ဗမာပြည်ကွန်မြူနစ်ပါတီပြောရေးဆိုခွင့်ရှိသူ ရဲဘော်ဖိုးသံချောင်းကို TM MEDIA မှ အင်တာဗျူး
(စာသားဖြင့် ဖော်ပြချက်)
မေးခွန်း။ ။PLA ရဲ့ စစ်ရေးနိုင်ငံရေးသင်တန်းတွေကို ဘယ်မှာပေးခဲ့သလဲ။
ဖြေဆိုချက်။ ။ PLA ရဲ့ စစ်ရေးသင်တန်းတွေကို အစပိုင်းက PLA ဖွဲ့စည်းတည်ထောင်မှုကို လက်ခံအားပေးတဲ့ တိုင်းရင်းသားလက်နက်ကိုင်တော်လှန်ရေးအဖွဲ့အစည်းတချို့တည်ရှိရာမှာ သင်တန်းပေးခဲ့ပါတယ်လို့ ယေဘုယျ ဖြေပါရစေ။ နောက်ပိုင်းမှာ မိမိရောက်ရှိရာဒေသတဝိုက်မှာ စစ်သင်တန်းတွေဖွင့်တာကို ကြိုးစားဆောင်ရွက်နေကြပါတယ်။
PLA ရဲ့နိုင်ငံရေးသင်တန်းတွေကိုတော့ စစ်ရေးသင်တန်းတက်ရောက်ချိန် အခွင့်သာတဲ့ဒေသမှာ သင်တန်းပေးပါတယ်။ ပြောရရင် PLA ကို နိုင်ငံရေးအရတည်ဆောက်ဖို့ နေရာဒေသမရွေး အခွင့်သာရင်သာသလို အခွင့်အလမ်းကို ဆုပ်ကိုင်ပြီး နိုင်ငံရေးသင်တန်းတွေပေးပါတယ်။ ပြောရရင် ရှေ့တန်းရန်သူ့စခန်းတွေနဲ့နီးကပ်တဲ့တောင်ကုန်းတွေမှာ ကြိုတင်နေရာယူထားတဲ့အချိန်မှာတောင် နိုင်ငံရေးသင်တန်းပေးခဲ့တာရှိပါတယ်။ စစ်ကိုင်းတိုင်းလို တိုက်ပွဲခွင်ဒေသထဲမှာလည်း အရက် ၂၀ ကျော် နိုင်ငံရေးသင်တန်းတခုကို ကြိုးစားပြုလုပ်ပေးနိုင်ခဲ့ပါတယ်။ တချို့ PLA ရဲဘော်တွေဆိုရင် သင်တန်းအတွက် ဝေးကွာတဲ့ပြောက်ကျားစခန်းနေရာကနေ ခက်ခဲပင်ပန်းစွာ နေတိုင်းလာရောက်ပြီး သင်တန်းတက်ရောက်တာတွေ လုပ်ခဲ့ကြရပါတယ်။
မေးခွန်း။ ။ PLA နဲ့ပတ်သက်ပြီးဝေဖန်ကြတဲ့အထဲမှာ PLA ဆိုတဲ့နာမည်ဟာ တရုတ်ပြည်ပြည်သူ့လွတ်မြောက်ရေးတပ်မတော်နဲ့ နာမည်ချင်းတူနေတဲ့အတွက်လည်း ဝေဖန်ကြပါတယ်။ တချို့ကလည်း တရုတ်ပြည်ကျောထောက်နောက်ခံနဲ့ထူထောင်ထားတဲ့တပ်လားလို့ ထင်ကြတာရှိပါတယ်။ အဲဒီအချက်နဲ့ပတ်သက်ပြီး ရဲဘော်ဖိုးသံချောင်းကို မေးကြည့်ပါတယ်။
