“လက်နက်ကိုင်တော်လှန်ရေးမှာရော မြေပေါ်၊မြေအောက် လှုပ်ရှားမှုအနေနဲ့ရော ဗမာပြည်ကွန်မြူနစ်ပါတီက ပါဝင်နေတယ်”

ကိုချို/Myanmar Now

စစ်အာဏာသိမ်းပြီးနောက် နိုင်ငံ၏အရှေ့မြောက်ပိုင်းဖြစ်သည့် ရှမ်းပြည်နယ်မောက်ပိုင်းတွင် ညီနောင်မဟာမိတ်တပ်ဖွဲ့များဦးဆောင်သည့်တပ်ဖွဲ့များနှင့် စစ်ကောင်စီတပ်များအကြား တိုက်ပွဲများပြင်းထန်နေသည်။

မြန်မာနိုင်ငံ လွတ်လပ်ရေးမတိုင်မီခေတ်ကပင်ပေါ်ပေါက်ခဲ့ပြီး နိုင်ငံ၏လွတ်လပ်ရေးသမိုင်းတွင် ရှေ့တန်းက ဦးဆောင်ပါဝင်ခဲ့သည့် ဗမာပြည်ကွန်မြူနစ်ပါတီ (ဗ.က.ပ)၏ လက်နက်ကိုင်တပ်များသည်လည်း အရှေ့မြောက်ဒေသတိုက်ပွဲများတွင် ညီနောင်မဟာမိတ်တပ်များနှင့်အတူ တိုက်ပွဲဝင်နေကြသည်။

၁၉၃၉ ခုနှစ်တွင်တည်ထောင်ခဲ့သည့် ဗမာပြည်ကွန်မြူနစ်ပါတီ (ဗ.က.ပ) သည် နိုင်ငံလွတ်လပ်ရေးရပြီးနောက် ၁၉၄၈ မှ စတင်ပြီး လက်နက်ကိုင်တော်လှန်ရေးကို ဆင်နွှဲခဲ့သောပါတီဖြစ်သည်။

၂၀၂၁ စစ်အာဏာသိမ်းပြီးနောက်တွင် ဗ.က.ပ၏ လက်နက်ကိုင်တပ်ဖြစ်သည့် ပြည်သူ့လွတ်မြောက်ရေး တပ်မတော် (PLA) ကို ပြန်လည်တည်ထောင်ခဲ့ပြီး စစ်ကိုင်းတိုင်းတွင်းခြေကုပ်ယူပြီး ယခုဖြစ်ပွားနေသည့် နိုင်ငံ အရှေ့မြောက်ပိုင်းကစစ်ပွဲများတွင် PLA တပ်ဖွဲ့ဝင်များလည်း တိုက်ပွဲဝင်နေကြသည်။

ဗမာပြည်ကွန်မြူနစ်ပါတီ (ဗ.က.ပ) ၏ ပြောရေးဆိုခွင့်ရှိသူ ရဲဘော်ဖိုးသံချောင်းကို လူထုသတင်းစာတိုက်ပိုင်ရှင် လူထုဦးလှနှင့် လူထုဒေါ်အမာတို့က မန္တလေးမြို့တွင် မွေးဖွားခဲ့သည်။

ကိုးကိုးကျွန်းပြန်နိုင်ငံရေးအကျဉ်းသားဟောင်းတစ်ဦးလည်းဖြစ်ပြီး စာရေးဆရာတစ်ဦးလည်းဖြစ်သူ ဗမာပြည် ကွန်မြူနစ်ပါတီ (CPB) ပြောရေးဆိုခွင့်ရှိသူ ရဲဘော်ဖိုးသံချောင်းကို နွေဦးတော်လှန်ရေးအပေါ် ဗ.က.ပ ၏ သဘောထား၊ လက်ရှိဖြစ်ပွားနေသည့် တရုတ်-မြန်မာနယ်စပ်ရှိစစ်များပွဲအရေး၊ တရုတ်နိုင်ငံ၏ မြန်မာ့နိုင်ငံရေး အပေါ် သဘောထားများကို Myanmar Now က မေးမြန်းထားသည်။

မေး။ ။ နွေဦးတော်လှန်ရေးကတဆင့်ပေါက်ဖွားလာတဲ့ လက်နက်ကိုင်တော်လှန်ရေးအပေါ်မှာ ဗမာပြည်ကွန်မြူနစ် ပါတီရဲ့သဘောထားကို သိပါရစေ။

