အထိမခံတဲ့ ပြစ်မှုများ (လှသောင်း)

အထိမခံတဲ့ ပြစ်မှုများ (လှသောင်း)

ဘယ်ပြည်သူမဆို အချိန်မရွေးဖမ်းဆီးချုပ်နှောင် ထောင်ချခံရနိုင်ခြင်းဆိုတဲ့ ဖက်ဆစ်ခြိမ်းခြောက်မှုကို စစ်အုပ်စုက ဖန်တီးထားတယ်၊ သူတို့က ဒီပြစ်မှုကို လက်ညှိုးအထိုးမခံပေမဲ့ ရံဖန်ရံခါ ဝန်ထုပ်ခါတဲ့သဘော လွတ်ငြိမ်းခွင့်ပေးတာလေးတွေကိုတော့ လူထုက ကျေးဇူးတင် ကြိုဆိုပေးရမယ့်သဘောဖြစ်နေပါတယ်။ ထုနဲ့ထည်နဲ့ ကျုးလွန်ခဲ့တဲ့ လယ်သိမ်းယာသိမ်းပြစ်မှုများကိုလည်း တို့ထိလို့မရပေမယ့် အသုံးမလိုတဲ့ မြေအနည်းအကျဉ်း ပြန်စွန့်ပေးတာလေးတွေကိုတော့ လူထုက အမျက်ဖြေကြေအေးပေးရမယ့်သဘော ဖြစ်နေပြန်ပါတယ်။ အလေးထားပြောလိုတာက စစ်အုပ်စုဟာ ပြည်သူအပေါ်ကျူးလွန်ထားတဲ့ပြစ်မှုတွေကို ဝန်ခံဖို့ဝေလာဝေး အတို့အထိတောင်မခံဘူးဆိုတဲ့အချက်ဖြစ်ပါတယ်။

ဂျူလိုင်-၇ ကျောင်းသားသတ်ဖြတ်မှု၊ သပိတ်အလုပ်သမားများကို သတ်ဖြတ်မှု၊ ၈၈ အရေးတော်ပုံနှောင်းပိုင်းကာလမှာ ပြည်သူကို အစုလိုက်အပြုံလိုက်သတ်ဖြတ်မှု၊ ဒီပဲရင်းလုပ်ကြံမှု၊ ဒီနေ့ကာလအထိ ပူပူနွေးနွေး သွေးမခြောက်သေးတဲ့ လူမျိုးရေး ဘာသာရေး သတ်ဖြတ်မှုများ စတဲ့ပြစ်မှုကြီးများ အလွယ်တကူကျူးလွန်နိုင်နေတာက ပြည်တွင်းစစ်မီးတောက်လောင်နေတဲ့ အခြေခံအခြေအနေရှိပြီးဖြစ်နေတာကြောင့်ဖြစ်တယ်။ ဗျူရိုကရက်လူတန်းစားနဲ့ စစ်အုပ်စုက ဒီမီးကို ဦးဆောင်ထွန်းငြှိ ထိန်းသိမ်းတိုးချဲ့နေခဲ့တာ ဖြစ်ပါတယ်၊ ဒီလုပ်ရပ်ကိုယ်တိုင်က သရဖူပြစ်မှုကြီးဖြစ်တယ်၊ ဒီပြစ်မှုကို သေသေချာချာ မကိုင်တွယ်ဘဲနဲ့ကတော့ ပြည်တွင်းငြိမ်းချမ်းရေးဆိုင်ရာ ဘာပြဿနာကိုမှ ဖြေရှင်းနိုင်မှာမဟုတ်ပါ။

