့ ကွန်မြူနစ်ပါတီအနေနဲ့ကရော ရှမ်းမြောက်ဒေသအဖြစ် ဒီဖက်ဒေသတွေမှာ မဟာမိတ်ဆက်ဆံရေးက ဘယ်လိုသွားဖို့ရှိလဲ။ ဥပမာ NUG နဲ့ ဆက်ဆံတာမျိုး NUCC နဲ့ ပူးပေါင်းဆော်ရွက်တာမျိုးရော ရှိလာနိုင်မလား။ ဒါမှမဟုတ် တပ်ပေါင်းစုအသွင်နဲ့ ကွန်မြူနစ်ပါတီအနေနဲ့ ဘာတွေလုပ်လာဖို့ရှိနိုင်မလဲ။
ရဲဘော်ဖိုးသံချောင်း။ ။ ပါတီအနေနဲ့ ကြိုးစားတာတော့ ရှိပါတယ်။ အမြဲတမ်း ထုတ်ပြောနေတာ ဆွေးနွေးဖို့၊ ပူးတွဲလုပ်ကိုင်ဖို့ အဆင်သင့်ပဲဆိုတာ အမြဲတမ်းပြောပါတယ်။ ဒါပေမယ့် လာဆက်တာကတော့ သူတို့လည်း သူတို့အခက်အခဲရှိပါလိမ့်မယ်။ နောက်ကြောင်းတွေ နောက်ခံတွေလည်း ရှိလိမ့်မယ်ထင်တယ်။ သူတို့ကိုလည်း ကျနော်တို့က အလွယ်တကူတော့ အပြစ်မတင်လိုပါဘူး။ နားလည်တယ်လို့ပဲ ကျနော်တို့ သဘောရပါတယ်။ သူတို့အပေါ်လည်း ကျနော်တို့က နားလည်တယ်၊ အဲလိုပဲ ကျနော်တို့အပေါ်လည်း နားလည်စေချင်တယ်။ ဘယ်လိုပဲဖြစ်ဖြစ် ဒီလိုကြားထဲကပဲ ကျနော်တို့ PLA ဟာ ဗမာပြည် အလယ်ပိုင်း၊ စစ်ကိုင်းတိုင်းတို့ဘာတို့မှာလည်း လှုပ်ရှားနေတာတွေ ရှိပါတယ်။ ဆက်လည်း သွားဦးမှာပါ။ အဲဒါကို အားလုံးက နားလည်မှုရှိရှိ ဘုံရန်သူကို တိုက်ခိုက်ရေးအတွက် လက်တွဲလုပ်ကိုင်ကြဖို့ဟာ အဓိကအကျဆုံးလို့ ထင်တာပဲ။
THN ။ ။ လက်ရှိ တော်လှန်ရေးအင်အားစုတွေအတွက် ကွန်မြူနစ်ပါတီရဲ့ သဘောထားနဲ့ သတင်းစကား ဘာများပြောပေးလိုပါသလဲ။
ရဲဘော်ဖိုးသံချောင်း။ ။ ကွန်မြူနစ်ပါတီအနေနဲ့ လက်ရှိ လက်နက်ကိုင်တော်လှန်တိုက်ပွဲဝင်နေကြတဲ့သူတွေ သူတို့ဟာ အရှိန်တခု ရလာပြီ။ ရန်သူကလည်း ပုံပျက်ပန်းပျက်ကို ဖြစ်လာနေပြီ။ အဲလိုအခြေအနေမှာ အားတက်ကြဖို့၊ ပိုပြီးအားရှိကြဖို့ အရေးကြီးတယ်။ အားတင်းမှု အားရှိမှုကို ညီညွတ်ရေးနဲ့ ပေါင်းစပ်ပြီးတော့ အင်အားကြီးထွားလာအောင် လုပ်ကြဖို့၊ ရန်သူကို အပြတ်ချေမှုန်းရေးဆီကို ဦးတည်တက်လှမ်းကြဖို့ အဲလိုပဲ တိုက်တွန်းချင်ပါတယ်ခင်ဗျ။
ကျနော်တို့ကတော့ ကျရာအခန်းက ပါဝင်ဖို့ အမြဲအသင့်ရှိတယ်ဆိုတဲ့အကြောင်းလည်း ဖော်ပြလိုပါတယ်။