ဖြေ။ ။ နွေဦးတော်လှန်ရေးကပေါက်ဖွားလာတဲ့ လက်နက်ကိုင်တော်လှန်ရေးမှာ ကျွန်တော်တို့ပါတီက ဆင်နွှဲခဲ့တဲ့ ပြည်သူ့ဒီမိုကရေစီလက်နက်ကိုင်တော်လှန်ရေးနဲ့ ခု ဖြစ်နေတဲ့ဟာတွေနဲ့တူညီတယ်လို့ ပြောနိုင်ပါတယ်။ စစ်အစိုးရ ဖြုတ်ချရေးပေါ့။ အဲဒါကြောင့် ထောက်ခံနိုင်ပါတယ်။ ကျယ်ပြန့်တဲ့ တစ်ပြည်လုံးက စစ်အုပ်စုရဲ့ဗိုလ်ကျလွှမ်းမိုးမှုနဲ့ စစ်ဗျူရိုကရက်တွေရဲ့ လက်ဝါးကြီးအုပ်ဖိနှိပ်သွေးစုပ်မှုများကို လက်မခံနိုင်တော့လို့ တော်လှန်ပုန်ကန်လာကြတာဖြစ်ပါတယ်။ သဘာဝကျကျပေါ်ပေါက်လာတဲ့ လက်နက်ကိုင်တော်လှန်မှုဖြစ်ပါတယ်။ ဗမာပြည်ကွန်မြူနစ်ပါတီရဲ့ လက်နက်ကိုင်တော်လှန်ရေးဟာစစ်တပ် လက်ဝါးကြီးအုပ် စစ်ဗျူရိုကရေစီအရင်းရှင်စနစ်ကို တိုက်ခိုက်ဖြိုခွင်းခဲ့ပြီး ပြည်သူလူထုအားလုံး လူမျိုးမရွေး ဘာသာမရွေး စည်းလုံးညီညွတ်ပြီး အခွင့်အရေးတန်းတူညီမျှဖို့အတွက် ပြည်သူ့ ဒီမိုကရေစီနိုင်ငံတော်သစ်တည်ထောင်ဖို့ဖြစ်လို့ နိုင်ငံရေးအတားအဆီးဖြစ်နေတဲ့ စစ်ဗျူရိုကရက်အရင်းရှင်စနစ်ဖြိုဖျက်ရေးမှာတူညီတယ်လို့ ပြောနိုင်ပါတယ်။ ကျွန်တော်တို့နဲ့ ခု လက်ရှိတော်လှန်ရေးလုပ်နေတဲ့လူတွေနဲ့ တူညီတယ်လို့ ပြောနိုင်ပါတယ်။ ဒါကြောင့်မို့လို့ ကျွန်တော်တို့အနေနဲ့ အားပေးထောက်ခံနိုင်သလို ပူးတွဲလုပ်ဆောင်လို့လည်းရပါတယ်။ ဗမာပြည်ကွန်မြူနစ်ပါတီအနေနဲ့က (စစ်လက်ဝါးကြီးအုပ်အရင်းရှင်စနစ်အောက်မှာ ဗမာပြည် ပြည်သူလူထုတွေ အဖိနှိပ်ခံဘဝကနေ သာယာဝပြောအောင်မတည်ဆောက်နိုင်ပါဘူး။ စစ်တပ်လက်ဝါးကြီးအုပ် အရင်းရှင်စနစ်က အဆိုးဆုံးပါ။ ဗမာပြည်ရဲ့လက်ရှိပြဿနာဟာ လူမျိုးရေးပြသနာမဟုတ်ဘူး။ စစ်တပ် လက်ဝါးကြီးအုပ်အရင်းရှင်စနစ်ကို ရန်သူအဖြစ်ထားတဲ့ လူမျိုးအသီးသီးထဲက အလုပ်သမား၊ လယ်သမား၊ မြို့နေဆင်းရဲသားနဲ့ အမျိုးသားဓနရှင်တွေချုပ်ကိုင်တဲ့အာဏာရဖို့ လုပ်ရမယ်)လို့ထင်ပါတယ်။သူတို့ရဲ့ အင်အားကြီးထွားလာဖို့ ခိုင်မာလာဖို့ ပိုအရေးကြီးတယ်လို့ထင်ပါတယ်။ ပြည်သူ့ဒီမိုကရေစီတော်လှန်ရေးတစ်ရပ်တည်ထောင်နိုင်မှသာလျှင် ပြည်သူတရပ်လုံး ချမ်းသာကြွယ်ဝနိုင်မယ့်အခြေအနေကို တည်ထောင်နိုင်မယ်။ အဲ့လို မဟုတ်ဘဲနဲ့ တခြားက အကူအညီပေးတာနဲ့ တခြားကထောက်ပံ့ပေးတာနဲ့ ကျွန်တော်တို့တော်လှန်ရေးကြီးအောင်မြင်မယ်လို့လဲ မမျှော်လင့်ဘူး။ အဲ့ဒီလိုမျိုးလည်း မဖြစ်စေချင်ဘူး။ အဓိကကတော့ ပြည်တွင်းက လူတန်းစားပြဿနာကိုဖြေရှင်းဖို့ပဲ။ စစ်အစိုးရမှာ ဗမာလူမျိုးကြီးဝါဒရှိတယ်ဆိုတာ အမှန်ပါပဲ။ ဒါပေမယ့် အဲဒါက စစ်အစိုးရပါ။ ဗမာပြည်သားတွေ မဟုတ်ပါဘူး။ ခုဆိုရင် ဗမာပြည်သားတွေရဲ့ အချက်အချာဒေသတွေမှာ စစ်အစိုးရက ဗမာလူမျိုးတွေကိုပဲ ရက်ရက်စက်စက်သတ်ဖြတ်နေတာ တွေ့နေရပါတယ်။ အရင်တုန်းက အဲဒီနေရာတွေမှာ လက်နက်ကိုင်တော်လှန်ရေး မရှိတော့ တိုင်းရင်းသားဒေသတွေမှာပဲ စစ်အစိုးရက ရက်ရက်စက်စက်သတ်ဖြတ်တာတွေရှိပါတယ်။ အခုတော့ လူမျိုးစုရော မြန်မာရောမရွေး သူတို့ကို ခုခံသူတိုက်ခိုက်သူမှန်သမျှကို ရက်ရက်စက်စက် သတ်ဖြတ်နေတယ်၊ ရက်ရက်စက်စက်လုပ်ကြံနေတယ်ဆိုတာကို အားလုံးမြင်တွေ့ရပြီးဖြစ်ပါတယ်။