ဒါပေမဲ့ စစ်အုပ်စုကတော့ ဒီသရဖူပြစ်မှုကြီးကို အကိုင်ခံဖို့ နေနေသာသာ၊ ပြည်တွင်းစစ်လို့ အသုံးနှုန်းမခံ လူမျိုးစွဲ ဝါဒစွဲ မငြိမ်မသက်မှုအဖြစ်သာ သတ်မှတ်တယ်၊ ပြစ်မှုလို့ အပြောမခံ နိုင်ငံတော်မပြိုကွဲရေး တည်ငြိမ်ရေးအတွက်လုပ်ဆောင်တဲ့ ကောင်းမှုအဖြစ် ဖော်ထုတ်တယ်၊ ပြည်တွင်းစစ်ကို ကြုံကြိုက်တိုက်ဆိုင်မှုဖြစ်ရပ်ဆိုးအဖြစ်သတ်မှတ်ကာ သမိုင်းအတွင်း ကံမကောင်း အကြောင်းမလှစွာရှိခဲ့တဲ့ အမွေဆိုး၊ ပြဿနာဖြေရှင်းရေးတာဝန်ကို အောင်မြင်အောင်ထမ်းဆောင်ပြီးမှသာ စစ်တန်းလျားပြန်မယ်ဆိုပြီး ပေကပ်ပြောနေတယ်။

တကယ်တော့ ဒါဟာ ရှောင်တခင်ဖြစ်ရပ်မျိုးမဟုတ်သလို၊ အုပ်စိုးသူလူတန်းစား စိတ်ကောင်းနှလုံးကောင်း – စိတ်ဆိုးနှလုံးဆိုး ရှိမှု၊ မင်းကောင်းမင်းမြတ် – မင်းဆိုးမင်းညစ်ဆန်မှုအပေါ်မူတည်တဲ့ လုပ်ရပ်မျိုးလည်းမဟုတ်၊ လူဆိုးများ အလွယ်တကူကျုးလွန်တတ်ပြီး လူကောင်းများ အသက်နဲ့လဲ ရှောင်ကြဉ်လေ့ရှိတဲ့ ပြစ်မှုမျိုးလည်းမဟုတ်ပါ။ စစ်အုပ်စုရဲ့ လက်ဝါးကြီးအုပ်စီးပွားရေးစနစ်ကို လုံလုံခြုံခြုံကာကွယ်ဖို့အတွက် စစ်အာဏာရှင်နိုင်ငံရေးစနစ်ကို ခိုင်ခိုင်မာမာတည်ဆောက်ထားဖို့လိုတာကြောင့် ပြည်သူလူထုရဲ့ ဒီမိုကရေစီ အခွင့်အရေးနဲ့ အမျိုးသားအသီးသီးရဲ့တန်းတူမှုအခွင့်အရေးကို ပြင်းပြင်းထန်ထန်ဖိနှိပ်တဲ့ပြည်တွင်းစစ်ကို မလွဲမသွေ ဖက်တွယ်နေတာ ဖြစ်ပါတယ်။

အဲဒီလိုမျိုး လူတန်းစားသဘာဝအရကျူးလွန်တဲ့ အတို့အထိမခံတဲ့ပြစ်မှုတွေကို နယ်ချဲ့စနစ်ဆိုင်ရာ နယ်ပယ်မှာလည်းတွေ့ရနိုင်ပါတယ်။ အင်္ဂလိပ်ကိုလိုနီကျူးကျော်သိမ်းပိုက်ခဲ့မှုကို နယ်ချဲ့လူတန်းစားတရပ်လုံးက ပြစ်မှုအဖြစ်သဘောမထားပါ၊ အမျိုးသားလွတ်မြောက်ရေးလှုပ်ရှားမှုများ ကြီးမားကျယ်ပြန့်လာတဲ့အခြေအနေ၊ ကိုလိုနီထိန်းသိမ်းမှုဝန်ထုပ် လေးလာတဲ့အခြေအနေ၊ ခြေလှမ်းသစ် နည်းနာသစ်များပြောင်းသုံးရတော့မယ့်အခြေအနေမှာ နယ်မြေအသီးသီးကို အကန့်အသတ်နဲ့ လွတ်လပ်ရေးပေးပြီး ကိုယ်ရဲ့သြဇာလည်း အတိုင်းအတာအမျိုးမျိုးချန်ရစ်ကာ အောင်မြင်စွာဆုတ်ခွာနိုင်ခဲ့တာကိုတော့ ဂုဏ်ယူစရာအဖြစ် သူတို့က သဘောထားပါတယ်။ အနုမြူဗုံးဒဏ်သင့် ဂျပန်ပြည်သူများအပေါ် ပြစ်မှုကျူးလွန်သူ အမေရိကန်အုပ်စိုးသူကပြသတဲ့ စိတ်မကောင်းဖြစ်မှုဟာ တကယ်မှာတော့ မိမိသာ ဗိုလ်အစစ်ဖြစ်ကြောင်း ပြိုင်ဖက်တွေသိအောင် သတင်းစကားပါးတဲ့အနေနဲ့ မရက်စက်ရင်မဖြစ်လို့ ရက်စက်ခဲ့ရတာ စိတ်မကောင်းပါဆိုတဲ့သဘောမျှသာ ဖြစ်နေပါတယ်။ အလားတူစွာဘဲ သမိုင်းတလျှောက် နေရာအသီးသီးမှာ သယံဇာတလုယူသိမ်းပိုက်မှု၊ ကျွန်အရောင်းအဝယ်ပြုမှု၊ ဌာနေလူမျိုးများကို သတ်ဖြတ်ဖယ်ရှားမှု စတာတွေအားလုံးဟာလည်း နယ်ချဲ့စနစ်ကကျူးလွန်းတဲ့ပြစ်မှုများ ဘဲဖြစ်ပါတယ်။

