“တပ်တည်ဆောက်ရေးမှာ စည်းကမ်းရဲ့ အရေးကြီးမှု”ငြိမ်းမောင်ဦး—-
လက်ရှိကာလမှာ ဗမာပြည်သူလူထုတရပ်လုံးရဲ့နိုင်ငံရေးလှုပ်ရှားမှုဟာ ဒီရေမြင့်ကာလကိုရောက်ရှိနေပါပြီ။ အဖိနှိပ်ခံ ပြည်သူလူထုဟာ မိမိတို့ရဲ့လက်တွေ့ဘဝအရ စစ်အာဏာရှင်စနစ်ရဲ့ကမ်းကုန်အောင်ရက်စက်တဲ့ ဖိနှိပ်သတ်ဖြတ်မှုကို ရရာလက်နက်စွဲကိုင်ပြီး တော်လှန်တဲ့ လမ်းကြောင်းကို မလွှဲသာမရှောင်သာရွေးခဲ့ကြရတယ်။ တပြည်လုံးအနှံ့အပြား ကျေးလက်ဒေသရော မြို့ပြတွေမှာပါ လက်နက်ကိုင်တပ်ဖွဲ့တွေ တည်ထောင်ဖွဲ့စည်းပြီး ပြန်လှန်ခုခံကြတဲ့ပြည်သူတွေရဲ့တိုက်ပွဲဟာ အနှစ်သာရအားဖြင့် တော်လှန်တဲ့ပြည်သူ့စစ်ပွဲပဲဖြစ်ပါတယ်။
ဒါဟာ…ဗမာပြည်တော်လှန်ရးရဲ့ကြီးမြတ်တဲ့ အလှည့်အပြောင်းလည်းဖြစ်ပါတယ် ။ ဖိနှိပ်မှုမှန်သမျှဒဏ် စုပြုံမခံတော့တဲ့ အောက်ခြေလူထုက အစချီကာ တပ်ဖွဲ့များကို စုဖွဲ့လှုပ်ရှားကြခြင်းဆိုတဲ့ အားသာချက်ရှိတာနဲ့ တချိန်တည်းမှာ ရန်/ငါ အင်အားအချိုးအစားကွာဟမှုကတော့ ကြီးပါတယ်။ ဒီလို အင်အားကြီးမားတဲ့ ရန်သူကိုအနိုင်တိုက်ဖို့အတွက် တော်လှန်ရေး တပ်ဖွဲ့တွေဟာ ကြံ့ခိုင်မှန်ကန်တဲ့နိုင်ငံရေးအတွေးအခေါ်ကို မြဲမြဲကိုင်စွဲပြီး အမိန့်စည်းကမ်းတွေလိုက်နာမှုကောင်းတဲ့ တပ်ဖြစ်အောင် လေ့ကျင့်တည်ဆောက်ရပါလိမ့်မယ်။ ချုပ်ပြောရရင် တပ်ကိုတော်လှန်ရေးတပ်ဖွဲ့ပီသအောင်တည်ဆောက် ရမယ်…။
တကယ်တော့ တပ်ရဲ့အမိန့်စည်းကမ်းတွေဆိုတာဟာ တော်လှန်ရေးရဲ့နိုင်ငံရေးရည်မှန်းချက်နဲ့ အတွေးအခေါ်ကိုအခြေခံပြီး ချမှတ်ထားတာဖြစ်လို့ … အမိန့်စည်းကမ်းလိုက်နာမှုဟာ တော်လှန်ရေးအောင်ပွဲအတွက် အာမခံချက်တချက်ပဲဖြစ်ပါတယ်။ ဗမာပြည်ကွန်မြူနစ်ပါတီက ဖွဲ့စည်းခဲ့တဲ့ ပြည်သူ့တပ်မတော်မှာချမှတ်ကျင့်သုံးခဲ့တဲ့ (စည်းကမ်းကြီးသုံးးရပ်နဲ့ သတိပြုရန်ရှစ်ချက်)ကို လေးလေးနက်နက် လေ့လာ ဝေဖန်သုံးသတ်ကြည့်ရင် လက်ရှိတော်လှန်ရေးတပ်ဖွဲ့တည်ဆောက်ရေးပြဿနာအတွက် လမ်းညွှန်တချို့ ရနိုင်လိမ့်မယ်လို့ မျှော်လင့်ပါတယ်။
