တပ်တည်ဆောက်ရေးလမ်းညွှန်တချို့
ငြိမ်းမောင်ဦး
(ဗမာပြည် ကွန်မြူနစ်ပါတီ ၈၅ နှစ်မြောက်ပါတီမွေးအထိမ်းအမှတ်အဖြစ်ထုတ်ဝေမည့် အရေးတော်ပုံဂျာယ်နယ်တွင် ထည့်သွင်းဖော်ပြမည့် ဆောင်းပါး)
၁၉၈၉-ခုနှစ်ကဖြစ်ပွားခဲ့တဲ့ဆုံးရှုံးမှုကြီးဟာ ပါတီသမိုင်းမှာ အကြီးမားဆုံးအထိနာမှုကြီးဖြစ်ခဲ့တယ်။ ထိချက်ပြင်းလှတဲ့ တော်လှန်ရေးလောကဓံမှာ ပါတီဟာအလူးအလဲခံခဲ့ရတယ်။ လက်နက်ကိုင်တော်လှန်ရေး(AS) ဆုံးရှုံးခဲ့ရသလို အခြေခံဒေသ၊ တပ် အားလုံးနီးပါးဆုံးရှုံး ပျောက်ကွယ်သွားခဲ့ရပေမယ့် ပြည်သူ့ဒီမိုကရေစီတော်လှန်ရေး(PDR) အလံကို ဆက်လက်ကိုင်စွဲပြီး( UG ) မြေအောက်ပါတီအနေနဲ့ ဆက်လက်ရပ်တည်ခဲ့တယ်။ ရန်သူကလက်နက်နဲ့ဖိနှိပ်လာရင် လူထုကလက်နက်နဲ့ တုံ့ပြန်တိုက်ခိုက်တာတရားတယ်ဆိုတဲ့မူကိုတလျှောက်လုံး ရပ်ခံခဲ့တယ်။ ရေရှည်မြှုပ်နှံ အခွင့်အခါကောင်းကိုစောင့် ဆိုတဲ့လမ်းညွှန်အတိုင်း အခွင့်အလမ်းကောင်းကိုစောင့်ရင်း (AS) လက်နက်ကိုင်တော်လှန်ရေးပြန်လည်ရှင်သန်လာဖို့အခိုင်အမာ စည်းရုံးပြင်ဆင်ခဲ့တယ်။
အနှစ် ၃၀ ကျော် ယူဂျီပါတီအဖြစ် လူထုကြားမှာရပ်တည်ရင်း ဥပဒေတွင်း ဥပဒေပ လူထုလူတန်းစားတိုက်ပွဲများမှာ ပေါင်းစပ်ပါဝင် လှုပ်ရှားခဲ့တယ်။ …၂၀၂၁-ခုနှစ် ဖေဖေါ်ဝါရီလမှာတော့ ပြည်သူတရပ်လုံးရဲ့အုံကြွမှုကြီးနဲ့အတူနိုင်ငံရေး ဒီရေမြင့်မှုကြီးတရပ်ဖြစ်ပေါ်လာပြီး တပြည်လုံးအနှံ့အပြားလက်နက်ကိုင်အုံကြွတိုက်ခိုက်မှုတွေပေါ်လာခဲ့တယ်။ ပါတီအနေနဲ့ ဒီအခွင့်အလမ်းကောင်းကို မိမိရရဆုပ်ကိုင်ခဲ့တယ်။ တော်လှန်တဲ့ပြည်သူ့စစ်ပွဲကို လက်တွေ့ဦးဆောင်ဖို့ပြတ်ပြတ်သားသားဆုံးဖြတ်ပြီး ပြည်သူ့လွတ်မြောက်ရေးတပ်မတော်(PLA)ကို ၂၀၂၁-ခုနှစ် မတ်လ(၁၅)ရက်နေ့မှာ ပြန်လည်ဖွဲ့စည်းခဲ့တယ်။ လက်နက်ကိုင်တိုက်ပွဲကိုအဓိကထား တခြားတိုက်ပွဲသဏ္ဌာန်တွေနဲ့ပေါင်းစပ်ဆိုတဲ့ နည်းပရိယာယ်လမ်းစဉ်က လက်တွေ့လမ်းညွှန်ဖြစ်လာချိန်မှာ တပ်တည်ဆောက်ရေး စာမျက်နှာဟာ အရေးကြီးတဲ့.. ရှေ့တန်းရောက်တဲ့ ပြဿနာဖြစ်လာတယ်။
