အခက်အခဲကျော်လွှား အောင်ပွဲအရယူ
မောင်သန်းမြရွှေ
အရေးတော်ပုံဂျာနယ်။ အတွဲ(၃) အမှတ် ၅ မှာ ဖော်ပြမယ့်ဆောင်းပါး
ဖေဖော်ဝါရီ ၁ ရက်နေ့ အာဏာမသိမ်းခင် နောက်ဆုံးအချိန်အထိ မင်းအောင်လှိုင်နဲ့ဒေါ်စု စေ့စပ်ညှိနှိုင်းခဲ့ပါတယ်။ မပြေလည်လို့ အာဏာသိမ်းတာပါ။ ဘာတွေဘယ်လို တောင်းဆိုတယ်။ ဘာတွေလိုက်လျောပြီး ဘာတွေမလိုက်လျောနိုင်ဘူး ဆိုတာ ကာယကံရှင်တွေကိုယ်တိုင် ထုတ်ပြောမှသာ သိရမှာပါ။
တကယ်က စေ့စပ်ညှိနှိုင်းတာ မဟုတ်ပါဘူး။ စစ်ကောင်စီက သူ့တို့လိုလားချက်ကို တဖက်သတ် တောင်းဆိုတာပါ။ ဒါမျိုးက ဗိုလ်သန်းရွှေ ဗိုလ်ခင်ညွန့်တို့ ဒေါ်စုကို အိမ်ချုပ်ထားလိုက် အပြင်ထုတ်လိုက်နဲ့ တလျှောက်လုံးလုပ်လာခဲ့တဲ့ ဖိအားပေးအကျပ်ကိုင် စေ့စပ်တဲ့ပုံစံပါ။
အခုကျတော့ မင်းအောင်လှိုင်က ရွေးကောက်ပွဲမသမာမှုကြောင့် အာဏာသိမ်းရတယ်လို့ အကြောင်းပြတယ်။ လမ်းပြမြေပုံ ၅ ရပ်နဲ့အတူ ၂၀၀၈ ခြေဥအောက်မှာ ရွေးကောက်ပွဲသစ် ပြန်လုပ်ပေးမယ်လို့ ဆိုတယ်။ ဒါပေမဲ့ သူလုပ်နေတာတွေက စစ်သူကြီးမင်းဆက် ရာသက်ပန်အာဏာမြဲရေးပါ။
စစ်ကောင်စီက ကိုယ်စားပြုလွှတ်တော် CRPH နဲ့ အမျိုးသားညီညွတ်ရေးအစိုးရ NUG ကို မတရားသင်းအဖြစ် အစောကတည်းက ကြေညာထားပြီးဖြစ်ပေမယ့် ဒီချုပ်ပါတီကိုတော့ တရားဝင်ပါတီအဖြစ်မှ ဖျက်သိမ်းပစ်မယ်လို့ ယခုအခါ ရွေးကောက်ပွဲကော်မရှင်က ခြိမ်းခြောက်နေတယ် ။ ဒေါ်စုနဲ့ ဒီချုပ်ခေါင်းဆောင်များကို နိုင်ငံရေးသိက္ခာချဖို့ ပုဒ်မအမျိုးမျိုးတပ်ပြီး ရုံးထုတ်နေတယ်။ ဒေါ်စုက အမှုကို ဥပဒေကြောင်းအရ တုံ့ပြန်နေပေမယ့် နိုင်ငံရေးအရ တုံ့ပြန်တာ မတွေ့ရသေးဘူး။
အခုလဲ ဒေါ်စုနဲ့ မင်းအောင်လှိုင် တိတ်တိတ်ပုန်း ဆွေးနွေးနေတယ်လို့ သတင်းထွက်လာတယ်။ ဒီလိုသတင်းမျိုးက ဟုတ်ဦးတော့ စစ်အုပ်စုက အသိမပေးရင် ဘယ်သူမှ သိနိုင်စရာအကြောင်း မရှိဘူး။ “အန်ကယ်”နဲ့ ကြိတ်ဆွေးနွေးပြီး ၂၀၀၈ အောက် ခေါင်းလျှိုဝင်ခဲ့ဖူးပြီ။ ယခု “သာဝ”နဲ့ ဘာထပ်ဆွေးနွေးစရာ ရှိသေးလို့လဲ။
