စစ်အာဏာကို စွဲချက်တွေနဲ့ ကာကွယ်နေတဲ့ အာဏာသိမ်း စစ်အုပ်စု
ဒုဗိုလ်ချုပ်ကြီး မိုးမြင့်ထွန်းနှင့် ဗိုလ်မှူးချုပ်ရန်နိုင်စိုးတို့ကို ထောင်ဒဏ်တသက်တကျွန်း ပြစ်ဒဏ်ချသည်။ စစ်အုပ်စုရဲ့ စစ်ခုံရုံးက နိုင်ငံတော်သစ္စာဖောက်မှု၊ အကျင့်ပျက်ခြစားမှုစွဲချက်များဖြင့် ပြစ်ဒဏ်စီရင်ခြင်းဖြစ်သည်။ စစ်အုပ်စုအဆက်ဆက်သည် စစ်အာဏာကာကွယ်ဖို့အတွက် သူတို့ စစ်အုပ်စုအဖွဲ့ဝင်အပါ စစ်အရာရှိများကိုဖယ်ရှားဖို့ စွဲချက်တင်ရာ၌ အကျင့်ပျက်ခြစားမှုနှင့် စီးပွားရေးမသမာမှုများကို အကြောင်းပြလေ့ရှိတတ်သည်။ ဗိုလ်ခင်ညွန့်တုန်းကလဲ ဒီလိုပဲ။ ဒီတခါလဲ ဒီလိုပဲ။ ဒါပေမဲ့ စီးပွားရေးအကြောင်းပြချက်ဖြစ်တဲ့ အကျင့်ပျက်ခြစားမှုနဲ့ တကယ်တမ်းအရေးယူမည်ဆိုလျှင် စစ်အုပ်စုတခုလုံး လွတ်လမ်းမမြင်။ ဒီတခါ သူတို့ ဖြုတ်ထုတ်- ပြစ်ဒဏ်ချမှုရဲ့ အဓိကအကြောင်းရင်းက သူတို့စစ်အုပ်စုတခုလုံးရဲ့အကျိုးစီးပွားကို ထိခိုက်သွားမှာစိုး၍ ရှင်းပစ်လိုခြင်းဖြစ်သည်။ ဒါအပြင် ဒီတခေါက်စွဲချက်တင်ရာမှာ နိုင်ငံတော်သစ္စာဖောက်မှုဟူသောစွဲချက်ကို မဖုံးမကွယ်ဖော်ပြလာသည်။ နိုင်ငံတော်သစ္စာဖောက်မှုဆိုတာက စစ်အုပ်စုကိုသစ္စာဖောက်ဖို့ကြံရွယ်ခြင်းကို ဆိုလိုသည်။ သူတို့ပြောနေတဲ့ နိုင်ငံတော်ဆိုတာ တကယ်တမ်းမှာ စစ်အုပ်စုသာဖြစ်သည်။ နောက်တခုမြင်သာသည်က သူတို့ လက်ကိုင်တုတ်စစ်တပ် အားနည်းယုတ်လျော့လာခြင်းနှင့်အတူ သူတို့စစ်အုပ်စုတွင်း အက်ကြောင်းရာတွေဖြစ်ထွန်းလာခြင်းပင် ဖြစ်သည်။ ဒုဗိုလ်ချုပ်ကြီးမိုးမြင့်ထွန်းဆိုတာ စစ်ကောင်စီအဖွဲ့ဝင်တဦးပဲ မဟုတ်လား။
စစ်ဖက်ထဲကသာမက၊ သူတို့အာဏာထိပါးနိုင်သည်ဟု သူတို့ထင်နေသူများကို ဘယ်သူ့မဆို ဘယ်ပါတီအဖွဲ့အစည်းမဆို သူတို့က ဉာဏ်နီဉာဏ်နက်အမျိုးမျိုးထုတ်ပြီး စွဲချက်တင်တိုက်ခိုက်ဖြိုခွဲတတ်သည်။ ၂၀၂၁ ရွေးကောက်ပွဲအနိုင်ရ ဒီချုပ်ပါတီအား ရွေးကောက်ပွဲမှာ မဲမသမာမှုရှိသည်ဟုအကြောင်းပြတိုက်ခိုက်သည်။ ဒေါ်အောင်ဆန်းစုကြည်နဲ့ ဒီချုပ်ခေါင်းဆောင်များကို စီးပွားရေးစွဲချက်အမျိုးမျိုးနဲ့ ပြစ်ဒဏ်စီရင်သည်။ နိုင်ငံရေးပါတီတွေ၊ အသင်းအဖွဲ့တွေကို စွဲချက်တွေနဲ့ စစ်အုပ်စုကဖယ်ရှားပစ်ခဲ့တာတွေ အများအပြားရှိခဲ့သည်။ ဒီလိုလုပ်ပြီး မဆလတပါတီစနစ်ကြီးစိုးခဲ့ခြင်း ဖြစ်သည်။ သူတို့ရဲ့စွဲချက်အမျိုးမျိုးအောက်မှာ မတရားသင်းကြေညာခံထားရတဲ့အဖွဲ့အစည်းတွေ၊ ပါတီမှတ်ပုံတင်ဖို့ကြိုးစားဆဲကာလမှာပဲ အဖျက်သိမ်းခံလိုက်ရတဲ့ပါတီတွေ ရှိခဲ့သည်။
သူတို့ကိုဆန့်ကျင်တဲ့ ပါတီအသင်းအဖွဲ့တွေ၊ လက်နက်ကိုင်တော်လှန်ရေးအဖွဲ့အစည်းအမျိုးမျိုးကျ သူတို့က ပိုမိုပြင်းထန်စွာ အငြိုးတကြီးစွဲချက်တင်တိုက်ခိုက်တတ်သည်။ နိုင်ငံတော်ပုန်ကန်မှု ပြည်ပြေး၊ အဖျက်သမား၊ သောင်းကျန်းသူ၊ အမျိုးသားရေးသစ္စာဖောက်၊ အစွန်းရောက်အမျိုးသားရေးဝါဒီများ၊ ပြည်ထောင်စုပြိုကွဲအောင် ဖြိုခွဲသူ၊ ဘာသာ သာသနာ ဖျက်ဆီးသူ၊ ဓမ္မန္တရာယ်၊ ပြည်ပြေး၊ ပြည်ပအားကိုးပုဆိန်ရိုး၊ စသည်ဖြင့်။ ဗကပမှသည် တိုင်းရင်းသားလက်နက်ကိုင်အဖွဲ့အစည်းအချို့နှင့် ယနေ့ NUG အထိ သူတို့ ဒီလိုပဲ စွပ်စွဲတိုက်ခိုက်လာသည်။ သူတို့စွဲချက်တွေကလည်း သူခိုးက လူလူဟစ်သည့်စွပ်စွဲချက်တွေမျှသာ။ သည်စွဲချက်တွေဆိုသည်မှာလည်း တပြည်လုံးကို လက်နက်နဲ့အကြမ်းဖက် ဖိနှိပ်အုပ်စိုးမှုအောက်မှာ သူတို့ကျင့်သုံးကိုင်စွဲသည့် လုပ်နည်းလုပ်ဟန် နည်းနာတမျိုးသာ ဖြစ်သည်။
အမှန်စင်စစ် တိုင်းပြည်နှင့်ပြည်သူလူထုကို ရာစုနှစ်တခုလောက်နီးနီးအချိန်ကာလအတွင်း ဆင်းရဲဒုက္ခနှင့် အန္တရာယ်သေတွင်းသို့ အတင်းအကျပ်ထိုးချခဲ့သည့် အန္တရာယ်အကြီးဆုံးရာဇဝတ်ကောင်မှာ သူတို့သာဖြစ်သည်။ တိုင်းပြည်ကို လက်ညှိုးထိုးရောင်းစားပြီး တိုင်းပြည်၏ အဘိုးတန်သယံဇာတများ ပြောင်သလင်းခါအောင်လုပ်ခဲ့သူမှာ သူတို့ စစ်အုပ်စုတွေ ဖြစ်သည်။ တိုင်းပြည်ကို အကြီးဆုံးမီးရှို့ဖျက်ဆီးသူမှာ သူတို့ ဖြစ်သည်။ လူမျိုးပေါင်းစုံ ပြည်သူလူထုကို ပြည်တွင်းစစ်သေတင်းထဲတွန်းချပြီး နေ့စည်လိုလို မီးရှို့ လုယက်သတ်ဖြတ်သူမှာ သူတို့ဖြစ်သည်။ တိုင်းပြည်၏ အကြီးဆုံးမုဒိမ်းကောင်မှာ သူတို့ဖြစ်သည်။ ပြည်သူတွေကို ကလေးသူငယ် အိုကြီးသူမမကျန် အစုလိုက်အပြုံလိုက် ကြိုးတုတ်သတ်ဖြတ်မှု၊ မီးရှို့သတ်ဖြတ်မှု၊ သေနတ်ကျည််ဆန်၊ ဗုံးဆန်အမြောက်ဆန်တို့ဖြင့် ရက်စက်ယုတ်မာစွာ သတ်ဖြတ်သူမှု၊ လူမျိုးတုံးသတ်ဖြတ်မှုတို့၏ လက်သည်တရားခံအစစ်မှာ သူတို့ဖြစ်သည်။
