ရှေ့က အစိုးရတွေလိုပဲ ငြိမ်းချမ်းရေးလုပ်ရာမှာ ဆိတ်ခေါင်းချိတ်ပြီး ခွေးသားရောင်းနေတဲ့ ဗိုလ်ချုပ်မှူးကြီး မင်းအောင်လှိုင်
(ကိုထွေး)
အရေးတော်ပုံဂျာနယ်၊ အတွဲ(၃) အမှတ်(၄) မှာ ဖော်ပြမယ့်ဆောင်းပါး
ဆိတ်ခေါင်းချိတ်ပြီး ခွေးသားရောင်းတယ်ဆိုတာ ဗမာအသုံးအနှုန်းအရ ပြောရမယ်ဆိုရင်တော့ ဗြောင်လိမ်တယ်လို့ပဲ ပြောရပါလိမ့်မယ်။
(၄) ကြိမ်မြောက် ပင်လုံအစည်းအဝေးမှာ ငြိမ်းချမ်းရေးမရတာဟာ ဆွေးနွေးဘက် လူမျိုးစုလက်နက်ကိုင်အင်အားစုတွေက မရိုးသားလို့ ဆိုပြီး၊ ဗမာပြည်ကွန်မြူနစ်ပါတီနဲ့ အတိတ်က ဆွေးနွေးပွဲပျက်ခဲ့တာကို ကိုးကားပြီး ဗိုလ်မင်းအောင်လှိုင်က ဒီစကားလုံးသုံးပြီး တိုက်ခိုက်ပြောဆိုခဲ့ပါတယ်။
ဗမာပြည်မှာ ပြည်တွင်းစစ်ဖြစ်လာခဲ့တဲ့ ခရီးစဉ်တလျှောက်၊ဗမာပြည်ကွန်မြူနစ်ပါတီနဲ့စဖြစ်ခဲ့တဲ့ပြည်တွင်းစစ် နဲ့ (သမိုင်းမှာ ပြုလုပ်ပြီးခဲ့တဲ့) ငြိမ်းချမ်းရေးဆွေးနွေးပွဲတွေ ပျက်ခဲ့တာတွေကိုကြည့်ရင် အဆုံးအဖြတ်ကျတဲ့ကိစ္စတိုင်းမှာ အုပ်စိုးသူအာဏာရ ဖဆပလ၊ မဆလ၊ နဝတ၊ နအဖ နဲ့ ဒီနေ့ စစ်အာဏာရှင်လက်အောက်က အရပ်သားအစိုးရခေတ်အထိ အစိုးရတိုင်းဟာ မဟုတ်မမှန်ပြောဆို ရပ်တည်ခဲ့တာချည်းပဲဆိုတာတွေ့ရမှာ ဖြစ်ပါတယ်။ ကြည့်ပါ။
ဖဆပလခေတ် ၁၉၄၈ က တကယ်မရှိခဲ့တဲ့ ဂိုရှယ်စစ်တမ်းဆိုတာကို ဖန်တီးပြီး ပုန်ကန်ဖို့လုပ်နေပြီလို့ ဗြောင်လိမ်စွပ်စွဲကာ ဗမာပြည်ကွန်မြူနစ်ပါတီကို အကြမ်းဖက်တိုက်ခိုက်ချေမှုန်းပြီး ပြည်တွင်းစစ်မီးကို မွှေးခဲ့တယ်။
တိုင်းရင်းသားများက ၁၉၄၇ ဖွဲ့စည်းအုပ်ချုပ်ပုံအရ ပြည်ထောင်စုပုံစံဖြစ်ဖို့ ကြိုးစားကြတာကို ၁၉၆၂ မှာ ဗိုလ်နေဝင်းက တိုင်းပြည် ပြိုကွဲအောင်လုပ်နေပြီလို့ ယုန်ထင်ကြောင်ထင်ဖြစ်အောင်ပြောကာ အာဏာသိမ်းခဲ့တယ်။
၁၉၆၃ မှာ ငြိမ်းချမ်းရေးဆွေးနွေးပွဲခေါ်ပြီး နိုင်ငံရေးပြဿနာများ ဆွေးနွေးဖြေရှင်းတာ မလုပ်ဘဲ ပါတီနဲ့တပ်အားလုံး အစိုးရက ဆုံးဖြတ်သတ်မှတ်ပေးထားတဲ့နေရာမှာစုထားပြီး သူတို့သဘောမတူဘဲ ဂွင်(ခွင်) ထဲက မထွက်ရ၊ ပါတီက စည်းရုံးရေး၊ ဘဏ္ဍာရေး ကောက်ခံမှုများမလုပ်ရလို့ တောင်းဆိုခဲ့တယ်။ ဒါဟာ ငြိမ်းချမ်းရေးဆွေးနွေးရေးလို့ဆိုပြီး ဗမာပြည်ကွန်မြူနစ်ပါတီကို ဝိုင်းဝန်းချေမှုန်းဖို့ ကြိုးစားမှု၊ အကျင့်ယုတ်မှုပဲ မဟုတ်ပါလား။
