အချိန်ရောက်လို့သာ လုပ်ရတဲ့ ရွေးကောက်ပွဲနဲ့ ပြည်သူတွေရဲ့တုံ့ပြန်မှု
(ရဲဘော်ဖိုးသံချောင်း)
အရေးတော်ပုံဂျာနယ်၊ အတွဲ(၃) အမှတ်(၄) မှာ ဖော်ပြမယ့်ဆောင်းပါး
ရွေးကောက်ပွဲနီးလာတယ်ဆိုတာနဲ့ ဒါနဲ့ပတ်သက်တဲ့ သဘောထားတွေအမျိုးမျိုး၊ တုံ့ပြန်မှုတွေအမျိုးမျိုး ပေါ်လာကြပါတယ်။ ဗမာပြည်ကရွေးကောက်ပွဲလို အာဏာရသူတွေအချင်းချင်း လူလဲ၊ နေရာပြောင်းဖို့အတွက် မျက်လှည့်ပြတဲ့ ရွေးကောက်ပွဲလိုဟာကျတော့ တုံံ့ပြန်မှုတွေဟာ ပိုလို့တောင်များပါတယ်။ ဗမာပြည်သူလူထုဆိုတာ မဟုတ်မခံ၊ သန်းကောင်ထက်ညည့်မနက်၊ မိုးကိုတက်ပြီး ဒူးနဲ့တိုက်မယ် စတဲ့ကြွေးကြော်သံတွေနဲ့ လူလုပ်ကြသူတွေဖြစ်တော့ မျက်လှည့်ပွဲကို အသာလေးထိုင်ကြည့် လက်ခုပ်တီးတာမျိုး မလုပ်ပါဘူး။ နည်းမျိုးစုံနဲ့ဆန့်ကျင်ကြတော့တာပါပဲ။ အနည်းဆုံး အိမ်တွင်းကထမင်းဝိုင်းမှာ၊ လဘက်ရည်ဆိုင်တွေမှာ “ဒါမျိုးတွေနဲ့ ဒို့ကိုတော့လာမလုပ်နဲ့”ဆိုတာမျိုးပြောဖြစ်ကြမှာပါ။ ဒီလိုပြောကြရာကနေ “ဒါဖြင့် ငါတို့ ဘာလုပ်ကြမလဲ”ဆိုတဲ့မေးခွန်းမျိုး၊ အတွေးမျိုးတွေပေါ်လာမှာပါ။ ၂၀၀၈ ခြေဥအောက် ရွေးကောက်ပွဲဝင်ပြီး ဝင်ပြင်လမ်းကြောင်း၊ ရင်ကြားစေ့ရေးလမ်းကြောင်း လိုက်နေတာတွေကို လက်မခံလိုတော့ဘဲ ၂၀၀၈ ခြေဥ ဆန့်ကျင်တိုက်ဖျက်ရေးလမ်းကြောင်းကို ပြတ်ပြတ်သားလျှောက်လှမ်းဖို့ ပိုင်းဖြတ်လာကြတဲ့အင်အားစုတွေလည်း ရှိနေပါတယ်။ နိုးဗုတ်ဟာ ဒီလိုကနေပေါ်ထွက်လာတဲ့ လှုပ်ရှားမှုတခုလို့ မြင်ပါတယ်။ စစ်အာဏာရှင်တွေရဲ့ မတရားလှည့်စားမှုကိုတားဆီးဖို့နည်းလမ်းတခု ဖေါ်ထုတ်တာလို့ယူဆပါတယ်။