၁။ တပ်တည်ဆောက်ရေးရဲ့အရေးကြီးမှု
(၁) မျက်မှောက်ကာလမှာဆင်နွှဲနေတဲ့ ဗမာပြည်ပြည်သူတရပ်လုံးရဲ့ လက်နက်ကိုင်အုံကြွမှုကြီးဟာ ခေတ်က ပြဋ္ဌာန်းလိုက်တဲ့သမိုင်းပေးတာဝန်ကြီးဖြစ်တယ်။ ဒီသမိုင်းပေးတာဝန်ကို ထမ်းဆောင်နိုင်မလား မထမ်းဆောင်နိုင်ဘူးလားဆိုတာ ပါတီသမိုင်းရဲ့အဆင့်နေရာကို အဆုံးအဖြတ်ပေးပါလိမ့်မယ်။ ဒါကြောင့် တပ်ကိုတပ်နဲ့တူအောင်တည်ဆောက်ရေးဟာ ပါတီအတွက်အရေးကြီးတဲ့တာဝန်တရပ် ဖြစ်လာပါတယ်။
(၂) ပြည်သူ့စစ်ပွဲထဲမှာ လှုပ်ရှားတိုက်ခိုက်နေတဲ့(PLA) ဟာ ပါတီနဲ့ပြည်သူအကြားက ပေါင်းကူးတံတား ဖြစ်လာတယ်။ လက်တွေနိုင်ငံ ရေးမှာ(PLA) ရဲ့လှုပ်ရှားမှုဟာ ကျယ်ပြန့်တဲ့ လူထုကြားမှာထင်ဟပ်နေတဲ့ ပါတီရဲ့ပုံရိပ်ပဲဖြစ်တယ်။
(၃) စစ်ရေးကိုဗဟိုပြုရေးဟာ ဗမာပြည်နိုင်ငံရေးရဲ့ လက်တွေ့တောင်းဆိုချက်ဖြစ်လာတယ်။ မှန်ကန်တဲ့စစ်ရေးလမ်းစဉ်ကိုအကောင်အထည်ဖော်ဖို့အတွက် တပ်ကိုတပ်နဲ့တူအောင်တည်ဆောက်ရလိမ့်မယ်။ မိမိထက်အဆမတန်အင်အားကြီးတဲ့ရန်သူကိုရင်ဆိုင်ဖို့အတွက် နိုင်ငံရေး အတွေးအခေါ်ခိုင်မာတဲ့ တိုက်စွမ်းရည်ထက်မြက်တဲ့တပ်ဖြစ်လာအောင် တည်ဆောက်ရမှာဖြစ်တယ်။
(၄) ပြည်သူတရပ်လုံးရဲ့ လက်နက်ကိုင်အုံကြွမှုကြီးရှိနေပေမယ့် ပါတီအနေနဲ့ ယူဂျီစည်းရုံးရေးသဏ္ဍာန်နဲ့ ဖြတ်သန်းခဲ့ရတာကြောင့် မိမိတို့ရဲ့အတ္တဘာဝက တစ်ကပြန်စနေရတဲ့ အခြေအနေဖြစ်တယ်။ခေတ်စားနေတဲ့ လစ်ဘရယ်အတွေးအခေါ်လေထု(ကွန်မြူနစ်ဆန့်ကျင်ရေးအတွေးအခေါ်) ရဲ့စိန်ခေါ်ချက်တွေကလည်း သည်းသန်ပြင်းထန်နေတယ်။ ရန်သူဆန့်ကျင်ရေးစိတ်ဓာတ်နဲ့ တပ်ထဲကိုဝင်ရောက်လာကြတယ်ဆိုပေမယ့် အတွးအခေါ် အယူအဆတွေက အမျိုးမျိုးပါလာကြတယ်။ ဒါကြောင့် တပ်ကို မှန်ကန်တဲ့နိုင်ငံရေးအတွေးအခေါ် ဦးတည်ချက်ရှိတဲ့တပ် စည်းကမ်းလိုက်နာမှုကောင်းတဲ့တပ်ဖြစ်အောင် တည်ဆောက်ရေးအတွက် အတွေးအခေါ်တည်ဆောက်ရေးကို လက်ဦးမှုရှိရှိ လုပ်ဖို့လိုပါတယ်။
(၅) အခြေအနေအရ အသစ်ပြန်ထူထောင်ရတဲ့တပ်ဖြစ်လို့ ..တပ်မှူးတပ်သားအားလုံးကို ပါတီကိုချစ်မြတ်နိုးတဲ့စိတ်ဓာတ် ပါတီကိုယုံကြည်တဲ့စိတ်ဓာတ် (ပါတီစိတ်ဓာတ်) နဲ့ ပါတီဗဟိုဝန်းရံရေးစိတ်ဓာတ်ကို ခိုင်မာအောင် တည်ဆောက်ဖို့ပညာပေးဖို့ လိုအပ်နေပြီဖြစ်တယ်။
အထက်ဖေါ်ပြပါအချက်တွေဟာ တပ်တည်ဆောက်ရေးရဲ့ အရေးကြီးမှုကို ရည်ညွှန်းတဲ့ အချက်တွေပဲဖြစ်ပါတယ်။
၂။ တပ်တည်ဆောက်ရေးမှာ အခြေခံရမဲ့လမ်းညွှန်သဘောတရား
တပ်တည်ဆောက်ရေးရဲ့ဦးတည်ချက်၊ အတွင်းသဘောနဲ့လက်တွေ့ကျင့်သုံးရမည့်နည်းနာ စတာတွေကိုချမှတ်ဖို့အတွက် ကျင့်သုံးရမယ့်လမ်းညွှန်သဘောတရားက မာ့က့်စ်ဝါဒ (အနုပဋိလောမရုပ်ဝါဒ သမိုင်းရေးရုပ်ဝါဒ)ပဲဖြစ်ပါတယ်။ အခိုင်အမာအခြေအနေကို အခိုင်အမာကျစွာချဉ်းကပ်ပြီး ( ရပ်တည်မှု.အမြင်.နည်းနာ) ဆိုတဲ့ မာက့်စ်ဝါဒရဲ့ သော့ချက်သုံးရပ်နဲ့ ပိုင်းခြားစိတ်ဖြာသုံးသပ်သွားရမှာဖြစ်ပါတယ်။
တည်ဆောက်ရေးရဲ့အတွင်းသဘောဟာ တိုက်ပွဲပဲဖြစ်ပါတယ်။ တိုက်ပွဲမပါတဲ့ တည်ဆောက်ရေးဆိုတာ အတုအယောင်သာဖြစ်ပါတယ်။ မိမိအင်အားကိုတည်ဆောက်ရေးအတွက် ရန်သူနဲ့တိုက်ပွဲဆင်ရတာ…..ပစ္စည်းမဲ့အတွေးအခေါ်ကိုတည်ဆောက်ဖို့ ဓနရှင်အတွေးအခေါ်ကိုတိုက်ပွဲဆင်ရတာ…စတဲ့ ဆန့်ကျင်ဖက်တွေရဲ့ ဒွန်တွေနေမှုနဲ့တိုက်ပွဲကတဆင့် ဖြစ်ပေါ်တိုးတက်သွားတဲ့ဖြစ်စဉ်တွေများစွာဖြတ်ကျော်သွားရမှာဖြစ်ပါတယ်။ စစ်အတတ်ပညာသင်ကြားရေးနဲ့ပတ်သက်ရင်တော့ …စစ်ပညာကို စစ်ပွဲအတွင်းမှာသင်ယူတာဟာ အကောင်းဆုံးနည်းလမ်းပဲဖြစ်ပါ တယ်။