ဖြေကြားချက်။ ။ ဒီမေးခွန်းနဲ့ပတ်သက်လို့ ကျွန်တော်တို့အနေနဲ့ ရှင်းရှင်းလင်းဖြေကြားပါမယ်။ ၁၉၄၈ ခုနှစ် ကျွန်တော်တို့ရဲ့ ပြည်သူ့ဒီမိုကရေစီလက်နက်ကိုင်တော်လှန်ရေးစတင်ကတည်းက ကျွန်တော်တို့ရဲ့ပါတီတပ်ဟာ ပြည်သူ့လွတ်မြောက်ရေးတပ်မတော်အဖြစ် စတင်ဖွဲ့စည်းခဲ့တာပါ။ စာနဲ့ပေနဲ့အထင်အရှား ရှိပါတယ်။ ၁၉၄၈-၄၉ ခုနှစ် သတင်းစာ စာစောင်တွေထဲမှာ ပြန်လည်ရှာဖွေကြည့်ရင် ကျွန်တော်တို့ပါတီဦးဆောင်တဲ့တပ်ဟာ PLA ပြည်သူ့လွတ်မြောက်ရေးတပ်မတော်အဖြစ်တည်ရှိခဲ့ကြောင်း အထင်အရှားတွေ့ရမှာပါ။ အဲဒီခေတ်က ကမ္ဘာပေါ်ရှိ ကိုလိုနီစနစ်အုပ်စိုးမှုအောက်ကလွတ်မြောက်ဖို့ကြိုးပမ်းကြတဲ့တိုင်းပြည်တွေဟာ တိုင်းပြည်လွတ်လပ်ရေး၊ အမျိုးသားလွတ်မြောက်ရောက်ရေး၊ ပြည်သူ့လွတ်မြောက်ရေးဆိုတဲ့အသုံးအနှုန်းတွေကို တွင်တွင်ကျယ်ကျယ် အသုံးပြုခဲ့ကြပါတယ်။
အဲဒီကာလမှာပဲ တရုတ်ပြည်ကွန်မြူနစ်ပါတီကလည်း သူ့တပ်ကို PLA ဆိုတဲ့ နာမည် ပြောင်းလဲခေါ်ဝေါ်သုံးစွဲခဲ့ပါတယ်။
နည်းနည်းလောက် ရှင်းပြပါရစေ။
တရုတ်ပြည်ကွန်မြူနစ်ပါတီရဲ့ပါတီတပ်ဟာ ၁၉၂၇ ခုနှစ်တုန်းက တရုတ်ပြည် အလုပ်သမား လယ်သမား တပ်နီတော်- နာမည်နဲ့ပါ။
၁၉၃၄-၃၅ ခရီးရှည်ချီတက်ပွဲကာလအထိ တပ်နီတော်နာမည်နဲ့ ဖြစ်ပါတယ်။
၁၉၃၇က ၁၉၄၅ ခုနှစ်အထိက အမှတ် (၈) စစ်ကြောင်းတပ်မတော်နဲ့ အမှတ် (၄) တပ်မတော်သစ်နာမည်တွေနဲ့ ရှိခဲ့ပါတယ်။
၁၉၄၅ ခုနှစ် ဂျပန်တို့ရှုံးနိမ့်သွားပြီး ၁၉၄၇ ခုနှစ် ဖေဖော်ဝါရီလကျမှ တရုတ်ပြည်ကွန်မြူနစ်ပါတီက အမှတ်(၈) စစ်ကြောင်းတပ်မတော်နဲ့ အမှတ်(၄) တပ်မတော်သစ်ကို ပြည်သူ့လွတ်မြောက်ရေးတပ်မတော် (PLA) အဖြစ် ပေါင်းစည်းဖို့ဆုံးဖြတ်ချက် ချခဲ့ပါတယ်။ ဒီလို ပြည်သူ့လွတ်မြောက်ရေးတပ်မတော်(PLA) အဖြစ် ပေါင်းစည်းပြီး ထူထောင်တဲ့လုပ်ငန်းဟာ ၁၉၄၈ ခုနှစ်နှောင်းပိုင်းမှ ပြီးဆုံးခဲ့တာဖြစ်တယ်လို့ သူတို့ မှတ်တမ်းတင်ထားပါတယ်။