စစ်တပ်အာဏာသိမ်းမှုအပေါ် လူထုက ဒီလောက်အထိ တုံ့ပြန်လာလိမ့်မယ်လို့ မထင်ကြောင်း မင်းအောင်လှိုင်က ပြောပါတယ်။ လူထုကို အထင်သေးတာပါ။ ဒေါ်စုကလည်း ခါတိုင်းလိုပဲ ကြားလူဝင်ရောက် ဖြန်ဖြေ(အောင်သွယ်)ပေးတာ စောင့်ချင်နေပုံပဲ။ အစကတည်းက ဘာပြင်ဆင်မှုမှ မရှိခဲ့ပါဘူး။ ဒါ့အပြင် လူထုကို အခြေအနေမှန် ရှင်းမပြတာကိုက စစ်အုပ်စုငြိုငြင်မှာကို စိုးရိမ်နေခဲ့တဲ့သဘောပဲ။
စစ်ကောင်စီအာဏာသိမ်းမှုနဲ့ စစ်အာဏာရှင်စနစ်ဆိုတဲ့ စစ်သုံးစစ် ( စစ်အုပ်စု၊ စစ်အစိုးရ၊ စစ်ဗျူရိုကရေစီယန္တရား) ကို မစေ့စပ်တမ်း ပြတ်ပြတ်သားသား ဆန့်ကျင်လာတာက နိုင်ငံရေးနိုးကြားနေတဲ့ လူထုကြီးပါ။
သပိတ်တိုက်ပွဲတွေကို ရန်ကုန်၊ မန္တလေး၊ မုံရွာ၊ ကနီ၊ မြင်းခြံ-တလုပ်မြို့၊ ရွှေဘို၊ ချောင်းဦး၊ ပဲခူး၊ မင်းတပ်၊ ဟားခါး၊ ကလေး၊ ဂန့်ဂေါ၊ မြိုင်၊ ထားဝယ်၊ စတဲ့ စတဲ့ မြို့တွေမှာ သွေးချောင်းစီးပစ်ခတ် နှိမ်နင်းခဲ့ပေမယ့် လူထုဟာ ရတဲ့နည်းနဲ့ တိုက်ပွဲတွေဆက်လက်လုပ်ဆောင်နေဆဲပါ။
တတိုင်းပြည်လုံး လူထုတရပ်လုံးက စစ်ကောင်စီကို ရရာလက်နက် ကိုင်စွဲပြီး ပြင်းပြင်းထန်ထန် ခုခံတော်လှန်လာတယ်။ CDM အာဏာဖီဆန်ရေးတိုက်ပွဲ၊ GSC သပိတ်တိုက်ပွဲတွေနှင့်အတူ လက်နက်ကိုင်တိုက်ပွဲတွေ ပေါ်လာတယ်။ တပြည်လုံးအနှံ့ မြို့နယ်အသီးသီးမှာ PDF ပြည်သူ့ကာကွယ်ရေးတပ် ဆိုတာတွေ ပေါ်လာတယ်။ တချို့ PDF အမည်မခံဘူး။
PDF ပေါ်တာ ၄လလောက်ပဲ ရှိပါသေးတယ်။ လက်နက်ခဲယမ်း မပြည့်စုံပေမယ့် စစ်ကောင်စီ ကြေးစားတပ်ကို အထိနာအောင် ချေမှုန်းရေးတိုက်ပွဲတွေ တိုက်လာနိုင်တယ်။
စစ်ကောင်စီ ကြေးစားစစ်တပ်ဟာ (အာဏာမြဲရေးအတွက်) အကုန်လု အကုန်သတ် အကုန်ရှို့ဆိုတဲ့ လူထုဆန့်ကျင်ရေးပေါ်လစီအောက်မှာ (ဗီယက်နမ်စစ်ကာလ မိုင်လေလူသတ်ပွဲလို) အစုလိုက်အပြုံလိုက် သတ်ဖြတ်မှုတွေ လုပ်လာနေပါတယ် (မကွေးတိုင်း ပေါက်မြို့နယ် ကင်းမရွာ၊ စစ်ကိုင်းတိုင်း ကနီမြို့ ယင်းရွာ၊ ဒီပဲယင်း၊ မိုးဗြဲ – ဒီမောဆိုး စသဖြင့်)။
တပြည်လုံးအနှံ့ ပေါ်ပေါက်လာနေတဲ့ လက်နက်ကိုင် ခုခံတော်လှန်ရေးတိုက်ပွဲဟာ စစ်အုပ်စုကို အထိနာစေရုံတင်မက အထိတ်တလန့် ဖြစ်စေပါတယ်။ စစ်အုပ်စုမှာ လက်ကိုင်ဆိုလို့ ကြေးစားစစ်တပ်ပဲ ကျန်ပါတော့တယ်။ ဒါကြောင့်လဲ အားကိုးရှာ ပြေးပေါက်ရအောင် ရုရှားကို အရေးတကြီး ပြေးကပ်တာပါ။
