ကျွန်တော်ကြားဖူးသလို ပြောဆိုပါမည်(အမှတ် ၈)“ယူဂျီနဲ့ ထောက်လှမ်းရေး”
(A.ငြိမ်း)
(အရေးတော်ပုံဂျာနယ်၊ အတွဲ (၃) အမှတ်(၄) မှာ ဖော်ပြမယ့် ဆောင်းပါး)
(၁)
ယူဂျီဆိုလိုက်တာနဲ့ သူသူကိုယ်ကိုယ် နိုင်ငံရေးသမားတွေ လှုပ်လှုပ်ရှားရှားဖြစ်လာတတ်ကြတယ်။ ပါတီအဖွဲ့အစည်းတွေကလည်း မျက်လုံးဝိုင်းသွားတတ်ကြတယ်။ အနည်းဆုံး ဒီသတင်းကို နားမထောင်ဘဲ မဖတ်ဘဲ နေမရ – ဒါကကိုယ့်ဘက် -ရန်သူ့ဘက် (အထူးသဖြင့်စစ်တပ်) နဲ့ အုပ်စိုးသူအဆက်ဆက်ဘက်မှာလည်း ခေါင်းထောင်လာတတ်ကြတယ်။ အမြဲနားစွင့်နေတဲ့ ထောက်လှမ်းရေးဘက်ကပုဂ္ဂိုလ်တွေဆိုရင် ပိုအာရုံပြုကြမှာ သေချာပါတယ်။
လွတ်လပ်ရေးခေတ်နောက်ပိုင်း ကျွန်တော်တို့ ကြားဖူးတဲ့ မီလိုက်တဲ့ ကြုံလိုက်ဖူးတဲ့ ထောက်လှမ်းရေးတာဝန်ခံတွေ စဉ်ကြည့်မိတယ်။ ဗိုလ်မှူးကြီးချစ်ခင် (လေ)၊ ဗိုလ်မှူးကြီးလွင် (တပ်ထဲမှာ ဗိုလ်မှူးကြီးမောင်လွင် ၃ ယောက်ဖြစ်နေလို့ နှုတ်ခမ်းမွှေးမောင်လွင်လို့လည်း ခေါ်တတ်ကြ)၊ မျက်မှန်တင်ဦး၊ ဗိုလ်ခင်ညွန့် စသည် တွေ့မိပါတယ်။ ၄ ယောက်စလုံးက ဗိုလ်နေဝင်းမွေးထားတဲ့သူတွေ၊ တလက်ကိုင် လက်မရွံ့သမားတွေချည်းပဲ။ ရှေ့ ၂ ယောက်က ခိုင်းတာပဲ လုပ်တယ်။ အထွတ်အထိပ်ရောက်ဖို့အထိတက်လှမ်းဖို့ မျှော်မှန်းလုပ်ဆောင်ကြတာ မတွေ့ရ။ နောက် ၂ ယောက်ကျ တမျိုး –
(၂)
ကျွန်တော် ၁၉၇၉ – အရှေ့မြောက်ရောက်လာတော့ ထိုစဉ်က အာဏာလက်စောင်းထက်နေတဲ့ မျက်မှန်တင်ဦး (ရွှေနားပေတင်ဦး) နဲ့ ပတ်သက်တဲ့သတင်းတခု ပါလာတယ်။ မဆလ ဗဟိုကော်မတီမဲပေးပွဲတခုမှာ ဗိုလ်နေဝင်းက နံပါတ် (၆) ရောက်သွားတဲ့ကိစ္စ၊ ဗိုလ်တင်ဦးက ဗဟိုကော်မတီတွေခေါ်တွေ့ပြီး ပွဲကြမ်းပစ်လိုက်မှ နံပါတ် (၁) ပြန်ရောက်သွားတဲ့အကြောင်း ရဲဘော်ထွန်းကို အစီရင်ခံတော့ “ကျွန်တော်လည်း ကြားပါတယ်” တဲ့။ နောက်နေဝင်းက တင်ဦး ၂ ဦးနဲ့ တိုင်းပြည်ကို အုပ်ချုပ်နေကြောင်း လူတွေပြောနေတဲ့အကြောင်း တင်ပြတော့ ပြုံးပြီး “CC တွေကို တင်ဦးက ခေါ်လက်မှတ်ထိုးခိုင်းတဲ့ကိစ္စ ခင်ဗျားပြောတာက ပိုပြည့်စုံပါတယ်” လို့ မှတ်ချက်ပေးပါတယ်။
