ကိုဗစ်၊ ရွေးကောက်ပွဲ၊ မင်းရဲသိင်္ခသူနဲ့ ဗိုလ်ချုပ်ရုပ်ရှင်(မြစမ်းအေး)

By | November 28, 2020

ကိုဗစ်၊ ရွေးကောက်ပွဲ၊ မင်းရဲသိင်္ခသူနဲ့ဗိုလ်ချုပ်ရုပ်ရှင်

(မြစမ်းအေး)

ဗိုလ်မင်းအောင်လှိုင်ရဲ့ ရေငုပ်သင်္ဘောပြပွဲသတင်းဖတ်ရတော့ ဗိုလ်နေဝင်းရဲ့(လွှတ်တော်)သင်္ဘော ရေချပွဲကို သွားသတိရမိတယ်။ ၁၉၇၄ မဆလ တပါတီရွေးကောက်ပွဲ အောင်ပွဲနဲ့အတူ ဆင်မလိုက်သင်္ဘောကျင်းမှာ ပြည်တွင်းဖြစ် (လွှတ်တော်)ဆိုတဲ့ သင်္ဘောကြီးတစင်း ရေချပွဲအကြောင်း မဆလသတင်းစာများရဲ့မျက်နှာဖုံးသတင်း ဖော်ပြလာတယ်။

ရယ်စရာကောင်းတာက အဲဒီ(လွှတ်တော်)သင်္ဘောဟာ အခွံချည်းဖြစ်ပြီး အင်ဂျင်မပါဘူး။ သမ္မတကြီးဦးနေဝင်း အလိုကျအောင် ဟန်ပြရေချပြီး နောက်နေ့မှာ ဒေါက်ပေါ်ပြန်ဆွဲတင်ထားရတာ ဖြစ်တယ်။

ယခုလည်း ၂၀၂၀ရွေးကောက်ပွဲအမီ ရေချပြတဲ့ မင်းရဲသိင်္ခသူ ရေငုပ်သင်္ဘောကို တပ်မတော် မှန်/ပြန်အဖွဲ့မှ ချီးမွမ်းခန်းဖွင့် ဋီကာချဲ့ ပြနေတယ်။ ၁၉၈၀မှာ သက်တမ်းကုန်နေတဲ့ ဒီဇယ်စွမ်းအင်သုံး ရုရှားလုပ်အဟောင်းကြီးကို အိန္ဒိယမှာမွမ်းမံပြီး ဗမာကို ပြန်ရောင်းပေးတာ ဖြစ်တယ်။ ဘယ်ဈေးပေးရလဲတော့ မဖော်ပြဘူး။ ဘာမဆိုင်ညာမဆိုင် ဘင်္ဂလားဒေ့ချ်ထက် အပြတ်အသတ် သာကြောင်းလည်း ပြောလိုက်သေးတယ်။

ရွေးကောက်ပွဲအမီ ကြည်းရေလေ စစ်ရေးပြအခမ်းအနားကျင်းပပြီး အားပြလိုပေမယ့် ကိုဗစ်ကြောင့်ကော ရခိုင်စစ်ပွဲ အခြေမလှတာကြောင့်ပါ မလုပ်ဖြစ်တော့တဲ့အတွက် (မင်းရဲသိင်္ခသူ နဲ့ပဲ) နှစ်သိမ့်လိုက်ရတာဖြစ်တယ်။ ဘင်္ဂလားဒေ့ချ်ကို ရန်လုပ်နေတာကတော့ မင်းအောင်လှိုင်စစ်တပ်မှ စစ်သုံ့ပန်းနှစ်ဦး ICJ နိုင်ငံတကာတရားရုံးမှာ သက်သေထွက်ဖို့ရောက်သွားတဲ့အပေါ် မခံချိမခံသာဖြစ်သွားလို့ပါ။

အလားတူပဲ ဒီချုပ်ကလည်း ဗိုလ်ချုပ်ရုပ်ရှင်ကို ရွေးကောက်ပွဲအမီ ပွဲထုတ်လိုပေမယ့် ကိုဗစ်ကြောင့် (ပြီးသလောက်ရှိပြီ ဆိုသော်လည်း) ရုံမတင်ပွဲမထုတ်နိုင် ဖြစ်နေတယ်။ ဒါ့အပြင် ပညာရှင်အတော်များများက လက်ရှောင်ထားတာကြောင့် အပေါစားဝါဒဖြန့်ချိရေးရုပ်ရှင် ဖြစ်နေရင် အကျိုးပိုယုတ်လိမ့်မယ်။

