ပြည်သူ့အမွန်

By | July 28, 2014

– မတရား သိမ်းဆည်း လယ်ယာမြေများကို တောင်သူများသို့ ပြန်ပေးပါ။

– လယ်ယာမြေနှင့် ပတ်သက်သော အကျင့်ပျက် ဝန်ထမ်းများအား အရေးယူပေးပါ။

– တောင်သူလယ်သမားများ ကိုယ်တိုင်ပါဝင်သော လယ်ယာမြေခုံရုံးများ ဖွဲ့ပေး။

ရေတာရှည် မြို့နယ်က ဆန္ဒပြတောင်သူလယ်သမားတွေရဲ့ ဒီတောင်းဆိုချက်တွေကို ကြည့်ရင် ပြည်သူတွေရဲ့  တီထွင် ဖန်တီးမှုစွမ်းအားကို အထင်အရှား တွေ့နိုင်တယ်။

ကိုလိုနီခေတ်ကတည်းက အမတော်ကြေးများ လျှော်ပစ်ရေး၊ အခွန်တော် လျှော့ပေါ့ရေး၊ သီးနှံဈေး တိုးမြှင့်ပေးရေး စသဖြင့် လယ်သမားတွေရဲ့ လယ်တွေ့ဘဝကို ထင်ဟပ်တဲ့ လတ်တလော တောင်းဆိုချက် အများအပြားကို တင်ပြတောင်းဆိုခဲ့ကြတယ်။ ကြွယ်ဝပြည်စုံတဲ့ အဲဒီတောင်းဆိုချက်တွေထဲမှာ ၁၉၄၆-၄၇ ခုနှစ် ဗမာပြည် ပြည်သူတရပ်လုံးနဲ့အတူ လယ်သမားများလည်း ရှားပါး ကျပ်တည်းနေချိန်ဖြစ်လို့“ခေါင်းပါးစရိတ် ထုတ်ပေးရေး”ဆိုတဲ့ တောင်းဆိုချက်မျိုးကိုတောင် တင်ပြတောင်းဆိုခဲ့ဖူးကြောင်း တွေ့ရှိရတယ်။ လွတ်လပ်ရေးမရမီ လယ်သမားညီလာခံများမှာလည်း လယ်သမားထု အတွက် အမှန်တကယ် လိုအပ်တဲ့ လတ်တလော တောင်းဆိုချက်များကို ပြည့်စုံကြွယ်ဝစွာ တင်ပြတောင်းဆိုနိုင်ခဲ့ကြတယ်။ ဒီတောင်းဆိုချက်တွေထဲမှာ သီးစားခ လျှော့ပေါ့ရေးမှ အစ တောင်သူလယ်သမားများ နေ့စဉ်လိုအပ်ချက်ဖြစ်တဲ့ “သစ်၊ ဝါး၊ ကိုင်းပင်များ လွတ်လပ်စွာ ခုတ်လှဲခွင့် ပြုရေး”အထိ ပါဝင်တာ သတိပြုမိတယ်။ ခေတ်အဆက်ဆက် တောင်းသူလယ်သမားထုဟာ မိမိတို့ဘဝပြဿနာအတွက် လယ်ယာမြေဆိုင်ရာ တောင်းဆိုချက်သာ မက နိုင်ငံရေးဆိုင်ရာ တောင်းဆိုချက်များအထိ တင်ပြတာလည်း ရှိခဲ့တာပါပဲ။ ပျဉ်းမနား တောင်သူလယ်သမားသမဂ္ဂညီလာခံမှာဆိုရင် အစိုးရက သတင်းစာတိုက်တွေတွေကို ရိုက်ချိုးဖျက်ဆီးရင် တုံ့ပြန်တိုက်ပွဲဝင်သွားမယ်လို့ သန္နိဌာန်ချ ဖော်ပြခဲ့ကြောင်း တွေ့ရတယ်။

