ဖောင်ပိတ်ဆောင်းပါး

ဖောင်ပိတ်ဆောင်းပါး

A.ငြိမ်း

(ဗမာပြည်ကွန်မြူနစ်ပါတီ ရဲ့ ၈၅ နှစ်မြောက် ပါတီမွေးနေ့အထိမ်းအမှတ် အရေးတော်ပုံဂျာနယ် ဖောင်ပိတ်ဆောင်းပါး)

(၁) တိုင်းပြည်နဲ့လူမျိုးမျက်နှာ အိုးမဲသုတ်သူများ

ဒီရက်ပိုင်းတွင်း မီဒီယာသတင်းတခု ကြားလိုက်မိတယ်။ ကမ္ဘာပေါ်က လူမျိုးရေးခွဲခြားမှုနဲ့အသားအရောင်ခွဲခြားတာမှာ အဆိုးဆုံး ၁၀ နိုင်ငံစာရင်းဖော်ပြခဲ့တယ်။ ဆားဗီးယား၊ ကာတာ၊ ဆော်ဒီ၊ အီရန်၊ အစ္စရေး ပြီးရင် ဗမာနိုင်ငံက နံပါတ် ၆ ချိတ်တယ်ဆိုပဲ။ ခု နောက်ဆုံး စစ်တပ်အာဏာသိမ်းပြီးတဲ့နောက် ပိုဆိုးလာတယ်လို့လည်း ထုတ်ဖော်သွားပါတယ်။

ပြည်တွင်းမှာ လူမျိုးရေးခွဲခြားမှု ခါးခါးသီးသီးခံစားနေရတဲ့ တိုင်းရင်းသားလူမျိုးစုတွေကတော့ ဒီနံပါတ်စဉ်ကို ကြိုက်ချင်မှကြိုက်ပါလိမ့်မယ်။ အလားတူ စစ်အုပ်စုရဲ့ဖိနှိပ်သတ်ဖြတ်သွေးစုပ်မှုကိုနိစ္စဓူဝခံနေရတဲ့ ဗမာလူမျိုးတွေကလည်း “စစ်အုပ်စုအဝန်းအဝိုင်းမဟုတ်ရင် တို့တတွေကိုလည်း ကျေးကျွန်တွေလိုသဘောထားပြီး ဒီပေါ်လစီကျင့်သုံးခဲ့တာပါလို့ ပြောမယ်ထင်တယ်။

တိုင်းရင်းသားလူမျိုးစုတွေကို မင်းတို့တတွေ ငါတို့နဲ့ပေါင်းမလား၊ တို့ခိုင်းတာ လုပ်မလား၊ မပေါင်းဘူး မလုပ်ဘူးဆိုရင် မင်းတို့လူမျိုးတွေကို ဗုံးကြဲမယ်၊ စက်သေနတ်နဲ့ ပစ်မယ်၊ လက်နက်ကြီးနဲ့ထုမယ်လို့ ခြိမ်းခြောက်ထားပြီး တကယ်လည်း လုပ်ပါတယ်။ ရှေ့မှာဖော်ပြတဲ့ ၅ နိုင်ငံက ကိုယ့်လူမျိုးကိုယ်သတ်တာ မဟုတ်ဘူး၊ ဒီကကောင်တွေက လုပ်ကြတယ်။ ဒီသတ္တဝါတွေဟာ အာဏာကလွဲပြီး ဘာမှဂရုစိုက်တာမဟုတ်ဘူး။ သူတို့ကို အယုတ်ညံ့ဆုံးတိရစ္ဆာန်တွေနဲ့ နှိုင်းရင်တောင် ဒီတိရစ္ဆာန်တွေပဲ သိက္ခာကျသွားနိုင်တယ်လို့ ဆိုပါရစေ။

(၂) ကစ်တီဘသန်းခေါ် ဒေါ်ခင်မေသန်းရဲ့ အဆိုအမိန့်

ဗမာ့နိုင်ငံရေးမှာ သတိထားရမယ့်သား ၃ သား ရှိတယ်။ (၁) ကျောင်းသား (၂) ဘုရားသား (ဘုန်းကြီး) (၃) စစ်သားတို့ ဖြစ်တယ်။ သူတို့ကို လွှတ်ထားလို့မဖြစ်။ မျက်စိဒေါက်ထောက် ကြည့်နေရမယ်လို့ ဗိုလ်နေဝင်းကတော် ကစ်တီ ဘသန်း(ခေါ်) ဒေါ်ခင်မေသန်းက ပြောဖူးတယ်။ သူ့ကိုယ်တွေ့တွေနဲ့ သမိုင်းကို နိဂုံးချုပ်ထားပုံပဲ။

