စစ်ကျန် အတိုအစများ
မြင့်ဆွေ
(ဗမာပြည်ကွန်မြူနစ််ပါတီ ၈၅ နှစ်မြောက် ပါတီမွေးနေ့အထိမ်းအမှတ် အဖြစ် ထုတ်ဝေတဲ့ အရေးတော်ပုံဂျာနယ်မှာ ထည့်သွင်းဖော်ပြမယ့်ကဗျာ)
စစ်အတွင်းမှာ ကွဲကွာသွားကြရတာတွေ
စစ်အတွင်မှာ ကြုံဆုံခဲ့ကြရတာတွေ
လူသားချင်း တူးတူးခါးခါးတွေ
လူသားချင်း နှစ်နှစ်ကာကာတွေ
တောင်တန်းပြာပြာ တောစိမ်းစိမ်းတွေ
စမ်းချောင်းလေး နံဘေးမှာ
တောပန်းလေးတွေလည်း ပွင့်ပါတယ်။
– တယောက်က
အသက်နဲ့ရင်းပြီး ရောက်လာ၊
တယောက်က
ဘဝနဲ့ရင်းပြီး ရောက်လာ၊
နောက်တယောက်က
အားလုံး အသစ်က ပြန်စဖို့တဲ့…..
– ရဲဘော်ချေရဲ့ အဆိုအမိန့်တွေ
အလွတ်ကျက်ထားသူက
တော်လှန်ရေးဆိုတာ
ကြီးမြတ်တဲ့ အချစ်ပါပဲတဲ့။
– ဘယ်သူများ မနာမကျင်ဘဲ
ချစ်လို့ရခဲ့ဖူးလို့လဲ?
– ခြေတဖက် မရှိတော့တဲ့ ရဲဘော်လေးက
သူက တဝက်အာဇာနည်ပါတဲ့
ရယ်ရယ်မောမော အရွှန်းဖောက်တယ်။
– တံတိုင်းများ၊ စည်းရိုးများကို
ငါမတည်ဆောက်လို၊
ဝါးတံတားငယ်မှာ နှီးတပင်အဖြစ်သာ
အသုံးဝင်လိုခဲ့ပါတယ်တဲ့။
– မေးခွန်းကို ပြဿနာလို့ ငါမတွေး
အဖြေက ပြဿနာဖြစ်လာမှာသာ စိုးရိမ်မိတာပါ၊
ကလေးတွေ ငိုတဲ့အခါ
လူကြီးများလည်း အိပ်မပျော်နိုင်တော့ပါ။
– မြေမြှုပ်မိုင်းတွေရှင်းရင်း
ကွဲကြေနေတဲ့ နှလုံးသားတွေများ တွေ့မိရင်လေ
နီးစပ်ရာ အလံလွှမ်းပြီး
အလေးနီနဲ့ ဂုဏ်ပြုပေးလိုက်ကြပါဗျာ။
မြင့်ဆွေ