မေး။ ။ ဗမာပြည်ကွန်မြူနစ်ပါတီရဲ့လက်နက်ကိုင်တပ်ဖြစ်တဲ့ P LA လည်းပေါ်ပေါက်လာပြီဆိုတော့ PLA ကို ဘယ်လို ဖွဲ့စည်းထားသလဲ။ ဗ.က.ပ ရဲ့ မြေအောက်လှုပ်ရှားမှုဆိုတာရော ဘာလဲ။

ဖြေ။ ။ ခုလောလောဆယ်မှာတော့ ကျွန်တော်တို့ပါတီရဲ့ လက်နက်ကိုင်တပ်ဖြစ်တဲ့ PLA ဆိုတဲ့ ပြည်သူ့လွတ်မြောက်ရေးတပ်မတော်က လက်နက်ကိုင်တော်လှန်ရေးအဆင့်အနေနဲ့ ပါဝင်နေပါတယ်။ ကျွန်တော်တို့ကတော့ မြေအောက်လှုပ်ရှားမှုသဘောတရားနဲ့ ပါဝင်နေပါတယ်။ ၂ မျိုးစလုံး ပါဝင်နေပါတယ်။ လက်နက်ကိုင်အနေနဲ့လည်း ပါတယ်။ မြေပေါ်မှာမြေအောက်လှုပ်ရှားမှုအနေနဲ့လည်း ပါပါတယ်။ ဗမာပြည်ကွန်မြူနစ်ပါတီရဲ့ မြေအောက်လှုပ်ရှားမှုအကြောင်းတွေက ကျွန်တော်ပြောခွင့်မရှိဘူးဗျ။ အဲဒါတွေက ကျွန်တော်တို့အတွက် ထိပ်တန်းလျှို့ဝှက်ချက်တွေ ဖြစ်လို့ပါ။ PLA ပေါ်ပေါက်လာတာကတော့ PLA ဟာ ကျွန်တော်တို့စည်းရုံးလို့ရတဲ့အင်အားစုတွေပါဝင်ပြီး ဖွဲ့စည်းထားတဲ့ ကျွန်တော်တို့ ရဲဘော်တွေကခေါင်းဆောင်ထားတဲ့ တပ်ပဲဖြစ်ပါတယ်။ ပါတီက တိုက်ရိုက်ချုပ်ကိုင်တယ်လို့ ပြောလို့ရပါတယ်။ အဲဒီတပ်ဟာ အရှေ့မြောက်မှာတင်လှုပ်ရှားနေတာ မဟုတ်ဘူး။ အဓိကအားဖြင့် ဗမာပြည်အလယ်ပိုင်းမှာလှုပ်ရှားနေတာ ဖြစ်ပါတယ်။ ကျွန်တော်တို့ရဲ့ အခြေခံစစ်မဟာဒေသတွေဖြစ်တဲ့ မ ၃ လုံးတို့ စစ်ကိုင်းတိုင်းတို့ အဲဒီလိုနေရာတွေမှာ ကျွန်တော်တို့ ဝင်ရောက်ပြီးလှုပ်ရှားနေတာ ဖြစ်ပါတယ်။ စစ်အုပ်စုကတော့ အကုန်လုံးကို ဗမာပြည်ကွန်မြူနစ်ပါတီကိုပဲ အိုးမဲသုတ်ပြီးတော့ အဲဒီဟာနဲ့ပဲ အကုန်လုံးကိုပေါင်းပြီးရောချနေတာပဲဗျ။ သူတို့ပြောတဲ့အချက်အလက်တွေထဲမှာ တစ်ချို့ကတော့ မှန်တာရှိချင်ရှိမယ်။ ဒါပေမယ့် တော်တော်များများကတော့ ပုံချတဲ့ဟာတွေ များပါတယ်။ သူတို့ ထုံးစံအတိုင်းပါပဲ။ အ ခုဆိုရင် တခြားပါတီတွေကို တိုက်စရာရှိတာရှိတော့ ဗမာပြည်ကွန်မြူနစ်ပါတီကအားနည်းလာပြီဆိုတော့ တခြား လက်နက်ကိုင်ရော လက်နက်မကိုင်ရော အားကြီးလာတဲ့ပါတီတွေကို တိုက်တာ ပိုများလာပါတယ်။

ဥပမာ NLD ပါတီကိုဆိုရင် သူတို့ ရက်ရက်စက်စက်ပိုပြီး တိုက်ခိုက်တယ်။ သူတို့ရဲ့ မီဒီယာတွေပေါ်မှာကြည့်လိုက်ရင် NLD ပါတီပေါ်မှာ တိုက်ခိုက်တာက ရာခိုင်နှုန်း ၇၀၊ ၈၀ ထက် မနည်းပါဘူး။ ကျွန်တော်တို့ကိုတိုက်တာက ရာခိုင်နှုန်း ၂၀၊ ၃၀ အဲဒီလောက်ပဲ ရှိကောင်းရှိပါလိမ့်မယ်။ ဆိုလိုတာက သူတို့ကတော့ သူတို့ရဲ့အဓိက ရန်သူပစ်မှတ်ကို သေသေချာချာသတ်မှတ်ပြီးတော့ အချိန်အခါအလိုက် အဓိကရန်သူကို အဓိကတိုက်ခိုက်တာဖြစ်ပါတယ်။ အဲဒါကိုတော့ ကျွန်တော်တို့မမေ့ဖို့ လိုအပ်ပါတယ်။