ဒီနေ့လက်တွေ့နိုင်ငံရေးခွင်မှာ ထင်ဟပ်ကြည့်တော့ အမှန်ပဲ ကျောင်းသားဟာ သူတို့ကို ဒုက္ခအပေးဆုံးဖြစ်နေတယ်။

သူတို့မျက်ဖြူဆိုက်လောက်အောင် အကျပ်အတည်းတွေ့ခဲ့တဲ့အရေးအခင်းကြီးတွေ မြစ်ဖျားခံရာထိပ်မှာ ကျောင်းသားတွေရှိနေတာ သတိထားမိကြတယ်။ ဟုတ်တယ်။ ပြည်သူတွေ ဒုက္ခရောက်ပြီဆိုရင် (အလုပ်သမား၊ လယ်သမား၊ လူလတ်တန်းစားတွေရဲ့သားသမီးတွေ အများစုဖြစ်တဲ့) ကျောင်းသားတွေ ရှေ့ဆုံးက စဆူခဲ့တာပဲ မဟုတ်လား။

ဘုန်းတော်ကြီးများကိုလည်း သူတို့ကြောက်မယ်ဆို ကြောက်လောက်တယ်။ ဒကာ ဒါယိကာမ ပြည်သူတွေနဲ့အတူ ကိုယ်တော်တွေ ရှိကြတယ်။ စစ် ၃ စစ် ဆန့်ကျင်ရာမှာ သံဃာတော်တွေ နောက်မကျခဲ့။ ဒါ့ကြောင့်လည်း အရေးအခင်းတော်တော်များများမှာ ဆရာတော်တွေ အဖမ်းခံအသတ်ခံခဲ့ကြရတယ်။ ခုအထိ ထောင်ထဲမှာ သံဃာတော်တွေ အများကြီးရှိသေးတယ်။

စစ်သားဆိုတာ နေ့ရောညပါ သူတို့နားမှာရှိတယ်။ အနီးကပ်မောင်းဖြုတ်နိုင်သူတွေ။ ဒါ့ကြောင့်လည်း တသွေး၊ တသံ၊ တမိန့်နဲ့ ပိနေအောင် အဖိခံနေကြရတယ်။ အမျိုးဘာသာ သာသနာနဲ့ မှိုင်းတိုက်ခြင်းကိုလည်း ခံနေရတယ်။ အထက်ကို ကာပြန်တဲ့ကိစ္စမှတပါး လုပ်ပိုင်ခွင့်လေးတွေပေးထားတယ်။ ပြည်သူကို ရန်သူအဖြစ်ကြေညာရတဲ့ မင်းအောင်လှိုင်ခေတ်ရောက်တော့ လုယက်၊ ခိုးဆိုး၊ ဓားပြတိုက်ခွင့်အပြင် လူသတ်လိုင်စင်တောင် ထုတ်ပေးခံနေကြရတဲ့ လူတန်းစားတရပ် ဖြစ်လာတယ်။

ဒါပေမဲ့ သူတို့ထဲမှာလည်း ဒါတွေကို ဘယ်သူ့အတွက် လုပ်နေကြရသလဲ? သဘောပေါက်သူတွေ ရှိလာတယ်။ ခုတော့ အမိန့်မနာခံမှု ဖြစ်သူဖြစ်၊ CDM လုပ်သူလုပ်၊ အစုလိုက်အပြုံလိုက်လက်နက်ချသူတွေချ ဖြစ်လာကြပြီ။ ဒါပေမဲ့ သူတို့သမိုင်း သိပ်မတောက်ပြောင်သေး။

မနေ့တနေ့ကပဲ ဘင်္ဂလားဒေ့ရှ်မှာ ရွေးကောက်ပွဲ ၃ ခါနိုင် ဝန်ကြီးချုပ် ရှိတ်ဟာစီနာ နိုင်ငံကထွက်ပြေးပြီး အိန္ဒိယမှာ ခိုလှုံလိုက်ရတယ်။ ၁၅ နှစ်လုံးလုံး တိုင်းပြည်ကို ငြိမ်နေအောင်အုပ်ချုပ်နေရာက (ဗမာပြည် နှစ်သီးစား စစ်အရာရှိ မိုးကျရွှေကိုယ်များလို) အလုပ်အကိုင် ရာထူးခန့်ထားရေးမှာ သူ့ရဲ့အထူးအခွင့်အရေးများပေးနေမှုကို မကျေနပ်ရာမှ ကျောင်းသားတွေဆန္ဒပြတော့ မာန်မာနထောင်လွှားပြီး ပစ်သတ်ခိုင်းလို့ ပြည်သူကျောင်းသား သုံးရာကျော် လေးရာခန့် သေဆုံးခဲ့ရတယ်။ တိုင်းပြည်ကို ထိန်းမရတော့ဘူး။ ဒါ့ကြောင့် ပြေးရတာ။

