“၈၄” ဒိုင်ယာရီ
( ဗမာပြည် ကွန်မြူနစ်ပါတီ ၈၄ နှစ်မြောက် သို့ ဂုဏ်ပြုခြင်း)
ခေတ်သစ်သမိုင်းကို
မုန်တိုင်းကြားမှာ
ရေးသားဆဲ မို့
ဖြတ်သန်းခဲ့တဲ့ မှတ်တမ်းများ
စမ်းတဝါးဝါးနဲ့ မကျန်ရစ်စေရ ။
ငါတို့ မွေးဖွားခဲ့တဲ့ ရက်
ရက် ရာဇာ၊ ပြဿဒါး မရှိ,မသိ
နိုင်ငံရေးအသိကပဲ
အဓိက လက်သည်ဖြစ်ခဲ့တယ်။
နယ်ချဲ့ရဲ့ ထမ်းပိုးအောက်မှာ
အသက်ဗီဇဖြစ်တည်လာ။
ဖက်ဆစ်ဓားအောက်မှာ
ပြားပြားမမှောက်ဘဲ
ရှင်သန် ထမြောက်လာ
တပြည်လုံး လွတ်မြောက်စေရေးမှာ
ရှေ့ တန်းက ငါတို့ ပါရှိခဲ့။
နယ်ချဲ့ နဲ့ ဖက်ဆစ်စနစ်တို့
ခေတ်ရဲ့ တော်လှန်ဒီရေလှိုင်းက
နေ့မဆိုင်း ညမဆိုင်း မောင်းထုတ်နိုင်ခဲ့ပြီ။
ငါတို့
လွတ်လပ်တဲ့ တိုင်းပြည်
ဖြစ်တည်လာခဲ့။
ငါတို့
ပြည်တွင်းစစ်ပွဲ
ဆက်လက်ဆင်နွှဲရ။
ရှောင်မရ၊ တားမရတဲ့
လူတန်းစားတိုက်ပွဲများ
စဉ် ဆက် မပြတ်ဆင်နွှဲရင်း
ငါတို့ ရဲ့ ရှင်သန်မှုဟာ
ပြည်တွင်းစစ်မီးလျှံကြားမှာ
သံမဏိသား အနှစ်ကျစေခဲ့တယ်လေ။
နှစ်ကာလ ရှည်ကြာပေမယ့်
အောင်ပွဲတွေနဲ့ ဝေးကွာခဲ့တာ
အမှန်ပါ။
နိုင်ခြင်း၊ ရှုံးခြင်းတွေနဲ့
ပူးသတ်၊ ခွာသတ် ရင်း
အသက်မျှဉ်းမျှဉ်း ရှူသွင်းရတဲ့ အထိ
ဒါဏ်ရာနက်ရှိုင်းခဲ့။
ငါတို့
ဆက်လက်ရှင်သန်ဖို့
တိုက်ပွဲကြားမှာ ဆေးဝါးရှိတယ်
တိုက်ပွဲကြားမှာ အင်အားရှိတယ်
ဒီ ယုံကြည်ချက်နဲ့ နိုးထနိုင်ခဲ့ပြီ။
ရှင်သန်ခြင်းသမိုင်းမှာ
ရန်တကာ နဲ့လည်း ရင်ဆိုင်ရ။
ခေတ်ပြိုင် တိုက်ဖော်များတောင်
ပြိုဆင်းသွား၊ ငုတ်လျှိုးသွား
အို မင်း ရင်း ပျောက်ကွယ်ကြလေပြီ။
ငါတို့ကား
ခေတ် အဆက်ဆက်ရဲ့
ခေတ်ပြိုင်မျိုးဆက်များနဲ့
လက်ချင်းချိတ်လို့
ခေတ်တိုင်းရဲ့ တာဝန်
ဆက်လက်ယူနေဆဲ။
ဒါပေမဲ့
ခြေဖျားထောက်
လမ်းလျှောက်သူအချို့ကား
ငါတို့ မပါတဲ့ “ညီညွတ်ရေး” လုပ်နေကြ။
ငါတို့ မပါတဲ့
“တော်လှန်ရေး” လုပ်နေကြ။
သူ့ တရားနဲ့ သူ မို့
ရှိစေတော့… ရှိစေတော့ ။
ဒါပမဲ့
“ဆန်ကျင်ဖက်” က ပေးမယ့်
သင်ခန်းစာများ
ယခင် လူများလို မရရှိစေချင်။
ငါ့တို့ ရဲ့
၈၄ နှစ် ဖြတ်သန်းခြင်း
ဒိုင်ယာရီမှာ
“ပြည်သူ့ အကျိုးဆောင်ကြ” ဆိုတဲ့
ကြွေးကြော်သံ တိုင်, ဟစ်ရင်း
သက္ကရာဇ်တွေ၊ ရှင်သန်နေခဲ့တယ်။
ဒီ “ကြွေးကြော်သံ”
တိုးမြှင့် တိုင်, ဟစ်ရင်းနဲ့
မိုးသက် မုန်တိုင်း ပြင်းထန်ပစေ
ရှင်သန်ကြီးထွားနေဉီးမှာ
သံသယ မရှိကြစေချင်။ ။
ရဲဘော် ဒိုးငြိမ်းချမ်း
၁၅. ၈. ၂၃