အရှေ့မြောက်စစ်ဒေသရောက်ပြီး ၄ နှစ်လောက်ကြာတော့ အာဏာနံပါတ် တစ် နှစ်ပိုင်းတစ်ပိုင်း မှာရှိတဲ့ မျက်မှန်ကြီးတင်ဦး နန်းကျပြီး ထောက်လှမ်းရေးအစဉ်အလာမရှိတဲ့ ဗိုလ်ခင်ညွန့် ထောက်လှမ်းရေးတာဝန်ခံ ဖြစ်လာတယ်။ (အသစ်ဆိုတော့ ဘယ်သူ့ဩဇာမှ ပါမလာနိုင်တော့ဘဲ လိုသလိုပုံသွင်းနိုင်လို့- လို့ထင်ပါတယ်။)
(၃)
သူ(ရဲဘော်ထွန်း) နဲ့တွေ့နေရတဲ့ ကာလမှာ ထောက်လှမ်းရေးအကြောင်းတွေ စကားစပ်မိကြတယ်။
(က) အိမ်တော်သန့်ရှင်းရေး (လခရ) ဆိုပြီး အမှုထမ်းတချို့ရှင်းပစ်တဲ့ကိစ္စ ဒေါ်ခင်မေသန်းနဲ့ ပြဿနာဖြစ်တာရဲ့ နောက်ကြောင်းရာဇဝင် (တိတိကျကျ မိတ်ဆက်ပေးတာ မဟုတ်၊ ဆက်စပ်စဉ်းစားနိုင်အောင်သာ ပြောတာဖြစ်)
(ခ) ထောက်လှမ်းရေးကိစ္စတခု ပြောရင်းက “ဗိုလ်စိန်မြ၊ ဗိုလ်လွန်းတင်တို့ဟာ ဆရာချစ်က ဆိုလိုက်ရင်ပြီးတယ်။ နှုတ်ခမ်းမွှေးမောင်လွင်က သခင်သန်းထွန်းဆိုရင်ပြီးတယ်” တဲ့။
(အဲဒီခေတ်က UG ဆိုတာ သိပ်နက်ရှိုင်းပါလားလို့ ခံစားမိလိုက်တယ်။ ရှေ့ ၂ ယောက်က တိုင်းမှူးတွေ၊ နောက်တယောက်က (ထလရ) ညွှန်မှူး)
(၄)
မျက်မှန်တင်ဦး (ရွှေနားပေလို့လည်းခေါ် – ဂျပန်နားရင်းရိုက်တာခံရလို့ နားပင်းသွားတာဖြစ်) အရာကျသွားပြီး နောက်ပိုင်းမှာမှ သူ့လက်ထောက်တချို့က တင်ဦးနဲ့တွဲပြီး အလုပ်လုပ်ရတာတွေ ရေးတယ်။ ဒီအထဲမှာ တင်ဦးရဲ့ လုပ်ပုံကိုင်ပုံ စဉ်းစားတွက်ချက်ပုံတွေ ဖော်ပြထားတာ တွေ့ရသလို သူ့အရှိန်အဝါတွေ တက်လာပုံ၊ နောက်ဆုံး တစ်နှစ်ပိုင်းတစ်ပိုင်းအဆင့် ရောက်သွားပုံအထိ သတိပြုမိကြပါလိမ့်မယ်။ တင်ဦးကိုယ်တိုင် စာတစောင် ပေတဖွဲ့ရေးတာ မတွေ့မိ။
ခင်ညွန့်ကတော့ ရေးတယ်။ သူ့စာအုပ်ထဲမှာ တင်ဦးကို ဆရာတင်ထားတာလည်း ဖတ်ရတယ်။
(၅)
ရှေ့ကလူတွေထားတော့ – တင်ဦးနဲ့ခင်ညွန့် ဘယ်သူက ပိုပြီးလုပ်ချင်ရာ လုပ်ခွင့်ရခဲ့သလဲ။
တင်ဦးက အိမ်တော်သန့်ရှင်းရေးဆိုပြီး အိမ်တော်ထဲဝင်ကာ သူ့စိတ်ကြိုက်စိစစ်ရေးလုပ်ပြီး ရှင်းထုတ်သင့်သူတွေ ရှင်းထုတ်လိုက်တော့ ဒေါ်ခင်မေသန်းနဲ့ငြိတယ်။ သူက နောက်မဆုတ်ဘူး။ ဒါ့ကြောင့် တင်ဦးလာတာ မြင်လိုက်တာနဲ့ ဒေါ်ခင်မေသန်းက “မျက်မှန်ကြီး…. မျက်မှန်ကြီး လာပြီ”ဆိုပြီး မျက်နှာ သွေးဆုတ်သွားလို့ ဘေးလူက တွဲထားရတယ်။ ဒါကို ကြည့်ရင် ထောက်လှမ်းရေးတွေထဲမှာ တင်ဦးဟာ အာဏာအမြင့်ဆုံးပဲလို့ ပြောသူက ပြောတယ် ။ ဒါပေမဲ့ တင်ဦးက မဆလ မှာ တွဲဖက်အတွင်းရေးမှူးလည်း လုပ်နေရတော့ ပါတီချုပ်ကိုင်မှု အကန့်အသတ်တွေရှိတယ်။
