၂၀၁၃ နိုဝင်ဘာလက အုပ်ချုပ်မှုမွမ်းမံသင်တန်းဆင်းပွဲမှာ ဗိုလ်ချုပ်မှူးကြီးမင်းအောင်လှိုင်ပြောတဲ့ မိန့်ခွန်းဆိုတာ ဖတ်လိုက်ရတယ်။
မိန့်ခွန်းအစမှာ ဗိုလ်ချုပ်မှူးကြီးသန်းရွှေကို အရင်ဆုံးတိုင်တည်သစ္စာပြုတာ တွေ့လိုက်ရပါတယ်။
တပ်တည်ဆောက်ရေး တာဝန်ကြီးလေးရပ်ဆိုတာကို ပြောပါတယ်။ တပ်ကိုစစ်အုပ်စုတခုတည်းရဲ့ ခါးပိုက်ဆောင် တပ်ဖြစ်မြဲဖြစ်နေအောင် ချမှတ်ထားတဲ့ တာဝန်လေးရပ် ဖြစ်နေတာတွေ့ရတယ်။ တပ်ကိုသက်သာချောင်ချိရေးနဲ့ တည်ဆောက်ရမယ်လို့ ပါတယ်။ လူထုအပေါ် အဲဒီလုပ်ပေးဖို့ စေတနာတော့ ဖော်ပြသံ မကြားဖူးဘူး။ ဗိုလ်အောင်ကြီး၊ ဗိုလ်မောင်မောင်တို့လက်ထက်က စခဲ့တဲ့ ဒီအက်စ်အိုင်လို တပ်သက်သာချောင်ချိရေး အစီအစဉ်တွေမှာ နောက်ဆုံးတော့ ထိပ်ပိုင်းအရာရှိတွေပဲ ချောင်လည် သူဌေးဖြစ်သွားတာတွေ တွေ့ခဲ့ရတယ်။ ဒီနေ့ဆိုရင် ပိုဆိုးတယ်။
“တပ်ကိုစိတ်ဓာတ်နဲ့ တည်ဆောက်”ဆိုတာလည်းပါရဲ့။ ဘာစိတ်ဓာတ်မှန်းမသိ။ ဘီလူးစိတ်လား၊ မုဒိမ်းစိတ်လား။
စစ်သားတွေ အပြင်မှာ ဆိုက္ကားနင်းနေရတာတွေ၊ အငှားဆိုင်ကယ်မောင်းစားနေရတာတွေကို ၀မ်းပမ်းတနည်းပြောသွားတယ်။ ဒါပေမဲ့ စစ်သားတွေ လုယက်နေတာတွေ၊ စစ်ဗိုလ်တွေ ဘဏ်ဓားပြတိုက်တာတွေ မပြောဘူး။ ထိပ်သီးသားသမီးတွေ ဗမာပြည်ရဲ့ လူ့မလိုင်ခဲ ဖြစ်နေတာတွေ မပြောဘူး။
တိုင်းပြည်ဆင်းရဲတာရဲ့အကြောင်းရင်း ပြည်တွင်းစစ်တခုတည်းကို ပုံချထားတယ်။ စစ်အစိုးရတွေ အသုံးမကျတာ၊ စစ်တပ်ထိပ်သီးတွေနဲ့ သူတို့ခရိုနီတွေ ကိုယ်ချမ်းသာဖို့ ဇောင်းပေးလုပ်နေတာတွေကိုတော့ မပြောဘူး။
“ငြိမ်းချမ်းရေးယူတာ ကြောက်လို့ယူတာ မဟုတ်ဘူး”တဲ့။ ဒါပြောဖို့ လိုသလား။ ဒါမှမဟုတ် ခြိမ်းခြောက် သတိပေးနေတာလား။ “ဘယ်သောင်းကျန်းသူကိုမှ မတိုက်နိုင်စရာ အကြောင်းလည်း မရှိဘူး၊ မတိုက်ရဲစရာ အကြောင်းလည်း မရှိဘူး” လို့လည်း ဆိုပါတယ်။ ဒါဖြင့် သူတို့အခုလုပ်နေတဲ့ ငြိမ်းချမ်းရေးဟာ သူတို့ဘက်က ဘယ်လောက်ရိုးသားမှု ရှိသလဲ။
နောက်ဆုံးမှာ“ငြိမ်းချမ်းရေးဆိုတာ အာဏာခွဲဝေပေးဖို့ မဟုတ်ဘူး”လို့ တွေ့ရတယ်။ တကယ်ပြောချင်တာက အခု သူတို့ပြောနေတဲ့ ဒီမိုကရေစီဆိုတာရော၊ ရွေးကောက်ပွဲဆိုတာရော အာဏာခွဲဝေဖို့ မဟုတ်ဘူး၊ အာဏာကို စစ်တပ်လက်ထဲမှာ ထားသွားမယ်ဆိုတာပဲ။