၂၀၂၃ ခုနှစ်၊ အောက်တိုဘာ ၁၄ ရက်။
သို့
လူ့ဘောင်သစ်ဒီမိုကရက်တစ်ပါတီဌာနချုပ်ဗမာပြည်။
အကြောင်းအရာ။ ။ ရဲဘော်တို့၏ပါတီတည်ထောင်ခြင်း ၃၅ နှစ်ပြည့်မြောက်ခြင်းအတွက် သဝဏ်လွှာပေးပို့ခြင်း။
ဗမာပြည်၏ ရှစ်လေးလုံးအရေးတော်ပုံကြီးနှင့်အတူ ပေါ်ထွက်လာခဲ့သော သင်တို့၏လူ့ဘောင်သစ်ဒီမိုကရက်တစ်ပါတီ တည်ထောင်ခဲ့သည်မှာ (၃၅) နှစ် တင်းတင်းပြည့်ပြီဖြစ်ကြောင်းသိရသောကြောင့် ဦးစွာအားဖြင့် ကျွန်တော်တို့အနေဖြင့် ရှစ်လေးလုံးအရေးတော်ပုံကြီးနှင့် လက်ရှိနွေဦးတော်လှန်ရေးကြီးအတွင်း ပုံစံအမျိုးမျိုးဖြင့်ပါဝင်ခဲ့ကြသော သင်တို့အားလည်းကောင်း၊ ဗမာပြည် ပြည်သူလူထုကြီးအားလည်းကောင်း လေးစားစွာဖြင့် ဂုဏ်ပြုနှုတ်ခွန်းဆက်သလိုက်ပါသည်။
ဆိုးဝါး၊ ယုတ်မာ၊ ရက်စက်လှသော စစ်အာဏာရှင်များ၏ ဖိနှိပ်အုပ်ချုပ်မှုအောက်၌ လူ့ဘောင်သစ်ဒီမိုကရက်တစ်ပါတီ ယခုကဲ့သို့ (၃၅) နှစ်မျှ ရပ်တည်လှုပ်ရှားနိုင်ခဲ့ခြင်းကို အသိအမှတ်ပြု၊ ချီးကျူးအပ်ပါသည်။ ကောက်ကျစ်ယုတ်မာသော စစ်အာဏာရှင်များသည် သူတို့က ရက်ရက်စက်စက်သတ်ဖြတ်နေသည့်အကြားက ပေါ်ထွက်ထွန်းပြောင်လာခဲ့သော သင်တို့၏ပါတီကို မည်မျှအညှိုးထား၊ မုန်းတီးမည်ဆိုသည်မှာ အထူးပြောဖွယ်မရှိပင် ဖြစ်သည်။ သို့တိုင်အောင် အခက်အခဲကိုမကြောက်၊ ရက်စက်မှုကို ထီမထင် ဆက်လက်ချီတက်နေကြခြင်းမှာ ရဲဘော်တို့ လူ့ဘောင်သစ်ဒီမိုကရက်တစ်ပါတီ၏ ဂုဏ်လက္ခဏာတစ်ရပ်ဟုပင် မဖုံးမကွယ်အသိအမှတ်ပြုရပါမည်။
ထို့နည်းတူ ရဲဘော်တို့ပါတီအနေဖြင့် မိမိတို့အလံနှင့်အခန်းကဏ္ဍကို ဆက်လက် ထိန်းသိမ်းရွက်ဆောင်ကာ ပြည်သူလူထုကြီးနှင့်အတူ ချီတက်ကြမည်ဟုလည်း ယုံကြည်ပါသည်။
ယနေ့ကာလတွင် မြေပေါ်လူထုတိုက်ပွဲများကိုလည်းကောင်း၊ မြေအောက်နှင့် လက်နက်ကိုင်တိုက်ပွဲတို့ကိုလည်းကောင်း ပြည်သူလူထုကြီးနှင့်အတူ တိုက်ပွဲဝင်နေသော သင်တို့အား မချီးကျူးဘဲ မနေနိုင်ပါကြောင်းလည်း သိစေအပ်ပါသည်။ တိုက်ပွဲများအတွင်း ကြီးထွားခိုင်မာလာခဲ့သော သင်တို့၏ လူ့ဘောင်သစ်ဒီမိုကရက်တစ်ပါတီသည် ပိုမိုကြီးမား၊ ခက်ခဲသော တိုက်ပွဲမျိုးစုံအတွက် အသင့်ပြင်ပြီး၊ အသင့်ဖြစ်ပြီးဖြစ်မည်ဟု ယုံကြည်မျှော်လင့်ပါသည်။ နောင်တွင်လည်း ယခုကဲ့သို့ပင် လက်နက်ကိုင်တိုက်ပွဲသဏ္ဌာန်ရော အခြားတိုက်ပွဲသဏ္ဌာန်အမျိုးမျိုးနှင့်ပါ တိုက်ပွဲဝင်နေကြသည့် အခြားသောနိုင်ငံရေးအင်အားစုအသီးသီးနှင့် နိုင်ငံရေးမတူညီမှုများကို ဘေးချိတ်ကာ ဆက်လက်၍တိုက်ပွဲဝင်သွားမည်ဟု ကျွန်တော်တို့နားလည်ယုံကြည်ထားပါသည်။
ဒီနေ့ နိုင်ငံတကာ့အခြေအနေဟာ အတိမ်းအစောင်းမခံ၊ ကမ္ဘာစစ်ဆိုတဲ့ ချိုင့်ဝှမ်းနှုတ်ခမ်းမှာ မေးတင်နေသည် ဆိုခြင်းကို အားလုံးအသိပင်ဖြစ်ပါသည်။ ရဲဘော်တို့နှင့် ကျွန်တော်တို့ကဲ့သို့သော ပြည်ချစ်အင်အားစုအားလုံးအဖို့ သွေးစည်းညီညွတ်ဖို့ မည်မျှလိုအပ်နေကြောင်း အထူးပင်ပြောနေစရာမလိုသောအနေအထားမျိုးလည်း ဖြစ်ပါသည်။
နိုင်ငံရေး၊ စီးပွားရေး၊ စစ်ရေး၊ သံတမန်ရေး ဘက်စုံမှာ အထွေထွေအကျပ်အတည်းဆိုက်နေသော ဘုံရန်သူစစ်အုပ်စုကို လျှော့မတွက်ဘဲ အခြေအနေမှန်ကို ဆုပ်ကိုင်၊ မိမိတို့ညီညွတ်ရေးကိုတည်ဆောက်ကာ ရဲရင့်သောခြေလှမ်းများဖြင့် အောင်ပွဲသို့တက်လှမ်းသွားနိုင်ကြမည်ဟု ယုံကြည်မိပါကြောင်း ဖော်ပြအပ်ပါသည်။
အလေးနီဖြင့်
ဗဟိုစည်းရုံးရေးကော်မီတီ
ဗမာပြည်ကွန်မြူနစ်ပါတီ