ခင်ညွန့်က နိုင်ငံတော်အာဏာအဆင့်မှာ တရားဝင်နံပါတ် (၃)။ တင်ဦးလို ထောက်လှမ်းရေးနံပါတ်(၁) ဒါ့အပြင် သူကြိုက်သလို အုပ်ချုပ်ရေး institution တွေဖွဲ့တယ်။ အဲဒီမှာ သူက အကြီးအမှူး – ဥက္ကဋ္ဌရာထူးစသည် ယူထားတာ မနည်းမနောပဲ။ ထလရ တပ်ကြပ်ကို ဗိုလ်မှူး၊ ဒုဗိုလ်မှူးကြီး အဆင့်ရှိသူ ခရိုင်အုပ်ချုပ်ရေးဥက္ကဋ္ဌ ဖြစ်သူတွေက လန့်နေရပြီး ပစားပေးနေရတဲ့ခေတ်ကို ထူထောင်ထားသူ။ ဒါ့အပြင် ဘယ်ခေတ်နဲ့မှမတူအောင် ထောက်လှမ်းရေး တပ်ရင်းတွေ အမြောက်အမြား ဖွဲ့ထားနိုင်သူ ဖြစ်တယ်။ ဒါ့ကြောင့် ထလရ အာဏာအထွတ်အထိပ်ရောက်တာ ခင်ညွန့်ပဲလို့ သတ်မှတ်သူက သတ်မှတ်တယ်။ဒါပေမဲ့ ခင်ညွန့်က ဗိုလ်နေဝင်း သွေးသားတွေကို လက်ဖျားနဲ့တောင် တို့ဝံ့တာမဟုတ်။
ရေးရာပေါင်းစုံမှာ သူမပါတာမရှိ။ သူ့သတင်းတွေ၊ ဓာတ်ပုံတွေ မီဒီယာတွေမှာ မဖော်ပြတဲ့ရက်မရှိ။ ဒီသတင်းစာတွေ ဖတ်ဖတ်ပြီး ရဲဘော်ထွန်းက ပြုံးပြီးတော့ နံမည်ပြောင်တခု ပေးထားတာ ရှိတယ်။ ‘ဦးထင်ပေါ်’ တဲ့။ သိပ်ထင်ပေါ်ချင်တဲ့ကောင်တဲ့။ အာဏာလည်းသိပ်မက်တယ်။ ဒီလိုကောင်မျိုးဟာ ကန့်လန့်ကာကြားဝင်ရမှာ သေမလောက်ကြောက်တတ်တယ်လို့ ပြောဖူးတယ်။
ဒါပေမဲ့ ခင်ညွန့်ကို အထင်လည်း မသေးဘူး။ တချို့အကွက်တွေမှာ ‘ခင်ညွန့်ကို ဒီလိုလုပ်လို့ ဘာရမလဲ’ လို့ မကြာခဏ ပြောလေ့ရှိတယ်။
(၆)
ထောက်လှမ်းရေးတဖွဲ့လုံး ဖြုတ်ပစ်ပြီး အသစ်တည်ထောင်တဲ့လုပ်ဟန်ဟာ နေဝင်းနည်း နေဝင်းဟန်ပဲ။ တကယ်က ထောက်လှမ်းရေးမွေးထားတာ သရဲမွေးထားတာနဲ့ အတူတူပဲ။ တချိန်ချိန် ကိုယ့်ကုပ်ကို ချိုးစားပစ်လိမ့်မယ်လို့ စဉ်းစားမိဟန်တူတယ်။ ဗိုလ်သန်းရွှေကလည်း ဒီလုပ်ဟန်ကိုလိုက်ပြီး ခင်ညွန့်ကို ရှင်းလိုက်ပုံ ရတယ်။ ကိုယ့်ကိုယ်ကိုယ် ကာကွယ်နိုင်အောင် တဆင့်တက်ပြီး စဉ်းစားလာတာတခုက နောက်ဖွဲ့တဲ့ ထလရ (စရဖ) ကို အာဏာပုံပေးတာ မတွေ့ရတော့ဘူး။
ဒါပေမဲ့ UG မွေးရမယ့်အဖွဲ့အစည်းတွေဘက်က ဒါကို အခွင့်ကောင်း၊ မိမိတို့အတွက် အားသာချက်လို့ မမှတ်ယူလိုက်ကြစေချင်ပါ။ ဘာဖြစ်လို့လဲဆိုရင် ထောက်လှမ်းရေးက ထောက်လှမ်းရေးဖြစ်ပြီး UG က UG ဖြစ်နေလို့ပါပဲ။
(၁၀ – ၁၁ – ၂၀၂၀)