ဘာမှန်းဘယ်သူမှ မသိရတဲ့ စာချုပ်တွေ

By | January 13, 2014

ဘာမှန်းဘယ်သူမှ မသိရတဲ့ စာချုပ်တွေ

ခုတလောမြစ်ဆုံစီမံကိန်းပြန်စဖို့ လှုပ်ရှားနေတယ်ဆိုတဲ့သတင်းတွေ ပြန်ထွက်လာပါတယ်။ သက်ဆိုင်ရာ တရုတ်ကုမ္ပဏီဘက်ကလည်း သတင်းစာရှင်းလင်းပွဲတွေ ဘာတွေလုပ်ပြီး သူတို့ဘက်က ဘယ်လို လူမှုရေးဆိုင်ရာ တာဝန်ယူမှု တွေလုပ်ထားတယ်ဆိုတာ အခုတလောခေတ်စားနေတဲ့ CSR (corporate social responsibility) ကိုသုံးပြီး ပြောသွားတာလည်း ကြားလိုက်ရပါတယ်။ တချိန်က အငြင်းအခုံအကြီးအကျယ် ဖြစ်ခဲ့ရတဲ့ ပတ်ဝန်းကျင် ထိခိုက်မှုကိစ္စ EIA (Environment Impact Assessment) ဆိုတာကိုတော့ သိပ်အကျယ်တ၀င့်ပြောသံ မကြားလိုက်ရပါဘူး။ တချိန်တည်းဖြစ်ခဲ့တဲ့ SIA (Social Impact Assessment) ဆိုတာကိုသာ ခေတ်စားနေတဲ့ စကားလုံးအသစ်နဲ့ ပြန်ပြောသွားတာ ဖြစ်ပါတယ်။

တချိန်တည်းမှာ တရုတ်ကွန်မြူနစ်ပါတီရဲ့ အာဘော်တပိုင်းလို့ပြောရမဲ့ Global Times သတင်းစာကလည်း တရုတ်နိုင်ငံအနေနဲ့ ယခင်စစ်အစိုးရဟောင်းနဲ့ စီးပွားရေးစာချုပ်တွေ ချုပ်ရာမှာ လာဘ်ပေးမှုတွေလုပ်ခဲ့ကြောင်း ၀န်ခံထားတာလည်း တွေ့လိုက်ရပါတယ်။

လူထုကတော့ ဒီတရားမျှတမှုမရှိ၊ တဖက်သတ်လူမသိသူမသိ ချုပ်ဆိုခဲ့တဲ့စာချုပ်တွေကို အသိအမှတ်မပြုဘဲ မြစ်ဆုံစီမံကိန်းလို အရေးကြီးစာချုပ်ကို အပြီးတိုင်ဖျက်သိမ်းဖို့၊ ဧရာဝတီကို လောဘဇောတိုက်နေသူတွေ လက်ထဲက ကယ်တင်ဖို့နဲ့ မြစ်ဝှမ်းတလျှောက်နေထိုင်ကြတဲ့ ပြည်သူတွေ ထမင်းလုပ်မပျောက်ရေးကိုသာ စိတ်ဝင်စားကြပါတယ်။ ဒီအတွက်သာ တစိုက်မတ်မတ် တောင်းဆိုနေကြပါတယ်။

ဒေါ်အောင်ဆန်းစုကြည်ကိုယ်တိုင်ကလည်း ဒီမြစ်ဆုံစာချုပ်ကို ဖျက်သိမ်းမယ်ဆိုရင် ဘယ်လောက် ကိုယ့်ဘက်က လျော်ကြေးပေးရမယ်၊ ဘယ်လောက် ထိခိုက်နစ်နာမယ်ဆိုတာသိမှ ဖြစ်မယ်လို့ ပြောသံလည်း ကြားလိုက်ပါတယ်။ သူကိုယ်တိုင်ဥက္ကဋ္ဌလုပ် ကိုင်တွယ်ခဲ့တဲ့ လက်ပံတောင်းစုံစမ်းစစ်ဆေးရေး ကော်မရှင်မှာတောင် စာချုပ်ကို သူတဦးတည်းသာ ဖတ်ရှုခဲ့ရတယ်။ ကျန်အဖွဲ့ဝင်တွေ ဖတ်ရှုခွင့်မရခဲ့ဘူးလို့ အဖွဲ့ဝင်တဦးဖြစ်တဲ့ ဒီချုပ်လွှတ်တော် ကိုယ်စားလှယ်က ပြောခဲ့ဖူးပါတယ်။