မေး။ ။ မြောက်ပိုင်းမဟာမိတ်တွေဆင်နွှဲနေတဲ့စစ်က တရုတ်နိုင်ငံရဲ့ထောက်ခံမှုကိုရရှိတယ်လို့ ပြောနေကြတယ်။ ဒီဒေသတွေမှာ ဒီမိုကရေစီလိုလားတဲ့လက်နက်ကိုင်တပ်တွေပေါ်ပေါက်လာဖို့ တရုတ်နိုင်ငံက တကယ်ပဲဆန္ဒရှိနေပြီလား။

ဖြေ။ ။ ကျွန်တော်သိထားတာ နားလည်ထားတာတခုကတော့ တရုတ်ပြည်အနေနဲ့ သူတို့နိုင်ငံရဲ့သမိုင်းမှာ ဗမာပြည်ရှိတဲ့ ဒီဘက်တကြောဟာ သူတို့ရဲ့နောက်ကျောဖြစ်ပါတယ်။ သူတို့ရဲ့နောက်ကျောမှာ သူတို့ကို အဓိကအန္တရာယ်ပေးတာတွေက နောက်ကျောကဝင်တဲ့ဟာတွေပဲ။ ဗမာပြည်ဘက်ကနေပြီး ဂျပန်တပ်တွေဝင်သွားခဲ့တာ။ ဒီနောက်ကြောမှာ ဂျပန်တပ်တွေလှုပ်ရှားပြီး တရုတ်တွေကိုဒုက္ခပေးခဲ့တာ သူတို့မမေ့ပါဘူး။ အဲ့ဒါကြောင့်မို့လို့ သူတို့ရဲ့ နောက်ကျောပိုင်းကို သူတို့ အမြဲလုံခြုံရေးအတွက်သတိထားပါတယ်။ ဟို အရှေ့ဘက်ပိုင်းကတော့ သူတို့ ရင်ဆိုင်နိုင်ပါတယ်။ နိုင်လည်း နိုင်နေတယ်။ နောက်ကျောပိုင်းမှာကတော့ သူတို့အတွက် အမြဲတမ်းသတိထားမှာပါ။ နယ်စပ်တလျှောက်မှာ သာယာဝပြောစေချင်မှာ ဒါကတော့သဘာဝကျတယ်လို့ ထင်ပါတယ်။ နားလည်နိုင်တယ်လို့လည်း ထင်ပါတယ်။

မေး ။ ။ တရုတ်က ခေတ်သစ်ပိုးလမ်းမလို့ခေါ်တဲ့ BRI စီမံကိန်းကိုဖော်ဆောင်နေတယ်။ ခုဖြစ်နေတဲ့ အရှေ့မြောက်ပိုင်းကစစ်ပွဲတွေကလည်း တရုတ်ကစီစဉ်နေတဲ့ မြန်မာ-စင်္ကြံလမ်းလို့ခေါ်တဲ့ လမ်းကြောင်းတစ်လျှောက်မှာ ဖြစ်နေတယ်။ ဒါကြောင့် ခုဖြစ်နေတဲ့စစ်ဟာ တရုတ်နိုင်ငံက ရပ်တန့်စေချင်တဲ့အချိန်မှာ ဒီစစ်ဟာ ရပ်တန့် သွားနိုင်မလား။

