ကမ္ဘာ့နိုင်ငံရေးနဲ့စီးပွားရေးလောက၊ နောက်ပြီး မီဒီယာလောကမှာ ခရိုနီဆိုတဲ့အသုံးအနှုန်းကို ပေါပေါများများ သုံးတာဟာ ၁၉၉ဝ စုနှစ် အစပိုင်းက စခဲ့ပြီး ၁၉၉၇ ခုနှစ်မှာ အထွတ်အထိပ်ရောက်တဲ့ အာရှတိုက် ငွေကြေးအကျပ်အတည်းက စတယ်လို့ ပြောကြပါတယ်။ တကယ်က အဲဒီလိုခရိုနီလို့ ခေါ်ရမယ့်လူတွေက စောစောကတည်းက ပေါ်နေတာပါ။ အထူးသဖြင့် မဖွံ့ဖြိုးသေးတဲ့နိုင်ငံတွေ၊ စစ်အာဏာရှင်နိုင်ငံတွေမှာ အများဆုံးနဲ့အဆိုးဆုံး ဖြစ်ပါတယ်။
ဗမာပြည်မှာကတော့ ဗမာပြည်ရဲ့ စစ်အုပ်စုပထမမျိုးဆက်လို့ ခေါ်ရမယ့် ဗိုလ်နေဝင်း-ဗိုလ်အောင်ကြီးတို့ရဲ့ ၁၉၅၈ ခုနှစ် အာဏာသိမ်းပွဲလောက်ကစပြီး သန္ဓေတည်တယ်လို့ ဆိုရမယ်ထင်ပါတယ်။ ကူမင်တန် တရုတ်ဖြူနဲ့တိုက်တဲ့ စစ်တပ်တွေထဲက ထိပ်သီးတချို့ဟာ ဘိန်းရာဇာတွေနဲ့ ချိတ်ဆက်မိကြ၊ ယိုးဒယားနဲ့ ဆက်တဲ့ မှောင်ခိုလမ်းကြောင်းတွေ အကာအကွယ်ပေးကြနဲ့ ခရိုနီမွေးပြီး စားရသောက်ရတဲ့အရသာကို စပြီးခံတွင်းတွေ့ခဲ့ကြတာ ဖြစ်ပါတယ်။ ဒါတွေနဲ့ တပြိုင်နက်တည်းလိုမှာလည်း ဂျပန်စစ်လျော်ကြေးထဲက စားပေါက်တွေကို ကြုံရပြန်တော့ စစ်တပ်ထိပ်သီးတွေရဲ့ ခရိုနီတွေ စပေါ်လာပါတော့တယ်။ ဒီနေ့ ဗမာပြည်က ခရိုနီတွေထဲမှာ နာမည်ကြီးတဦးဖြစ်တဲ့ ဦးတေဇရဲ့ယောက်ခမ ဒေါ်ထူးတို့ဟာ အဲဒီတုန်းက စစ်အုပ်စုရဲ့ခရိုနီတွေလို့ သတင်းကြီးခဲ့ပါတယ်။ သည့်အရင်တုန်းက ဖဆပလ၊ ပထစ လက်ထက်တွေမှာ အာဏာရသူတို့ကို ထောက်ခံတဲ့၊ သူတို့နဲ့ရင်းနှီးတဲ့ တိုင်းရင်းသားဓနရှင်တွေ မရှိမဟုတ်၊ ရှိခဲ့ပါတယ်။ ဒါပေမဲ့ သူတို့ဟာ အခုခေတ် ခရိုနီတွေလောက် ကြီးပွားချမ်းသာ၊ အခွင့်ထူးတွေရကြတာ မဟုတ်ပါဘူး။ နောက်ပြီး လွတ်လပ်ရေးရပြီးနောက်ကနေ ပထမအကြိမ်အာဏာသိမ်းတဲ့အထိ ဆိုတဲ့ကာလဟာ အင်မတန်မှ တိုတောင်းလွန်းပါတယ်။ ဒါ့အပြင် သူတို့ရဲ့စီးပွားရေးတွေက တစ်ကနေ စတည်ထောင်ရသလိုလည်း ဖြစ်နေခဲ့တောင် အရှိန်ရကာစမှာ ဗိုလ်နေဝင်းရဲ့မဆလ“ပြည်သူပိုင်”ထိသွားကြပါတယ်။ ၁၉၈၈ ခုနှစ် နောက်ပိုင်း ဗိုလ်သန်းရွှေတို့ကျတော့ ဗိုလ်နေဝင်းရဲ့ မဆလ စနစ်ကြီးက“ပြည်သူပိုင်သိမ်း”ပြီး စုဆောင်းပေးခဲ့တဲ့ အဆောက်အအုံကြီး ရှိပြီးသားဆိုတော့ စစ်အာဏာက ကျောထောက်နောက်ခံပြုထားတဲ့ ဦးပိုင်ဟာ အရှင်မွေးနေ့ချင်းကြီး အချမ်းသာကြီးချမ်းသာခဲ့ပါတယ်။ ဒီဗမာပြည်ရဲ့ ဒုတိယမျိုးဆက် စစ်အုပ်စုလို့ ဆိုရမယ့် ဗိုလ်သန်းရွှေတို့က ခရိုနီစနစ်ကို စတင်ပျိုးထောင်ပေးလိုက်တဲ့ ၁၉၈၈ – ၈၉ ကာလကနေ ဒီနေ့အထိဆိုရင် နှစ်ပေါင်းသုံးဆယ်နီးပါး ရှိပြီမို့ ဒီနေ့အခါမှာ ဒီခရိုနီတွေဟာ အမွေးအတောင် သာမက၊ အတက်တွေ၊ ချိုတွေ၊ ဆူးတောင်တွေ အကုန်ပေါက်ပြီး အဆီယစ်ဝဖီးနေကြသူတွေ ဖြစ်ပါတယ်။
ဒီနေ့ဗမာပြည်ရဲ့ အဓိကစီးပွားရေးလုပ်ငန်းကြီးတွေကို ကြည့်လိုက်ပါ၊ သွင်းကုန်ထုတ်ကုန်လုပ်ငန်း၊ ဆက်သွယ်ရေးလုပ်ငန်း၊ ဘဏ်လုပ်ငန်း၊ ဆောက်လုပ်ရေးလုပ်ငန်း၊ သတ္တု၊ သစ်၊ ကျောက်မျက်ရတနာ အားလုံး ခရိုနီတွေရဲ့ လက်ထဲမှာပဲ မဟုတ်လား။ အရပ်သားပြော ပြောရရင် ကောင်းတာဆို ဘာတခုမှ မချန်ဘူးဆိုတဲ့ လူမျိုးတွေပါ။ ဒါသာမက မူးယစ်ဆေးဝါးတောင် မကျန်ဘူးလို့လည်း ဖြည့်နိုင်ပါသေးတယ်။
ဒီနိုင်ငံမှာက ခရိုနီဆိုတာဟာ စစ်အာဏာရှင်စနစ်နဲ့အတူ ပေါ်လာတာဖြစ်လို့ အများစုဟာ စစ်ဗိုလ်ချုပ်တွေရဲ့ ဆွေမျိုးသားချင်း၊ ထောက်လှမ်းရေးနဲ့ပတ်သက်သူ၊ ဘိန်းဘုရင်၊ မူးယစ်ဆေးဝါးရာဇဝတ်သားတွေသာ ဖစ်တယ်။ သဘာဝသယံဇာတတွေကို အဖြုံးတီးဆုံး၊ သဘာဝပတ်ဝန်းကျင်ကို အဖျက်ဆီးဆုံး၊ လူ့မျိုးဆက်တွေကို အပျက်စီးစေဆုံး (မူးယစ်ဆေးဝါးစတာနဲ့) ဟာလည်း သူတို့တတွေပဲ ဖြစ်ပါတယ်။
ဒီနေ့ ဗမာပြည်ရဲ့စီးပွားရေးလောကမှာ ဆက်တည်ရှိနေတဲ့ ခရိုနီတွေဟာ စစ်အစိုးရ၊ စစ်အုပ်စုရဲ့ အဓိကဒေါက်တိုင်တွေ ဖြစ်မြဲဖြစ်နေပါတယ်။
နှစ်လတာရှည်ဖြစ်နေတဲ့ (မွေးထားတဲ့) ပြည်တွင်းစစ်ကြီး ဖြစ်နေတဲ့ ဒေသတွေက ခရိုနီလောင်းတွေဟာ အဲဒီက စစ်မျက်နှာပြင်တွေက စစ်အရာရှိကြီးတွေကို ပဏ္ဍာဆက်၊ ဆရာမွေးရာကနေ သူတို့ရဲ့ အမည်းရောင်ငွေတွေကို ခဝါချ၊ မြို့တွေမှာ ရင်းနှီးမြှုပ်နှံတာတွေ လုပ်ရင်းကနေ စစ်တပ်ထိပ်ပိုင်းတွေနဲ့ ဆက်မိသွားကြပါတယ်။ ထောက်ပြသင့်တာက အခုလို