ကဲ မာရဝိဇယဘုရား ဒါယကာကြီး မင်းအောင်လှိုင် သင့်မှာ ခြေဖျားထောက်စရာဆိုလို့ ဘာမှမရှိ။ ဘုရားဖက်တော့ အသက်ရှည်၊ တရားဖက်တော့အမျက်ပြေ ဆိုရိုးစကားတခုမှ မလိုက်နာ။ လောဘနဲ့ မောဟပဲ ဖက်တွယ်နေတော့ ခု အခက်ပွေနေပြီ မဟုတ်လား။

(၃) တုတ်၊ ဓား၊ လက်နက်နဲ့ မသေနိုင်သော မင်းအောင်လှိုင်

မင်းအောင်လှိုင်တယောက် အာဏာလောဘ၊ ဘွဲ့ထူးဂုဏ်ထူးလောဘ၊ စည်းစိမ်ချမ်းသာလောဘတွေကနေ မောဟကောင်ကြီးဖြစ်နေတာ ကြာပါပြီ။ ပီပီပြင်ပြင်ဖြစ်နေတာက အနည်းဆုံး ၃-၄ နှစ်လောက် ရှိရောပေါ့။ အာဏာကိုင်ထားရင် ဘာမဆိုလုပ်လို့ရတယ်ထင်ပြီး ကျုပ် ဘာမဆိုလုပ်ရဲတယ်’ လို့ ကြွေးကြော်ထားတဲ့ မင်းအောင်လှိုင်- ဒီရက်ပိုင်းအတွင်း မင်းအောင်လှိုင်တယောက် တန်ပြန်အာဏာသိမ်းခံရတဲ့သတင်း အမျိုးမျိုးကြားထားရတဲ့ ပြည်သူတွေက ဝမ်ယိကိုတော့ ထွက်တွေ့နိုင်မှာမဟုတ်တော့ဘူးလို့ ထင်ခဲ့ကြတယ်။ ဒါပေမဲ့တွေ့ဖြစ်သွားကြပါပြီ။ ဒါ့မတိုင်မီ သူ့မကျေနပ်ချက်တွေကို မျက်စိကန်းတစ္ဆေမကြောက် ဂျိုးပြောမိုးပြော ပြောထားလေတော့ ကျားနဲ့ဆင် လယ်ပြင်မှာတွေ့ကြပြီပေါ့။ ဒါပေမဲ့ ဘာပြဿနာမှမထွက်။ ဘယ်လိုဖြစ်တာလဲ။ မိမိတဦးချင်းအမြင်အရ မင်းအောင်လှိုင် ထွက်ပေါက်တွေ့သွားပြီလို့မမြင်။ ဝမ်ယိက ထွက်ပေါက်ပေးသွားတာ (တနည်း) လွတ်ငြိမ်းချမ်းသာခွင့်ပေးသွားတာလို့မြင်တယ်။ တရုတ်က သူတို့ဖြစ်စေချင်တဲ့ပုံစံကို လူသိရှင်ကြား ကြေညာထားတာပဲ။ ခုလည်း အဲဒါကို ချိုးဖောက် လုပ်သွားတာ မတွေ့ရသေး။ ခုစဉ်းစားနေမိတာက သူ့ဘက်ကိုယ့်ဘက် ပြောပြောနေကြတဲ့ ‘ကြားဖြတ်အစိုးရတရပ်’ ပေါ်လာခဲ့သော် မင်းအောင်လှိုင်ပါဖို့ရှိသလား။ ဘယ်လိုကြားဖြတ်အစိုးရလဲ။ စစ်အုပ်စုလူဟောင်းတချို့ပါတဲ့ အစိုးရ၊ ဒေါ်စုဦးဆောင်ပါဝင်တဲ့ အစိုးရ၊ ဒေါ်စုနဲ့ စစ်ဘက်ပေါင်းစပ်ထားတဲ့ အစိုးရ… စသည့်လေသံ ပစ်နေကြတဲ့ ပုံစံတွေဖြစ်တယ်။ ဘယ်လိုအပြောင်းအလဲပဲလုပ်လုပ် ၂၀၀၈ ခြေဥနဲ့ စစ်အာဏာရှင်စနစ် (စစ်သုံးစစ်) ဖျက်သိမ်းရေးကနေ အစချီရပါမယ်။ နွေဦးတော်လှန်ရေးရဲ့ကြွေးကြော်သံက ဖက်ဆစ်စစ်တပ်အမြစ်ဖြတ်ရေး ဖြစ်ပါတယ်။