ပြည်သူ့ဒီမိုကရေစီ တော်လှန်ရေးနဲ့ အတူ ပေါ်ထွက်လာခဲ့တဲ့ “လယ်လုပ်သူ လယ်ပိုင်ရေး”ဆိုတဲ့ တောင်းဆိုချက်ဟာ ဒီနေ့အထိ မှန်ကန်ဆဲ မှန်ကန်နေပြီး လယ်သမားထုအတွက် အရင်းခံအကျဆုံး တောင်းဆိုချက်လည်း ဖြစ်ပါတယ်။ လက်ငုတ်လယ် လက်မလွှတ်ရေး တောင်းဆိုချက်ဆိုရင် မျက်မှောက်ကာလနဲ့ ဆီလျော်ကိုက်ညီနေတုန်းပါ။ ဒါပေမဲ့ လယ်သမားများဟာ မိမိတို့ လက်တွေ့ လက်ငင်း တွေ့ကြုံရင်ဆိုင်နေရတဲ့ လုပ်ငန်းခွင်အခြေအနေအလိုက် မိမိတို့ဘဝအတွက် အလိုအပ်ဆုံးအချက်များကို အထိရောက်ဆုံးတင်ပြနိုင်ဖို့ လတ်တလောတောင်းဆိုချက်များကို တီထွင်ဖန်တီးမှုရှိစွာ တင်ပြပြီး တောင်းဆိုတိုက်ပွဲဝင်သွားဖို့လည်း လိုအပ်ပါတယ်။

လယ်သမားထုမှာ ဒီလို တီထွင်ဖန်တီးမှုစွမ်းအား ရှိကြောင်း ရေတာရှည်မြို့နယ်က ဆန္ဒပြလယ်သမားများက ဖော်ထုတ်ပြသလိုက်ကြပါတယ်။ သူတို့တင်ပြတဲ့ တောင်းဆိုချက်များအနက်“တောင်သူလယ်သမားကိုယ်တိုင်ပါဝင်သော လယ်ယာမြေခုံရုံးဖွဲ့ပေး”ဆိုတဲ့ တောင်းဆိုချက်ဟာ အစိုးရ တရားရုံးများရဲ့ မတရားမှုကို ဆန့်ကျင်တိုက်ခိုက်လိုက်တာ ဖြစ်ပါတယ်။ ဒီတောင်းဆိုချက်ဟာ သူတို့ရဲ့ လက်တွေ့ဘဝအရလည်း လိုအပ်တဲ့ တောင်းဆိုချက်ပါ။ မိမိလယ်ယာမြေကို မတရား အသိမ်းခံထားရလို့ ငြိမ်းချမ်းစွာ ဆန္ဒထုတ်ဖော်တဲ့ လယ်သမားတွေကို ထောင်ထဲပို့နေတဲ့ တရားရုံးဟာ တရားရုံးမဟုတ်ဘဲ ကင်ပေတိုင်ရုံးဖြစ်နေတာ ကြာပါပြီ။ ယခုအခါ တရားသူကြီးတဦးက စစ်တပ်က အမိန့်ပေးလို့ လယ်သမားတွေကို ထောင်ထဲပို့တဲ့ စီရင်ချက်ချလိုက်ရပါတယ်-လို့ ဖွင့်ဟ ဝန်ခံလိုက်တဲ့အခါမှာတော့ ဦးသိန်းစိန် စစ်အစိုးရရဲ့ တရားရုံးတွေဟာ မတရားရုံးတွေ ဖြစ်နေကြောင်း လယ်ပြင်နင်းတဲ့ ဆင်ခြေရာကို ကွက်ကွက်ကွင်းကွင်းကြီး မြင်လာရပါတယ်။