ဒါတွေဟာ စီးပွားရေးဆိုင်ရာစာချုပ်တွေသာ ဖြစ်ပါတယ်။ တိုင်းပြည်ကာကွယ်ရေးလို နိုင်ငံခြားရေးလို အများအသိ မခံနိုင်လောက်အောင် လျှို့ဝှက်ထားရမဲ့စာချုပ်တွေလည်း မဟုတ်ပါဘူး။ လျှို့ဝှက်ထားရမယ်ဆိုရင်လည်း ဘာလို့လဲဆိုတဲ့ အကြောင်းပြချက်ကို ပြည်သူတွေ သိခွင့်ရှိပါတယ်။ တရုတ်သတင်းစာက ၀န်ခံထားသလို လာဘ်ပေးမှုတွေ အကြီးအကျယ်ပြုလုပ်ခဲ့လို့ လူသိမခံဝံ့တာဆိုရင်တော့ ထိုယူခဲ့သူတွေကိုသာ အပြစ်ပေးပြီး တာဝန်ယူစေသင့်ပါတယ်။ လူထုက ကြားကင၀က်ဒဏ်ခံရတယ်ဆိုတဲ့ အဖြစ်မျိုးတော့ မဖြစ်သင့်ပါ။

ဒီတော့ န၀တ နအဖ လက်ထက် တပည့်တပန်းခရိုနီတသိုက်နဲ့ပေါင်းပြီး တိုင်းပြည်လက်ညှိုးထိုးရောင်းခဲ့တဲ့ စာ ချုပ်စာတမ်းတွေ၊ တဘက်သတ်ချုပ်ဆိုခဲ့တဲ့ တရားမျှတမှုမရှိတဲ့စာချုပ်တွေ အားလုံးကို ပြည်သူလူထု သိခွင့်ရှိရေး တောင်းဆိုသင့်ကြပါတယ်။ နအဖ လက်ထက် နောက်ဆုံးအချိန် အပြေးအလွှားလုပ်ခဲ့တဲ့ ပုဂ္ဂလိကပိုင်လုပ်ရေး ခေါင်းစဉ်အောက်က နိုင်ငံပိုင်စက်ရုံအလုပ်ရုံ၊ မြေ၊ အဆောက်အဦတွေကို သူခိုးဈေးနဲ့ ခရိုနီတွေနဲ့ပေါင်း ရိုက်စားလုပ်ခဲ့တာတွေ အားလုံးကိုလည်း ဖော်ထုတ်ဖို့လိုပါတယ်။

လက်ရှိအစိုးရအနေနဲ့လည်း ဒါတွေဟာ အရင်အစိုးရလက်ထက်က လုပ်ခဲ့တာတွေပါလို့ ထမင်းရေပူလျှာလွှဲ မလုပ်သင့်ပါ။ လက်ရှိသမ္မတဟာ နောက်ဆုံးအစိုးရရဲ့ တာဝန်အရှိဆုံးဝန်ကြီးချုပ်ဆိုတာကိုလည်း မမေ့သင့်ပါ။ အနိမ့်ဆုံးအားဖြင့်တော့ လက်ရှိလွှတ်တော်ကို အသိပေးတင်ပြ အတည်ပြုချက်ယူတာတွေ လုပ်သင့်ပါတယ်။ လွှတ်တော်က ပြည်သူ့ကိုယ်စားလှယ်များအနေနဲ့လည်း ဒီကိစ္စတွေကို တွန်းတွန်းတိုက်တိုက် ဆောင်ရွက်သင့်ကြပါတယ်။

ဒါကြောင့် ဒီမတရားစာချုပ်တွေ ပြည်သူလူထုသိခွင့်ရရေး၊ အသိအမှတ်မပြုရေးကို လွှတ်တော်တွင်း လွှတ်တော်ပ နည်းလမ်းပေါင်းစုံနဲ့ ဆောင်ရွက်သင့်ကြောင်း တင်ပြလိုက်ရပါတယ်။

Leave a Reply

Your email address will not be published. Required fields are marked *