ပါတီရဲ့မျိုးဆက်ပြဿနာကိုဂရုစိုက်ကာကွယ်ကြ
ရဲဘော်အောင်ချစ်
(ဗမာပြည်ကွန်မြူနစ်ပါတီ ၈၅ နှစ်မြောက် ပါတီမွေးနေ့အထိမ်းအမှတ် အရေးတော်ပုံဂျာနယ်မှာ ထည့်သွင်းဖော်ပြမယ့်ဆောင်းပါး)
၁။ ပါတီရဲ့ဘဝမှာ ၁၉၃၉ ခုနှစ်ပါတီဖွဲ့ပြီးနောက် ဖက်ဆစ်ဂျပန်ကို လက်နက်ကိုင်ဆန့် ကျင်တော်လှန်ခဲ့ရလို့ ရဲဘော်အများအပြားကျဆုံးခဲ့ရသလို ကေဒါတချို့လည်း ထိခိုက်ဆုံးရှုံးမှုရှိခဲ့ရပါတယ်။
၂။ လွတ်လပ်ရေးရပြီးခေတ်နောက်ပိုင်းမှာ ဒေသအတော်များများမှာ စည်းရုံးစုစည်းနိုင်ခဲ့ပေမယ့်၁၉၅၅ ရန်သူနဲ့စေ့စပ်ရေးလမ်းစဉ်ကြောင့် အိမ်ပြန်တဲ့အောက်ခြေရဲဘော်တွနဲ့အတူ ကေဒါတွေလည်း ပါသွားပါတယ်။
၃။ ၁၉၇၀ ခုနှစ်ကျော်ကာလ ရဲဘော်သခင်သန်းထွန်း၊ ရဲဘော်သခင်ဇင်၊ ရဲဘော်သခင်ချစ်တို့လက်ထက်မှာလည်း ၁၉၆၇ လက်ဝဲလမ်းစဉ်အမှားကြောင့် ကေဒါတချို့ဆုံးရှုံးကြရပြန်ပါတယ်။
၄။ ၁၉၈၀ ကျော်ကာလတွေရောက်ပြန်တော့ ကွန်မြူနစ်တွေပြောပြောနေတဲ့ ပြည်သူ့ဒီမိုကရေစီတော်လှန်ရေးမဟုတ်ဘဲ အရင်းရှင်ဒီမိုကရေစီလှိုင်းတွေ၊ လူ့အခွင့်အရေးလှိုင်းတွေ၊ လစ်ဘရယ်လှိုင်းတွေ တက်လာကြပြန်တော့၊ အဲဒီလှိုင်းတွေထဲမှာလည်း ပါတီက လူးလူးလိမ့်လိမ့်ဖြစ်နေတုန်း၊ ပါတီက ခွဲထွက်ကြတဲ့ရဲဘော်တွေထဲမှာ ကေဒါတချို့လည်း ပါသွားခဲ့ပါတယ်။ (၁၉၉၀ခုနှစ်)
၅။ တော်လှန်ရေး အတက်အကျရှိသော်လည်း၊ ကေဒါတချို့ဆုံးရှုံးခဲ့ရတာရှိခဲ့သော်လည်း ပါတီဟာ ဘယ်တုန်းကမှ မျိုးဆက်မပြတ်ခဲ့ပါဘူး။ တဗိုလ်ကျတဗိုလ်တက် ခရီးဆက်ခဲ့တာပါ။ ပါတီ ၈၅ နှစ်သမိုင်းမှာ ကွန်ဂရက်က ၃ ကြိမ်ပဲ လုပ်နိုင်ခဲ့တာပါ။ ပါတီနဲ့တော်လှန်ရေးရှိနေသမျှ မျိုးဆက်မပြတ်နိုင်ပါဘူး။ ရှေ့မျိုးဆက် နောက်မျိုးဆက်ကို တော်လှန်ရေးခယောင်းလမ်းမှာ လျှောက်လှမ်းရင်းပဲ တာဝန်လွှဲရတာပါ။ ပုဒ်မ ၃၃ အရ ထူးခြားတဲ့အခြေအနေအရ CPB ရဲ့ တာဝန်ကို ရဲဘော်ထွန်းကိုလွှဲပေးပြီး ပါတီရှင်သန်ရေးလုပ်ရတာ ဗမာပြည်ရဲ့ထူးခြားချက်ပါ။ အရှေ့တောင်အာရှမှာ တခြားကွန်မြူနစ်ပါတီတချို့ နာလန်မထူနိုင်အောင်ဖြစ်သွားရချိန်မှာ CPB အနေနဲ့ ပြန်ပေါ်လာနိုင်တာဟာ မျိုးဆက်မပြတ်လို့ပါ။
လှေခွက်ချည့်ကျန်အလံမလှဲတဲ့ ရဲဘော်ထွန်းဟာ ကျန်ခဲ့တဲ့ပါတီဝင်ရဲဘော်တွေကိုစုစည်းပြီး မဟာမိတ်တပ်ဖွဲ့တွေရှိရာကိုလွှတ်သင့်တာလွှတ်၊ မြေအောက်လွှတ်သင့်တာလွှတ်၊ နိုင်ငံခြားလွှတ်သင့်တာလွှတ်ပြီး ကေဒါရဲဘော်တွေကိုထိန်းသိမ်းတာဝန်ပေးခဲ့ပါတယ်။မြေအောက်မှာ ပါတီဝင်တွေသိမ်းသွင်းဖို့၊ ဖြစ်နိုင်ရင်တပ်ဖွဲ့ဖို့၊ တပ်ဖွဲ့နာမည်ကိုပြည်သူ့လွတ်မြောက်ရေးတပ်မတော်လို့ အမည်ပေးဖို့လည်း မှာကြားခဲ့ပါတယ်။