“စည်းကမ်းကြီး(၃)ရပ် …သတိပြုရန်(၈)ချက်”
စည်းကမ်းကြီး(၃)ရပ် ၁။ ဘာပဲလုပ်လုပ်အမိန့်နာခံရမည်။ ၂။ ပြည်သူ့ပစ္စည်းမှန်သမျှ အပ်တချောင်းချည်တမျှင်မှ မယူရ။ ၃။ စစ်မြေပြင်မှ သိမ်းပိုက်ရရှိသောပစ္စည်းမှန်သမျှ အများပိုင်အဖြစ်အပ်နှံရမည်။ သတိပြုရန်(၈)ချက် ၁။ စကားပြောဆိုရာမှာ ချိုချိုသာသာပြောကြရမည်။ ၂။ ပြည်သူ့ပစ္စည်းများကိုတန်ရာတန်ဖိုးပေးဝယ်ရမည်။ ၃။ ပြည်သူ့ပစ္စည်းဥစ္စာကိုငှါးပြီးပြန်အပ်ရမည်။ ပစ္စည်းပျက်လျှင်တန်ရာတန်ကြေးပေးလျော်ရမည်။ ၄။ မူးယစ်သောက်စားခြင်း မပြုလုပ်ရ။ ၅။ပြည်သူများ၏ စပါးသီးနှံများကိုမဖျက်ဆီးရ။ ၆။အမျိုးသမီးများအပေါ် သဘောထားမှန်ကန်ရမည်။ ၇။ ပြည်သူများ၏ ဓလေ့ထုံးတမ်းများကိုလေးစားရမည်။ ၈။ စစ်သုံ့ပန်းများကို မညှဉ်းဆဲရ။
ရေးထားတာတွေကတော့ အတော်ရိုးရှင်းပါတယ်။ ဖတ်မိသူတိုင်း အလွယ်တကူ နားလည်နိုင်ပါတယ်။ ဒါပေမဲ့ ဒီစည်းကမ်း ချက်တွေဟာ ပြည်သူနဲ့တော်လှန်ရေးရဲ့အကျိုးစီးပွားဘက်ကရပ်တည်ပြီးချမှတ်ထားတာဖြစ်လို့ မြင့်မားတဲ့ နိုင်ငံရေးရည်မှန်းချက်နဲ့ အတွေးအခေါ်အခြေခံတွေရှိနေတယ်ဆိုတာ နားလည်သဘောပေါက်ထားသင့်ပါတယ်။ ပြည်သူလူထုရဲ့ အသိရှိရှိထောက်ခံမှုနဲ့ ပါဝင်ဆင်နွှဲမှုဟာ ဒီစည်းကမ်းချက်များ တကယ် ရေရှည်အနှံ့အပြား အသက်ဝင်မှုအတွက် အဓိကကျတဲ့ လူမှုအခြေခံအချက် ဖြစ်တယ်ဆိုတာကိုလည်း မျက်ခြည်မပြတ်သင့်ပါ။ ဥပမာ “ဘာပဲလုပ်လုပ်အမိန့်နာခံရမယ်” ဆိုတဲ့အချက် ….. အမိန့်နာခံမှုဆိုတာ ပြည်သူကိုဖိနှိပ်တဲ့ .ဖေါက်ပြန်တဲ့တပ်တွေ ဖက်ဆစ်တပ်တွေ မှာလည်းရှိတာပဲ..သူတို့တပ်တွေမှာအမိန့်အာဏာတွေ ပိုပြီးပြင်းထန်တာတွေ့ရတယ်။ ဒါပေမဲ့ ရပ်တည်မှုအရ အနှစ်သာရအရပြောရင်သူတို့နာခံတယ်ဆိုတာ ပြည်သူကိုဆန့်ကျင်တဲ့ ဖိနှိပ်တဲ့လူတန်းစားရဲ့အမိန့်ကိုနာခံတာပဲ။ ကြေးစားစိတ်ဓာတ်နဲ့နာခံတာပဲ..