၃။ တပ်တည်ဆောက်ရေးရဲ့ ဦးတည်ချက်
တပ်တည်ဆောက်ရေးမှာ..အမျိုးအစားသစ်ပြည်သူ့တပ်မတော်တရပ်တည်ဆောက်ရေးကို ခိုင်မာတဲ့ဦးတည်ချက်အဖြစ်ထားရှိရမှာ ဖြစ်တယ်။ အမျိုးအစားသစ်ပြည်သူ့တပ်မတော်ရဲ့ အရေးကြီးတဲ့..ထူးခြားတဲ့အင်္ဂါ လက္ခဏာတွေကတော့……
(၁) ကွန်မြူနစ်ပါတီရဲ့ တိုက်ရိုက်နဲ့အကြွင်းမဲ့ခေါင်းဆောင်မှုကိုခံယူထားတဲ့တပ်မတော်ဖြစ်တယ်။ (ပါတီကတပ်ကိုအမိန့်ပေးမှာဖြစ်ပြီး ..တပ်ကပါတီကိုပြန်ပြီး အမိန့်ပေးတာကိုလုံးဝ ခွင့်မပြုနိုင်ဘူးဆိုတဲ့ “မူ”..ဖြစ်တယ်။) တပ်မတော်တခုလုံးရဲ့စစ်ရေးကိုတိုက်ရိုက်လမ်းညွှန်ပေးဖို့ ပါတီဗဟိုက စစ်ရေးနဲ့ပါတ်သက်တဲ့ကော်မရှင်တခုဖွဲ့စည်းထားရှိပြီး ပါတီရဲ့အမြင့်ဆုံးခေါင်းဆောင်က ဒီကော်မရှင်ကိုတိုက်ရိုက်ဦးဆောင်ရမယ်။ တပ်တွင်းမှာ ပါတီကော်မတီ၊ ပါတီကလပ်စည်း၊ စတဲ့ပါတီ အစည်းအရုံးတွေထားရှိပြီး တပ်ရဲ့လက်တွေ့လုပ်ငန်းတွေကိုခေါင်းဆောင်ညွှန်ကြားဖို့ နိုင်ငံရေးမှူးတပ်မှူးတွေက တာဝန်ယူတယ်။
(၂) အမျိုးအစားသစ်ပြည်သူ့တပ်မတော်ဟာ မာ့က်စ်ဝါဒလီနင်ဝါဒမော်စီတုန်းအတွေးအခေါ်ကို လမ်းညွှန်သဘောတရားအဖြစ်ခံယူတယ်။
(၃) လူမျိုးစုံသွေးစည်းချစ်ကြည်ရေးအလံကို မြင့်မြင့်မားမားလွှင့်ထူထားတယ်။
(၄) အဖိနှိပ်ခံပြည်သူတရပ်လုံးရဲ့ အကျိုးကို အမြဲတမ်းဦးထိပ်ပန်ဆင်ထားတယ်။လူထုလမ်းစဉ်ကျင့်သုံးတယ်။
(၅) စည်းကမ်းကြီးသုံးရပ်နဲ့သတိပြုရန်ရှစ်ချက်ကို ကိုယ်ပိုင်အသိနိုးကြားမှုနဲ့ တင်းတင်းကျပ်ကျပ်လိုက်နာတယ်။
(၆).( ကြံ့ခိုင်မှန်ကန်တဲ့ နိုင်ငံရေးဦးတည်ချက်ရှိတဲ့လုပ်ဟန်..ရိုးရိုးကုတ်ကုတ်အဆင်းရဲအပင်ပန်းခံတဲ့
လုပ်ဟန်..လျှင်မြန်ပါးနပ်ကျင်လည်တဲ့ သေနင်္ဂဗျူဟာနဲ့ နည်းပရိယါယ်ရှိတဲ့လုပ်ဟန်) စတဲ့ …သုံးရှစ်လုပ်ဟန်ကိုကျင့်သုံးတယ်။
(၇) သေရဲ၊ တိုက်ရဲ၊ အနိုင်ယူရဲတဲ့ ရဲသုံးရဲစိတ်ဓာတ်ကိုမွေးမြူပြီး တော်လှန်တဲ့သူရဲကောင်းဝါဒကိုမြဲမြဲကိုင်စွဲထားတယ်။
(၈) တပ်တွင်းမှာ (နိုင်ငံရေးဒီမိုကရေစီ၊ စစ်ရေးဒီမိုကရေစီ၊ စီးပွားရေးဒီမိုကရေစီ)ဆိုတဲ့ ဒီမိုကရေစီသုံးရပ်ကိုလက်တွေ့ကျကျ ကျင့်သုံးတယ်။ ဒီမိုကရေစီလည်းရှိ-ဗဟိုချုပ်ကိုင်မှုလည်းရှိ ၊စည်းကမ်းလည်းရှိ လွတ််လပ်မှုလည်းရှိ၊ စုပေါင်းခေါင်းဆောင်မှုလည်းရှိ -တဦးချင်း တာဝန်ယူမှုလည်းရှိဆိုတဲ့မူကိုကျင့်သုံးတယ်။ တပ်တွင်းမှာဗျူရိုကရေစီနဲ့ စစ်ဘုရင်ဝါဒကို ပြတ်ပြတ်သားသားဆန့်ကျင်တယ်။
(၉) တိုက်ခိုက်ရေးတာဝန်၊ လူထုစည်းရုံးရေးတာဝန်၊ ထုတ်လုပ်ရေးတာဝန်ဆိုတဲ့ တာဝန်သုံးရပ်ကို ထမ်းဆောင်တယ်.။
(၁၀) ကိုယ့်ထူးကိုယ်ချွန်စိတ်ဓာတ်ကို ခိုင်ခိုင်မာမာမွေးမြူတယ်။
အထက်ကဖေါ်ပြသွားတဲ့အချက်တွေကတော့ တပ်တည်ဆောက်ရေးမှာ ဦးတည်ချက်အဖြစ်ထားရှိရမယ့် အမျိုးအစားသစ်ပြည်သူ့တပ်မ တော်ရဲ့ အရေးကြီးတဲ့ ထူးခြားတဲ့အင်္ဂါလက္ခဏာတွေပဲ ဖြစ်ပါတယ်။
၄။ တပ်တည်ဆောက်ရေးနည်းနာ
ပုံမှန်အခြေအနေမှာ.. တပ်ရဲ့ နိုင်ငံရေးအတွေးအခေါ်တည်ဆောက်ရေးလုပ်ငန်း၊ တပ်စည်းကမ်းထိန်းသိမ်းရေးလုပ်ငန်း ၊ တပ်ရဲ့ ယဉ်ကျေးမှုရေချိန်မြှင့်တင်ရေးလုပ်ငန်းအစရှိတဲ့တာဝန်တွေကို တပ်တွင်းပါတီအဖွဲ့အစည်းတွေဖြစ်တဲ့ ပါတီကော်မတီ၊ ပါတီကလပ်စည်းတွေက တာဝန်ယူသွားရမှာဖြစ်ပါတယ်။ အဆင့်ဆင့်ရှိ တပ်သားကော်မတီအစည်းအဝေးတွေလုပ်တာ တပ်သားထုအစည်းအဝေးတွေလုပ်တဲ့နည်းတွေနဲ့ လှုပ်ရှားသွားလို့ရနိုင်ပါတယ်။
ဒါပေမဲ့ တချို့ထူးခြားတဲ့အခြေအနေမျိုးမှာတော့ ပုံမှန်လှုပ်ရှားမှုမျိုးနဲ့မရတော့ဘဲ “ ဒီမိုကရေစီလှုပ်ရှားမှုအစည်းအဝေး”လုပ်ပြီး ကိုင်တွယ်ဖြေရှင်းရတာမျိုးလည်းရှိပါတယ်။
ဒီမိုကရေစီလှုပ်ရှားမှုရဲထူးခြားချက်တွေကတော့….