ဖြေ။ ။ အဲဒီလိုတော့ မလုပ်ကြဘူးထင်ပါတယ်။ သူတို့လည်းပဲ ကိုယ့်လူတွေအကျအဆုံးခံထားတဲ့ဟာတွေရှိနေတာကို အဲဒီဟာတွေအပေါ်မှာပိုပြီးတော့ သစ္စာရှိကြလိမ့်မယ်လို့ ထင်ပါတယ်။ တရုတ်ပြည်ရဲ့ ပိုးလမ်းမစီမံကိန်းဟာ ခုအချိန်အခါမှာတော့ ကမ္ဘာက နိုင်ငံပေါင်း ၁၃၀ ကျော် ပူးပေါင်းလုပ်ကိုင်နေကြတာဖြစ်တဲ့အတွက် ဒီလမ်းမကြီးဟာ ဗမာပြည်အတွက်လည်း အကျိုးစီးပွားရှိတဲ့စီမံကိန်းတစ်ခုလို့ ပြောနိုင်ပါတယ်။ ဗမာပြည်က ဒီဟာမှာ သေသေချာချာ ကိုယ်ရအောင်လုပ်နိုင်လို့ရှိရင် အစိုးရကလူတွေနဲ့ဒေသခံတချို့သာ စားရသောက်ရအောင်လုပ်တာမျိုးမဟုတ်ဘဲနဲ့ နိုင်ငံကပြည်သူအားလုံး ခံစားရအောင်လုပ်လို့ရှိရင် ဒီစီမံကိန်းက ကျွန်တော်တို့တိုင်းပြည်အတွက် ကျွန်တော်တို့နိုင်ငံသားတွေအတွက်လည်း အကျိုးရှိမှာပါပဲ။ တရုတ်ပြည်ကတော့ ဒီလို တခြားနိုင်ငံနဲ့ပူးပေါင်းပြီး လုပ်တဲ့ လုပ်ငန်းစီမံကိန်းတွေရှိတဲ့အတွေ့အကြုံတွေ အများကြီးရှိပါတယ်။ ဒါကြောင့် တရုတ်ပြည်အတွက်တော့ ထူးထူးခြားခြားထိခိုက်စရာမရှိဘူးလို့ ထင်ပါတယ်။ ဗမာပြည်မှာ ခုဆိုရင်တော့ ဒီလုပ်ငန်းကရပ်နေခြင်းဖြစ်တာတော့ အမှန်ပါပဲ။ အဲဒီလိုရပ်နေရုံနဲ့ကတော့ တရုတ်ပြည်ရဲ့စီးပွားရေးပြိုလဲသွားတာ သိပ်ထိခိုက်သွားတာမျိုးတော့ မဖြစ်လောက်ပါဘူး။ ဗမာပြည်ရဲ့ပြဿနာကို နယ်စပ်လက်နက်ကိုင်အင်အားစုများလောက်ကို အားကိုးမှီခိုနေရုံနဲ့က တရုတ်ပြည်က သူ့ပြသနာကို သူတို့မဖြေရှင်းနိုင်လောက်ဘူးဆိုတာကို သူတို့သိပါတယ်။ ဗမာပြည်ရဲ့ နိုင်ငံရေး ပြဿနာဟာ ဗမာပြည်သားတွေဖြေရှင်းမှပြီးမယ်ဆိုတာလည်း သူတို့ သိပါတယ်။ အဲဒီတော့ ဗမာပြည်နိုင်ငံရေး ပြဿနာကို ငြိမ်းချမ်းစွာဖြေရှင်းတာမျိုးဖြစ်အောင်လို့ သူတို့က တိုက်တွန်းနေမယ်လို့ထင်မိပါတယ်ခင်ဗျ။

မေး ။ ။ ၁၉၉၀ ရွေးကောက်ပွဲမှာ တရုတ်က ရွေးကောက်ပွဲရလဒ်ကို ပထမဆုံးအသိမှတ်ပြုခဲ့ဖူးသလို ဒေါ်အောင်ဆန်းစုကြည်တို့ NLD အစိုးရတက်ချိန်မှာလည်း ကော်ဇောနီခင်းပြီး ကြိုဆိုခဲ့ဖူးပါတယ်။ BRI ဆယ်နှစ်ပြည့် အခမ်းအနားမှာလည်း အာဏာသိမ်းစစ်ခေါင်းဆောင်ကို မဖိတ်ကြားခဲ့တဲ့အခြေအနေမျိုးနဲ့ ထုတ်ဖော်ပြသတာမျိုးလည်းရှိပါတယ်။ တရုတ်နိုင်ငံရဲ့သဘောထားအပေါ် ရဲဘော်ဖိုးသံချောင်းတို့ မြင်တဲ့အမြင်လေးကို ပြောပြပေးပါဦး။