။ မိမိတို့တော်လှန်ရေးတပ်ဖွဲ့တွင်းမှာတော့ …အမိန့်နာခံတယ်ဆိုတာအနှစ်သာရအားဖြင့်ပြောရင် ပြည်သူ့တော်လှန်ရေးတပ်ဦးရဲ့အမိန့် တနည်းအားဖြင် မှန်ကန်တဲ့ နိုင်ငံရေးဦးဆောင်မှုကို ကိုယ်ပိုင်အသိနိုးကြားမှုနဲ့ နာခံတာဖြစ်တယ်။ ဒါကြောင့် တပ်ထဲမှာ အမိန့်မနာခံတဲ့ လုပ်ရပ်ဟာ အတွေးအခေါ်အရဆန်းစစ်ရင် မင်းမဲ့အတွေးအခေါ်ဖြစ်တယ်.။ စည်းရုံးမှုမဲ့တဲ့လုပ်ဟန်ဖြစ်တယ် တပ်မှူးတပ်သားစည်းလုံး ညီညွတ်မှုကို ပျက်ပြားစေပြီး တိုက်ပွဲတွင်းမှာဆိုရင် ကြီးမားတဲ့ဆုံးရှုံးမှုတွေကြုံရနိုင်တယ်။ ချုပ်ရင်….တော်လှန်ရေးတပ်ဖွဲ့အတွင်းမှာ အမိန့်နာခံမှုရှိမှသာ. .အင်အားကြီးမားတဲ့ရန်သူ့တပ်ကိုအနိုင်တိုက်နိုင်မှာဖြစ်တယ်။
နံပါတ်(၂)အချက်ဖြစ်တဲ့ “ ပြည်သူ့ပစ္စည်းမှန်သမျှ အပ်တချောင်းချည်တမျှင်မှ မယူရ။ ” စည်းကမ်းကတော့ မိမိတို့တပ်ဖွဲ့ရဲ့ ပြည်သူနဲ့ပတ်သက်တဲ့ရပ်တည်ချက် ၊ ပြည်သူအပေါ်ထားရှိတဲ့မွန်မြတ်တဲ့သဘောထားကို မှတ်ကျောက်တင်ထားတာပဲဖြစ်တယ်။ လက်ရှိဆင်နွှဲနေတဲ့တော်လှန်စစ်ဟာ အနှစ်သာရအရပြောရင်ပြည်သူ့စစ်ပွဲပဲဖြစ်တယ်။ ဒါကြောင့်.. လူထုလမ်းစဉ် ကျင့်သုံးရမယ်။ (လူထုဟာသမိုင်းဖန်တီးသူ….လူထုသာသူရဲကောင်း..လူထုကိုအလုပ်အကျွေးပြုကြ).စတဲ့လူထုအမြင်တွေကိုခိုင်ခိုင်မာမာ စိုက်ထူကြရမယ်။ လူထုနဲ့ပါတ်သက်တဲ့စည်းကမ်းတွေကို တင်းတင်းကျပ်ကျပ်လိုက်နာရမယ်။
သတိပြုရန်အချက်တွေထဲက အများစုဟာ လူထုနဲ့ပတ်သက်ပြီး ချမှတ်ထားတဲ့စည်းကမ်းတွေပါပဲ ။ သတိပြုရန်ဆိုပေမယ့် စည်းကမ်းလိုသဘောထားပြီးလိုက်နာရမှာဖြစ်တယ်။ “တော်လှန်တဲ့စစ်ပွဲဟာ လူထုစစ်ပွဲဖြစ်တယ်၊ လူထုကိုလှုံ့ဆော်စည်းရုံးမှ၊ လူထုကိုအားကိုးမှ တော်လှန်စစ်ပွဲဆင်နွှဲနိုင်မယ်။” “မော်” ရဲ့ဒီအဆို အမိန့်ဟာ ဗမာပြည်ရဲ့လက်ရှိတော်လှန်ရေးလက်တွေ့ မှာ မှန်ကန်တဲ့လမ်းညွှန်ဖြစ်နေဆဲပဲဖြစ်တယ်။
