ရွေးကောက်ပွဲကော်မရှင်ရောက် စစ်တပ်ကမိုးကျရွှေကိုယ်တွေ

By | January 13, 2014

ရွေးကောက်ပွဲကော်မရှင်ရောက် စစ်တပ်ကမိုးကျရွှေကိုယ်တွေ

ပြည်ထောင်စုရွေးကောက်ပွဲကော်မရှင်မှာ လက်ထောက်ညွှန်မှူးအဆင့် အရာရှိကြီးတွေအဖြစ် တာဝန်ထမ်း ဆောင်ဖို့ စစ်ဘက်အရာရှိ ၆၀ ဦးကို တာဝန်ပေးခန့်ထားလိုက်တယ်ဆိုတဲ့ သတင်းကို ကော်မရှင်က ထုတ်ပြန်ခဲ့တာ တွေ့လိုက်ပါတယ်။

ဒါကို မေးမြန်းကန့်ကွက်သံတွေ ထွက်လာတော့ ၀န်ကြီးဌာနအသီးသီးကို ၀န်ထမ်းတွေလွှဲပြောင်းပေးဖို့ တောင်းခံရာမှာ ဘယ်ဝန်ကြီးဌာနကမှ မပေးဘဲ ကာကွယ်ရေးဝန်ကြီးဌာနကသာ ပေးခဲ့လို့ အခုလိုခန့်အပ်ခဲ့ရတာ ဖြစ်တယ်လို့ ကော်မရှင်က ဖြေရှင်းတာလည်း တွေ့လိုက်ရပါတယ်။

ဒါဘယ်က မြစ်ဖျားခံခဲ့သလဲ ဆိုတာကို ပြန်လည်လေ့လာကြည့်တဲ့အခါ ၂၀၁၀ ရွေးကောက်ပွဲနဲ့ ၂၀၁၂ ကြားဖြတ် ရွေးကောက်ပွဲတွေမှာ မဲစာရင်း မမှန်ကန်တာတွေ၊ မဲရေတွက်ရာ မဲရုံစောင့်ရာတွေမှာ မသမာမှုတွေ ပေါ်ပေါက်ခဲ့တာကို ရွေးကောက်ပွဲဝင်ပါတီများက ကန့်ကွက်ခဲ့ရာက စခဲ့တာကို တွေ့ရပါတယ်။ ဒီတော့ ကော်မရှင်ဥက္ကဋ္ဌကြီးက ဒီလိုဖြစ်ရတာတွေဟာ ကော်မရှင်မှာ ကိုယ်ပိုင်ဝန်ထမ်းပြည့်ပြည့်စုံစုံမရှိလို့၊ အခြားဝန်ထမ်းအဖွဲ့အစည်းတွေကို အကူအညီတောင်းလုပ်ကိုင်ခဲ့ရလို့ ဖြစ်ရတာလို့ဆိုပြီး ဆင်ခြေပေးပါတယ်။ အခု ဒီဆင်ခြေကိုသုံးပြီး မိုးကျရွှေ ကိုယ်တွေကို ကော်မရှင်ရဲ့ ရှေ့တန်းတိုက်စစ်မှူးတွေအဖြစ် ထုတ်သုံးတော့မှာ ဖြစ်ပါတယ်။

ရွေးကောက်ပွဲကော်မရှင်ဆိုတာ ဗဟိုမှာသာ အမြဲတမ်းအလုပ်ရှိနေတာဖြစ်ပြီး ကျန်တဲ့အဖွဲ့ခွဲတွေ အောက်အဆင့်တွေမှာ ရွေးကောက်ပွဲကျင်းပချိန်မှသာ အလုပ်ရှိတာဖြစ်လို့ တလျှောက်လုံး အခြားဝန်ထမ်းအဖွဲ့အစည်းတွေ (အထူးသဖြင့် ထွေအုပ်ဝန်ထမ်းတွေ) ကိုသုံးပြီး လုပ်ခဲ့တာ ဖြစ်ပါတယ်။ နု-အက်တလီ စာချုပ်က စကြည့်ရင် အဲဒီအချိန် ကျင်းပရမယ့် တိုင်းပြုပြည်ပြုလွှတ်တော်ရွေးကောက်ပွဲကိုတောင် ၁၉၃၅ မြန်မာနိုင်ငံဥပဒေ (1935 Government of Burma Act) မှာပါတဲ့ ရွေးကောက်ပွဲစက် (electoral machinery/apparatus) ကိုသာ အသုံးပြုရမယ်လို့ ပြဌာန်းခဲ့ပါတယ်။ အစဉ်အဆက်လည်း ရွေးကောက်ပွဲအရာရှိ (Returning Officer) တွေ အဖြစ် ပြည်ထဲရေး လက်အောက်ခံ ထွေအုပ်လို့ အတိုခေါ်ကြတဲ့လူသိများတဲ့ ဂျီအေ (General Administration) ကသာ တာဝန်ယူခဲ့တာ တွေ့ရပါတယ်။