– ပြဿနာတစ်ခု သို့မဟုတ် အကြောင်းအရာတစ်ခုကို အဓိကပစ်ကွင်း(ဦးတည်ချက်)အဖြစ်ထားပြီး ဆွေးနွေးတာ…(ဥပမာ… တပ်တွင်း ဗျူရိုကရက်ဝါဒနဲ့စစ်ဘုရင်ဝါဒ လွှမ်းမိုးမှုဆန့်ကျင်ရေးလှုပ်ရှားမှု၊ …ရန်သူကိုကြောက်တဲ့ စစ်ပြေးအတွေးအခေါ်တိုက်ဖျက်ရေးလှုပ်ရှားမှု …..စည်းကမ်းကြီးသုံးရပ် သတိပြုရန်ရှစ်ချက်လိုက်နာရေးလှုပ်ရှားမှု ..စတဲ့ပြဿနာမျိုးတခုခုကိုဦးတည်ချက်ထားပြီး ဆွေးနွေးတာ……..
– တဆင့်မြင့်တဲ့အထက်အဖွဲ့အစည်းရဲ့ဦးစီးမှုနဲ့ တပ်ထု ဒါမှမဟုတ် ပါတီဝင်ထုတရပ်လုံးပါဝင်ဆွေးနွေးတာ (“ထု”ကိုဒီမိုကရေစီ ကျယ်ကျယ်ပြန့်ပြန့်ဖွင့်ပေးတာ..အပြန်အလှန်ပွင့်ပွင့်လင်းလင်း ဝေဖန်ဆွေးနွေးကြတာ.. )
– လှုပ်ရှားမှုအစည်းအဝေးဦးစီးတဲ့ခေါင်းဆောင်က လေးလေးနက်နက် နိဂုံးချူပ်ပေးတာ….
ဒီလိုထူးခြားချက်တွေရှိတဲ့ လှုပ်ရှားမှုတွေကို အခြေအနေကတောင်းဆိုလာရင် လုပ်ပေးရမယ်။ အတိတ်က ပဲခူးရိုးမ၊..အနောက်မြောက်တိုင်းက တိုက်တိုင်းအောင်တပ်တွေနဲ့ ရခိုင်ရိုးမ ပြောက်ကျားတပ်တွေရဲ့တပ်တည်ဆောက်ရေးမှာ ဒီအစဉ်အလာမျိုးတွေရှိခဲ့ဖူးတယ်။
လှုပ်ရှားမှုဟာ တပ်ရဲ့အတွေးအခေါ်လန်းဆန်းတက်ကြွဖို့၊ တိုက်ပွဲဝင်စိတ်ဓာတ်မြင့်မားဖို့၊ စည်းကမ်းလိုက်နာမှုပိုကောင်းလာဖို့၊ တပ်တွင်း စည်းလုံးညီညွတ်မှုခိုင်မာလာဖို့ ..စတဲ့ဖက်အသီးသီးမှာ ကြီးမားတဲ့အကျိုးပြုမှုတွေရရှိစေမှာဖြစ်ပါတယ်။
_ အခြေအနေပေးရင် တနှစ်တကြိမ် တပ်ညီလာခံလုပ်တာ လုပ်သင့်တယ်။ တပ်သားထုတရပ်လုံးပါဝင်တဲ့ လှုပ်ရှားမှုသဘောဆောင်တဲ့ အစည်းအဝေးကြီးပဲဖြစ်တယ်။