နံပါတ်(၃) အချက်ဖြစ်တဲ့ “ စစ်မြေပြင်မှ သိမ်းပိုက်ရရှိသောပစ္စည်းမှန်သမျှ အများပိုင်အဖြစ်အပ်နှံရမည်။” ဆိုတဲ့ စည်းကမ်းကတော့ မိမိတို့တော်လှန်ရေးရဲ့ရည်ရွယ်ချက်အပေါ်မှာထားရှိတဲ့ သဘောထားနဲ့ဆိုင်ပါတယ်။ တော်လှန်ရေးလုပ်နေတာဟာ တဦးချင်းအကျိုးစီးပွား အတွက်မဟုတ်ဘူး…တဦးချင်းထွက်ပေါက်အတွက်မဟုတ်ဘူး….ပြည်သူ့ဒီမိုကရေစီအစိုးရတရပ်ထူထောင်ဖို့…ဖိနှိပ်သွေးစုပ်မှုကင်းတဲ့ စံနစ်သစ်တခုတည်ဆောက်ဖို့ဆိုတဲ့ ဘုံရည်မှန်းချက်အတွက်ပဲဖြစ်တယ်။ တော်လှန်ရေးသမားတယောက်အနေနဲ့ မိမိကိုယ်ကိုပြုစုပျိုးထောင်တဲ့ဖြစ်စဉ်မှာ အရာရာကိုစွန့်လွှတ်တဲ့အတွေးအခေါ်ကို စိုက်ထူသွားရမှာဖြစ်ပါတယ်။ “ မူးယစ်သောက်စားခြင်း မပြုလုပ်ရ။” ဆိုတဲ့သတိပြုရန်အချက်ကတော့ လက်တွေ့လူထုစည်းရုံးရေးတာဝန်နဲ့ စစ်ရေးတာဝန်တွေ ထမ်းဆောင်ရာမှာ တော်လှန်ရေးတပ်ဖွဲ့တွေအနေနဲ့ မလိုလားအပ်တဲ့ အမှားမျိုးတွေမပေါ်ပေါက်စေဖို့ရည်ရွယ်ချက်နဲ့ ချမှတ်ထားတာဖြစ်ပါတယ်။ အထူးသဖြင့် ဗမာပြည်လူ့အဖွဲ့အစည်းရဲ့ ဓလေ့ထုံးတမ်းတွေကိုထောက်ထားပြီး လူထုစည်းရုံးရေးမှာ ပိုမိုထိရောက်စွာ ဆောင်ရွက်နိုင်ဖို့ဖြစ်ပါတယ်။
“အမျိုးသမီးများအပေါ် သဘောထားမှန်ကန်ရမည်” ဆိုတဲ့သတိပြုရန်အချက်ရဲ့ အတွင်းသဘောကတော့“ အမျိုးသမီးတွေဟာ စနစ်ဆိုးရဲ့ဖိနှိပ်မှုကိုသာမက ယောကျ်ားများရဲ့ မဟာဖိုဝါဒနဲ့ အထင်အမြင်သေးမှု အနိုင်ကျင့်မှုကိုခံရတဲ့ အဖိနှိပ်ခံလူတန်းစားပဲဖြစ်ပြီး တော်လှန်ရေးရဲ့အင်အားစုဖြစ်တယ်ဆိုတာမြင်ဖို့ကိုဆိုလိုတာပါ။ လူဦးရေထက်ဝက်ကျော်ရှိတဲ့ အမျိုးသမီးတွေအပေါ် သဘောထားမမှန်တာဟာ ပြည်သူအပေါ်သဘောထားမမှန်တာနဲ့အတူတူပါပဲ။ ဒါကြောင့် အမျိုးသမီးတွေကိုတန်းတူရည်တူသဘောထားနဲ့ လူတန်းစားညီအစ်ကိုမောင်နှမစိတ်ဓါတ်နဲ့ တော်လှန်ရေးမှာပါဝင်နိုင်အောင်စည်းရုံးသွားဖို့လိုပါတယ်။ ဗမာပြည်မှာရော နိုင်ငံတကာမှာပါ..တော်လှန်တဲ့ သူရဲကောင်းဝါဒကိုင်စွဲပြီး စွန့်လွှတ်သွားခဲ့ကြတဲ့ အမျိုးသမီးသူရဲကောင်းတွေရှိခဲ့တယ်ဆိုတာ မမေ့သင့်ပါ။ အမျိုးသမီးတွေအပေါ် သဘောထားမှန်ကန်မှုအောက်မှာ အမျိုးသမီးများအပေါ် အသရေပျက်စီးစေမှုလုပ်ရပ်တွေ အားလုံး၊ ဂုဏ်သိက္ခာထိခိုက်စေမှုအားလုံး ရှောင်ရှားသွားရေအချက်တွေ ပါဝင်သွားပါတယ်။