နယ်ချဲ့လူတန်းစားကျူးလွန်တဲ့အထဲမှာ အဆိုးဝါးဆုံးပြစ်မှုကတော့ နယ်ချဲ့အချင်းချင်း သြဇာနယ်ပယ်လုယက်ရေးအတွက် စစ်ပြင်မှုနဲ့ စစ်ဆင်မှုတွေပါဘဲ။ ဒီကိစ္စမျိုးက လက်ဝှေ့ပွဲ ဘော်လုံးပွဲတွေမှာလို ဒီဘက်ကအားပေးမလား ဟိုဘက်ကအားပေးမလား၊ ကြားက မျှအားပေးမလား ပြောနေရမည့်ကိစ္စမျိုးမဟုတ်ပါ။ ဒီလို စစ်ပြင်ပွဲ စစ်ဆင်ပွဲများ ဦးဆောင်လှုံ့ဆော်ဆင်နွှဲမှု ပင်ကိုယ်ကို ဆန့်ကျင်ရမယ့်ကိစ္စဖြစ်ပါတယ်။ ဒီပွဲများမှာ အနိုင်အရှုံး ရလဒ်တခုခုဖြင့် အဆုံးသတ်ပြီး၊ တရားစီရင်ကြ ပြေငြိမ်းကြ အပေးအယူလုပ်ကြ အဖွဲ့သစ်တွေဖွဲ့ကြ စည်းကမ်းသစ်တွေ သတ်မှတ်ကြတာတွေဟာ တကယ်ကတော့ နောက်ပွဲကြီးတွေအတွက် ခြေလှမ်းပြင်ခြင်းမျှသာ ဖြစ်ပါတယ်။

ကျူးကျော်စစ် “အောင်မြင်စွာ” အဆုံးသတ်တာနဲ့ ပတ်သက်လို့ ပြောစရာဖြစ်ရပ်တခု လောလောလတ်လတ် ပေါ်ပေါက်လာပါတယ်။ ၂၀၂၀ ဖေဖော်ဝါရီ ၂၉ရက် နေ့ က ကာတာမှာ အာဖဂန်စစ်ဆိုင်ရာ ဒိုဟာသဘောတူညီချက် လက်မှတ်ရေးထိုးတဲ့ဖြစ်ရပ်ပါ။ စကတည်းမှာကိုဘဲ လက်ရှိ အာဖဂန်အစိုးရဘက်က အကျဉ်းသားလဲလှယ်ရေးကိစ္စနဲ့ပတ်သက်ပြီး ကန့်ကွက်မှုတွေပေါ်လာတာ၊ အာဖဂန် အင်အားစုများအချင်းချင်း အရှုပ်အထွေးတွေရှိနေတာ၊ စာချုပ် အကောင်အထည် ပေါ်လာဖို့ အလွန်ကိုမရေမရာနိုင်တာ၊ အမေရိကန် သမတရွေးကောက်ပွဲအတွက် အမြတ်ထုတ်တာလည်းဖြစ်နိုင်လို့ ထုံးစံအတိုင်း ရွေးကောက်ပွဲအပြီးမှာ အခြေအနေ ပြောင်းပြန် ပြောင်းသွားနိုင်သေးတာနဲ့ စာချုပ်အတွင်း ကာလအလိုက် ခြေလှမ်းဆိုင်ရာအချက်အလက်တွေအကြောင်း အထူးမပြောလိုပါ၊ စစ်ပွဲနဲ့ စာချုပ်အပေါ် အမေရိကန်နယ်ချဲ့သဘောထားကိုဘဲ အလေးထားပြောလိုပါတယ်။