၁၉၈၀-၈၁ မှာ ဗမာပြည်ကွန်မြူနစ်ပါတီက ပြည်သူလူထုအကျိုးကို ထောက်ထားပြီး ပြည်တွင်းစစ်ကို ရပ်စဲကာ ပြည်တွင်း ငြိမ်းချမ်းရေးကိုတည်ဆောက်ရန်တင်ပြခဲ့ပြီး မိမိတို့ရဲ့ ပါတီ၊ တပ်၊ ဒေသများနဲ့ပတ်သက်တဲ့ နှစ်ဖက်လက်ခံနိုင်မယ့် စဉ်းစားထားချက်များကို တင်ပြခဲ့ပေမယ့် ဆွေးနွေးပွဲပြီးအောင်မပြုလုပ်ဘဲ မဆလအစိုးရက တဖက်သတ် ဖျက်ပစ်ခဲ့တယ်။ ဒါကကော ငြိမ်းချမ်းရေးလိုလားတယ်ဆိုတဲ့ မျက်နှာဖုံးစွပ်ပြီး အတုအယောင်လုပ်ပြတဲ့ ဗြောင်လိမ်ညာမှုတရပ်ပဲ မဟုတ်ပါလား။
၁၉၈၉ မှာ ဗမာပြည်ကွန်မြူနစ်ပါတီမှ လူမျိုးစုတပ်တွေ ပုန်ကန်ခွဲထွက်တော့ အာဏာရ နဝတအစိုးရက ချက်ချင်း အပစ်အခတ် ရပ်စဲရေးလုပ်ပါတယ်၊ နိုင်ငံရေးအရ ဆွေးနွေးဖြေရှင်းတာမလုပ်ဘဲ ငြိမ်းချမ်းရေးစကားတွေပြောပြီး စီးပွားရေးလုပ်ခွင့်တွေပေးကာ ဒေသဖွံ့ဖြိုးရေးတွေ လုပ်ခိုင်းခဲ့တယ်။ ဖဆပလအစိုးရခေတ်ကလို စီးပွားရေးလုပ်ခွင့်တွေနဲ့ မက်လုံးပေးသိမ်းသွင်းပြီး လက်နက်ချလာအောင်လုပ်နေတယ်လို့ ပါတီက မြင်ပါတယ်။ ဒါကြောင့် တနပ်စားငြိမ်းချမ်းရေးမလုပ်ဘဲ နိုင်ငံရေးပြဿနာများကို နိုင်ငံရေးအရ အဆင့်ဆင့်ဆွေးနွေးဖြေရှင်းပြီး စစ်မှန်တဲ့ငြိမ်းချမ်းရေးရအောင်ဆောင်ရွက်ဖို့ တင်ပြခဲ့ပါတယ်။ နဝတရော နအဖ အစိုးရရော မလုပ်ပါဘူး။ နယ်ခြားစောင့်တပ်နဲ့ ပြည်သူ့စစ်အဖြစ်သာ အသွင်ပြောင်းခိုင်းတာကိုပဲ ငြိမ်းချမ်းရေးတည်ဆောက်နေပါတယ် ဆိုပြီး ဗြောင်လိမ်ပါတယ်။ အရပ်သားအစိုးရပေါ်လာမှ နိုင်ငံရေးအရ ဆွေးနွေးပါဆိုပြီး လျစ်လျူရှုပါတယ်။