ကျွန်တော်တို့ပါတီဟာ တရုတ်ပြည်ကွန်မြူနစ်ပါတီ PLA ထူထောင်ချိန်နဲ့မရှေးမနှောင်း ၁၈၄၈ ခုနှစ် မတ်လ ၂၈ ရက်နေ့ ပြည်သူ့ဒီမိုကရေစီတော်လှန်ရေးမှာ PLA ပြည်သူ့လွတ်မြောက်ရေးတပ်မတော်နာမည်နဲ့ တော်လှန်တိုက်ပွဲဝင်ခဲ့ပါတယ်။
ဘယ်သူက ဒီနာမည် စသုံးသုံး အဲဒါက အဓိက မဟုတ်ပါဘူး။ အဖိနှိပ်ခံအမျိုးသားပေါင်းစုံ ပြည်သူတွေ လွတ်မြောက်ရေးဆိုတဲ့ရည်မှန်းချက်ကသာ အဓိကပါ။ အဲဒီခေတ်အဲဒီကာလတုန်းက အမျိုးသားလွတ်မြောက်ရေးတို့ ပြည်သူ့လွတ်မြောက်ရေးတို့ဆိုတာကို လွတ်လပ်ရေးအတွက်ကြိုးပမ်းနေတဲ့နိုင်ငံတွေနဲ့ လွတ်လပ်ခါစနိုင်ငံတွေ တွင်တွင်ကျယ်ကျယ်သုံးခဲ့ကြတဲ့ အခေါ်အဝေါ် အသုံးအနှုန်းတခုဖြစ်ကြောင်း တင်ပြချင်တာပါ။
ကျွန်တော်တို့ ပါတီဟာ ၁၉၄၉ ခုနစ် နှစ်လယ်မှာ တော်လှန်တဲ့ဗမာ့တပ်မတော်၊ ပြည်သူ့ရဲဘော်တို့နဲ့ “ပြည်သူ့ဒီမိုကရေစီတပ်ပေါင်းစု” ဖွဲ့စည်းနိုင်ခဲ့တယ်။ ဒါကြောင့် ၁၉၅၀ ခုနှစ် စက်တင်ဘာလမှာ တပ်ပေါင်းစုရဲ့တပ်မတော်အဖြစ် ပြည်သူ့လွတ်မြောက်ရေးတပ်မတော် အင်အား ၁၅၀၀၀ နဲ့ တော်လှန်တဲ့ဗမာ့တပ်မတော်အင်အား ၃၀၀၀ ပေါင်းစည်းလိုက်ပါတယ်။ တပ်ပေါင်းစုတပ်ဖြစ်တဲ့တပ်ရဲ့နာမည်ကိုလည်း “ပြည်သူ့တပ်မတော်”အဖြစ် ပြောင်းလဲလိုက်ပါတယ်။ ပြောချင်တာက တပ်ပေါင်းစုမဖွဲ့မီ ကျွန်တော်တို့ပါတီတပ်ရဲ့ ၁၉၄၈ တော်လှန်ရေးအစက နာမည်ဟာ PLA ပြည်သူ့လွတ်မြောက်ရေးတပ်မတော် ဖြစ်ခဲ့တယ်ဆိုတာပါပဲ။
ဒါကြောင့် ကျွန်တော်တို့ရဲ့ ပါတီအတွင်းရေးမှူး ရဲဘော်ကြင်မောင်က နောင်မှာ လက်နက်ကိုင်တော်လှန်ရေးပြန်လည်ဆင်နွှဲပြီး ပါတီတပ်ဖွဲ့စည်းတဲ့အခါမှာ တပ်အမည်ကို “ပြည်သူ့လွတ်မြောက်ရေးတပ်မတော်” PLA လို့ အမည်ပေးဖို့ အသေအချာ မှာကြားခဲ့တာ ဖြစ်ပါတယ်။