ဖြေ။ ။ ကျွန်တော်ထင်တာတော့ တရုတ်ပြည်က ဗမာပြည်ရဲ့နိုင်ငံရေးမှာ နိုင်ငံရေးသဘောမျိုးနဲ့ သူတို့ ဘာမှ ဝင်ပါမယ် မထင်ဘူးဗျ။ ဗမာပြည်သားတွေ ကိုယ့်ကံကြမ္မာ ကိုယ်ဖန်တီးတာကို သူတို့စောင့်ကြည့်နေမယ့် သဘောရှိတယ်။ ဘယ်ပါတီနောက်က ရပ်မယ်။ ဘယ် အဖွဲ့အစည်းနောက်က ရပ်မယ် အဲဒီလိုမျိုး သူတို့ အတိအကျသတ်မှတ်ထားတာမျိုး မရှိပါဘူး။ အလားတူပဲ ဘယ်သူ့ကိုတော့ ဆန့်ကျင်မယ်ဆိုတာမျိုးလည်း အတိအကျ သေသေချာချာ သတ်မှတ်ပြီးလုပ်နေတာမျိုးမရှိဘူးလို့ ထင်တယ်။ စစ်အစိုးရရှိနေတဲ့အတွက်ကြောင့် သူတို့မှာ မကောင်းဘူးဆိုတာတော့ သူတို့သိတယ်။ အခုလိုမျိုး နယ်စပ်တွေမှာတိုက်ပွဲတွေဖြစ်နေတာ သူတို့ကို အများကြီးထိခိုက်တယ်ဆိုတာ သူတို့ သိတယ်။ သူတိုပြည်သားတွေ ဒီဘက်မှာဆိုရင် ကျောင်းတွေပိတ်ရ ဗုံးဆန်တွေကျလို့ထွက်ပြေးရ ထိခိုက်ဒဏ်ရာရတာတွေရှိလားတောင်မသိဘူး။ အဲ့ဒီလိုမျိုးတွေ ကြားနေရတယ်။ အဲဒီတော့ ဗမာပြည်ဘက်ကသူတွေ ပြေးဝင်လာတာကလည်း သူတို့အတွက် တရုတ်ပြည်က လူဦးရေးပြဿနာအမြဲတမ်းပေါ်ပေါက်နေတဲ့တိုင်းပြည်ပါ။ သူတို့ အဲဒါကို သဘာဝကျစွာပဲစိုးရိမ်ပါတယ်။ ဒီလိုကူးဝင်လာတွေရှိရင် စစ်ပြေးတွေပေါ့၊ ရောက်လာရင် သူတို့နောက်ကနေပြီး သူတို့ကိုကူညီပါတယ်ဆိုတဲ့ အနောက်နိုင်ငံအင်အားစုတွေလည်း ပါလာတတ်တာကို တရုတ်က သိပါတယ်။ အဲဒီ အင်အားစုတွေက တရုတ်ပြည်ကိုဆန့်ကျင်တဲ့အလုပ်တွေလုပ်တယ်ဆိုတာလည်း သူတို့က သိတယ်။ အဲဒီတော့ သူတို့ဘက်က စဉ်းစားတာက အဲဒါတွေရှိနေတယ်။ နယ်စပ်မှာ စစ်ကြီးကြီးကျယ်ကျယ်ဖြစ်တာကို အမှန်အတိုင်းပြောရရင်တော့ သိပ်မလိုလားပါဘူး။ တရုတ်ပြည်နဲ့ဗမာပြည်ဟာ နှစ်ကာလကြာရှည်စွာပဲ ချစ်ခင်ရင်းနှီးစွာနေခဲ့ကြတာပါ။ အရင် အစိုးရတွေ ဗိုလ်နေဝင်းအပါအဝင် အဆက်ဆက်အစိုးရဟာ တရုတ်ပြည်နဲ့ အင်မတန်တည့်အောင် ပေါင်းခဲ့ကြတာပါ။ အမျိုးမျိုး တရုတ်ပြည်ကို ရင်းနှီးအောင်လုံးပန်းခဲ့ကြတာတွေရှိပါတယ်။ တိုင်းပြည် ၂ ပြည်၊ ပြည်သူ ၂ ရပ်ဖြစ်တဲ့အတွက် သူတို့အကျိုးစီးပွားနဲ့ ကျွန်တော်တို့ဗမာပြည်ကအကျိုးစီးပွားဟာ ထပ်တူကျဖို့ဆိုတာကတော့ မဖြစ်နိုင်ပါဘူး။ ကိုယ့်အကျိုးစီးပွားနဲ့ ကိုယ်ဖြစ်မှာပါ။ ဒါပေမယ့် အိမ်နီးချင်းကောင်းတွေဖြစ်တဲ့အတွက် ကောင်းမွေ ဆိုးမွေကို တစုံတရာရိုက်ခတ်မှုရှိနိုင်ပြီး မကောင်းတဲ့အပူမီးတွေလည်းကူးစက်နိုင်တာ သဘာဝကျပါတယ်။ ကျွန်တော်တို့ ၂ နိုင်ငံလုံးက ငြိမ်းချမ်းစွာအတူယှဉ်တွဲနေထိုင်ရေး ဘန်ဒေါင်းမူ ၅ ရပ်ကို စတင်ရေးဆွဲခဲ့တဲ့နိုင်ငံတွေထဲမှာ အပါအဝင်ဖြစ်ပါတယ်။ အဲဒါကြောင့် အဲဒီအတိုင်းပဲနေဖို့ကြိုးစားနေကြဆဲလို့မြင်ပါတယ်။ တရုတ်နယ်စပ် တကြောမှာ စစ်တပ်နဲ့တိုက်ပွဲဖြစ်နေရတဲ့ အဓိကပြဿနာက ဗမာပြည်ဘက်မှာ စစ်တပ်အစိုးရကြောင့်ဖြစ်တာပါ။ ဗမာပြည်ထဲက နိုင်ငံရေးပြဿနာမပြေလည်လို့ ဒီတိုက်ပွဲတွေဖြစ်တာပါ။ တရုတ်ပြည်နဲ့တော့ ဘာမှမဆိုင်ပါဘူး။ ဒီလို တိုက်ပွဲတွေဖြစ်တဲ့အကြောင်းအရင်း စစ်တပ်တွေရှိနေတာ ဒီမိုကရေစီမရှိတာဟာ ပြည်သူလူထုရဲ့ သာမန်အခွင့်အရေးတွေဆုံးရှုံးနေတာ အဲဒါတွေကိုဖြေရှင်းနိုင်မှ နယ်စပ်တကြောကတိုက်ပွဲတွေ ပျောက်သွားမှာပါ။ ဒါကို တရုတ်ပြည်ဘက်ကလည်း ခုအခါမှာ သဘောပေါက်လာတဲ့ပြောဆိုလိုတဲ့ အသံတွေကြားရပါတယ်။