THN ။ ။ ဗိုလ်ချုပ်အောင်ဆန်း စတင်ဦးဆောင်ခဲ့တဲ့၊ မြေပေါ်မှာဆို ၃ နှစ်ပဲ ဖြတ်သန်းခဲ့ရဖူးတဲ့ ဗမာပြည်ကွန်မြူနစ်ပါတီအနေနဲ့ မဝေးတော့တဲ့အချိန်မှာ မြေပေါ်ပါတီအနေနဲ့ ပြန်ပြီးရှင်သန်လာဖို့ မျှော်လင့်ထားလားဗျ။
ရဲဘော်ဖိုးသံချောင်း။ ။ ကျနော်တို့ စိတ်ကူးမယဉ်ပါဘူးခင်ဗျာ။ တိုက်ပွဲမပါဘဲနဲ့တော့ မရဘူးလို့ထင်တယ်။ စစ်အုပ်စုကို အပြုတ်မတိုက်နိုင်ဘဲနဲ့တော့ ကျနော်တို့ပါတီ မြေပေါ်ပြန်မရောက်ပါဘူး။ ကျနော်တို့လက်နက်ကို စွန့်လို့မရပါဘူး။
THN ။ ။ အခု NUCC က ချထားတဲ့ Road map လမ်းပြမြေပုံအရဆိုရင် အသွင်ကူးပြောင်းရေးကာလကို ဖြတ်ကျော်ရမယ့်အနေအထားတခု ရှိလာလိမ့်မယ်ပေါ့။ အဲလို စစ်အုပ်စုကို ဖြိုချပြီး အသွင်ကူးပြောင်းရေးကာလမှာ ကွန်မြူနစ်ပါတီအနေနဲ့ ဘယ်အခန်းကဏ္ဍမှာ ရှိနေမယ်လို့ ပြောနိုင်မလဲ။
ရဲဘော်ဖိုးသံချောင်း။ ။ စစ်အုပ်စုကို ဖြိုမယ်ဆိုတဲ့ အဓိကအကျဆုံးနဲ့ အခက်ခဲဆုံးဟာကြီးကို အရင်ကျော်လွှားဖို့ စဉ်းစားကြဖို့၊ အဲဒီအတွက် လုံးပန်းကြဖို့ တိုက်တွန်းချင်ပါတယ်။ ‘အဲဒီနောက်’ဆိုတာကို ကြိုပြောရတာ နည်းနည်း ရှက်လည်းရှက်ပါတယ် အမှန်အတိုင်းပြောရရင်။
THN ။ ။ နောက်ဆုံးမေးခွန်းအနေနဲ့ ဆရာ့မှာ ပြောချင်တာ အိုင်ဒီယာတခုခုများရှိရင် ပြောပေးပါ။
ရဲဘော်ဖိုးသံချောင်း။ ။ ထူးထူးခြားခြားတော့ ပြောစရာမရှိပါဘူး။ အခုဟာက ကျနော်တို့တတွေအနေနဲ့ လက်ဝဲ/လက်ယာ ခွဲမနေဖို့ အဲလိုစဉ်းစားမနေဖို့၊ ဗမာပြည်မှာ စစ်အုပ်စုနဲ့ စစ်အာဏာရှင်စနစ် ရှိနေသရွေ့ ဗမာပြည်ကြီးဟာ ကြာလေ ပိုပြီးဆိုးရွားလာလေ၊ အရင်ကထက် ပိုပြီးတော့ ဆင်းရဲသထက် ဆင်းရဲလာပြီး ပြည်သူလူထုဟာ ဒုက္ခတွေ ပိုပြီးနက်ရှိုင်းစွာ ကြုံရလိမ့်မယ်လို့ပဲ သတိပေးချင်ပါတယ်။ အဲဒီအတွက် ကျနော်တို့တတွေဟာ တာဝန်ရှိတဲ့လူတွေ၊ တာဝန်သိတဲ့လူတွေဖြစ်ကြောင်း ဖော်ပြကြဖို့လိုတယ်လို့ထင်ပါတယ်။ အဲဒီအတွက် ကိုယ်ကျိုးတွေ၊ စွန့်လွှတ်တန်တဲ့ဟာတွေကို စွန့်လွှတ်ပြီးတော့ ညီညွတ်ရေးတည်ဆောက်။ အဲလိုနည်းနဲ့ စစ်အစိုးရ၊ စစ်အုပ်စုကို ဖြိုချဖို့လိုတယ်လို့ထင်ပါတယ်။ ဒါပဲပြောချင်ပါတယ်။
THN ။ ။ ဟုတ်ကဲ့၊ ရဲဘော်ဖိုးသံချောင်း ကျေးဇူးအထူးတင်ပါတယ်ဗျ။
ရဲဘော်ဖိုးသံချောင်း။ ။ ကျနော်ကလည်း ကျေးဇူးတင်ပါတယ် ကိုသက်ထွေးနိုင်။