၂၀၀၈ ဖွဲ့စည်းပုံဥပဒေ အတည်ပြုပြီးနောက် (၂၀၁၀ မှာ) ဦးသိန်းစိန်အရပ်သားအစိုးရတက်လာတော့ တနိုင်ငံလုံးအပစ်အခတ်ရပ်စဲရေး(NCA ) ဆွေးနွေးပွဲတွေ စလုပ်ပါတယ်။ (၂၀၁၂) မှာ ထာဝရငြိမ်းချမ်းရေးအတွက် ဆိုပြီး အဆင့်(၃) ဆင့် ချမှတ်အကောင်အထည်ဖော်ဖို့ ဦးသိန်းစိန်မိန့်ခွန်းခြွေပါတယ်။ NCA ဆွေးနွေးပွဲတွေ လုပ်နေတဲ့ကာလ ၂၀၁၃ နိုဝင်ဘာလထဲမှာ၊ မြစ်ကြီးနားဆွေးနွေးပွဲမှာ နယ်စပ်ရေးရာ ပြည်ထောင်စုဝန်ကြီး ဒုဗိုလ်ချုပ်ကြီး သက်နိုင်ဝင်းက ကာကွယ်ရေးဦးစီးချုပ်ကိုယ်စား တပ်မတော်ရဲ့သဘောထားဆိုတဲ့အချက်(၆) ချက်ကို ထုတ်ပြန်ပါတယ်။ အခု အားလုံးက ကာချုပ်မူ(၆) ချက်လို့ ပြောဆိုကြတဲ့ မူများပဲ ဖြစ်ပါတယ်။ ငြိမ်းချမ်းရေးရဖို့ဖြေရှင်းရမယ့် နိုင်ငံရေးပြဿနာဖြစ်တဲ့ ဒီမိုကရေစီရေး၊အမျိုးသားတန်းတူရေးများနဲ့ ဘယ်လောက်
ဝေးတယ်ဆိုတာတွေ့နိုင်ပါတယ်။
ပြည်တွင်းငြိမ်းချမ်းရေးရရန် ဆွေးနွေးဖို့လို့ပြောကြပေမယ့် တကယ်ဆွေးနွေးတဲ့အခါမှာ ငါတို့လိုချင်တာ ဒီပုံစံပဲလို့ ဆိုတဲ့သဘောနဲ့ ကာချုပ်မူ(၆) ချက် တင်ခဲ့တာပဲ မဟုတ်ပါလား။ ဒီနေ့အထိ ဒီမူ (၆) ချက်နဲ့ ထိန်းထားဆဲ ဖြစ်ပါတယ်။ ဒီလုပ်ရပ်ဟာ ငြိမ်းချမ်းရေး စကားပြောပြီး ငါတို့လုပ်ချင်ရာလုပ်တယ်ဆိုတဲ့ ဗိုလ်ချုပ်မှူးကြီးမင်းအောင်လှိုင်ရဲ့ ဗြောင်လိမ်လည်မှုပဲ မဟုတ်ပါလား။ ဒါကြောင့်
ကာချုပ်မူ(၆)ချက်နဲ့ထိန်းချုပ်ခံရမှုအောက်က ရရှိမဲ့ သဘောတူညီချက်ဆိုတာတွေဟာ အပေါ်ယံသာမန်အချက်များသာဖြစ်ပြီး၊ တကယ့်ပြဿနာကို မဖြေရှင်းနိုင်ပါဘူး။
ဗိုလ်မင်းအောင်လှိုင်ဟာ ဒီလို ပြည်တွင်းငြိမ်းချမ်းရေးကိစ္စတိုင်းမှာ သူတို့ စစ်အုပ်စုကိုယ်တိုင် ဆိတ်ခေါင်းချိတ်ပြီး ခွေးသားရောင်းတာကို ဗြောင်လိမ်ဖုံးကွယ်ပြီး ဗကပရဲ့ ၅၅ လမ်းစဉ်ကိုပါ လက်ညှိုးထိုး အပြစ်ရှာ ရန်လုပ်လာပါသေးတယ်။ ဒုတိယမြန်မာနိုင်ငံတော်ဆိုတာ တောင်ငူခေတ်မှန်း အင်းဝခေတ်မှန်းတောင် မသိတဲ့ ဗိုလ်မင်းအောင်လှိုင်ဟာ ဗကပရဲ့ ၅၅ လမ်းစဉ် ဆိုတာကိုလည်း ရေရေလည်လည် မသိဘဲ ရမ်းသန်းပြောဆိုတယ်ဆိုတာ သေချာပါတယ်။