ဓမ္မတာပဲ၊ ဒီရွေးကောက်ပွဲလှည့်ကွက်ကိုဖန်တီးတဲ့ စစ်အုပ်စုအသိုင်းအဝိုင်းနဲ့ အဲဒီလမ်းမှာ အကြွင်းအကျန်ကောက်စားနေတဲ့သူတွေဟာ ဒီနိုးဗုတ်လှုပ်ရှားမှုကို ဆန့်ကျင်တဲ့လုပ်ရပ်တွေကို ဉာဏ်နီဉာဏ်နက်ရှိသမျှ ညှစ်ထုတ်ဖန်တီးကြပါတော့တယ်။ နိုးဗုတ်လုပ်ကြသူတွေဟာ မဲပေးမယ့်သူတွေ လျော့နည်းအောင် လုပ်နေကြတာဆိုပြီး မဲနိုင်ဖို့ကြိုးစားနေသူတွေက ဒီလှုပ်ရှားမှုအပေါ် ဒေါသဖြစ်လာကြပါတယ်။ ဒီလိုလုပ်ရာမှာ သူတို့ဟာ အတွေ့အကြုံရှိထားကြသူတွေဖြစ်တဲ့အတိုင်း သာမန်ရိုးသားသူတွေကိုပါ သူတို့ဘက်ပါအောင်ဆွဲခေါ် ကြတာလည်း ရှိနေပါတယ်။
ဒီလို နိုးဗုတ်-ဂိုးဗုတ်ရယ်လို့ အပြိုင်ဖြစ်နေတဲ့ဖြစ်စဉ်ထဲမှာ ဒီအချက်လည်း အကြောင်းတခုအနေနဲ့ ပါဝင်ပါတယ်။ ဒါပေမဲ့ ဒီ ၂၀၀၈ အောက်က ရွေးကောက်ပွဲနဲ့ပတ်သက်ပြီး လှုပ်ရှားကြတာဟာ ဒီနှစ်ဖွဲ့တည်းလို့ဆိုရင် မှားပါလိမ့်မယ်။ တခြားလူတွေလည်း အသွင်သဏ္ဌာန်အမျိုးမျိုးနဲ့ လှုပ်ရှားနေကြမှာပါ။ ဒီလိုအခါမှာ နိုးဗုတ်နဲ့ဂိုးဗုတ်ရယ်လို့ နှစ်မျိုးတည်း ထိပ်တိုက် တိုက်နေကြလို့ လူထုတွေအာရုံပြားကုန်ရင် စစ်အုပ်စုနဲ့အာဏာရအသိုင်းအဝိုင်းက ကြိတ်ဝမ်းသာနေကြပါလိမ့်မယ်။ နှစ်ပေါင်း ၆၀ ကျော်၊ ၇ဝနီးပါး အာဏာယူထားခဲ့ကြတဲ့ စစ်အာဏာရှင်တွေရဲ့ နည်းပရိယာယ်တွေထဲမှာ ပြည်သူလူထုချင်းရန်တိုက်ပေးတာလည်း ပါတယ်ဆိုတာကို မမေ့သင့်ပါဘူ။
တဖက်မှာကျတော့လည်း ဒီရွေးကောက်ပွဲမှာ ဘယ်သူနိုင်နိုင်၊ ဘယ်လိုညွန့်ပေါင်းအစိုးရ ပဲပေါ်လာလာ၊ ၂၀၀၈ စစ်ခြေဥပဲ အောင်ပွဲခံမှာ ဖြစ်ကြောင်း။ ဒီအတွက် စစ်အုပ်စုပဲ အကျိုးအရှိဆုံးဖြစ်ပါလိမ့်မယ်။ သူတို့စိတ်ကြိုက် တသွေမတိမ်းနာခံတဲ့ လက်ရင်းအစိုးရမျိုး လူယုံအစိုးရမျိုး သူတို့ ပိုလိုချင်တာလည်း ထင်ရှားပါတယ်။ ဒါအတွက် ညစ်နည်းပေါင်းစုံနဲ့ ကြိုးပမ်းလုပ်ဆောင်လာနိုင်တာကိုလည်း သတိပြုသင့်ပါတယ်။
