အာဏာသိမ်းမှုနဲ့ပတ်သက်လို့ ဗမာ့ကွန်မြူနစ်များရဲ့ ထုတ်ဖော်ပြောကြားချက်
ဗမာပြည်ကွန်မြူနစ်ပါတီရဲ့ အင်တာဗျူးပြောကြားချက်(ဒုတိယပိုင်း)(ဗြိတိန်နိုင်ငံမှာ ထုတ်ဝေတဲ့ Morning Star နေ့စဉ်သတင်းစာရဲ့ ဧပြီလ ၂၆ ရက်နေ့စွဲနဲ့ ဖော်ပြထားတဲ့ ဆောင်းပါးကို ဘာသာပြန်ဆိုတင်ပြပါတယ်။)
ဗမာပြည် စစ်အာဏာသိမ်းမှုနဲ့ (ဒေါ်)အောင်ဆန်းစုကြည်ဗမာပြည်ကွန်မြူနစ်ပါတီမှ ပြောရေးဆိုခွင့်ရှိသူနဲ့ Morning Star သတင်းစာရဲ့သီးသန့်အင်တာဗျူး ဒုတိယပိုင်းမှာ စစ်တပ်ထိပ်သီးတွေနဲ့ အမျိုးသားဒီမိုကရေစီအဖွဲ့ချုပ်ကြားက ပဋိပက္ခရဲ့ဇာစ်မြစ်တွေအပေါ် သူတို့ရဲ့ ခွဲခြမ်းစိတ်ဖြာပုံကို KENNY COYLE က မေးမြန်းထားပါတယ်။
စစ်ခေါင်းဆောင်တွေက ၁၉၆၂ ခုနှစ်ကတည်းက ဗမာပြည်ရဲ့ နိုင်ငံရေးစင်မြင့်ကို တိုက်ရိုက်တမျိုး၊ သွယ်ဝိုက်တဖုံ လွှမ်းမိုးချုပ်ကိုင်ထားတာပါ။ အာဏာရှင်စနစ်ကို ဗြောင်ကျင့်သုံးပြီးဖြစ်စေ၊ အဓိက အရပ်သားပါတီဖြစ်တဲ့ (ဒေါ်)အောင်ဆန်းစုကြည် ခေါင်းဆောင်တဲ့ အမျိုးသားဒီမိုကရေစီအဖွဲ့ချုပ်ပါတီနဲ့ မရေရာမခိုင်မာတဲ့ ညွန့်ပေါင်းဖွဲ့ပြီးဖြစ်စေ ချုပ်ကိုင်ခဲ့ပါတယ်။
သို့ပေမဲ့ ဗမာပြည်ကွန်မြူနစ်ပါတီရဲ့အဆိုအရ စစ်အုပ်စုထိပ်သီးတွေနဲ့ပတ်သက်လို့ စစ်တပ်ကို နိုင်ငံရေးအင်အားစု တရပ်အဖြစ်သာ ရိုးရိုးလေး ရှုမြင်လို့မရပါဘူး၊ စီးပွားရေးအင်အားစုတရပ်အဖြစ်ပါ ရှုမြင်ရပါလိမ့်မယ်။
“စစ်တပ်နဲ့ ဒီချုပ်ကြားက ပဋိပက္ခတွေက ကြာတော့ကြာပါပြီ။ အဓိက အကြောင်းကတော့ တိုင်းပြည်ရဲ့ အာဏာရအုပ်စိုးသူတွေကြားမှာ စစ်တပ်က သူ့ဘာသာသူကို အုပ်စုတစု ဖြစ်လာပါတယ်။ ဘယ်အရပ်သားအစိုးရနဲ့မှ အဆင်ပြေအောင် ဆက်ဆံဖို့ စိတ်ကူးမရှိဘူး၊ လက်အောက်ခံအနေနဲ့နေဖို့ဆိုတာတော့ ဝေးပါတယ်။ ဒါက ခေတ်သစ် ဗမာပြည်သမိုင်းမှာ ပထမဆုံး စစ်အာဏာရှင်ဖြစ်တဲ့ နေဝင်းဆီကနေ အမွေဆက်ခံထားတဲ့ အတွေးအခေါ် ဖြစ်ပါတယ်” လို့ ဗမာပြည်ကွန်မြူနစ်ပါတီရဲ့ ပြောရေးဆိုခွင့်ရှိသူက ဆိုပါတယ်။