ဗမာပြည်ကွန်မြူနစ်ပါတီရဲ့ လက်ရှိကာလမှာကျင့်သုံးနေတဲ့လမ်းစဉ်က ဗမာပြည်မှာ ပြည်သူလူထုတရပ်လုံး စည်းလုံးညီညွတ်ပြီး ချမ်းသာကြွယ်ဝစေမယ့် လူမှုစနစ်တရပ် ထူထောင်ရန်အတွက် (အလုပ်သမားကိုအခြေခံ လယ်သမားနဲ့ခိုင်မြဲတဲ့မဟာမိတ်ဖွဲ့၊ ဓနရှင်ပေါက်စကိုစည်းရုံး၊ အမျိုးသားဓနရှင်ကိုကြားထား – စစ်၃စစ်ကိုဦးတည်တိုက်) ဆိုတဲ့လူတန်းစားပေါ်လစီ ကျင့်သုံးပြီး ပြည်သူ့ဒီမိုကရေစီအစိုးရတရပ် ထူထောင်ရေးပဲ ဖြစ်ပါတယ်။ ဒီလမ်းစဉ်ဟာ ပါတီစတင်ထူထောင်ကတည်းက ဒီနေ့အထိ အပြောင်းအလဲမရှိပါဘူး။ အခြေအနေ အပြောင်းအလဲအမျိုးမျိုးကြောင့် လမ်းစဉ်အကောင်အထည်ဖော်ရာမှာ လက်ဝဲ လက်ယာ တိမ်းစောင်းခဲ့တာတွေ ပါတီရဲ့သမိုင်းတလျှောက်မှာ အတော်အတန် ရှိခဲ့ပါတယ်။ အဲဒီအထဲက တိမ်းစောင်းသွားတာ၊ မှားယွင်းသွားတာ၊ အခြေအနေနဲ့ မကိုက်ညီတော့တာ—စတဲ့ ပြန်ပြင်ဖို့လိုအပ်တာတွေကို လိုအပ်မှန်းသိတဲ့အချိန်မှာ ပြန်ပြင်ပြီး ဒီလမ်းစဉ် ဒီလမ်းကြောင်းအတိုင်းပဲ ဆက်လျှောက်ခဲ့တာ ဒီနေ့အထိပဲ ဖြစ်ပါတယ်။ လက်တွေ့အခြေအနေအရ လူတန်းစား(၄) ရပ်ကို စုစည်းပြီး ဘုံရန်သူကို ဦးတည်တိုက်နိုင်ဖို့(နည်းပရိယာယ် လမ်းစဉ်အရ) ပါတီစုံဒီမိုကရေစီကို ကြားခံအဆင့်အဖြစ် တင်ပြထားသော်လည်း အရင်းခံအားဖြင့် ပြည်သူ့ဒီမိုကရေစီလမ်းကြောင်းပဲ ဖြစ်ပါတယ်။
ဖက်ဆစ်ဂျပန်တော်လှန်ရေးကို ဆင်နွှဲအောင်မြင်ပြီးနောက် ဥပဒေတွင်းမှာ တရားဝင်ရပ်တည်လာခဲ့တဲ့ ဗမာပြည်ကွန်မြူနစ်ပါတီဟာ မိမိတို့လမ်းစဉ်အရ လူတန်းစား(၄) ရပ်အကျိုးကို ဦးတည်ဆောင်ရွက်ပါတယ်။ အဲဒီကာလမှာ အာဏာရနေတဲ့ ဖဆပလ အစိုးရရဲ့ နယ်ချဲ့ကိုမီခို – ပဒေဿရာဇ်စနစ်ထိန်းသိမ်း – ဗျူရိုကရက်အရင်းရှင်စနစ် ကြီးထွားအောင်ပြုမှု(ရန်သူကြီး၃ဦး) ကြောင့် ဆင်းရဲမွဲတေ ချွတ်ခြုံကျနေရတဲ့အလုပ်သမား၊ လယ်သမားနဲ့အဖိနှိပ်ခံပြည်သူလူထုများရဲ့ အကျိုးစီးပွားကို ရပ်ခံကာကွယ်ပြီး ဥပဒေတွင်း တိုက်ပွဲဝင်ခဲ့တာပဲ ဖြစ်ပါတယ်။
လက်ရှိကာလကတော့ စစ်ဗျူရိုကရက်အရင်းရှင်လူတန်းစားနဲ့ခရိုနီများကို ဦးတည်တိုက်ပွဲဆင်ပြီးလူတန်းစား(၄) ရပ်အကျိုး ရပ်တည်တဲ့ ပြည်သူ့ဒီမိုကရေစီ အစိုးရတရပ် ထူထောင်နိုင်အောင် ကြိုးပမ်းအားထုတ်နေတဲ့ကာလ ဖြစ်ပါတယ်။
ကိုထွေး