လယ်သမားတွေကို ထောင်သို့ ပို့ဆောင်တဲ့အခါ လယ်သမားတွေ စုပေါင်းဝန်းရံ ပို့ဆောင်မှုဟာလည်း လိုအပ်ပြီး ထိရောက်တဲ့ နည်းနာတခုပါ။ ၁၉၄၆ ခုနှစ် ဖေဖော်ဝါရီလ ၂၂ ရက်နေ့က ကွန်မြူနစ်ပါတီဝင် ရဲဘော်စစ်သိန်းနဲ့ ရဲဘော်ပြည်သ်ိမ်းတို့ကို ဟင်္သာတမှ ပုသိမ်ထောင်သို့ ပို့ရာမှာ ကွန်မြူနစ်တွေနဲ့ လူထုကပါ လိုက်လံပို့ဆောင်ခဲ့ကြလို့ ဟိုးလေးတကျော်ဖြစ်ပြီး အုပ်ချုပ်သူကို ထိုးနှက်မှုတရပ် ဖြစ်စေခဲ့ပါတယ်။

အသုံးတည့်တဲ့ အစဉ်အလာ တိုက်ပွဲသဏ္ဌာန်တွေကို ဆက်လက်ကျင့်သုံးရင်း တိုက်ပွဲနည်းနာသစ်များကိုလည်း တီထွင်ဖန်တီးရမှာပါ။ ထွန်တုံးတိုက်ပွဲဟာ ခေတ်အဆက်ဆက် တောင်သူလယ်သမားတွေ ကျင့်သုံးခဲ့တဲ့ တိုက်ပွဲပုံသဏ္ဌာန် ဖြစ်ပြီး မျက်မှောက်မှာလည်း တောင်ပေါ်မြေပြန့် ဗမာပြည်အနှံ့အပြားက တောင်သူလယ်သမားတွေ ကိုင်စွဲနေကြတဲ့ တိုက်ပွဲပုံသဏ္ဌာန် ဖြစ်နေကြောင်း တွေ့ရှိရပါတယ်။ လက်ပံတောင်းတောင်ဒေသမှာ သံဆူးကြိုး ပိတ်ကာထားတဲ့ တားမြစ်မှုကို ချိုးဖောက်ပြီး ဆိတ်ကျောင်းတာ၊ ထွန်ထက်စိုက်ပျိုးတာ လုပ်တာဟာလည်း မတရားတဲ့ အမိန့်အာဏာကို ဖီဆန်တဲ့ တိုက်ပွဲပုံသဏ္ဌာန်တမျိုးလို့ ဆိုရပါမယ်။ ဒါပေမဲ့ လက်နက်မဲ့ တောင်သူလယ်သမားတွေက တောင်ကုန်းတွေပေါ်မှာ နေရာယူထားပြီး လက်နက်ကိုင်ရဲအင်အား ၅၀၀ လောက်နဲ့ ဝိုင်းထားတဲ့ အခင်းအကျင်းကတော့ လက်နဲ့မဲ့ ပြည်သူတွေကို အဓမ္မ စစ်ခင်းနေတဲ့ အသွင်ကို ဆောင်နေပါတယ်။ ဦးသိန်းစိန် စစ်အစိုးရဟာ ဒေသခံလယ်သမားတွေ နေထိုင်တဲ့ ကျေးရွာကို သူပုန်နယ်မြေ ဝင်စီးသလို တိုက်ခိုက်ကြတာကိုလည်း လက်ပံတောင်းဒေသမှာ တွေ့မြင်ခဲ့ကြရပါပြီ။ ဒါကို တွန်းလှန်ဖို့ ကြွယ်ဝတဲ့ တိုက်ပွဲနည်းနာများကို တောင်သူလယ်သမား ပြည်သူများက ဖန်တီးလာကြမယ်ဆိုတာ မြေကြီးလက်ခတ်မလွဲပါပဲ၊