မေး ။ ။ ကျွန်တော်တို့နိုင်ငံက တရုတ်နဲ့အိမ်နီးချင်းဖြစ်သလို နိုင်ငံရဲ့တခြားတစ်ဖက်မှာလည်း အနောက်အုပ်စု နိုင်ငံတွေနဲ့ ရင်းနှီးတဲ့နိုင်ငံတွေ ရှိနေပါတယ်။ ခုလို တရုတ်နယ်စပ် အရှေ့မြောက်မှာ တရုတ်နဲ့နီးစပ်တဲ့ လက်နက်ကိုင်တပ်တွေနဲ့ ဖြစ်နေတဲ့စစ်ကြောင့် အနောက်နိုင်ငံတွေဟာ စစ်အစိုးရနဲ့နီးစပ်သွားနိုင်ပါသလား။ ရဲဘော် ဖိုးသံချောင်း တို့ ဗ.က.ပ ခေတ်တုန်းကရော ဒီလိုအခြေအနေမျိုးတွေ ကြုံခဲ့ဖူးပါသလား။

ဖြေ။ ။ ခုခေတ်တော့ ကျွန်တော်မပြောချင်ဘူး။ အရင်တုန်းကတော့ ရှင်းရှင်းပြောရရင် ဗိုလ်နေဝင်းက အစ ဗမာပြည်က အုပ်စိုးသူလူတန်းစားဟာ အနောက်နိုင်ငံတွေကို အားကိုးတာပဲ။ အဲဒီဟာတွေနဲ့ ပေါင်းချင်တာပဲ။ အဲဒီက အကူအညီတွေကို လိုချင်တာပဲ။ တပည့်ခံချင်တာပေါ့ တည့်တည့်ပြောရရင်တော့။ ဒါပေမယ့် အခြေအနေတွေ အရသာ တရုတ်ပြည်တို့ဘာတို့ ရုရှရောအပါအဝင်ပေါ့ ပြုံးပြနေရတာ။ အမှန်ကတကယ်က သူတို့လိုချင်တာက အဲဒီဘက်က ( အနောက်အုပ်စု) အကူအညီတွေပဲ။ ဒါကြောင့်မို့လို့ တရုတ်-ဗမာအရေးအခင်းတွေလည်း ဗိုလ်နေဝင်းက တမင် ဖန်တီးခဲ့တာရှိတယ်။ မတော်တဆဖြစ်ပေါ်လာတာ မဟုတ်ဘူး။ ဗိုလ်နေဝင်းက ဖန်တီးတာဖြစ်တယ်။ အဲဒီလို ဖန်တီးလို့ပေါ်ပေါက်လာတဲ့ တရုတ်-ဗမာအရေးအခင်းကြောင့် ဗမာပြည်သားတွေက တရုတ်ပြည်သားတွေအပေါ်မှာ နာကျည်းလာတာမျိုးဖြစ်လာတာ အဲဒါကို သူတို့ကသိပ်သဘောကျတယ်။ ဒါပေမယ့်ကိစ္စတွေက အဲဒီလောက်မှာတင်ရပ်မနေဘဲ တခြားဟာတွေပါဆက်ဖြစ်လာတော့ သူတို့လည်း ခုတော့ အဲဒီကနေ သင်္ခန်းစာတွေထုတ်ထားတာ ရှိသင့်သလောက်တော့ ရှိမယ်ထင်ပါတယ်။ အခြေခံအားဖြင့်တော့ သူတို့က အနောက်အုပ်စုကို အဖေခေါ်ချင်နေတုန်းပဲ။ ဒါပေမယ့် တရုတ်ပြည်ကရတာကိုလည်း ယူချင်တယ်။ အကျိုးစီးပွားကို ဘယ်ဘက်ကရရ ယူမယ်ဆိုပြီးတော့ အခုကတော့ တိုင်းပြည်သိပ်ဆင်းရဲနေတဲ့အခါမှာ သူတို့က ဝင်ငွေတွေထိခိုက်နေတဲ့အခါမှာ ၂ ဖက်စလုံးကို ကြည်ဖြူအောင်ကြိုးစားမှာတော့ သေချာတယ်။ သူတို့ရဲ့ အဓိကအဖေခေါ်ချင်တာကတော့ အနောက်အုပ်စုနိုင်ငံတွေလို့ပဲ ပြောရမယ် ထင်ပါတယ်။ ခုကတော့ ရုရှပေါ့။ ရုရှအပါအဝင်ပေါ့။ ရုရှကလည်း သူတို့ဖြစ်စေချင်သလောက်နီးပါး အကူအညီတွေ ပေးနေတာ ရှိပါတယ်။

မေး ။ ။ ခု လက်တလော တိုက်ပွဲတွေပြင်းထန်နေတဲ့ အရှေ့မြောက်ဒေသဟာ တချိန်က ဗ.က.ပရဲ့ ခြေကုပ်ဒေသတွေဖြစ်ခဲ့ဖူးသလို ဒီတပ်တွေဟာလည်း ဗ.က.ပ ကနေပေါက်ဖွားလာတဲ့တပ်တွေဖြစ်တော့ ဗ.က.ပ အတွက်ရော တစ်ချိန်ကရှိခဲ့ဖူးတဲ့ ခြေကုပ်ဒေသတွေပြန်ရတော့မှာလား။