သူတို့၏ ယုတ်မာရက်စက်မှုမှာ မြန်မာသိ၊ ကမ္ဘာသိဖြစ်၏။ ဒါကြောင့် အိုင်စီဂျေ နိုင်ငံတကာ့တရားရုံးတွင် စစ်ရာဇဝတ်ကောင်အဖြစ် တရားစွဲဆိုခံနေရခြင်းဖြစ်သည်။ ထိုမျှမက စစ်အုပ်စုအပေါ် အဖိနှိပ်ခံပြည်သူတွေက တင်စရာစွဲချက်တွေ များစွာရှိပါသည်။ ပြည်သူတွေအပေါ် သူတို့ မတရားကျူးလွန်သတ်ဖြတ်ခဲ့သည့် ပြစ်မှုပေါင်းများစွာ မရေမတွက်နိုင်အောင်ရှိပါသည်။ ဒါတွေအားလုံးကို လုံလောက်စွာ စွဲချက်တင်၊ အပြစ်ပေးနိုင်မည့် အဓိက တရားခုံရုံးမှာ ပြည်သူ့ခုံရုံးဖြစ်ရပါလိမ့်မည်။ စစ်အုပ်စုအပေါ် ပြစ်ဒဏ်ချတရားစီရင်မည့် အဓိက တရားသူကြီးမှာလည် ပြည်သူလူထုသာ ဖြစ်ရပါလိမ့်မည်။
မျက်မှောက်တွင် အာဏာသိမ်းစစ်ကောင်စီက သူ့အာဏာ ထိပါးလိမ့်မည်ဟု ထင်သူများ၊ သူ့အကျိုးစီးပွား ပျက်စီးစေမည်ထင်သူများကို သူ့အတွင်းပိုင်းကထဲက စစ်အရာရှိများအပါအဝင် သူ့ကိုဆန့်ကျင်သည့် အသင်းအဖွဲ့၊ လူပုဂ္ဂိုလ်များအပေါ်ရော စွဲချက်တွေတင်၊ ပြစ်ဒဏ်တွေချ လက်တွေ့ လုပ်နေပါသည်။ ပြည်သူလူထုက အာဏာသိမ်းစစ်ကောင်စီအပေါ် တင်စရာစွဲချက်တွေ၊ အပြစ်ပေးစရာပြစ်ဒဏ်များစွာအတွက် စီရင်ခွင့်အာဏာ မျက်မှောက်မှာ မရရှိသေးပါ။ ယင်းသို့ တရားစီရင်ရေးအခွင့်အာဏာရရှိမည့်အချိန်မှာ စစ်အာဏာရှင်စနစ်ကို အမြစ်ပါမချန် ဖယ်ရှားနိုင်မည့်အချိန်ကျမှသာ ဖြစ်နိုင်ပါလိမ့်မည်။
ပြည်သူ့လက်နက်ကိုင်တော်လှန်ရေးကို အဓိကထားကာ တခြားတိုက်ပွဲသဏ္ဌာန်အမျိုးမျိုးနဲ့ ပေါင်းစပ်ပြီး စစ်အာဏာရှင်စနစ်ကို အမြစ်ပါမကျန် မဆုတ်မနစ်တိုက်ပွဲဝင်သည့် တော်လှန်ရေးကြီးအောင်ပွဲခံနိုင်မှသာ တိုင်းပြည်နဲ့ ပြည်သူလူထုအပေါ် အကြီးမားဆုံးသော၊ အဆိုးရွားဆုံး အရက်စက်ဆုံးဖြစ်သော စစ်ရာဇဝတ်ပြစ်မှုများ ကျူးလွန်ခဲ့သည့် စစ်အုပ်စုအပေါ် ပြည်သူလူထုကြီးက သူတို့နှင့် ထိုက်တန်သောပြစ်ဒဏ်များကို စီရင်ချမှတ်နိုင်လိမ့်မည် ဖြစ်ပါသည်။
ဥဩချို
၁၂-၁၀-၂၀၂၃