(ကျွန်တော်တို့ပါတီဟာ ပြည်သူလူထုအပေါ် လက်နက်ကိုင်ဖိနှိပ်အုပ်ချုပ်နေတဲ့စစ်အာဏာရှင်စနစ်တွေ ရှိနေသရွေ့ မြေအောက်ပါတီအဖြစ်ရှိနေစေဦး- လက်နက်ကိုင်တော်လှန်ရေးလမ်းကြောင်းကို ရွေးလမ်းတခုအဖြစ်ထားမယ်လို့ ဆုံးဖြတ်ထားခဲ့တာပါ။ ဒါကြောင့်လည်း လက်နက်ကိုင်တော်လှန်ရေးတရပ်ဆင်နွှဲဖို့ ပါတီရဲ့တပ်မတော်တရပ် ထူထောင်ဖို့ ဆယ်စုနှစ်တခုခန့် လျှို့ဝှက်ကြိုးပမ်းပြင်ဆင်လာခဲ့တာ ဖြစ်ပါတယ်။ ဒါကြောင့်လည်း ၂၀၂၁ ခု စစ်အာဏာသိမ်းတဲ့နှစ် ပြည်သူ့အရေးတော်ပုံကြီးပေါ်ပေါက်လာတဲ့အခါ ပါတီရဲ့လက်နက်ကိုင်တော်လှန်ရေးတပ်ကို အချိန်ကိုက် ဖွဲ့စည်းနိုင်လိုက်တာပါ။ ဒီအခါ ရဲဘော်ကြင်မောင် ကြိုတင်မြော်မြင်မှာကြားတဲ့အတိုင်း တပ်အမည်ကို ပြည်သူ့လွတ်မြောက်ရေးတပ်မတော်လို့ အမည်ပေးလိုက်ခြင်း ဖြစ်ပါတယ်။ )
ဒီတပ်ကို တရုတ်ပြည် ကျောထောက်နောက်ခံနဲ့ ထူထောင်ခဲ့တာလား- ဆိုတဲ့ မေးခွန်းနဲ့ပတ်သက်လို့လည်း အပွင့်လင်းဆုံးနဲ့အရိုးသားဆုံး ဖြေဆိုပါမယ်။ ဒီမှာလည်း အတွင်းရေးမှူးရဲဘော်ထွန်းစကားကို ကိုးကားပါရစေဦး။
ကျွန်တော်တို့ပါတီဟာ ပဲခူးရိုးမမှာ ပါတီဗဟိုရဲ့အလံစိုက်ခဲ့စည်က ပါတီဟာ လုံးဝအမှီခိုကင်းပြီး ကိုယ်ထူးကိုယ်ချွန် စိတ်ဓာတ်ကို ကိုင်စွဲနိုင်ခဲ့တယ်။ ပဲခူးရိုးမကို လက်လွှတ်လိုက်ရတဲ့အချိန် ပါတီရဲ့အမှီခိုကင်းရေးဟာ ဆုံးရှုံးသွားခဲ့ရတယ်-လို့ ရဲဘော်ကြင်မောင်က သုံးသပ်ပြခဲ့ပါတယ်။ မျက်မှောက်ကာလမှာတော့ ကျွန်တော်တို့ပါတီရော ကျွန်တော်တို့တပ်ပါ လုံးဝအမှီခိုကင်းစွာ ကိုယ်ထူးကိုယ်ချွန်စိတ်ဓာတ်နဲ့ ခိုင်ခိုင်မာမာရပ်တည်နေတာဖြစ်ကြောင်း အသေအချာ ပြောနိုင်ပါတယ်။ ဒါကြောင့် အရှေ့ဖြစ်ဖြစ် အနောက်ဖြစ်ဖြစ် ဘယ်အင်အားကြီးနိုင်ငံကိုမှမှီခိုတာမရှိဘဲ ကိုယ့်ပြည်သူ့အားကိုသာအားကိုးပြီး တော်လှန်ရေးဆင်နွှဲနေပါတယ်။ ဒါကြောင့် ကျွန်တော်တို့ရဲဘော်တွေဟာ လက်နက်ငွေကြေး ဘာမှပြည့်စုံမှုမရှိပါဘူး။ ကျွန်တော်တို့ရဲဘော်တွေဟာ အခက်အခဲကြီးပါတယ်။ ဒါပေမဲ့ စစ်အာဏာရှင်စနစ်အမြစ်ပြတ်ချေမှုန်းရေးသန္နိဋ္ဌာန် ကျွန်တော်တို့မှာခိုင်မာပြတ်သားပါတယ်။ ပြည်သူ့လွတ်မြောက်ရေးတပ်မတော်ရဲ့ခြေလှမ်းတိုင်းဟာ ပြည်သူ့အကျိုးမှတပါး အခြားမရှိဆိုတဲ့ဆောင်ပုဒ်ကိုဦးထိပ်ပန်ပြီး ရဲဘော်တွေ ချီတက်နေကြပါတယ်။ ကျောရိုးမာမာ ခြေလှမ်းမှန်မှန်နဲ့ ကျားကုတ်ကျားခဲ ဇွဲနဘဲနဲ့ချီတက်နေကြရတာဖြစ်ပါတယ်။
မေးခွန်း။ ။ ဗမာပြည်ကွန်မြူနစ်ပါတီအကြောင်းကို လူတွေသိပ်မကြားကြရတာ တော်တော်ကြာမြင့်ခဲ့ပါတယ်။ စစ်ကောင်စီက ဗမာပြည်ကွန်မြူနစ်ပါတီဆိုတာမရှိဘူးလို့ပြောခဲ့ပါတယ်။ လူတော်တော်များများကလည်း အဲသလိုပဲ မှတ်ယူခဲ့ပါတယ်။ နည်းနည်းပါးပါးကျန်နေသေးရင်တောင်း တဖြည်းဖြည်းပျောက်ကွယ်သွားတော့မှာပဲလို့ တချို့က ယူဆခဲ့ကြပါတယ်။
အခုတော့စစ်ကောင်စီကပါ ဗမာပြည်ကွန်မြူနစ်ပါတီကို နာမည်ထုတ်ဖော်တိုက်ခိုက်လာတာမျိုးကို တွေ့ရပါတယ်။
စစ်ကောင်စီက ဗမာပြည်ကွန်မြူနစ်ပါတီဆိုတာမရှိတော့ဘူးလို့ပြောနေခဲ့ရာကနေ အခုတော့ ဗမာပြည်ကွန်မြူနစ်ပါတီကို နာမည်တပ်ပြီးပြောဆိုလာတာမျိုးတွေ့ရပါတယ်။ ဒါ့အပြင် တခြားအဖွဲ့အစည်းတွေရဲ့ဆောင်ရွက်ချက်တွေကိုတောင်မှာ ဗမာပြည်ကွန်မြူနစ်ပါတီလုပ်ဟန်ဆိုပြီး ခေါင်းစဉ်တပ်ဝေဖန်လာတာမျိုးအထိပြန်တွေ့ရပါတယ်။ (ဗိုလ်ချုပ်ဇော်မင်းထွန်းပြောတာ)
အဲသလိုထုတ်ဖော်ပြောဆိုလာတာက ဘာ့ကြောင့်လို့ထင်ပါသလဲ။
ဖြေကြားချက်။ ။ ဒါနဲ့ပတ်သက်လို့ ပြောရရင်တော့ ၁၉၄၈ ကစပြီး တက်လာသမျှဖောက်ပြန်ရေးအစိုးရတွေ၊ စစ်အစိုးရတွေဟာ တလျှောက်လုံး ဗမာပြည်ကွန်မြူနစ်ပါတီကို ဦးတည်ရန်သူအဖြစ် ဒါမှမဟုတ် ရန်သူတော်နံပါတ် ၁ အဖြစ် စစ်ရေးအရ နိုင်ငံရေးအရတိုက်ခိုက်လာခဲ့ကြတာ ဖြစ်ပါတယ်။ ဒါပေမဲ့ ၁၉၈၉ ခုနှစ် ဗမာပြည်ကွန်မြူနစ်ပါတီ ထိခိုက်နစ်နာမှုကြီးဖြစ်ခဲ့တဲ့ ခွဲထွက်အရေးအခင်းဖြစ်ပွားပြီးတဲ့နောက်မှာ ဗမာပြည်ကွန်မြူနစ်ပါတီဟာ သေလောက်တဲ့ဒဏ်ရာ ရခဲ့ပါတယ်။ အင်အားအရလည်း အလွန်ချည့်နဲ့သွားခဲ့ရပါတယ်။