အမေရိကန်နဲ့ နေတိုးတပ်များ အာဖဂန်အတွင်းသို့ ကျူးကျော်ဝင်ရောက် ပြီး ၁၉နှစ်နီးပါးကြာ စစ်ဆင်တိုက်ခိုက်တာဟာ ကမ္ဘာက ဘယ်လောက်ဘဲ ဆန့်ကျင်ဆန့်ကျင်၊ ပြည်သူတွေ ဘယ်လောက်ဘဲ သေကြေထိခိုက်မှုများများ၊ စစ်သားတွေ ဘယ်လောက်ဘဲ စတေးရစတေးရ၊ ၉၁၁ အကြမ်းဖက်အင်အားတွေကို သုတ်သင်ဖို့ ဖြစ်တဲ့အတွက် အမေရိကန်အုပ်စိုးသူတို့အနေနဲ့ ဒါကို ပြစ်မှုအဖြစ် သဘောမထားပါ။ အခုစာချုပ်မှာကိုဘဲ အာဖဂန်မြေပေါ် ဘယ်အကြမ်းဖက်အုပ်စုကိုမှ ခြေကုပ်မယူစေဖို့ တာလီဘန်တို့အပေါ် တောင်းဆိုထားတယ်။ ထိခိုက်မှုတွေများပြားလာပြီး စရိတ်လဲထောင်းလာ၊ အမေရိကန်ပြည်သူတွေကိုယ်တိုင်က ဒီစစ်ကို မကျေမနပ်နဲ့ ဆန့်ကျင်လာတဲ့အခြေအနေ၊ မိမိရဲ့ ကမ္ဘာ့ဗျူဟာကို “အကြမ်းဖက်ဝါဒချေမှုန်ရေး” စစ်မှ ပြိုင်ဘက်အင်အားကြီးများ (အထူးသဖြင့် တရုတ်နဲ့ရုရှား)ကို အလဲထိုးရေးစစ်မျက်နှာဘက်ဆီ လှည့်ပြောင်းဖို့ ပြင်ဆင်ရတောမည့်အခြေအနေရောက်လာချိန်မှာ အာဖဂန်မှ လက်ဦးမှုရှိရှိ ချောချောမောဆုတ်ခွာဖို့၊ ဗီယက်နမ်ကဆုတ်ခွာတုန်းကလို အိုးနင်းခွက်နင်းမဖြစ်ဖို့ အမေရိကန်အစိုးရက ခြေလှမ်း ပြင်ပါတယ်။

အစီအစဉ်အရကတော့ တပ်တွေကို အဆင့်ခွဲပြီး ဆုတ်ခွာစေမှာဖြစ်တယ်။ တာလီဘန်တွေကို ဆက်လက်ပေါင်းသင်းနိုင်သူများအဖြစ် သဘောထားကာ အနာဂါတ်မှာ အာဖဂန်အတွင်း စီအိုင်အေလို၊ အစိုးရစစ်တပ်လေ့ကျင့်ပေးတဲ့အရာရှိများလို အမေရိကန်သြဇာ အင်အားများကို ထားရှိဖို့ ၊ အစိုးရသစ်ကို ဘဏ္ဍာရေးအကူအညီများပေးသွားဖို့ စဉ်းစားချက်တွေလည်း ရှိပါတယ်။ အဲဒီတော့ အာဖဂန်ကျူးကျော်ရေးစစ်မှာ တကယ့်ရည်ရွယ်ချက်ဖြစ်တဲ့ မိမိရဲ့ ဗိုလ်အဆင့်နေရာထိန်းသိမ်းရေးကို ဆုတ်ခွာပြီးနောက်ပိုင်းမှာလည်း အမေရိကန်က ဆက်လက်လုပ်ဆောင်မှာ သေချာပါတယ်။

