နိုင်ငံတကာ မာ့က်စ်ဝါဒီတွေပြောတဲ့ ပြောက်ကျားစစ်(ဒုတိယပိုင်း)ထွန်းဇင်အောင်
ပြောက်ကျားစစ် နည်းပရိယာယ်တွေအခြေခံ ပြောက်ကျားနည်းပရိယာယ်တွေထဲမှာ ရှေးအကျဆုံး ဖော်ထုတ်မှုကို ဆွန်ဇုရဲ့ ‘စစ်ပညာ’ ကျမ်းမှာ တွေ့နိုင်တယ်။ ပြောက်ကျားစစ် နည်းပရိယာယ်တွေက ရန်သူကို တပ်ကထွက်ပြေးစေတာ၊ ဘက်ပြောင်းစေတာ၊ ကြောက်ဒူးတုန်စေတာ၊ တပ်မှူးတပ်သားတွေကြားမှာ နိုင်ငံရေးနဲ့လူမှုရေးအရ ဖိအားပေးမှုတွေဖြစ်စေတာ စတာတွေနဲ့ ရန်သူကိုတိုက်ခိုက်တာဖြစ်တဲ့ အဓိကအားဖြင့် မရပ်မနားတမ်း စိတ်ဓာတ်ရေးရာနှောင့်ယှက်မှုကို အားထားတယ်။ ရန်သူ့အရင်းအမြစ်တွေ မနိုင်ဝန်ထမ်းရတဲ့အဖြစ်ကိုရောက်သွားဖို့ရည်ရွယ်တဲ့ အလွန်အနုစိတ်၊ ပျော့ပျောင်းပြီး ဖြတ်ထိုးဉာဏ်နဲ့တီထွင်ကြံဆတဲ့ နည်းပရိယာယ်တွေသုံးကာ အောင်ပွဲရစေတာ ဖြစ်တယ်။
ပြောက်ကျားစစ်နဲ့ အချိန်ဆွဲထားတာဟာ ရန်သူကိုရင်ဆိုင်ဖို့ သမားရိုးကျတပ်မတော်တရပ် ပေါ်ထွက်လာရေးအတွက် သို့မဟုတ် ရန်သူကို စိတ်ဓာတ်ရေးရာအရသွေးခွဲပြီးအနိုင်ယူဖို့ အရေးပါနိုင်တယ်။ အဓိကကတော့ အထက်မှာဖော်ပြခဲ့တဲ့အတိုင်း ပြောက်ကျားနည်းပရိယာယ်တွေက ရှင်သန်ရပ်တည်ရေးနဲ့ အောင်ပွဲရယူရေးမူတွေကိုဆုပ်ကိုင်ထားဖို့ ဖြစ်တယ်။
အကြမ်းဖက်ခြိမ်းခြောက်မှုဆန့်ကျင်ရေး
ပြောက်ကျားစစ်က အကြမ်းဖက်ခြိမ်းခြောက်မှုနဲ့ လုံးဝဆန့်ကျင်ဘက် ဖြစ်တယ်။ ဒါပေမဲ့ အကျင့်ပျက် စည်းမဲ့ကမ်းမဲ့ဖြစ်နေပြီး ချည့်နဲ့နေတဲ့ပြောက်ကျားတွေကတော့ အကြမ်းဖက်ခြိမ်းခြောက်တဲ့နည်းပရိယာယ်တွေ သုံးချင်သုံးလိမ့်မယ်။ အကြမ်းဖက်ခြိမ်းခြောက်မှုရဲ့သဘာဝက လူထုထောက်ခံမှုနဲ့လုံးဝဆန့်ကျင်ဘက် ဖြစ်တယ်။ ဒါကြောင့် အကျင့်ပျက်၊ သင်းကွဲဖြစ်နေတဲ့ စစ်သားတွေက အကြမ်းဖက်ခြိမ်းခြောက်လေ့ရှိတယ်။ အကြမ်းဖက်ခြိမ်းခြောက်မှုဆိုတာ လူအများကိုထိခိုက်စေတဲ့ ဗုံးခွဲမှုတွေနဲ့ လူထုနဲ့အစိုးရ ကြောက်ရွံ့ထိတ်လန့်နေအောင် အကြမ်းဖက်တဲ့ လုပ်ရပ်သုံးပြီး အားထုတ်တာ ဖြစ်တယ်။ အုပ်စုလေးတစု သို့မဟုတ် လူတဦးတယောက်က လုပ်လေ့ရှိတယ်။