အဲဒီနောက်မှာ ဆိုဗီယက်ယူနီယံ ပြိုကွဲမှုကြီးဖြစ်သွားခဲ့ပြီး နိုင်ငံတကာမှာ ကွန်မြူနစ်လှုပ်ရှားမှုအရေးတော်ပုံဟာ ဒီရေနိမ့်ကာလရောက်သွားခဲ့ရပြန်တယ်။ ဒီတော့ နိုင်ငံတကာက ဖောက်ပြန်ရေးသမားတွေအတွက် အူမြူးချိုကြွစရာ ဖြစ်သွားပါတေ့တယ်။ အရင်းရှင်စနစ်အောင်ပွဲခံပြီ၊ သမိုင်း နိဂုံးချုပ်သွားပြီ၊ သမိုင်းဟာ အရင်းရှင်စနစ်အထွတ်အထိပ်ရောက်ချိန်မှာပဲ ဇာတ်သိမ်းခန်းရောက်သွားပြီလို့ ဝမ်းသာအားရအော်ဟစ်ကြွေးကြော်ကြပါတယ်။
အလားတူပဲ ဗမာပြည်က စစ်အုပ်စုနဲ့ဖောက်ပြန်ရေးသမားတွေကလည်း သေလောက်တဲ့ဒဏ်ရာရသွားတဲ့ ဗမာပြည်ကွန်မြူနစ်ပါတီကို ဗမာပြည်ကွန်မြူနစ်ပါတီရဲ့သမိုင်း နိဂုံးချုပ်သွားပြီ၊ သေသွားပြီလို့ သူတို့ အစစ်အမှန်ယုံကြည်သည်ဖြစ်စေ မယုံကြည်သည်ဖြစ်စေ အဲသလိုဝါဒဖြန့်ချိခဲ့ကြပါတယ်။ စစ်အုပ်စုနောက်လိုက် မီဒီယာတွေနဲ့ စာရေးဆရာဆရာအချို့ကလည်း ဒီအလုပ်ကိုအစွမ်းကုန်လုပ်ခဲ့ကြပါတယ်။ သည့်နောက် အမျိုးသားဒီမိုကရေစီအဖွဲ့ချုပ်ကို စစ်ရေးအရတိုက်ခိုက်နေရတာမဟုတ်သည့်တိုင်အောင် ဦးတည်ရန်သူ ဒါမှမဟုတ် ရန်သူတော်နံပါတ် ၁ အဖြစ် ပြောင်းလဲသတ်မှတ်လာခဲ့ကြပါတယ်။
ဒါပေမဲ့ ဗမာပြည်ကွန်မြူနစ်ပါတီဟာ သေလောက်တဲ့ဒဏ်ရာရခဲ့ပေမယ့် သူတို့ထင်သလို သေသွားခဲ့တာမဟုတ်ပါဘူး။ ကိုယ့်ကိုယ်ပေါ်ကသွေးတွေကို ကိုယ့်ဘာသာသုတ် ကိုယ့်ဒဏ်ရာ ကိုယ့်ဘာသာကုသပြီး တော်လှန်ရေးလမ်းကြောင်းပေါ်မှာ မြေအောက်ပါတီအဖြစ်ရပ်တည်ရင်း ဆက်လက်လျှောက်လှမ်းလာခဲ့ပါတယ်။ သွေးစုပ်ခံ အဖိနှိပ်ခံလူတန်းစားတွေရှိနေသမျှ ဒီပြည်သူတွေရဲ့လွတ်မြောက်ရေးတာဝန်နဲ့ ပြည်သူ့ဒီမိုကရေစီတော်လှန်ရေးတာဝန်ကို ထမ်းရွက်ဖို့ ဗမာပြည်ကွန်မြူနစ်ပါတီဟာ ဆက်လက်တည်ရှိနေမှာပါပဲ။ ဒီကြားကာလမှာလည်း ဗမာပြည်ကွန်မြူနစ်ပါတီဟာ နိုင်ငံရေးအရ ဝါဒဖြန့်ချိမှုတွေ၊ ပြည်သူလူထုကိုစည်းရုံးမှုတွေကို ယူဂျီပါတီအဖြစ် ဆက်လက်လုပ်ကိုင်နေခဲ့တာပါပဲ။ ဗမာပြည်ကွန်မြူနစ်ပါတီရဲ့ ပါတီဝက်ဆိုက်တခု ထူထောင်ထားရုံမျှမက အလားတူ ပြည်သူ့အာဏာဂျာနယ်၊ အရေးတော်ပုံဂျာနယ်တို့ကိုပါထုတ်ဝေပြီး ဗမာပြည်တော်လှန်ရေးအတွက် ဆက်လက်ပြီး ဝါဒဖြန့်ချိတာ စည်းရုံးတာ လုပ်နေခဲ့တာပါပဲ။ ဗမာပြည်ရဲ့ အရေးကြီးတဲ့နိုင်ငံရေးတိုက်ပွဲတွေမှာ ဗမာပြည်ကွန်မြူနစ်ပါတီဟာ ယူဂျီပါတီအနေနဲ့ အစွမ်းကုန်ကြိုးစားပြီး ပါဝင်လာခဲ့တာဖြစ်ပါတယ်။ ဒါတွေကို သူတို့ မသိကျိုးကျွံလုပ်လာခဲ့ကြတာပါ။ အခုအခါမှာ ဗမာပြည်ကွန်မြူနစ်ပါတီဟာ ကိုယ့်ခြေထောက်ပေါ် ကိုယ် မြဲမြဲရပ်တည်နိုင်ခဲ့ပါပြီ။ ပါတီအလံကို ဆက်လက်လွှင့်ထူနိုင်ရုံမက PLA ပြည်သူ့လွတ်မြောက်ရေးတပ်မတော်ကိုပြန်လည်ဖွဲ့စည်းကာ ၂၀၂၁ ပြည်သူ့လက်နက်ကိုင်တော်လှန်ရေးကြီးအတွင်း မိမိလက်နက်ကိုင်တပ်ဖွဲ့များနဲ့ တတပ်တအားပါဝင်တိုက်ခိုက်နိုင်တဲ့အခြေအနေသို့ ပြန်လည်တက်လှမ်းနိုင်ခဲ့ပါပြီ။
ယနေ့မျက်မှောက်မှာတော့ သူ့ရဲ့ဦးတည်ရန်သူဟာ NUG အဖွဲ့အစည်းပါ။ ဒါကြောင့် NUG ကို သူတို့ သဲသဲမဲမဲ တိုက်နေကြတာ ဖြစ်ပါတယ်။
ဒါပေမဲ့ အဲသလိုသဘောထားတဲ့လုပ်ဆောင်နေရင်းက ဗမာပြည်ကွန်မြူနစ်ပါတီရဲ့နာမည်ကို သူတို့ထုတ်ဖော်ပြီး စွပ်စွဲတိုက်ခိုက်လာတာမှာ အကြောင်းရှိပါတယ်။
အဲဒါကတော့ ဗမာပြည်မှာ မြန်မာလူမျိုးအပါအဝင် တပြည်လုံး၊ တိုင်းရင်းသားတွေအပါအဝင် လူမျိုးပေါင်းစုံ ပြည်သူလူထုကြီးတရပ်လုံး ရရာလက်နက်ကိုင်စွဲပြီး စစ်အာဏာရှင်စနစ်ကိုအမြစ်ပါမကျန်ချေမှုန်းဖို့ ပြတ်ပြတ်သားသား တိုက်ပွဲဝင်လာတာဟာ သူတို့အတွက် မယုံကြည်နိုင်စရာအဖြစ်အပျက်တရပ်လို ဖြစ်နေပါတယ်။ ဗမာပြည် ပြည်သူလူထုဟာ စစ်အာဏာရှင်စနစ်အောက် ဆယ်စုနှစ်ပေါင်းများစွာ နာကည်းချက်တွေနဲ့ ရှင်သန်နေခဲ့ရတာ သူတို့လိုဖိနှိပ်သူတွေက နားမလည်ပါဘူး။ တော်လှန်ရေးအစဉ်အလာရှိတဲ့ ပြည်သူလူထုဆိုတာကိုလည်း သူတို့ မေ့လျော့နေခဲ့ပါတယ်။ အဲဒီကိစ္စကို သူတို့ ဉာဏ်မီသလောက်စဉ်းစားကြည့်ပုံ ရပါတယ်။