တိုင်းမင်းကြီးက တိုင်းရွေးကောက်ပွဲအရာရှိ၊ ခရိုင်ဝန်က ခရိုင်ရွေး ကောက်ပွဲအရာရှိ၊ မြို့ပိုင် နယ်ပိုင်တွေက သူတို့သက်ဆိုင်ရာ မြို့နယ်တွေက ရွေးကောက်ပွဲ အရာရှိ အဖြစ်နဲ့သာ တာဝန်ထမ်းဆောင်ခဲ့ကြပါတယ်။ မဲရုံတာဝန်ကျ အဖြစ်နဲ့ကတော့ အခြေခံပညာ ဦးစီးဌာန လက်အောက်ခံ ဆရာ ဆရာမတွေကသာ ဆောင်ရွက်ခဲ့ကြတာ ဖြစ်ပါတယ်။ မဆလ ခေတ်မှာတောင် သက်ဆိုင်ရာ ပြည်သူ့ကောင်စီ အဆင့်ဆင့်က ရုံးအဖွဲ့မှူးတွေက ဒီတာဝန်ကို ထမ်းဆောင်ခဲ့ကြတာ ဖြစ်ပါတယ်။

အခုဘာကြောင့် ရွေးကောက်ပွဲကော်မရှင်အဆင့်ဆင့်မှာ ကိုယ်ပိုင်ဝန်ထမ်းတွေ ခန့်ထားပြီး တိုင်းပြည်ဘဏ္ဍာငွေကို ဖြုန်းတီးဖို့ လိုအပ်ပါသလဲ။ ထွေအုပ်ဝန်ထမ်းတွေကို မယုံရဘူးဆိုရအောင်ကလည်း ဒီဌာနက ဦးစီးအရာရှိအများစုဟာ တပ်ထွက်တွေချည်း ဖြစ်ပါတယ်။ သေချာတာကတော့ ရွေးကောက်ပွဲကော်မရှင်ဟာ ခြေမမြဲလက်မြဲဆိုသလို ကြံစည်လာတာပဲ ဖြစ်ပါတယ်။ သူတို့ကြံ့ဖွတ်ပါတီ အနိုင်ရရေး၊ နိုင်ရင်လည်း နိုင်ရမယ် ရှုံးရင်လည်း နိုင်ရမယ် လမ်းကိုလိုက်ဖို့ ဆင်ကြံကြံလာတာသာဖြစ်ဖို့ ရှိပါတယ်။ ယခင်ရွေးကောက်ပွဲများတုန်းက မသမာမှုတွေ လုပ်ခဲ့ရာမှာ နာမည်အကြီးအကျယ်ပျက်ခဲ့တဲ့ ရပ်ကျေးဥက္ကဋ္ဌများဟာ ကြံ့ဖွတ်ပါတီဝင်တွေ ရပ်ကွက်လူမိုက် စွမ်းအားရှင်တွေ ဖြစ်ခဲ့တာကြောင့် ပါတီများနဲ့ လူထုက ၀ိုင်းဝန်းကန့်ကွက်ကြလို့ အခု ရွေးကောက်ပွဲနဲ့ ရွေးကောက်တင်မြှောက်ရမယ်လို့ လုပ်နေချိန်မှာ မိုးကျရွှေကိုယ်အသစ်တွေ ပေါ်ပေါက်လာတာ ဖြစ်ပါတယ်။

ဒါကိုဒီအတိုင်းလက်ပိုက်ကြည့်မနေကြဘဲစစ်အုပ်စုရဲ့အကြံယုတ်ကိုကာကွယ်တားဆီးဖို့ သက်ဆိုင်ရာ နိုင်ငံရေးပါတီများနဲ့လူထုအခြေပြုအဖွဲ့အစည်း များ၊ ရွေးကောက်ပွဲစောင့်ကြည့်ရေးအဖွဲ့များက ၀ိုင်းဝန်းလုပ်ဆောင်သင့်ကြပါတယ်။ ရွေးကောက်ပွဲကော်မရှင် အဆင့်ဆင့်ဟာ ရွေးကောက်ပွဲဆိုင်ရာ မှုခင်းတွေမှာ တရားစီရင်ရေး အာဏာကိုပါ ရရှိထားသူတွေ၊ သူတို့ဆုံးဖြတ်ချက်ကို အရပ်ဖက်တရားရုံးမှာ အယူခံခွင့်မရှိတဲ့ စေတလုံးပိုင်သူတွေ ဖြစ်တာကိုလည်း မမေ့သင့်ပါ။ ရွေးကောက်ခံရရင်တောင် သူတို့လက်ထဲမှာ အဖြေဟာ အချိန်မရွေး ပြောင်းပြန်ဖြစ်သွားနိုင်ပါတယ်။

Leave a Reply

Your email address will not be published. Required fields are marked *