ပြောက်ကျားတွေက စစ်တပ်ကိုပဲ တိုက်ခိုက်တယ်။ အရပ်သားပစ်မှတ်တွေကို မတိုက်ခိုက်ဘူး။ အကြမ်းဖက်ခြိမ်းခြောက်မှုဆိုတာ မွေးဖွားလာကတည်းက အဆုံးသတ်ရလဒ်က အလုပ်သမားတွေရဲ့ ကင်းကွာမှုဖြစ်စဉ်ကို ဖြစ်စေတယ်၊ အစိုးရကို ပိုပြီးတော့ ဖိနှိပ်လာစေတယ်၊ တော်လှန်ရေးအဖွဲ့အစည်းတွေကို ဖျက်ဆီးပစ်တယ်၊ အခုအခါမှာ ပိုဖိနှိပ်ရက်စက်လာတဲ့ အစိုးရအောက်မှာ ပြည်သူလူထုကို အကာအကွယ်မဲ့စေတယ်။
ပြောက်ကျားရဲဘော်ကို ဆန့်ကျင်တိုက်ခိုက်ခြင်း
ပြောက်ကျားစစ်ကို ဆန့်ကျင်တိုက်ဖျက်ဖို့ နယ်ချဲ့သမားနဲ့ ပြည်တွင်းအစိုးရတပ်တွေသုံးတဲ့ အဓိကနည်းနာက သာမန် အရပ်သူအရပ်သားတွေကို တိုက်ခိုက်တာပဲ ဖြစ်ပါတယ်။ နယ်ချဲ့သမားရဲ့နည်းကို “တိုက်ရိုက်” နဲ့ “သွယ်ဝိုက်” နည်းနာတွေအဖြစ် ခွဲခြားနိုင်တယ်။
ပြောက်ကျားရဲဘော်တွေကို “တိုက်ရိုက်” တိုက်ခိုက်မှုက များသောအားဖြင့် မြို့ပေါ်က အချက်အချာ နေရာတွေ၊ ဆက်သွယ်ရေးလုပ်ငန်းတွေနဲ့ သယ်ယူပို့ဆောင်ရေးလုပ်ငန်းတွေကိုဖျက်ဆီးဖို့ ရည်ရွယ်တဲ့ လေကြောင်းက တိုက်ခိုက်မှုပဲ ဖြစ်တယ် (ဗီယက်နမ်မှာ အမေရိကန်လုပ်ခဲ့တယ်)။ အဲဒီတိုက်ရိုက်တိုက်ခိုက်မှုပုံစံမှာ အထူးတပ်ဖွဲ့ယူနစ်အမျိုးမျိုးကဆောင်ရွက်တဲ့ သွယ်ဝိုက်ပြီး လုပ်ဆောင်တဲ့နည်းနာလည်း ရှိပါတယ်။ ပြောက်ကျားခေါင်းဆောင်တွေကို လုပ်ကြံသတ်ဖြတ်တာ၊ ပြောက်ကျားရဲဘော် အယောင်ဆောင်တာ၊ နယ်ချဲ့သမားတွေက ပြည်သူတွေ သူတို့ဘက်ပါလာအောင် သေနင်္ဂဗျူဟာအရ အရေးပါတဲ့နယ်မြေတွေ၊ ခရိုင်တွေမှာ ရွာသားတွေ၊ အလုပ်သမားတွေကို လူမှုရေးစီမံကိန်းတွေနဲ့ အမှန်တကယ် အကူအညီပေးတာ၊ သတင်းအချက်အလက် စုဆောင်းတာ စသဖြင့်။
ပြောက်ကျားရဲဘော်တွေကို “သွယ်ဝိုက်” တိုက်ခိုက်မှုကတော့ ရှိသမျှ ဆက်သွယ်ရေးလမ်းကြောင်းတွေကိုသုံးပြီး စိတ်ဓာတ်စစ်ဆင်ရေး လုပ်တာဖြစ်တယ်။ လက်ကမ်းစာစောင်တွေ၊ စာအုပ်တွေကို လေယာဉ်နဲ့ ဖြန့်ကျဲချတာ၊ ရေဒီယို၊ ရုပ်မြင်သံကြား၊ သတင်း အစီရင်ခံတင်ပြမှုတွေမှာ လိမ်ညာလှည့်ဖြားတာ စသဖြင့်။ စိတ်ဓာတ်စစ်ဆင်ရေးတွေရဲ့ရည်မှန်းချက်က လှည့်စားဖို့ ဖြစ်တယ်။ စိတ်ဓာတ်ကျအောင်လုပ်တာ၊ တိုက်ရည်ခိုက်ရည် ကျလာအောင်လုပ်တာ၊ ဘက်ပြောင်းအောင် လုပ်တာ၊ နယ်ချဲ့သမားက သူ့လှုပ်ရှားသွားလာမှုတွေ၊ ဦးတည်ချက်တွေနဲ့ပတ်သက်လို့ သတင်းမှားဖြန့်တာ။
ဒါကြောင့် စိတ်ဓာတ်စစ်ဆင်ရေးရဲ့ ပထမအလုပ်က ရန်သူနဲ့ပတ်သက်လို့ လုံးဝနားလည်သဘောပေါက်ဖို့ ဖြစ်တယ်။ ရန်သူက ဘာကိုယုံကြည်သလဲ၊ ဘယ်လိုကိစ္စမျိုးက လူထုကို တက်ကြွစေသလဲ စသဖြင့်။ ယဉ်ကျေးမှုဆိုင်ရာ၊ သမိုင်းဆိုင်ရာရည်ညွှန်းချက်တွေ လှိုင်လှိုင်သုံးပြီး ဖြန့်ချိတဲ့ ရန်သူ့ဝါဒဖြန့်ချိရေး အခြေခံ အကြောင်းအရာတွေက (နယ်ချဲ့တပ်ရဲ့ အင်အားက သာလွန်ကြီးမားတယ်၊ ပြောက်ကျားတိုက်တာ စံမမှီတန်းမမှီဘူး၊ ရက်စက်ကြမ်းကြုတ်တယ်၊ ဘက်ပြောင်းလာသူတွေဟာ ကောင်းကောင်းမွန်မွန် ဆက်ဆံခံရမယ့် သူရဲကောင်းတွေ ဖြစ်တယ်၊ ပြောက်ကျားတွေနဲ့ မျိုးချစ်တွေကတော့ ညှဉ်းပမ်းနှိပ်စက်ခံရမယ်၊ တကယ့်အောင်ပွဲက ပြည်သူ့ လိုလားတောင့်တမှုတွေကို အမှန်တကယ် ထောက်ခံအားပေးတဲ့ (ရုပ်သေး) အစိုးရမှာပဲ ရှိတယ်) စတာမျိုးတွေပဲ။
စိတ်ဓာတ်စစ်ဆင်ရေးတွေမှာ တိုက်ရိုက် နည်းပရိယာယ်ပုံစံကိုလည်း သုံးပါတယ်။ ပြောက်ကျားလှုပ်ရှားမှုထဲ အရေခြုံတွေထည့်သွင်းမြုပ်နှံကာ ကွဲလွဲမှုတွေကို ဇောင်းပေးဖော်ထုတ်ခြင်းဖြင့် နိုင်ငံရေးညီညွတ်မှုကို ဖျက်ဆီးဖို့ ကြိုးစားတယ်။ ညီညွတ်ရေးပျက်ပြားစေတဲ့အလုပ်နဲ့ ပြည်သူတွေ တိုက်ပွဲနဲ့ဝေးရာ ရောက်သွားစေတဲ့အလုပ် လုပ်လာအောင် နိုင်ငံရေးပါတီတချို့ကို ဘုန်းဘောလအော လာဘ်ထိုးဖို့ ကြိုးစားတယ် (ဂွာတီမာလာ၊ အာဂျင်တီးနားနဲ့ ပနားမား စတာတွေမှာ အမေရိကန် သုံးခဲ့တဲ့နည်းတွေ)။
ပြောက်ကျားတပ်အနေနဲ့ ဒီနည်းနာနှစ်ခုလုံးကို ထိထိရောက်ရောက် တိုက်ပွဲဆင်ပစ်ဖို့ဆိုရင် အရေးအကြီးဆုံးက ပြည်သူတွေနဲ့ နိုင်ငံရေးအရရော စစ်ရေးအရပါ လုံးဝပေါင်းစည်းဖို့/သွေးစည်းချစ်ကြည်ဖို့ ဖြစ်ပါတယ်။