ဗကပရဲ့အမြင်အရ ပွတ်တိုက်မှုဖြစ်ရတဲ့အကြောင်းအချက်တခုက နှစ်အုပ်စုလုံး “ဗမာပြည်ရဲ့ အချမ်းသာဆုံးအလွှာဖြစ်တဲ့ ဗျူရိုကရက်အရင်းရှင်တွေကို ကိုယ်စားပြုပါတယ်။ ဒါပေမဲ့ သူတို့က အုပ်စု တအုပ်စုစီနဲ့ ပတ်သက်တယ်။ ဘယ်အုပ်စုကမှ သာမန်ပြည်သူတွေ ချမ်းသာလာအောင်လုပ်ဖို့၊ ဆင်းရဲချမ်းသာကွာဟနေတာကို ကျဉ်းသွားအောင်လုပ်ဖို့ စိတ်မဝင်စားကြပါဘူး”“အုပ်စုနှစ်စုကြားက ပဋိပက္ခက ဟိုအကျိုးစီးပွား သည်အကျိုးစီးပွားနဲ့ ပတ်သက်လို့၊ ဟိုလုပ်ငန်း သည်လုပ်ငန်းနဲ့ ပတ်သက်လို့ဆိုပြီး တိတိကျကျရှိနေတာ မဟုတ်ပေမယ့် စီးပွားရေးအရလည်း အုပ်စုနှစ်စုကြားမှာ ပဋိပက္ခရှိနေတာကို ဘယ်သူမှ မငြင်းနိုင်ပါဘူး”စစ်တပ်ရဲ့အကျိုးအမြတ်အထွက်ဆုံး ချမ်းသာအောင်လုပ်တဲ့ပုံစံက သတ္တုတူးဖော်ရေးကနေ စိုက်ပျိုးမွေးမြူရေးအထိ၊ ဘဏ်လုပ်ငန်းကနေ ဆက်သွယ်ရေးလုပ်ငန်းတွေအထိ ဗမာပြည်ရဲ့ စီးပွားရေးကဏ္ဍတိုင်းလိုလိုမှာ ပါဝင်ပတ်သက်နေတဲ့ ဧရာမ လက်ဝါးကြီးအုပ် ကုမ္ပဏီကြီးနှစ်ခုကို ဖန်တီးထားတာပဲ ဖြစ်ပါတယ်။
“စစ်ဗိုလ်ချုပ်တွေရဲ့ ကုမ္ပဏီအုပ်စုကြီးနှစ်ခုဖြစ်တဲ့ မြန်မာ့စီးပွားရေးဦးပိုင်လိမိတက်နဲ့ မြန်မာ့စီးပွားရေးကော်ပိုရေးရှင်းက ဗမာပြည်ရဲ့ စီးပွားရေးကို စိုးမိုးချုပ်ကိုင်ထားပြီးတော့ ဗိုလ်ချုပ်တွေက အဲဒီအုပ်စုနှစ်စုရဲ့ ဖြစ်ထွန်းတိုးတက်မှုနဲ့ပတ်သက်လို့ အတော့်ကို ဆတ်ဆတ်ထိ မခံပါဘူး”“နောက်ဆုံးလုပ်တဲ့ ရွေးကောက်ပွဲပြီးတော့ ဗိုလ်ချုပ်တွေက သူတို့ အရိပ်တကြည့်ကြည့်လုပ်နေတဲ့ ကုမ္ပဏီအုပ်စုကြီးတွေကို ထိခိုက်လာနိုင်တဲ့ အရိပ်အယောင်တွေ တွေ့လာရလို့ ဆိုင်းမဆင့်ဗုံမဆင့် လုပ်လိုက်တာဖြစ်တယ်လို့ ပြောတာတွေလည်း ရှိပါတယ်”
ဒါပေမဲ့ ပါတီကို ကိုယ်စားပြုသူက အခုလို မှတ်ချက်ပြုပါတယ် “ကျွန်တော်တို့ တိုင်းပြည်မှာ နောက်ဆုံးပေါ်ထွက်လာတဲ့ ပဋိပက္ခဟာဖြင့် ဘယ်ပြဿနာကြောင့်ဖြစ်တာပါဆိုပြီး တိတိကျကျထောက်ပြဖို့ ခက်ပါတယ်။ ပြည်သူတွေက ဘယ်လောက်ပဲ ဆန္ဒရှိသည်ဖြစ်စေ နှစ်ဖက် အလျှော့မပေးကြဘဲ စစ်တပ်နဲ့အရပ်သားအစိုးရကြားမှာ သံသယတွေ၊ အမြင်စောင်းတာတွေက ရှိနေတာ ကြာပါပြီ”