ခု-ပြောချင်တာက မင်းအောင်လှိုင် ဘာဖြစ်သွားမလဲ? ဆိုတာပဲ။ သူ့တပည့် ဇော်မင်းထွန်းကတော့ သူ့ဆရာ မင်းအောင်လှိုင်ဟာ ( သတ္တန္တရကပ်ကျော်နင်းပြီး) တုတ်၊ ဓား၊ လက်နက်ကြောင့် မသေနိုင်တဲ့အာဏာရှင်ဖြစ်ကြောင်း ဗေဒင်ဆရာဟောထားတယ်လို့ အခိုင်အမာဆိုတယ်။ လူမသေဘဲ နာမည်သေနေတာ သူထည့်မတွက်။ ဗမာပြည် အနီးကပ်နိုင်ငံရေးသမိုင်းမှာ ဘုန်းမီးနေလတောက်ခဲ့တဲ့ စစ်အာဏာရှင်တချို့ ရှိခဲ့တယ်။ လူတွေ ဖိန့်ဖိန့်တုန် ကြောက်ခဲ့ရတယ်။ နေဝင်းခေတ်မှာ နေဝင်း၊ မျက်မှန်တင်ဦး၊ ပြီးတော့ သန်းရွှေ၊ နောက် ခင်ညွန့်၊ ခု မင်းအောင်လှိုင်၊ သူတို့ဇာတ်သိမ်း မကောင်းကြဘူး။ မင်းအောင်လှိုင်ကိုတော့ သီးခြားထုတ်ပြီးမှတ်ချက်ပြုလိုတာက ” ဇာတ်သိမ်းကောင်းမယ့်ပုံ မရှိဘူး” ဆိုတာပဲ။ အချိန်တိုအတွင်း မြင်ကြရမှာပါ။ စိတ်ဝင်စားစရာတော့ အကောင်းသား-