-တပ်ရဲ့ ရုံးအဖွဲ့တွေ.နဲ့တပ်စိတ်တွေမှာ တရက်တာနိဂုံးချုပ်လုပ်တဲ့ အစဉ်အလာထွန်းကားအောင်လုပ်သင့်တယ်။ တရက်အတွင်းရှိတဲ့ပြဿနာကို အကြွေးမထားဘဲ ရှင်းသွားတဲ့သဘောပဲဖြစ်တယ်။ ပါတီက ခေါင်းဆောင်ခဲ့တဲ့တပ်တွေမှာ ဒီလုပ်ဟန်မျိုးတွေ ရှိခဲ့ဖူးတယ်။
တိုက်ပွဲနိဂုံးချုပ်
တိုက်ပွဲတိုက်ပြီးရင် တိုက်ပွဲနိဂုံးချုပ်ကိုမဖြစ်မနေ လုပ်ရမယ်။
တိုက်ပွဲနိဂုံးချုပ်ဆိုတာ…မိမိတို့ဆင်နွှဲတဲ့တိုက်ပွဲရဲ့ အောင်မြင်မှု၊ ဆုံးရှုံးမှု၊ အားကောင်းချက်အားနည်းချက်တွေကိုစစ်ရေး အတွေးအခေါ် တပ်တည်ဆောက်ရေး၊ စတဲ့ဘက်အသီးသီးကဝေဖန်သုံးသပ်အဖြေရှာပြီး ရှေ့လုပ်ငန်းအတွက် သင်္ခန်းစာထုတ်တဲ့လှုပ်ရှားမှုပဲဖြစ်တယ်။ တနည်းပြောရရင်အမျိုးအစားသစ်ပြည်သူ့တပ်မတော်ရဲ့ တိုက်ပွဲနိဂုံးချုပ်ဆိုတာ စစ်ရေးတပ်တည်ဆောက်ရေးပြဿနာမှာ အနုပဋိလောမရုပ်ဝါဒ ကမ္ဘာ့အမြင်နဲ့ ခွဲခြမ်းစိတ်ဖြာခြင်းက ရရှိလာတဲ့အသီးအပွင့်ပဲဖြစ်တယ်။
တိုက်ပွဲတိုက်ပြီး နိဂုံးချုပ်တာမလုပ်ရင် အတွေးအခေါ်လှုပ်ရှားမှုမရှိတဲ့ဦးနှောက်လို တပ်ဟာ ကြာလေတုံးလေဖြစ်လာပြီး တိုက်စွမ်းရည် ကျလာလိမ့်မယ်။ဖရိုဖရဲဖြစ်လာလိမ့်မယ်။ ထူးခြားချက်တွေက…
– တိုက်ပွဲနိဂုံးချုပ်ကို အထက်အဆင့်ကဦးစီးပြီးလုပ်တာ …
-မတိုက်ဖြစ်တဲ့တိုက်ပွဲတွေကိုလည်း တိုက်သင့်ပါလျက်မတိုက်ဖြစ်တာလား…ဘာကြောင့်မတိုက်ဖြစ်တာလဲဆိုတာ နိဂုံးချူပ်တာ
-ရှုံးတဲ့တိုက်ပွဲတွေကိုလည်း သင်ခန်းစာထုတ် နိဂုံးချုပ်တာ….
-အောင်ပွဲရတဲ့တိုက်ပွဲတွေကိုလည်း ဘာကြောင့်အောင်ပွဲရတာလဲ ရသင့်သလောက်ရခဲ့ရဲ့လား စသဖြင့် နိဂုံးချုပ်တာ..