“၁၉၆၂ ခုနှစ်မှာ အာဏာသိမ်းကတည်းက ဒီတိုင်းပြည်မှာ ဘယ်အရပ်သားအစိုးရမှ ဆယ်နှစ်ထက် ပိုမခံပါဘူး။ သူတို့အားလုံး သေနတ်သမားတွေ ရှေ့မှောက်မှာ ဒူးထောက်ရတာချည်းပါ။ ၁၉၈၈ ခုနှစ် အုံကြွမှုတွေဖြစ်ပြီး နောက်ပိုင်းမှာကတည်းက ဒီချုပ်ကို အဲဒီလို ဒူးထောက်စေချင်လို့ စစ်တပ်က ဖိအားပေးလာတာ ဖြစ်ပါတယ်။ တချိန်တည်းမှာ လိုအပ်ရင် အာဏာသိမ်းမှုတွေလုပ်ဖို့လည်း သူတို့က ပြင်ဆင်ထားတာပါ”“ဒါကြောင့်မို့လို့ ကျွန်တော်တို့နိုင်ငံမှာ ‘အာဏာသိမ်း’ စကားက စစ်တပ်အတွက် အရပ်သား နိုင်ငံရေးသမားတွေကိုခြိမ်းခြောက်ဖို့ အသုံးတည့်တဲ့စကား ဖြစ်လာပါတယ်။ ဒီတခါ သူတို့က ပြောရင်ပြောသလိုလုပ်တယ်လို့ သက်သေပြလိုက်တာပေါ့။ ရှေ့က သူတို့ရဲ့အစဉ်အဆက်ခေါင်းဆောင်တွေရဲ့ဆန္ဒတွေကို ဖြည့်ဆည်းလိုက်တာလို့ သူတို့ပြောမယ်ဆို ပြောနိုင်ပါတယ်” လို့ ဗကပကို ကိုယ်စားပြုသူက ဆိုပါတယ်။
ဒီချုပ်နဲ့ဆိုင်တဲ့ ကွန်မြူနစ်အမြင်က ပိုပြီးတော့ အနုစိတ်ပါတယ်။ အဖွဲ့ချုပ်မှာ သမိုင်းဝင် နယ်ချဲ့ဆန့်ကျင်ရေးခေါင်းဆောင် (ဗိုလ်ချုပ်)အောင်ဆန်းဆီကနေ သူ့သမီးဖြစ်သူ (ဒေါ်အောင်ဆန်း)စုကြည်ထံ လွှဲပြောင်းရောက်လာတဲ့ ကြည်ညိုလေးစားမှုအပေါ် တည်ဆောက်ထားတဲ့ အစစ်အမှန်ပါတီဝင်ထု ရှိပါတယ်။ ဒါပေမဲ့ ဒီချုပ်တည်ထောင်သူ ခေါင်းဆောင်တွေကြားမှာ ယခင်စစ်အစိုးရတွေနဲ့ ဆက်စပ်ပတ်သက်သူတွေ ရှိခဲ့ပါတယ်။
“၁၉၈၈ ခုနှစ် ပြည်လုံးကျွတ် နိုင်ငံရေးအုံကြွမှုတွေကနေ ဒီချုပ်ပါတီ ပေါ်ထွက်လာပါတယ်။ လူထုလှုပ်ရှားမှု ဒီရေလှိုင်းကို သူတို့စီးနိုင်ခဲ့တယ်။ ပြည်သူတွေများစွာရဲ့ လေးစားချစ်ခင်မှုကို ရယူနိုင်ခဲ့ပါတယ်”“ဒါပေမဲ့ ဒီချုပ်က ဒီအရေးတော်ပုံကို ဦီးဆောင်ခဲ့တယ်လို့ ကျွန်တော်တို့ ပြောလို့မရပါဘူး။ ဒေါ်အောင်ဆန်းစုကြည်ရဲ့ အရှိန်အဝါနဲ့ တခြားထင်ရှားတဲ့ အတိုက်အခံခေါင်းဆောင်တွေ ( သူတို့ထဲကတချို့က မာ့က်စ်ဝါဒီတွေပါ) ကြောင့် အရေးတော်ပုံရဲ့ အောင်သီးအောင်ပွင့်ကို သူတို့ဆွတ်ခူးသွားတယ်လို့ ကျွန်တော်တို့ ပြောနိုင်ပါတယ်”