မင်းအောင်လှိုင်ရဲ့တပ်ကို ကမ္ဘာမှာ Standard Army အဆင့် ၃၆ လို့ ဖော်ပြထားတာ ရှိတယ်။ ဘယ်ပေတံတွေနဲ့တိုင်းပြီး ပေးကြသလဲမသိ။ ကျွန်တော်တို့မြင်ရတာက ပခုံးပေါ်ကအပွင့်တွေ လိုင်းတွေ ရင်ဘတ်ပေါ်က ရောင်စုံတံဆိပ်တွေနဲ့ အော့နှလုံးနာဖွယ်ပုံတွေပဲမြင်ပြီး အော့နှလုံးနာဖွယ် (Smart Army)စမတ်အာမီလို့ပဲ အမည်ပေးချင်တယ်။ ဘာပဲဖြစ်ဖြစ် ဒီစမတ်အာမီပေါ်က ခံစားခွင့်တွေကြောင့် ချမ်းသာကြွယ်ဝမှုမှာ နိုင်ငံတကာတပ်တွေထဲက သူနဲ့အဆင့်တူ ပုဂ္ဂိုလ်တွေနဲ့ယှဉ်ရင် မင်းအောင်လှိုင်ဟာ Top Ten ထဲ ပါနေလောက်ပြီ။ ဒါပေမဲ့ တိုင်းပြည်ကတော့ ဘက်စုံနိမ့်ဆင်းသွားလိုက်တာ အာဆီယံမှာတောင် ဓားမနောက်ပိတ်ခွေး ဖြစ်နေပါပြီ။ သူ့ဆီရှိနေတဲ့ အရည်အချင်းဆိုလို့ ညစ်နည်းမျိုးစုံနဲ့ ထွက်လမ်းရှာတတ်တာ ဖြစ်တယ်။ ဒါ့ကြောင့်လဲ သူ့ကို လက်မလွှတ်နိုင် ဆက်သွယ်နေရတဲ့ သူတချို့ကို ပြောလိုတယ်။ ခင်ဗျားတို့အနေနဲ့ “မျောက်ကိုချစ်ငြား ချူဆွဲမှားသို့၊ နားမချမ်းသာ ရှိတို့ရာ၏” ဆိုရိုးစကားကို သတိချပ်ကြစေလိုတယ်။ ဒါ့အပြင် ဒီမျောက်က မီးတုတ်ကိုဆွဲပြီး အိမ်ခေါင်ပေါ်တက် လမ်းသလားနေတဲ့အဆင့်ရောက်နေပြီ။ အကျိုးဆက်ဘာဖြစ်မယ်ဆိုတာ ခင်ဗျားတို့ စဉ်းစားမှ ဖြစ်မယ်။ ဖျက်ဆီးအားကတော့ ပြင်းလိမ့်မယ်။ ဒါက နိုင်ငံတကာဆက်ဆံရေးအပိုင်း။ ပြည်တွင်းဘက်စုံဖျက်ဆီးမှုတွေထဲမှာ ရိုးရာအမွေအနှစ်တွေ ကုန်သလောက်ရှိခဲ့ပြီ။ (အရှက်အကြောက်ကြီးသောလူမျိုး – သို့သော် မာနကြီးသောလူမျိုး၊ ကူညီရိုင်းပင်းလိုသောလူမျိုး၊ ပေးကမ်းစွန့်ကြဲ ရက်ရောသောလူမျိုးများ နေထိုင်ရာတိုင်းပြည်) လို့ ကင်ပွန်းတပ်ခံထားရတဲ့ မိမိတို့နိုင်ငံ။ ခုဘာတွေဖြစ်နေသလဲ။ အားလုံးခံစားမိကြမှာပါ။ စမတ်အာမီခေတ် ဗမာပြည်ရဲယဉ်ကျေးမှုက ဝါးမျိုပစ်လိုက်ပါပြီ။ သူ့ဘက် ကိုယ့်ဘက် ပျစ်ပျစ်နှစ်နှစ် ဆဲသံကလော်တုတ်သံတွေ မီဒီယာလောကမှာ ပျံ့နှံ့ချင်တိုင်းပျံ့နှံ့နေခဲ့ပါပြီ။ ပိုဆိုးတာက ဆယ်ကျော်သက်တွေအပါအဝင် အမျိုးသမီးကြီးငယ်များကတောင် မကြားဝံ့မနာသာ စကားတွေကို အရှက်မရှိ ပြောနေကြတဲ့အဆင့် ရောက်ကုန်ပါပြီ။ ရဲဘော်ဦးတင် (ဗိုလ်ချုပ်ကျော်ဇော) နဝတ ခေတ်မှာ ကျွန်တော်တို့ကို ပြောခဲ့ဖူးတယ်။ “တိုင်းပြည်လွတ်မြောက်သွားတောင် ဒီကောင်တွေ ဖျက်ဆီးသွားလို့ တိုင်းပြည်ကိုပြန်လည်တည်ဆောက်ကြတဲ့အခါ အချိန်အများကြီး ယူကြရတော့မယ်။ အထူးသဖြင့် လူတွေရဲ့စိတ်ဓာတ်အမူအကျင့်တွေပဲ” တဲ့။ တို့မအုပ်ချုပ်ရရင် မင်းတို့အုပ်ချုပ်မရအောင် တိုင်းပြည်ကိုဖျက်ဆီးပစ်ခဲ့မယ်လို့ အောက်တန်းကျကျပြောနေတဲ့ Smart Army ကြီးခေတ်ကိုသာ မီလိုက်ရင် ရဲဘော်ဦးတင် ဘယ်လိုများ မှတ်ချက်ပြုလေမလဲ သိချင်စမ်းပါဘိ။

နိဂုံး

ဒီဖောင်ပိတ်ဆောင်းပါးရဲ့ရှေ့အပိုင်းတွေမှာ တိုင်းပြည်ရဲ့အနိဋ္ဌာရုံတွေနဲ့ ပြည်သူတွေရဲ့ အတိဒုက္ခတွေဖော်ပြပြီး လက်သည်တရားခံဟာဘယ်သူလဲဆိုတာ တို့ထိရေးထားပါတယ်။ ဒီတော့ ပါတီရဲ့ ၈၅ နှစ်မြောက်မွေးနေ့အခါသမယမှာ အားတက်စရာတွေနဲ့ ဖွံ့ဖြိုးတိုးတက်မှုတွေကော မရှိဘူးလား မေးစရာဖြစ်လာတယ်။ ရှိပါတယ်။ ခု-ရှိတဲ့အကြောင်း တိုနိုင်သမျှအတိုချုံးပြီး နိဂုံးအဖြစ် ဖော်ပြလိုက်ပါတယ်။