အဓိကအကျဆုံးက ပြည်သူလူထုကိုတတ်နိုင်သမျှအများဆုံး အရေအတွက်ရအောင် စည်းရုံးပြီး စစ်အာဏာရှင်စနစ်နဲ့ စစ်ခရိုနီ စီးပွားရေးအဆောက်အအုံကြီးကို ဖြိုချဖို့အတွက် ဦးတည်လှုပ်ရှားကြဖို့ဖြစ်ပါတယ်။ တချိန်တည်းမှာ ဒီရွေးကောက်ပွဲအပေါ် ဆန့်ကျင်မှုတွေကိုအသုံးချပြီး လူထုကိုနည်းမျိုးပေါင်းစုံနဲ့ဖိနှိပ်တာ၊ သူတို့လိုချင်တဲ့ ရလဒ်မထွက်ရင် ရွေးကောက်ပွဲမှာ မသမာမှုလုပ်တာ၊ အကြောင်းရှာပြီး နောက်အစိုးရကို ပြဿနာရှာတာ နောက်ဆုံးအာဏာသိမ်းဖို့အထိ မင်းမဲ့စရိုက်မျိုးစုံကို လုပ်ကြံဖန်တီးတာအထိ လုပ်လာနိုင်တယ်ဆိုတာကိုလည်း ကြိုတွေး၊ ကြိုပြင်ထားကြရပါမယ်။ ၂၀၀၈ ဖျက်သိမ်းရေးဟာ လတ်တလောရည်မှန်းချက်ဖြစ်တယ်။ အဓိကတိုက်ပွဲသဏ္ဌာန်ဟာ လူထုတိုက်ပွဲဖြစ်ပြီး လွှတ်တော်တွင်းတိုက်ပွဲဟာ အရန်ဖြစ်တယ်။ လွှတ်တော်ပလူထုတိုက်ပွဲကို အထောက်အကူပြုချင်လို့ ၂၀၀၈ ဖျက်သိမ်းရေးရပ်တည်ချက်နဲ့ နိုးဗိုဒ်လုပ်တာဖြစ်တယ်။ ဒါပေမဲ့ ရွေးကောက်ပွဲသပိတ်မှောက်တာတော့ မဟုတ်ဘူး။ ၂၀၀၈ ဖျက်သိမ်းရေး (လူထုတိုက်ပွဲကိုဝန်းရံဖို့) အတွက် ဂိုးဗုဒ်ကိုနားလည်ပေမယ့်- ခေါင်းလျှိုဝင်သွားတဲ့ ဂိုးဗုဒ်ကိုတော့ နိုးဗုဒ်က ဆန့်ကျင်တဲ့သဘော တွေ့ရပါတယ်။
ရွေးကောက်ပွဲနည်းလမ်းနဲ့ ၂ဝဝ၈အခြေခံဥပဒေအောက်မှာ ဆက်သွားနေကြလို့ကတော့ တိုင်းပြည်နွံထဲကမတက်နိုင်ဘူးဆိုတာကို ပြည်သူတွေ သဘောပေါက်လက်ခံအောင် ဟောပြောလှုပ်ရှားကြဖို့ဖြစ်ပါတယ်။ ဒီရွေးကောက်ပွဲဆန့်ကျင်ရေးလှုပ်ရှားမှု/တိုက်ပွဲဟာ စစ်အာဏာရှင်ဆန့်ကျင်ရေး၊ ၂ဝဝ၈ ခြေဥဖျက်သိမ်းရေးတို့အတွက် တခုတည်းသောနဲ့ နောက်ဆုံးတိုက်ပွဲမဟုတ်ပါဘူး။ လက်ရှိဗမာပြည်ရဲ့အခြေအနေအရဆိုရင် ဒီထက်ကြီးမားတဲ့၊ အရေးပါ တဲ့လူထုတိုက်ပွဲတွေ လှိုင်းလုံးကြီးတွေလိုကြွတက် လာမယ့်အချိန်ဟာမဝေးတော့ပါဘူး။ အဲဒီအတွက် ပြည်သူလူထုကြီးစည်းလုံးညီညွတ်မှုရှိရေးဟာ အဓိကအကျဆုံးနဲ့ အခုက စလုပ်ရမယ့်အလုပ်ဖြစ်ပါတယ်။
ရဲဘော်ဖိုးသံချောင်း