“ပြည်သူများ၏ ဓလေ့ထုံးတမ်းများကိုလေးစားရမည်” ဒီသတိပြုရန်အချက်ကတော့ ဗမာပြည်တော်လှန်ရေးရဲထူးခြားချက်လည်းဖြစ် အလေးအနက်ထားရမည့်အချက်လည်းဖြစ်ပါတယ်။ အဖိနှိပ်ခံလူမျိုးပေါင်းစုံပါဝင်တဲ့တော်လှန်တဲ့ပြည်သူ့စစ်ပွဲဆင်နွှဲရာမှာ လူမျိုးစုံသွေးစည်းချစ်ရေးဝါဒကိုင်စွဲကြမှာဖြစ်ပါတယ်။ အမျိုးသားတွေအချင်းချင်းအကြားဆက်ဆံရေးမှာတန်းတူရည်တူစိတ်ဓါတ်နဲ့ အပြန်အလှန် လေးလေးစားစား ရှိဖို့ အထူးသတိထားကြရမှာဖြစ်ပါတယ်။
“စစ်သုံ့ပန်းများကို မညှဉ်းဆဲရ” ဒီအချက်ကတော့ သုံ့ပန်းပေါ်လစီထဲမှာချမှတ်ထားပြီးဖြစ်ပါတယ်။ ရန်သူ့သုံ့ပန်းတွေကို ရိုက်နှက်ညှဉ်းပမ်းတာ မလုပ်ရ၊ အခြေအနေခွင့်ပြုသလောက်အချိန်ယူပြီးပညာပေးတာလုပ်ပြီးရင်လမ်းစရိတ်ပေးပြီး ပြန်လွှတ်ပေးရမှာဖြစ်တယ်။ ဒါဟာရန်သူ့တပ်ဖြိုခွဲရေးအတွက်နိုင်ငံရေးလုပ်ငန်းလည်းဖြစ်ပါတယ်။
စည်းကမ်းကြီး(၃)ရပ်ဟာ တိတိကျကျလိုက်နာရမယ့်စည်းကမ်းများဖြစ်သလို ဒီစည်းကမ်းကြီးတွေကဖြာထွက်လာတဲ့ သတိပြုရန်အချက်တွေဟာလည်း စည်းကမ်းအဖြစ်လိုက်နာရမယ့် အချက်တွေပါပဲ။ ချုပ်ရင်…တပ်တည်ဆောက်ရေးမှာ စည်းကမ်းကြီး(၃)ရပ်နဲ့သတိပြုရန်(၈)ချက်ရဲ့ အရေးကြီးမှုကို လေးလေးနက်နက်သဘောပေါက် ပြီး လက်တွေ့လိုက်နာကျင့်သုံးကြရမယ်။ အားနည်းချက်တွေရှိလာရင် ဝေဖန်ရေး-မိမိကိုယ်ကိုဝေဖန်ရေးနည်းနဲ့ဆေးကြောပြစ်ကြရမယ်.။ မိမိတပ်ဖွဲ့တွင်းအတွေးအခေါ်လှုပ်ရှားမှုတွေလုပ်ရင်း စည်းကမ်းလိုက်နာမှုရေချိန်ကို မြှင်တင်သွားကြရမယ်။ ဒီစည်းကမ်းတွေဟာ လေးနက်တည်ကြည်တဲ့နိုင်ငံရေးအတွေးအခေါ်နဲ့ တည်ဆောက်ထားတဲ့…..မွန်မြတ်တဲ့ပြည်သူ့အကျိုးစီးပွားကို ဦးထိပ်ထားတဲ့တော်လှန်ရေးတပ်ဖွဲ့တစ်ခုရဲ့ ဂုဏ်နဲ့ဒြပ်ကို မှတ်ကျောက်တင်ပေးပါလိမ့်မယ်။ ငြိမ်းမောင်ဦး ( ၂၈-၆-၂၀၂၁)