ဗမာပြည်သမိုင်းမှာ ဗမာပြည်ကွန်မြူနစ်ပါတီဟာ လက်နက်ကိုင်တိုက်ပွဲသဏ္ဌာန်နဲ့ရော နိုင်ငံရေးတိုက်ပွဲအပါ အခြားတိုက်ပွဲသဏ္ဌာန်တွေနဲ့ပါ သူတို့ကို အပြတ်သားဆုံးတိုက်လာတဲ့အဖွဲ့အစည်းပါ။ ၁၉၄၈ ကတည်းက နှစ်ပေါင်း ၄၀ တိုင် လက်နက်ကိုင်တော်လှန်ရေးကို မဆုတ်မနစ် ဇွဲနဘဲနဲ့ တိုက်ပွဲဆင်လာခဲ့တဲပါတီလည်းဖြစ်ပါတယ်။ မြေအောက်ပါတီဘဝနဲ့ ရှိနေစဉ်အတွင်းမှာလည်း အုပ်စိုးသူက လက်နက်ကိုင်ဖိနှိပ်မှုပြုတဲ့အခါ အုပ်စိုးခံပြည်သူတွေ လက်နက်နဲ့ ပြန်လည်ခုခံတာ တရားတယ်ဆိုပြီး လက်နက်ကိုင်တော်လှန်ရေးကို ရွေးလမ်းတခုအဖြစ် သတ်မှတ်ထားခဲ့ပါတယ်။ အဲဒီသဘောထားကိုလည်း အတိအလင်းထုတ်ဖော်ပြောကြားဝါဒဖြန့်ချိခဲ့ပါတယ်။
ဒီနေ့ ဗမာပြည် ပြည်သူလူထုထဲက ပြည်သူ့လက်နက်ကိုင်တော်လှန်ရေးတပ်ဖွဲ့တွေပေါ်လာပြီး လက်နက်ကိုင် တိုက်ပွဲတွေကို အတက်ကြွဆုံးဆင်နွှဲလာတဲ့အခါ နောက်ပြီး ဗမာပြည်ကွန်မြူနစ်ပါတီရဲ့ ပြည်သူ့လွတ်မြောက်ရေးတပ်မတော်ကလည်း ဒီတိုက်ပွဲတွေမှာပါဝင်တိုက်ခိုက်တာမြင်လာရတော ဒါတွေဟာ ဗမာပြည်ကွန်မြူနစ်ပါတီရဲ့ လမ်းစဉ်အတိုင်းလိုက်လုပ်လာနေကြတယ်လို့ သူတို့ယူဆလာကြဟန် ရှိပါတယ်။
အခု ပြည်သူလူထုကိုယ်တိုင် လက်နက်စွဲကိုင်ပြီး လက်နက်ကိုင်တော်လှန်ရေးဆင်နွှဲလာကြတဲ့အခါ….NUG ကိုယ်တိုင်ကရော တခြားတော်လှန်ရေးအဖွဲ့အစည်းတွေကပါ လက်နက်ကိုင်တော်လှန်ရေးဆိုတာကို ဆင်နွှဲလာကြတဲ့ အခါမှာ စစ်ကောင်စီက အထိတ်တလန့်နဲ့ ဟေ့-မင်းတို့က ကွန်မြူနစ်တွေလုပ်သလို လိုက်လုပ်နေကြပါလားဆိုပြီး အလန့်တကြား ထအော်လိုက်တဲ့ သဘောပါပဲ။