အခုပါတီဗဟိုဟာ အဲဒီရဲဘော်တွေနဲ့ လည်ပတ်နေတာဖြစ်ပါတယ်။
ပြည်သူ့လွတ်မြောက်ရေးတပ်မတော်ဟာ ပါတီဝင်ဆယ်အချို့နဲ့ စတင်ရုန်းကန်လှုပ်ရှားခဲ့၊ ဖွဲ့စည်းတည်ထောင်ခဲ့ရပြီး၊ အခုဆိုရင်စစ်ဒေသများတိုးချဲ့ကာ အင်အားများစွာ တိုးပွားလာနေပြီဖြစ်ပါတယ်။
၆။ ပါတီဗဟို နောက်ဆုံးနေခဲ့ရတာဟာ ပန်ဝါဒေသ(၁၀၁စစ်ဒေသ)ဖြစ်ပြီး၊ ဆခုန်တိန်ယင်း ရန်သူနဲ့စေ့စ့ပ်ခါနီးမှာ အလျင်အမြန်ဆုတ်ခွာနိုင်ခဲ့လို့ ခေါင်းဆောင်ရဲဘော်တွေ ရန်သူ့ထံ ရောင်းစားမခံခဲ့ရခြင်းပါတယ်။
ခေါင်းဆောင်ရဲဘော်တွေအားလုံး ဒေသကထွက်ခွာပြီးတဲ့အချိန်၊ ဒီမိုကရေစီပြည်ချစ်တပ်မတော်က ကေဒါအချို့တို့ကိုလည်း မြေအောက်ကိုပို့၊ မဟာမိတ်တွေဆီ ပို့ပြီးတဲ့အချိန်၊ နောက်ဆုံးကျန်နေတဲ့ ၂၀၂ စစ်ဒေသကိုပြန်ဆင်းမယ့် အဲဒီဒေသက ရဲဘော်တွေကို ရဲဘော်ထွန်းကညကြီးမင်းကြီး နှုတ်ဆက်စကားပြောခဲ့ပါတယ်။ မနက်ဖြန်တပ်က ထွက်ရတော့မှာပါ။ အဲဒီဒေသဟာ လတ်တလော ရဲဘော်ထွန်းအားကိုးအားထားပြုနေတဲ့ဒေသပါ။ လက်နက်လည်းကိုင်ထားနိုင်ပါသေးတယ်။ အဲဒီဒေသကပြည်သူတွေဟာ ပါတီကိုချစ်မြတ်နိုးတဲ့ပြည်သူတွေပါ။ မိုးမိတ်ဒေသကပြည်သူတွေပေါ့။
ရဲဘော်ထွန်းပြောခဲ့တာအားလုံးကို အမှတ်မရတော့ပေမယ့် အဓိကကျတဲ့- စကားက(ကျွန်တော်တို့မျိုးဆက်က ခင်ဗျားတို့မျိုးဆက်ကို ပါတီအလံလွှဲအပ်ခါနီးနေပါပြီ။ ပါတီအလံကိုမြေဝယ်မကျဖို့နဲ့ လေပေါ်မှာလွင့်ပျံနေဖို့ကတော့ ရဲဘော်တို့တာဝန်ပါပဲ)တဲ့။
၇။ အခုနှစ်ပေါင်း၃၀ကြာလာတော့လည်း ကျွန်တော်တို့မျိုးဆက်က ရဲဘော်ထွန်းပြောသလို ပြန်ပြောရမယ့်အချိန်ရောက်နေပြီလားလို့စဉ်းစားမိပါတယ်။
၈။ အထက်က ကျွန်တော်ပြောခဲ့သလို ပါတီရဲ့လမ်းစဉ်မှားခဲ့တဲ့နှစ်ကာလတွေမှာ ကေဒါမျိုးဆက်ထဲက ကေဒါတချို့ နစ်နာဆုံးရှုံးခဲ့ရလို့ ပါတီအင်အားကြီးထွားရေးလည်း ထိခိုက်နစ်နာခဲ့ရတာ သင်ခန်းစာယူရမှာပါပဲ။
၉။ အခုတကြိမ် ပြာပုံထဲကပြန်ထလာတဲ့ ပါတီနဲ့အတူတိုက်ပွဲဝင်နေတဲ့ရဲဘော်တို့လက်ထက်မှာ ပြီးခဲ့တဲ့အမှားတွေကိုပြန်မဖြစ်အောင်နိဂုံးချုပ်ပြီး၊ နေ့စဉ် မိမိကိုယ်ကိုယ်ဝေဖန်ရေးလုပ်ကာ ယခုရှိနေတဲ့ ကေဒါရဲဘော်တွေကို စည်းရုံးရေးအရလျော့နည်းမသွားအောင်နဲ့ တိုးပွားလာအောင်ကြိုးပမ်းအားထုတ်ကြစေလိုပါတယ်။
နောက်မျိုးဆက်အနေနဲ့ ကေဒါပြဿနာတွေကို ဖြေရှင်းကျော်နင်းသွားနိုင်ကြဖို့ကိုလည်း မျှော်လင့်မိပါတယ်။
၁၀။ပြည်သူ့ဒီမိုကရေစီလက်နက်ကိုင်တော်လှန်ရေးကို ဆုံးခန်းတိုင်အောင်ဆင်နွှဲကြ၊
ရဲဘော်အောင်ချစ်