ဆုတ်ခွာခြင်းနဲ့ပတ်သက်လို့ပြောရရင်၊ မဆလ တပါတီစနစ်ကနေ ဦးနေဝင်းဆုတ်ခွာပေးမယ့်သဘော ပြခဲ့တာ ရှိခဲ့ပါတယ်၊ ဒါပေမဲ့ အချိန်က နောက်ကျသွားပါပြီ၊ ပြည်သူလူထုက ကိုယ့်အစီအမံနဲ့ကိုယ် အမှီအခိုကင်းကင်းနဲ့ ပါတီစုံစနစ်တည်ဆောက်ရေးလမ်းကို ရွေးချယ်ခဲ့ပြီး လူထုအုံကြွမှုအရေးတော်ပုံတရပ်ကို ဆင်နွှဲခဲ့ပါတယ်။ အခုအခါမှာ ပြည်တွင်းစစ်ရပ်စဲရေးအတွက် တဖက်သတ် အကြွင်းမဲ့အပစ်ရပ်တာမျိုး စစ်အုပ်စုဘက်က လက်ဦးမှုရှိရှိပြုလုပ်ဖို့တောင်းဆိုတာတွေဟာ လုံးဝ ဆီလျှော်ပါတယ်၊ ဒါပေမဲ့ စစ်အုပ်စုဟာ လက်နက်ကိုင်ဆန့်ကျင်သူအင်အားစုများအညံ့ခံရေးကိုဘဲ မမှိတ်မသုံပြောနေရုံမက ဘာသာရေးအကြောင်းပြု ပြည်တွင်းစစ် စစ်မျက်နှာသစ်များတောင် တိုးချဲ့ဖွင့်လာနေတယ်။ မာရသွန် ငြိမ်းချမ်းရေးဆွေးနွေးပွဲများမှာပါဝင်သူ ကာယကံရှင်တွေကိုယ်တိုင် ဟန်မပျက်စခန်းသွားနေရတဲ့သဘော ဖြစ်နေတယ်။ ဒါကြောင့် စစ်အုပ်စုဘက်က ပြည်တွင်းစစ်ကို လက်ဦးမှုရှိရှိ အဆုံးသတ်ဖို့ဆိုတာ မဖြစ်နိုင်ပါ။ အကယ်၍ ဖြစ်ခဲ့သည်ရှိတောင်မှ ပြည်တွင်းစစ်ကို စတင်တိုက်ခိုက်ခြင်းဟာ ဘယ်တော့မှလုပ်ခွင့်မရှိတဲ့ပြစ်မှုဖြစ်တယ်ဆိုတာကို လက်ခံမှာ မဟုတ်ပါ၊ နောက်ထပ် အချိန်မရွေး ဖောက်ခွဲ နိုင်ပါသေးတယ်။

သမိုင်းဘီးကို နောက်ပြန်ဆွဲတဲ့လက္ခဏာပါတဲ့လူတန်းစားများ ကြီးစိုးအုပ်စိုးတဲ့လူမှုအဆင့်နေရာရောက်နေရင် သူတို့ဟာ ဒီလိုမျိုး ပြစ်မှုများကို မလွဲမသွေ ကျူးလွန်ကြမှာပါဘဲ။ ဒါတွေကို သူတို့ကိုယ်တိုင်က ပြစ်မှုအဖြစ် လက်ခံ ဝန်ခံလာဖို့ဆိုတာ စိတ်ကူးယဉ်မှု သာဖြစ်ပါတယ်။တိုးတက်မှုကို အလိုလားဆုံးကိုယ်စားပြုတဲ့ အလုပ်သမားလူတန်းစားကကြီးစိုးအုပ်စိုးတဲ့ လူမှုအဆင့်နေရာ ရောက်မှသာ ဒီလို အခြင်းအရာများ ပပျောက်နိုင်မှာဖြစ်ပါတယ်။

လှသောင်း