ကမ္ဘာ့ဗိုလ်နေရာဆက်ထိန်းဖို့ အစွမ်းကုန်လုပ်တော့မယ့် အမေရိကန်(နီအောင်ဝေ)

By | November 28, 2020

ကမ္ဘာ့ဗိုလ်နေရာဆက်ထိန်းဖို့ အစွမ်းကုန်လုပ်တော့မယ့် အမေရိကန်

(နီအောင်ဝေ)

‘အမေရိကန် ပြန်လာပြီ ကမ္ဘာကို ဦးဆောင်ဖို့အဆင်သင့်ပဲ’ လို့ရွေးကောက်ခံသမ္မတ ဂျိုးဘိုင်ဒင်က ကြွေးကြော်လိုက်ပါတယ်။

အဖိနှိပ်ခံ အမေရိကန်ပြည်သူတွေနဲ့နိုင်ငံတကာ အဖိနှိပ်ခံများအတွက်တော့ ဂျိုးဘိုင်ဒင်ဟာ ငကန်းသေလို့ပေါ်လာတဲ့ ငစွေပါ။ ‘အမေရိက ပထမ’ဆိုသူ မရှိတဲ့အခါ ‘အမေရိကန်က ဗိုလ်လုပ်မယ်’ဆိုသူ ရောက်လာပါတယ်။ ဘိုင်ဒင်က အီရတ်နဲ့အာဖဂန်နစ္စတန် ကျူးကျော်စစ်တွေကို ထောက်ခံခဲ့တယ်။ စစ်သားဦးရေတိုးဖို့၊ စစ်အသုံးစရိတ်တိုးဖို့ထောက်ခံခဲ့တယ်။ ကလင်တန် အစိုးရလက်ထက်က ယူဂိုဆလားဗီးယားအရေးမှာလည်း အဓိကအခန်းက ပါခဲ့တယ်။ နှစ်သစ်မှာ အာဏာလွှဲယူမယ့် သူ့အစိုးရအဖွဲ့ကို ‘နယ်ချဲ့ဖောက်ပြန်ရေး ရောင်စုံ ညွန့်ပေါင်းအဖွဲ့’ လို့ ဆိုရှယ်လစ် သတင်းဝဘ်ဆိုက်တခုက နာမည်ပေးထားပါတယ်။ တကယ်ကတော့ ဒီအဖွဲ့ဟာ အမှတ်အသားပြုနိုင်ငံရေးဆိုတဲ့ လက်ယာ အနှစ်သာရကို ရောင်ပြန်ဟပ်တာဖြစ်ကြောင်းလည်း အကဲဖြတ်ထားပါတယ်။ နိုင်ငံခြားရေးဝန်ကြီးဖြစ်လာမယ့် အန်တိုနီဘလင်းကင်းက အမေရိကန်ရဲ့ဆီးရီးယား၊ လစ်ဗျားနဲ့ယီမင် ကျူးကျော်စစ်တွေကို ထောက်ခံခဲ့တဲ့ စွက်ဖက်ရေးသမားဖြစ်တယ်။ အစ္စရေးထောက်လှမ်းရေးနဲ့ အလုပ်အတူတူလုပ်နေတဲ့ အကြံပေးအဖွဲ့တဖွဲ့ကို ပူးတွဲတည်ထောင်ခဲ့သလို ဂူဂယ်ရဲ့ဆင်ဆာဖြတ်တဲ့အစီအစဉ်တွေ၊ ဆော့ဖ်ဝဲတွေကိုလည်း ကူညီဖန်တီးပေးခဲ့သူပါ။ စီအိုင်အေ လက်ထောက်ညွှန်မှူးဟောင်း အာဗရီးဟိန်းစ်က အမျိုးသားထောက်လှမ်းရေးအဖွဲ့ရဲ့ပထမဆုံး အမျိုးသမီးညွှန်မှူး ဖြစ်လာလိမ့်မယ်။ သူကလည်း ခေသူတော့ မဟုတ်ဘူး။ အိုဘားမားအစိုးရလက်ထက်မှာ အာရှ၊ အာဖရိကနဲ့အာရပ်နိုင်ငံတွေမှာ တိုက်ခိုက်ရေးဒရုန်း (အဝေးထိန်းလေယာဉ်)သုံးပြီး လုပ်ကြံသတ်ဖြတ်တဲ့အစီအစဉ်ရဲ့ ဗိသုကာတဦး ဖြစ်တယ်။ ဘိုင်ဒင် သမ္မတလူကြမ်းအဖွဲ့က အဖွဲ့ဝင်တိုင်းမှာ ပြည်တွင်း၊ ပြည်ပ ဖိနှိပ်ညှဉ်းဆဲမှုသမိုင်း ကိုယ်စီနဲ့ပါ။ ကမ္ဘာ့ပြည်သူတွေက အရင်းရှင်စနစ်ရဲ့သွေးစုပ်မှု၊ နယ်ချဲ့စနစ်ရဲ့ဖိနှိပ်အုပ်စိုးမှုတွေအပြင် ကိုရိုနာဗိုင်းရပ်စ် ကပ်ရောဂါရဲ့ဒဏ်ကိုပါ ထပ်ဆင့်ခံကြရဆဲဖြစ်ပေမယ့် နယ်ချဲ့အင်အားကြီးတွေက ကမ္ဘာကို အုပ်စိုးရေး၊ ကမ္ဘာ့ဗိုလ်၊ ကမ္ဘာ့ပုလိပ်ကြီးအဖြစ်မှ လျော့ကျမသွားရေး တဗိုလ်ကျတဗိုလ်တက် လုပ်နေကြပါတယ်။ လူသားမျိုးနွယ်အတွက် ကိုဗစ်-၁၉ ကာကွယ်ဆေး ဖန်တီးရာမှာ အတူ ပူးပေါင်းလုပ်ဆောင်ကြမယ့်အစား တိုးတိုးတိတ်တိတ် အပြိုင်အဆိုင် စမ်းသပ်၊ ဖော်ထုတ်ကြပါတယ်။ မလိုအပ်ဘဲ အချိန်တွေကြန့်ကြာသလို ပြည်သူ့ဘဏ္ဍာတွေကို ဖြုန်းတီးကြတာပါ။ ကာကွယ်ဆေးထုတ်ပြီး ဗိုလ်လုပ်ကြဦးမှာဖြစ်သလို အကျိုးအမြတ်တွေလည်း နယ်ချဲ့အရင်းရှင်နိုင်ငံကြီးတွေ ခွဲယူကြဦးမှာပါ။ ကာကွယ်ဆေး ထုတ်နေရင်းတန်းလန်း သူဌေးနိုင်ငံကြီးတွေက လက်ဝါးကြီးအုပ်ဝယ်ထားလို့ ကုန်သလောက်ရှိနေပါပြီ။ ဆင်းရဲတဲ့နိုင်ငံလေးတွေကတော့ ကိုယ့်အလှည့်ရောက်ဖို့တော်တော် စောင့်ရဦးမယ်။ အလုအယက် တိုးဝှေ့ကြ၊ တန်းစီကြရပါဦးမယ်။ ဆေးရရုံနဲ့မပြီးသေးဘူး ဆေးသိုလှောင် ထိန်းသိမ်းရေးအတွက်လည်း ရုန်းကန်ကြရပါဦးမယ်။ အမေရိကန်က ဗိုလ်လုပ်နေမယ့် ကမ္ဘာကြီးရဲ့အနာဂတ်က မတောက်ပနိုင်သလို စစ်အုပ်စုက ဗိုလ်လုပ်နေဦးမယ့် ဗမာပြည် အနာဂတ်ဟာလည်း ပဋိပက္ခ အခိုးအငွေ့များ ယှက်နွယ်ရစ်သိုင်းနေပါတယ်။

ရည်ညွှန်း

Joe Biden’s cabinet: A rainbow coalition of imperialist reaction

Joe Biden’s cabinet: A rainbow coalition of imperialist reaction – World Socialist Web Site (wsws.org)

Capitalist Competition Is Sabotaging the Race for a Vaccine

Capitalist Competition Is Sabotaging the Race for a Vaccine | Left Voice

‘America is back’: Biden formally introduces national security, foreign policy team

‘America is back’: Biden formally introduces national security, foreign policy team (nbcnews.com)

Leave a Reply

Your email address will not be published. Required fields are marked *