ဖြေ။ ။ လက်ရှိအချိန်မှာ ပြည်သူတွေရဲ့တော်လှန်ရေးက အောင်ပွဲရတော့မှာဆိုပြီး တစ်ချို့ကပြောကြတာတွေရှိကြမှာပဲ။ ယူဆတာတွေလည်းရှိကြမယ့်လို ထင်ပါတယ်။ လပိုင်းပဲ ပြောလိုပြော၊ နှစ်ပိုင်းပဲ ပြောလိုပြော အမျိုးမျိုး ပြောနေကြတာကြားပါတယ်။ ဒါပေမယ့် ကျွန်တော်တို့အမြင်ကတော့ ခုချိန်က လမ်းခုလပ်မှာ ကြိုးစားနေရဆဲပဲဆိုရင် အသင့်တော်ဆုံးအမှန်ကန်ဆုံးဖြစ်မယ် ထင်ပါတယ်။ လက်ရှိ ကိုးကန့်တပ်ဖွဲ့က သူတို့ဒေသက သူတို့လက်လွတ်သွားတာကို ပြန်ရတော့မယ်လို့မျှော်လင့်ချက်ရှိတာက သဘာဝကျပါတယ်။ ဒါပေမယ့် အခုကတော့ သူတို့ တိုက်နေရဆဲ ဖြစ်ပါတယ်။ ရန်သူ့အင်အားဟာ ဘယ်လိုထုတ်သုံးလာမယ်ဆိုတာကို သူ့ဘက်ကထုတ်သုံးနိုင်တဲ့ အခြေအနေ ဘယ်လောက်ရှိတယ်ဆိုတာကို ကျွန်တော်တို့က သေချာမသိပါဘူး။ ကိုးကန့်ကို ကျွန်တော်တို့ပြန်ရခဲ့ရင်လည်း စစ်အုပ်စုအားလုံးကို တပြည်လုံးကိုမချေမှုန်းနိုင်သေးသမျှ အေးအေးဆေးဆေးနေလို့ မရဘူး။ ပိုင်ပြီကွလို့ နေလို့မရဘူးလို့ ထင်ပါတယ်။ ကျွန်တော်တို့ ပြီးခဲ့တဲ့ပြည်တွင်းစစ်သမိုင်း နှစ် ၇၀ သမိုင်းမှာ ပြည်ကြည့်လိုက်ရင်လည်း တစ်နေရာကို လက်ကိုင်အပိုင်ကိုင်ထားနိုင်တယ်ဆိုပေမယ့် အာမခံချက်ဆိုတာက တပြည်လုံးမရမချင်း ကျွန်တော်တို့အတွက် မရသေးပါဘူး။ ကျွန်တော်တို့ အရှေ့မြောက်စစ်ဒေသကို ပိုင်ပိုင်နိုင်နိုင်ချုပ်ကိုင်နိုင်ခဲ့တဲ့ ပဲခူးရိုးမမှာ ဗမာပြည်အလယ်ပိုင်းမှာ မြစ်ဝကျွန်းပေါ်မှာ အများကြီးရှိခဲ့ဖူးပါတယ်။ အရင်ကတော့ စစ်အုပ်စုနဲ့စစ်အစိုးရရယ်လို့ ရန်ကုန်မှာပေါ့၊ ရှိနေသမျှကာလပတ်လုံးကတော့ ကျွန်တော်တို့ရထားတယ်ဆိုတဲ့နေရာတွေဟာ အပိုင်လို့ပြောလို့ မရပါဘူးခင်ဗျ။ သူတို့ကို အဲဒီကပြည်သူတွေရဲ့ထောက်ခံမှု ဘယ်လောက်ရသလဲ အဲဒီအပေါ်မှာနဲ့ တွက်ရမယ်ထင်ပါတယ်။ ကျွန်တော်တို့တုန်းကတော့ ပြည်သူလူထုရဲ့ထောက်ခံမှုရလို့ ရပ်တည်နိုင်ခဲ့တာဖြစ်ပါတယ်။ ခု အင်အားစုတွေလည်း ကျွန်တာ်တို့ရခဲ့သလို ပြည်သူလူထုရဲ့ထောက်ခံမှု ရရှိမယ်ဆိုရင်တော့ ကျွန်တော်တို့ထက်တောင် ပိုလုပ်ကောင်းလုပ်နိုင်ပါလိမ့်မယ်။ အရေးကြီးတာက ပြည်သူလူထုရဲ့ထောက်ခံမှုရဖို့။ တပြည်လုံးမှာရှိတဲ့ နိုင်ငံရေးအင်အားစုတွေရဲ့ ထောက်ခံမှုရဖို့ ညီညွတ်မှုရဖို့ အဲဒါ အရေးအကြီးဆုံးလို့ထင်ပါတယ်။ အရင်တုန်းကတော့ ကျွန်တော်တို့က အရှေ့ဘက်က ဝ နယ်ရော မုန်းလားဘက်ရော မုန်းကိုးတို့ဘာတို့ဘက်ရော ဖြန့်ထားနိုင်တော့ ရန်သူ့အင်အားကို အဲဒီဘက်မှာ အများကြီးတိုးပြီးဆွဲထားနိုင်တယ်။ ခုကတော့ ရန်သူက သူ့အင်အားတွေကို ကိုးကန့်ဘက်ကိုဆွဲပြီးသွင်းထားနိုင်တယ်။ အဲဒီလို မတူညီတဲ့ အခြေခံအချက်အလက်တွေရှိပါတယ်။ အခုဟာက ကိုးကန့်တွေရင်ဆိုင်နေရတာက ပိုပြီးတော့တင်းမာတဲ့ လက်နက်အင်အားလည်းပိုကောင်းတဲ့ရန်သူတပ်တွေလို့ ထင်ပါတယ်။

All reactions:

301Aung Gyi, Kyaw Myaing Linn and 299 others