လက်နက်ချရင် ဆုချမယ်တဲ့လား

လက်နက်ချရင် ဆုချမယ်တဲ့လား

မောင်သန်းမြရွှေ

အာဏာသိမ်းစစ်ကောင်စီက လက်နက်နဲ့အလင်းဝင်ရင် ဆုချမယ့်အကြောင်း မေလ ၉ ရက်နေ့ နေ့စွဲနဲ့ ကြေညာချက်တစောင် ထုတ်ပြန်လာတယ်။ ခင်ညွန့်လက်ထက် ဖိတ်ခေါ်တုန်းက လမ်းမှားရောက်သွားတဲ့ လူငယ်တွေ ပြန်လာရင် ခွင့်လွှတ်မယ်လို့ဆိုတယ်။ အခုက လက်နက်ယူလာရင် ဘယ်လောက်ဆုချမယ်လို့ ပြောလာတာဖြစ်တယ်။ NUG ကလည်း လက်နက်နဲ့ CDM လုပ်လာရင် သိန်းပေါင်းဘယ်လောက် ဆုချမယ်ပြောထားတာဖြစ်တော့ ဗမာပြည်ပြည်တွင်းစစ်မှာ လက်နက်ဈေး ဘယ်လောက်ကောင်းနေသလဲ သိနိုင်ပါတယ်။ လက်နက်အရောင်းအဝယ်ဘယ်လောက်ကောင်းနေ သလဲဆိုတာကိုပြသတာပါ။

လက်နက်ရဖို့ အမျိုးမျိုးအလှူခံပြီး ဘယ်လောက် လုံးပန်းနေကြသလဲ။ လက်နက်မှောင်ခိုဈေးကွက် ဘယ်လောက် သောင်းကျန်းနေသလဲ။ လက်နက်ရေသောက်မြစ်ရှိတဲ့ EAO တွေ ဘယ်လောက် စန်းပွင့်နေသလဲ။ လက်နက်ကို ချုပ်ရောင်းချုပ်ဝယ် လုပ်ချင်သူတွေလဲရှိလာတယ်။

စကစကို လျှော့မတွက်ဖို့လိုတယ်။ လူလည်လူပါးတွေပါ။ အလင်းဝင်လာသူက အရေးမကြီးဘူး လက်နက်ပါလာဖို့က ပိုအရေးကြီးပါတယ်။ လက်နက်ကို အားလုံးက ဘုရားလို ကိုးကွယ်လာနေပြီး (လေယာဉ်ပစ်လက်နက်အပါ) လက်နက်မရှိရင် တော်လှန်ရေးလုပ်လို့ မရတော့သလို ဖြစ်လာနေပြီ။ (လက်နက်ဆိုတာ ကိုင်တွယ်ပစ်ခတ်သူမရှိရင် တုတ်ဖြစ်သွားတာပဲ) ဒီလိုနဲ့ ကိုယ်စွမ်းကိုယ်စတွေ တုံးကုန်လိမ့်မယ်။ တော်လှန်ရေးဆိုတာ မရှိရာမှရှိရာသို့ တစတစ ဖြစ်ပေါ်ကြီးထွား လာတာဖြစ်တယ်။ ရန်သူ့လက်နက် ကိုယ့်လက်နက်ဖြစ်အောင် တိုက်ရမယ်။ တိုက်ရင်းနဲ့ကြီးထွားလာတဲ့ ဖြစ်စဉ်ဖြစ်တယ်။ ဆန့်ကျင်ဘက် ရန်သူစကစ က တိုက်ရင်းနဲ့ သေးကျုံ့လာ နောက်ဆုံးကျေပြုန်းသွားတဲ့ ဖြစ်စဉ်ဖြစ်တယ်။ လူထုကြီးတရပ်လုံး တစည်းတလုံးတည်း နိုးကြားတက်ကြွနေပြီး အခက်အခဲဟူသမျှကျော်လွား အောင်ပွဲအရယူတဲ့ ဖြစ်စဉ် ဖြစ်ပါတယ်။

ကမ်ဘောဒီးယားဝန်ကြီးချုပ် ဟွန်ဆင်က သူ့မှာပြဒါးရှင်လုံးလဲမရှိ တန်ခိုးရှင်လည်းမဟုတ်လို့ မြန်မာပြည်ပဋ္ဋိပက္ခကို တခဏချင်းဖြေရှင်းလို့မရလို့ ပြောခဲ့တယ်။ မြန်မာပြည်အရေးဟာ ရှည်လျားရှုပ်ထွေးတဲ့ သမိုင်းကြောင်းရှိလို့ အလွယ်တကူ ဖြေရှင်းလို့မရ။ မြန်မာပြည်အရေးကို မြန်မာနိုင်ငံကသာ ဦးဆောင်ဖြေရှင်းသင့်ပြီး မြန်မာပြည်သူတွေရဲ့ဆန္ဒကို လေးစားသင့်တယ်လို့ တရုတ်နိုင်ငံခြားရေးဝန်ကြီးချင်ကန်းက ဆိုတယ်။ မြန်မာပြည်အရေးကို ဖြေရှင်းရာမှာ စေ့စပ်ညှိနှိုင်းခြင်းဖြင့် ဖြေရှင်းရမည်ဖြစ်ပြီး အရေးယူပိတ်ဆို့ခြင်းက အဖြေမဟုတ်ကြောင်း အင်ဒိုနီးရှားသမ္မတ ဂျိုကိုဝီဒိုဒိုက အာဆီယံထိပ်သီးအစည်းအဝေးမှာ ပြောပါတယ်။