ပြည်သူ့ဘဝတိုက်ပွဲတွေမှာ ပူးပေါင်းပါဝင်တဲ့ ကျောင်းသားသမဂ္ဂဝင် လူငယ်များရှိသလို ကျောင်းသားအရေးဖြစ်တဲ့ ၇ ရက် ဇူလိုင်အရေးအခင်း အထိမ်းအမှတ်အတွက်လည်း တောင်သူလယ်သမားတွေက မိမိတို့တတ်နိုင်တဲ့ နည်းနဲ့ စာနာမှုဖော်ပြလာတာမျိုးလည်း တွေ့လာရပါတယ်။ ဆက်လက်ဖွံ့ဖြိုးစေရမယ့် လုပ်ဟန်ုတွေပါ။

ပြည်သူလူထုဟာ တီထွင်ဖန်တီးမှုရှိရုံမက ဇွဲ ရှိတဲ့ ပြည်သူ၊ အားမာန်သတ္တိ ပြည့်ဝတဲ့ ပြည်သူတွေ ဖြစ်ကြောင်း ဖော်ပြနေတာကိုလည်း တွေ့ရှိရပါတယ်။ လက်ပံတောင်း တောင်သူလယ်သမားတွေဟာ နှစ်နဲ့ချီပြီး ရေရှည်တိုက်ပွဲ ဆင်နွှဲနေကြသလို မိကျောင်းကန် ပြည်သူတွေရဲ့ ဆန္ဒဖော်ထုတ် တိုက်ပွဲဝင်မှုဟာလည်း ရက်ပေါင်းတရာ ကျော်လာခဲ့ပါပြီ။

“ငါ့ကို ချန်မထားခဲ့နဲ့။ ငါ့ကိုပါ ဖမ်းသွား”လို့ဆိုပြီး အဖမ်းခံတဲ့ လယ်သမား။ ဒို့တရွာလုံးကို ထောင်ထဲထည့်ဆိုတဲ့ တောင်သူလယ်သမားများ။ “လမ်းကြိတ်စက် ဒလိမ့်တုံးနဲ့ ငါ့ကို နင်းလှည့်”ဆိုတဲ့ လက်ပံတောင်းတောင် ဒေသက အမေအိုတို့ဟာ ပြည်သူ့သတ္တိနဲ့ အားမာန်ကို ဖော်ဆောင်တဲ့ စံနမူနာများပါ။

ဘာသာရေး၊ လူမျိုးရေး အဓိကရုဏ်း ဖန်တီးမှုကို လိမ္မာပါးနပ်စွာ တားဆီးကျော်နင်းရုံမက အစိုးရရဲ့ ကောက်ကျစ်ယုတ်မာမှုကို ပွင့်ကျစေခဲ့တဲ့ မန္တလေးလူထုရဲ့ ညီညွတ်ပေါင်းစည်းမှုဟာလည်း ပြည်သူ့စွမ်းအား မြင့်မားမှုရဲ့ ဖော်ပြချက်တရပ်ပါ။

တီထွင်ဖန်တီးမှုစွမ်းအားရှိပြီး အားမာန်နဲ့ ဇွဲသတ္တိပြည့်ဝတဲ့ ဗမာပြည် တိုက်ပွဲဝင်ပြည်သူလူထုကြီးဖြစ်ကြောင်း ဆက်လက်ဆင်နွှဲသွားမယ့် တိုက်ပွဲတွေနဲ့ ဆက်လက်ဖော်ပြသွားကြဦးမှာပါ။

ဒါပေမဲ့ နည်းနည်းမှ သတိပေါ့လျော့လို့ မဖြစ်ပါဘူး။

စစ်အာဏာရှင်စနစ်နဲ့အတူ ယုတ်မာမှု၊ ကောက်ကျစ်မှုနဲ့ အဓမ္မ ဖိနှိပ်မှုတွေ လာဆဲ၊ လာလတ္တံ့ဖြစ်နေဦးမှာပါ။

Leave a Reply

Your email address will not be published. Required fields are marked *