“အဲဒီအချိန်မှာ လူသိထင်ရှား ခေါင်းဆောင်တယောက်လိုနေတဲ့ လူထုက (ဒေါ်အောင်ဆန်း)စုကြည်ကို ထိပ်ကို တွန်းပို့လိုက်တာပါ။ ဘာနိုင်ငံရေးအတွေ့အကြုံမှမရှိတော့ သူက ဗမာပြည်ကို တန်းပြီးတော့ အနောက်တိုင်းပုံစံနိုင်ငံရေးနဲ့ မိတ်ဆက်ပေးလိုက်ပါတယ်”“အထွဋ်အထိပ်ကို ရောက်သွားပြီးတော့ နောက်နှစ်နှစ်လောက်ရှိတဲ့အခါ ဒေါ်စုက အဖွဲ့အစည်းထဲကနေ လက်ဝဲယိမ်းတယ်လို့ ယူဆရသူအားလုံးကို ထုတ်ပစ်လိုက်ပါတယ်။ လူအတော်များများကတော့ သူအဲသလို လုပ်တာဟာ ဗမာပြည်နိုင်ငံရေးလောကမှာရှိတဲ့ လက်ယာအမာခံတွေ (စစ်တပ်တောင် ပါကောင်းပါနိုင်ပါတယ်) က အကြံပေးတာကြောင့်လို့ ယူဆကြတယ်။
NLD မှာပါတဲ့ L က အဖွဲ့ချုပ်ကို ညွှန်းတာပါ။ ဖက်ဆစ်ဂျပန်တော်လှန်ရေးမှာ ပါဝင်ခဲ့ကြပြီးတော့ အဲဒီနောက်မှာလည်း ဗမာ့လွတ်လပ်ရေးအတွက် ကြိုးပမ်းခဲ့ကြတဲ့ (ဗိုလ်ချုပ်)အောင်ဆန်းနဲ့ သခင်သန်းထွန်းတို့လို ခေါင်းဆောင်တွေ တည်ထောင်ခဲ့တဲ့ ဖက်ဆစ်ဆန့်ကျင်ရေး ပြည်သူ့လွတ်လပ်ရေးအဖွဲ့ချုပ် (ဖဆပလ) AFPFL မှာ ညွှန်းသလိုပါပဲ”
၁၉၄၇ ခုနှစ်မှာ လုပ်ကြံသတ်ဖြတ်ခံရတဲ့ သူ့အဖေနဲ့ ဒေါ်စုကြားကဆက်စပ်မှုက သူ့ကို အမျိုးသားခေါင်းဆောင်အဖြစ် တာဝန်ကို လွှဲပြောင်းယူခွင့်ပြုခဲ့ပါတယ်။ ဒီလိုလုပ်တာကို တခြားစစ်မှုထမ်းဟောင်းတွေက ဝန်းရံထောက်ခံပြီး ကျားကန်ပေးခဲ့ကြတယ်။“NLD ဒီနာမည်ရလာတာက ဦးအောင်ကြီးနဲ့ ဦးအောင်ရွှေတို့ ခေါင်းဆောင်တဲ့ မျိုးချစ်ရဲဘော်ဟောင်းများအဖွဲ့နဲ့ ဒေါ်စုနဲ့ မောင်နှမဝမ်းကွဲတော်တဲ့ ဦးစိန်ဝင်း ဦးဆောင်တဲ့ အမျိုးသားဒီမိုကရေစီပါတီတို့ ပေါင်းစပ်ထားလို့ ရလာတာပါ။ ဒါကြောင့် သူတို့အဖွဲ့ရဲ့နာမည်မှာ ‘အဖွဲ့ချုပ်’ ဆိုတာကို ထည့်လိုက်တာဖြစ်ပါတယ်။