ဒါတွေကို ဆန္ဒစွဲနဲ့ ငါတို့ကို အသိအမှတ်မပြုဘဲ၊ စကစကို အသိအမှတ်ပြုရကောင်းလားလို့ စွပ်စွဲလို့မရပါဘူး။ ကမ္ဘာ့ အစိုးရအသီးသီး တနည်းမဟုတ် တနည်းနဲ့ ပတ်သက်နေတဲ့ ပထဝီနိုင်ငံရေး ရဲ့ မျက်နှာစာမှာ သံခင်းတမန်ခင်းအရ ကြားဝင်ညှိနှိုင်းသူဟာ ဒီလိုပဲပြောရမှာပါ။ ကယ်တင်ရှင်ဂိုက်ဖမ်းပြီး ပထဝီနိုင်ငံရေး အမြတ်ထုတ်ချင်တဲ့ နီယိုလစ်ဘရယ်နိုင်ငံကြီးတွေလည်း ရှိတယ်။ မုသာဝါဒလေထုနဲ့သာ ထောက်ခံပြီး ဗမာပြည်တော်လှန်ရေးကို ကွန်မြူနစ်ဆန့်ကျင်ရေး တရုတ်ဆန့်ကျင်ရေး အတွက် အာဘော်ဖန်တီးလာနေတဲ့ အရာကျဆူပါပါဝါ နိုင်ငံကြီးရဲ့ ပေးစာကမ်းစာစားနေသူများက ဗမာပြည်တော်လှန်ရေးကို လမ်းကြောင်းပြောင်းအောင် လုပ်လာနေတာလည်း တွေ့လာရတယ်။ ဗမာပြည် ပြည်သူလူထုက စစ်အာဏာရှင်စနစ် ကို အမြစ်ပါမကျန် ချေမှန်းဖို့ ပြတ်ပြတ်သားသား ဇွဲနဘဲနဲ့ တိုက်ပွဲဝင်နေသလိုမျိုး ပြည်သူအုံကြွမှု ဆိုရင် ဘယ်နိုင်ငံရှိ အုပ်စိုးသူ လူတန်းစား က တကယ်တမ်းထောက်ခံ မှာလဲ။ ကမ္ဘာ့ အဖိနှိပ်ခံ ပြည်သူများ နေရာတိုင်းလိုလို မှာ အုံမကြွတောင် မခံမရပ်နိုင်ဖြစ်လာ နေတဲ့ အခုမျက်မှောက်လာလ မှာ “လူမှုတည်ငြိမ်ရေး” ရဖို့ နိုင်ငံတိုင်းရှိ အုပ်စိုးသူ လူတန်းစား က မနည်းကြိုးစား နေကြတာ အထင်အရှား တွေ့နိုင်တာပဲ။

၂၀၀၈-၂၀၁၀ တုန်းက အိုဘားမားအစိုးရ ကြားဝင်မှုနဲ့ ရင်ကြားစေ့ခဲ့တယ်။ ထိုစဉ်က ဒေါ်စုမဏ္ဍိုင်ပြု ရင်ကြားစေ့တာဖြစ်ပြီး ၂၀၀၈ အောက် ခေါင်းလျှိုသွားခဲ့တာပဲ။ ယခုအခါ ကြားဝင်လာသူတွေကများတယ်။ ကမ္ဘာ့အခြေအနေကလည်း အရင်ကနဲ့မတူတော့ဘူး။ လစ်ဘရယ်ဒီမိုကရေစီ ကမ္ဘာပတ်နေတဲ့ ကမ္ဘာပြားခေတ်မဟုတ်တော့ဘူး။ ပြည်တွင်းအခြေအနေကလည်း ယခင်ကနဲ့မတူတော့ဘူး။ လက်နက်ကိုင်တိုက်နေတဲ့ အင်အားစုတွေကလည်းများတယ်။ ဗမာပြည်သူတွေကလည်း နိုင်ငံရေးနိုးကြားမှု မြင့်မားတယ်။ သက်ဆိုင်သူ stakeholders တွေများတယ်။ ဒါကြောင့် အာဆီယံကို ခေါင်းတည်ပြီး ကြားဝင်တာဖြစ်တယ်။

အဖိနှိပ်ခံလူမျိုးပေါင်းစုံ ဗမာပြည်သူလူထုကြီးဟာ ငြိမ်းချမ်းတည်ငြိမ် လုံခြုံမှုကို ဖက်ဆစ်စစ်တပ်နဲ့ ရင်ကြားစေ့ခြင်းဖြင့်မရ၊ ကိုယ်တိုင်တိုက်ယူမှရမယ်ဆိုတာ ဘဝအရသိရှိပြီးဖြစ်ပါတယ်။ စစ်အုပ်စုအကြောက်ဆုံးကလည်း တော်လှန်ပြည်သူတွေကိုသာ ဖြစ်တယ်။ အဆုံးအဖြတ်က ဗမာပြည်တော်လှန်ရေးသမားတွေနဲ့ ဗမာပြည်ပြည်သူတွေရဲ့ တော်လှန်စစ်မှာပဲ တည်ပါတယ်။

ဘုံရန်သူစစ်အုပ်စုရဲ့ သွေးခွဲသပ်လျှိုမှုကို ပြတ်ပြတ်သားသား ဆန့်ကျင်ပြီး တော်လှန်ရေးအင်အားစုများ တစည်းတလုံးတည်းရှိဖို့ တိုက်တွန်းလိုက်ပါတယ်။

မောင်သန်းမြရွှေ (၁၂ မေ ၂၀၂၃)