(၁) ၈၅ နှစ်မြောက် ပါတီမွေးနေ့အချိန်မှာ ဗမာပြည်ကွန်မြူနစ်ပါတီကို ထီးထီးမတ်မတ် ရပ်တည်နေထိုင်ဆဲပါတီအဖြစ် မြင်နိုင်တယ်။ ဖိနှိပ်အုပ်စိုးသူတွေက လက်နက်နဲ့အကြမ်းဖက်လာတဲ့အခါ လက်နက်နဲ့ ပြန်လည်တုံ့ပြန်နိုင်စွမ်းရှိတဲ့ပါတီ၊ မာ့က်စ်လီနင်ဝါဒအမြင်ကို လက်တွေ့နဲ့ပြခဲ့တဲ့ပါတီဖြစ်တယ်။ (လက်နက်ကိုင်တိုက်ပွဲသာ မဆင်နွှဲခဲ့ရင် ဗမာပြည်ကွန်မြူနစ်ပါတီ ဘယ်ရောက်နေမလဲ တွေးကြည့်ပါ။)

(၂) လက်နက်အရာမှာ ဘက်ပေါင်းစုံသာလွန်ပြီး ဆယ်စုနှစ် ၆ ခုလောက် အပေါ်စီးကနေခဲ့တဲ့စစ်တပ်ဟာ စိတ်ဓာတ်တွေ ဒလဟော ကျနေတယ်။ တဖက်မှာ အဖိနှိပ်ခံပြည်သူတွေ မကြုံဖူးအောင် အားတက်ရွှင်လန်းနေကြတယ်။

(၃) တပြည်လုံးရှိ တိုင်းရင်းသားပြည်သူတွေ နိုးကြားတက်ကြွမှု အမြင့်ဆုံးအဆင့် ရောက်နေတယ်။

(၄) စကစ ခေတ် ၃ နှစ်ကျော် ၄ နှစ် အချိန်တိုအတွင်း လူငယ်တွေဟာ စစ်ရေးစစ်ရာဘက်မှာ လူလားမြောက်လာခဲ့ကြပြီ။ စည်းရုံးရေးဘက်မှာ အခြေခံလူတန်းစား (အထူးသဖြင့် ကျေးလက်လယ်သမားနဲ့ လူမျိုးစု) တွေကြား တိုးဝှေ့နေရာယူလာနိုင်ကြပြီ။

(၅) အုပ်စိုးသူ စစ်အုပ်စုအပေါ် အထင်ကြီးခဲ့တဲ့ သူ့သာပေါင်းညာစားတွေကပင် အွန်လိုင်းကနေ ပေါ်ပေါ်ထင်ထင် ဆဲရဲလာကြပြီ။ ပြောချင်တာက ရန်သူစစ်အစိုးရဆိုတာ လူမလေးခွေးမခန့်တဲ့ အစိုးရ ဖြစ်နေပြီ။

(၆) ဒီကာလမှာ ရေးစရာတွေ မှတ်တမ်းတင်စရာတွေ တပုံတထွေးကြီး ဖြစ်ပေါ်နေတယ်။ သမိုင်းမှာ ကြီးကျယ်ခမ်းနားတဲ့ ဖြစ်စဉ်တွေ ပေါ်ထွန်းနေတယ်။

(၇) ဒါကြောင့် ချုပ်ရရင် ဒီခေတ်မှာ လူဖြစ်တာ လူဖြစ်ကျိုးနပ်တယ်။ ဒါ့အပြင် တော်လှန်ရေးလုပ်ငန်းခွင်တွေမှာ တာဝန်ထမ်းဆောင်ခွင့်ရတဲ့ ကျွန်တော်တို့တတွေဟာ အင်မတန်ကံကောင်းတဲ့လူသားတွေ ဖြစ်တယ်။ ကိုယ်ကိုယ်ကိုယ် တန်ဖိုးထားနိုင်ကြပါစေလို့ စကားမွန်ဆိုပါရစေ။

လေးစားစွာဖြင့်

၁၅-၈-၂၀၂၄