ဦးအောင်ကြီးနဲ့ ဦးအောင်ရွှေက (အခုတော့ နှစ်ယောက်လုံး မရှိတော့ပါဘူး) အငြိမ်းစား စစ်ခေါင်းဆောင်တွေ ဖြစ်သလို ရန်/ငါပြတ်တဲ့ ကွန်မြူနစ်ဆန့်ကျင်ရေးသမားတွေလည်း ဖြစ်ပါတယ်။ အဲဒီအုပ်စုတွေထဲမှာ ဘယ်အစုကမှ တိုင်းပြည်မှာရှိတဲ့ အလုပ်သမား၊ လယ်သမား၊ အခြေခံ ဆင်းရဲသားလူတန်းစားတွေကို ကိုယ်စားမပြုပါဘူး”အန်အယ်လ်ဒီ ခေါင်းဆောင်တဲ့ အရပ်သားအစိုးရတွေက မြန်မာနိုင်ငံမှာရှိတဲ့ ပြည်သူလူထု အများစုကြီးရဲ့ ဘဝတွေကို ထိထိရောက်ရောက်နဲ့ ပြတ်ပြတ်သားသား တိုးတက်ကောင်းမွန်အောင် မဆောင်ရွက်နိုင်ခဲ့ဘူး။ ဒါ့အပြင် (ဒေါ်အောင်ဆန်း)စုကြည်ရဲ့ စစ်တပ်ဂိုဏ်းနဲ့ ပူးပေါင်းမှုနဲ့ မြန်မာနိုင်ငံအတွင်းက တိုင်းရင်းသား လူမျိုးစုတွေနဲ့ ဘာသာခြား လူနည်းစုတွေအပေါ်မှာရှိတဲ့ ရှော်ဗင်နစ် လူမျိုးကြီးဝါဒအမြင် စွဲကပ်မှုတွေကြောင့် ယခင်က ထောက်ခံခဲ့သူတွေကို ဝေးကွာသွားစေခဲ့ပါတယ်။
“၁၉၈၈ ခုနှစ် မငြိမ်မသက်ဖြစ်မှုတွေ နောက်ပိုင်းမှာ ဒီချုပ်ပါတီနဲ့ ဒေါ်အောင်ဆန်းစုကြည်ကို လူတွေ အတော်လေး ထောက်ခံကြပါတယ်။ ဒါပေမဲ့ ကျွန်တော်တို့ ၂၁ ရာစုကို ရောက်လာချိန်မှာတော့ သူတို့ ရွှေထီးဆောင်းခဲ့တဲ့အချိန်တွေ ကျန်ခဲ့ပါပြီ။ အခုဆိုရင် ဗမာပြည်က ပြည်သူတွေ အတော်များများက ဒီချုပ်အပေါ်မှာရော ဒေါ်အောင်ဆန်းစုကြည် အပေါ်မှာပါ သူတို့နှစ်တချို့ အုပ်စိုးပြီးနောက်မှာ ယုံကြည်မှု ပျောက်ဆုံးလာကြတယ်။
စစ်ဗိုလ်ချုပ်တွေနဲ့ သူတို့ မကြာခဏ ပေါင်းဖက်ပြီးလုပ်ကိုင်ကြတာတွေ တွေ့ပြီးတဲ့နောက်မှာ သူတို့ရဲ့ ပကတိရုပ်ကို မြင်လိုက်ရပြီလို့ လူတွေက ယူဆကြပါတယ်။ အခုဆိုရင် တချို့က လူသိရှင်ကြား ဝေဖန်ရှုတ်ချလာကြတယ်”“ပြည်ထောင်စုလွှတ်တော် ကိုယ်စားပြုကော်မတီ (အာဏာသိမ်းခံရတဲ့ ဒီချုပ်လွှတ်တော်အမတ်တချို့) က အလုပ်အတူတူ လုပ်ကြဖို့ဆိုပြီး တိုင်းရင်းသား လက်နက်ကိုင်အဖွဲ့တွေကို ချဉ်းကပ်ဖို့ ကြိုးပမ်းတဲ့အခါ ခေါင်းဆောင်တချို့က စိတ်ပါလက်ပါ မရှိကြဘူး။ “တကယ်လို့များ ဒေါ်စု လွတ်လာခဲ့ရင် ခင်ဗျားတို့က သူ့ကို ခင်ဗျားတို့ အရေးတော်ပုံရဲ့ခေါင်းဆောင်ဆိုပြီး တင်မြှောက်လိုက်ရင် ဘယ့်နှယ်လုပ်ကြမလဲ” ဆိုပြီး ပြောကြပါတယ်။ တိုင်းရင်းသား လူမျိုးစုတွေအပေါ်မှာရှိတဲ့ ဒေါ်အောင်ဆန်းစုကြည်ရဲ့ပေါ်လစီနဲ့ပတ်သက်လို့ သူတို့ရဲ့ သံသယတွေကို ပြနေတာပါ။