ဆရာမွေး၊ တပည့်မွေးလောကမှာ ဆရာလုပ်သူကရော၊ တပည့်လုပ်သူကပါ တဖက်သားကို ကိုယ့်အိတ်ထဲထည့်ထားနိုင်တယ်လို့ တွက်ထားကြတယ် ဆိုတာပါပဲ။ ဒါကြောင့်လည်း ကွယ်လွန်သူ ဦးဝင်းတင်က ဒီခရိုနီတွေကို အာဏာကပ်ပါးဓားပြများလို့ တင်စားပြောခဲ့တာ ဖြစ်ပါတယ်။ တကယ်တော့ ဗမာပြည်မှာသာမက တခြားနိုင်ငံတွေမှာရော ခရိုနီစနစ် ဆိုတာဟာ အကျင့်ပျက်ခြစားမှုနဲ့ တိုက်ရိုက်ဆက်စပ်နေတာပါ။ အာဏာရှိသူတွေက ရိုးသားတည်ကြည်ရင် ဒီလိုဖြစ်မလာပါဘူး။
ကမ္ဘာမှာ ခရိုနီဆိုတာ နိုင်ငံတိုင်းလို့ ဆိုရမလောက် ရှိတာပါ။ ဒါပေမဲ့ ဗမာပြည်က ခရိုနီအများတကာ့ အများစုဟာ ဗမာပြည်သူတွေကို ဆယ်စုနှစ်ပေါင်းများစွာ နှိပ်စက်နေတဲ့ စစ်အုပ်စုနဲ့ ပတ်သက်နေတာ၊ စစ်အုပ်စုကို အထောက်အကူပြုနေတာမို့ ပြဿနာက ပိုကြီးနေတာပါ။
ခရိုနီတွေကလည်း အာဏာရှိသူတွေကို အိတ်ထဲမှာ ထည့်ထားနိုင်တယ်လို့ ကိုယ့်ကိုယ်ကို ယူဆကြောင်း အထက်မှာရေးခဲ့ပါတယ်။ တစ္ဆေမွေးထားမိတဲ့ မှော်ဆရာဟာ တစ္ဆေရဲ့အမိန့်ကို နာခံရတာလည်း ရှိတတ်တယ် မဟုတ်ပါလား။ ဗိုလ်သိန်းစိန်တို့တတွေ ဗိုလ်သန်းရွှေမြေးတွေကို ကြောက်ရတယ်ဆိုတာ ဘာမှမဆန်းပါဘူး။ ဒီလိုနဲ့ ဒီတစ္ဆေတွေ သက်တမ်းရှည်လာ၊ ခိုင်မာလာ၊ ဆွေမျိုးအရ-နောက်ကြောင်းအရ- လူမျိုးအရ- ဘာသာရေးအရ စသဖြင့် သူတို့ချင်း ပေါင်းမိလာကြတဲ့အခါမှာ တိုင်းပြည်မှာ ဧရာမအင်အားကြီးတရပ် ဖြစ်လာပါတယ်။ အစတော့ စီးပွားရေးလောကမှာပါ။ နောက်တော့ နိုင်ငံရေးလောကကိုပါ သြဇာပေးလာပါတယ်။
ခရိုနီစနစ်ထွန်းကားပြီး ဖြစ်နေတဲ့ နိုင်ငံတခုမှာ အသစ်တက်လာတဲ့ အစိုးရတရပ်ဟာ တိုင်းပြည်နဲ့ပြည်သူတွေအတွက် ဆိုးကျိုးပေးနေတဲ့ ခရိုနီစနစ်ကို ဖျက်သိမ်းမလား။ ခရိုနီတွေကို တည့်အောင်ပေါင်းပြီး ရှေးရိုးအတိုင်းသွားမလား၊ ကိုယ့်ခရိုနီကိုယ်မွေးပြီး ခရိုနီဟောင်းတွေကို ပြန်ရင်ဆိုင်မလားဆိုတဲ့ ပြဿနာမျိုး ကြုံရတတ်ပါတယ်။ ဗမာပြည်က ခရိုနီတွေက အထက်မှာ ပြောခဲ့သလို စစ်အာဏာရှင်တွေနဲ့ တိုက်ရိုက်ပတ်သက်နေတော့ တော်ရုံတန်ရုံပြတ်သားမှုနဲ့တော့ လုပ်မရပါဘူး။