တကယ်တော့ တိုက်ပွဲနိဂုံးချုပ်လှုပ်ရှားမှုအစည်းအဝေးဆိုတာ စစ်သင်တန်း စာသင်ခန်းလေးတွေလိုပါပဲ..“တိုက်ပွဲတိုက်လိုက် နိဂုံးချုပ်လိုက်” နဲ့ မိမိတပ်ကိုတည်ဆောက်ကြရတယ်။ သဘောတရားနဲ့လက်တွေ့ ပေါင်းစပ်တဲ့လုပ်ဟန်လို့ ဆိုနိုင်ပါတယ်။ တော်လှန်စစ်ဆိုတာ သင်ယူတတ်မြောက်ပြီးမှ လုပ်ရတာမျိုးမဟုတ်ဘဲ “ လုပ်ရင်းသင် သင်ရင်းလုပ်ရတာမျိုး”ဆိုတော့ တိုက်ရင်းတည်ဆောက် တည်ဆောက်ရင်းတိုက်ဖြစ်စဉ်မှာ တိုက်ပွဲနိဂုံးချုပ်လုပ်ငန်းဟာအရေးကြီးတဲ့ကွင်းဆက်တွေအဖြစ်တည်ရှိနေမှာဖြစ်ပါတယ်။
တပ်တည်ဆောက်ရေးမှာ တည်ဆောက်ရမည့် စိုက်ထူရမည့် တွေးအခေါ်များ…..
– ပါတီစိတ်ဓာတ်နဲ့ပါတီဗဟိုဝန်းရံရေးစိတ်ဓာတ်ကိုစိုက်ထူရမယ်။ ဗဟိုစင်ပြိုင်ဝါဒ၊ မင်းမဲ့ဝါဒနဲ့တဗိုလ်တမင်းဝါဒကိုဆန့်ကျင်..ရမယ်။
-တော်လှန်တဲ့အကောင်းမြင်ဝါဒကိုကိုင်စွဲရမယ်။ အဆိုးမြင်ဝါဒကို တိုက်ဖျက်ရမယ်။
-ပစ္စည်းမဲ့စစ်ရေးအမြင်ကို စိုက်ထူရမယ်။ ဓနရှင်စစ်ရေးအမြင်ကို ဆန့်ကျင်ရမယ်။
-ကိုယ့်ထူးကိုယ်ချွန်စိတ်ဓာတ်ကို မွေးမြူရမယ်။ အချောင်ဝါဒကိုတိုက်ပွဲဆင်ရမယ်။
-တော်လှန်တဲ့သူရဲကောင်းဝါဒကိုကိုင်စွဲ (သေရဲ တိုက်ရဲ အနိုင်ယူရဲတဲ့ ရဲသုံးရဲစိတ်ဓာတ် )ကိုမွေးမြူရမယ်။ ရန်သူကိုတဖက်သတ်အထင်ကြီးတဲ့ စစ်ပြေးအတွေးအခေါ်ကို ဆန့်ကျင်ရမယ်။
-လူထုကိုအလုပ်အကျွေးပြုတဲ့စိတ်ဓာတ်နဲ့ လူထုအမြင်ကိုစိုက်ထူရမယ်။ ကယ်တင်ရှင်ဝါဒနဲ့ စစ်ဘုရင်ဝါဒ ကို တိုက်ဖျက်ရမယ်။
ချုပ်ရင်……
တပ်ကိုတပ်နဲ့တူအောင်တည်ဆောက်ရမယ်..ဆိုတဲ့အချက်ကိုပိုပြီးတိကျအောင်ပြောရရင်..တပ်ကို ဂုဏ်နဲ့ဒြပ်ကိုက်ညီတဲ့ အမျိုးအစားသစ် ပြည်သူ့တပ်မတော်တရပ်ဖြစ်လာအောင်တည်ဆောက်ရေးဖြစ်ပါတယ်။
ငြိမ်းမောင်ဦး