ကြံ့ဖွံ့၊ မဘသ၊ စွမ်းအားရှင် ဆိုတာတွေက နွေဦးတော်လှန်ရေး မီးတောက်မီးလျှံတွေအောက်မှာ ခေါင်းမထောင်ရဲတော့ဘူး။ ဒါကြောင့် စစ်တပ်အိမ်ထောင်သည်လိုင်းက အမျိုးသမီးတွေကို လက်နက်တပ်ဆင်ပေးပြီး ကင်းစောင့်ခိုင်းနေရတယ်။ စစ်အုပ်စု လက်ကိုင်တုတ်တွေကို လက်နက်တပ်ဆင်ပေးပြီး ပျူစောထီးကာကွယ်ရေးတပ်ဖွဲ့ လုပ်ခိုင်းရတယ်။ တပ်ပြေးတွေများ တပ်သားရေသောက်မြစ်ရှားပါး၊ နိုင်ငံရေး စီးပွားရေး လူမှုရေး အဘက်ဘက်က ဖရိုဖရဲဖြစ်လာရုံတင်မက စစ်ရေးအရ အကျပ်အတည်းဖြစ်လာ၊ အထိနာလာတဲ့အောက်မှာ၊ စစ်အုပ်စုဟာ မီးစတဖက် ရေမှုတ်တဖက် ကစားနည်းကို (အာစီယမ်ကို ခုတုံးလုပ်ပြီး) ပြန်ကစားဖို့ သွေးတိုးစမ်းလာပုံပါ။
စစ်အုပ်စုမှာ ဖိနှိပ်တဲ့နည်း ပြည်တွင်းစစ်ကိုတိုးချဲ့တဲ့နည်း လူသတ်တဲ့နည်း မှအပ တခြားနည်းမရှိတော့ဘူး။ တဆင့်တိုးဖိနှိပ်ဖို့အတွက် စေ့စပ်ရေးလေသံလွှင့်ပြီး ဆိုက်ဝါးဂျင်းတွေထည့် လာနေပြီ။
စစ်အုပ်စုက COVID ကိုဗစ်တတိယလှိုင်းကို လူထုဖိနှိပ်ရေးကိရိယာလိုအသုံးချပြီး နိုင်ငံရေးအမြတ်ထုတ်ဖို့ လုပ်နေတယ်။ တိုင်းပြည်ကို စစ်ရေး စီးပွားရေးအရ ဖျက်ဆီးရုံတင်မက ကိုဗစ်နဲ့ပါ လူသတ်ဖို့ ဖျက်ဆီးဖို့ လုပ်လာနေပါတယ်။ တိုင်းပြည်ဖရိုဖရဲဖြစ်အောင် ရည်ရွယ်ချက်ရှိရှိ လုပ်နေတယ်။ မျက်ဖြူဆိုက်လေ ဆရာကြိုက်လေ လုပ်နေတယ်။ ကယ်တင်ရှင်ပုံဖမ်းပြီး အာဏာမြဲအောင် လုပ်နေတယ်။
စစ်အုပ်စုရဲ့ အကျဉ်းသားဖြစ်နေတဲ့ လစ်ဘရယ်ဒီမိုကရေစီခေါင်းဆောင် အနေနဲ့လည်း အခြေအနေမှန်ကို ဘယ်လောက်အထိ သိနေမလဲတော့ မပြောတတ်ဘူး။ အခြေအနေမှန်သိရင် သူ ဘာဆုံးဖြတ်မလဲ ဆိုတာလည်း မပြောနိုင်ပါဘူး။
(တော်လှန်ရေးကာလ နိုင်ငံရေးနိုးကြားမှု ၁၀ ရက်ဟာ သာမန် ၁၀ နှစ်ကာလ နိုင်ငံရေးနိုးကြားမှုထက် မြင့်တယ်)လို့ လီနင်ကပြောဖူးပါတယ်။ လူထုရဲ့ ကြံ့ခိုင်တဲ့စိတ်ဓာတ်နဲ့ စစ်အုပ်စုအပေါ် နာကြည်းမုန်းတီးမှုဟာ ကမ္ဘာကြေသော်လည်း ဥဒါန်းကျေလိမ့်မယ် မဟုတ်ပါဘူး။ ဘုံရန်သူကိုဆန့်ကျင်၊ ပြည်သူကိုကူညီ၊ သန္နိဋ္ဌာန်ချ – အသက်စွန့်ရမှာ မကြောက် – အခက်အခဲမှန်သမျှကျော်လွှား အောင်ပွဲအရယူကြပါစို့။
မောင်သန်းမြရွှေ ( ၁၉ ဇူလိုင် ၂၀၂၁)
အခက်အခဲကျော်လွှား အောင်ပွဲအရယူ
မောင်သန်းမြရွှေ