”မည်သို့ဆိုစေ တတိုင်းပြည်လုံးမှာရော နိုင်ငံတကာမှာပါ အဲဒီလို ဩဇာတိက္ကမကြီးမားတဲ့ တခြားသူတယောက် ပေါ်မလာသေးပါဘူး။ လူထုအရေးတော်ပုံက လူပုဂ္ဂိုလ်အခြေခံတဲ့ အန်အယ်လ်ဒီ ခေါင်းဆောင်မှုနဲ့ မတူတဲ့ တခြားသင့်တော်လက်ခံနိုင်တဲ့ ရွေးချယ်စရာတခုကို မပေးသေးပါဘူး။
“သူက စစ်ဗိုလ်ချုပ်တွေနဲ့ အလိုတူအလိုပါ ရိုဟင်ဂျာတွေကို အသိအမှတ် မပြုခဲ့တာ လူတိုင်းသိပါတယ်။ ဒါပေမဲ့ မျက်မှောက်အရေးတော်ပုံမှာ ရှေ့ထွက်ခေါင်းဆောင်တယောက် လိုနေတယ်။ ဒေါ်အောင်ဆန်းစုကြည် နောက်တကြော့ ပြန်ပေါ်ချင် ပေါ်လာနိုင်ပါတယ်”
“အရေအတွက်အားဖြင့်ရော ဆန္ဒပြမှုပုံစံတွေအနေနဲ့ပါ အရှိန်အဟုန်ရလာနေတဲ့ မျက်မှောက် လူထုအရေးတော်ပုံကနေ သူက ဖီးနစ်ငှက်လို ပြန်ရှင်သန်နိုးထလာမလား၊ ပြာဖြစ်ပြီး နိဂုံးချုပ်သွားမလား ဆိုတာကိုတော့ ကျွန်တော်တို့ စောင့်ကြည့်ရမယ်လို့ ထင်ပါတယ်”
သူက သူ့အဖေရဲ့ကျော်ဇောမှုအပေါ်ကနေ အမြတ်ထုတ်ခဲ့ပေမယ့် ဖခင်ဖြစ်သူရဲ့ လက်ဝဲ ကိုလိုနီနယ်ချဲ့ဆန့်ကျင်ရေးသမိုင်းနဲ့ပတ်သက်ပြီး ဆိတ်ဆိတ်နေဆဲ ဖြစ်ပါတယ်။“ဒေါ်အောင်ဆန်းစုကြည်က လက်ယာသမားဖြစ်တဲ့ သူ့အမေရဲ့ထိန်းကျောင်းမှု အောက်မှာနဲ့ ကွန်မြူနစ်ဆန့်ကျင်ရေးကြီးစိုးတဲ့ လူ့အဖွဲ့အစည်းတခုမှာ ကြီးပြင်းခဲ့တာ ဖြစ်ပါတယ်။ သူ့အဖေ လုပ်ကြံခံရတော့ သူကနှစ်နှစ်သမီးအရွယ်ပဲ ရှိပါသေးတယ်။ နောက်ပြီး ဗမာပြည်ကွန်မြူနစ်ပါတီ တည်ထောင်ရာမှာ ပါဝင်ခဲ့တဲ့ သူ့အဖေရဲ့အခန်းနဲ့ ပတ်သက်လို့ တခါမှ မပြောဖူးပါဘူး။
သူ့ကို ပခုံးထမ်းတင်ပေးခဲ့တဲ ဒီချုပ်ပါတီရဲ့ ထင်ရှားတဲ့ခေါင်းဆောင်တွေကို ‘လက်ဝဲတွေ’ ဖြစ်လို့၊ ‘ကွန်မြူနစ်တွေ’ ဖြစ်လို့ဆိုပြီး ထုတ်ပစ်ခဲ့စဉ်က သူထောက်ခံခဲ့တာကိုလည်း ကျွန်တော်တို့ မေ့ပစ်လို့ မဖြစ်ပါဘူး”