စစ်ဗျူရိုကရက်တွေကော လစ်ဘရယ်ဘူဇွာတွေပါ ရွေးကောက်ပွဲဟာ အရေးကြီးနေတယ်။ ဘာဖြစ်လို့လဲဆိုတော့ ၂၀၀၈ အောက်မှာ (စစ်ခရိုနီ+လစ်ဘရယ်) ရင်ကြားစေ့အစိုးရ အာဏာအဝေတည့်နေလို့ ဖြစ်တယ်။ (ဘယ်တော့တာတေစနေသားလိုဖြစ်မလဲ မသိဘူး) သူတို့ဟာ အလုပ်သမား လယ်သမား ကျောင်းသား နဲ့အခြေခံလူတန်းစားတွေအပေါ် ရန်ဘက်လိုကြည့်မြင်တဲ့ သဘောထားချင်းတူတယ်။ တိုင်းရင်းသားတွေအပေါ် စစ်ခင်းပြီး ဗမာလူမျိုးကြီးဝါဒ ကျင့်သုံးတာချင်းလည်း တသဘောတည်း ဖြစ်နေတယ်။

ဦးသိန်းစိန်လက်ထက်ကော ဒေါ်စုလက်ထက်ပါ ၂၁ပင်လုံ NCA အောင်မြင်မှုမရပါဘူး။ (၁၅ အောက်တိုဘာ ၂၀၂၀) NCA လက်မှတ်ထိုးခြင်း ၅နှစ်မြောက်နေ့ သဝဏ်လွှာဆိုတာမှာ ဗိုလ်မင်းအောင်လှိုင်ကော ဒေါ်စုပါ ဒီမိုကရေစီဖယ်ဒရယ်ပြည်ထောင်စု အတွက် ဆက်လက်ကြိုးပမ်းသွားဖို့ ရွေးကောက်ပွဲအောင်မြင်ဖို့လိုကြောင်း အသားပေးပြောကြတယ်။

ICJ မှာ လူမျိုးတုံးသတ်ဖြတ်မှုနဲ့ စစ်ဗိုလ်ချုပ်ကြီးများ တရားရင်ဆိုင်နေရတာကို နိုဘယ်ဆုရှင်ကိုယ်တိုင် တရားရုံးမှာ ခုခံကာကွယ်ပေးပြီး၊ ပြည်ပရန်ကြောင့် တတိုင်းပြည်လုံး (လစ်ဘရယ် စစ်အုပ်စု တိုင်းရင်းသား) စည်းလုံးညီညွတ်ဖို့အရေး – နိုင်ငံရေးအရ အာဘော်ဖန်တီးနေသော်လည်း အဖိနှိပ်ခံလူမျိုးပေါင်းစုံပြည်သူတွေဟာ (အန်ကယ်အတွက် နှလုံးစိတ်ဝမ်း အေးချမ်းဖို့) လိုက်ပါဆုတောင်းပေးမယ့် နလပိန်းတုံးတွေမဟုတ်ကြပါဘူး။

ကိုဗစ်ကြောင့် ကူးစက်မှုနဲ့သေဆုံးမှု မြင့်နေတယ်။ စစ်ကြောင့် ဒုက္ခသည်နဲ့ အရပ်သားသေဆုံးမှု တိုးပွားနေတယ်။ စီးပွားရေးထိုင်းမှိုင်းမှုကြောင့် အလုပ်သမားတွေ လယ်သမားတွေ မြို့နေဆင်းရဲတွေ အငတ်ဘေးနဲ့ရင်ဆိုင်နေရတယ်။ လူလတ်တန်းစားတွေ နေထိုင်မှုကျပ်တည်းလာတယ်။ အမျိုးသားဓနရှင်တွေ စီးပွားဆုတ်ယုတ်လာတယ်။ စီးပွားရေးကျဆင်းမှုနဲ့အတူ လူမှုရေးမတည်ငြိမ်မှု တိုးပွားလာတယ်။ အနာဂတ်အတွက် မျှော်လင့်ချက်တွေ ကင်းမဲ့နေတယ်။

အလုပ်သမားတွေကို ဘေးကင်းလုံခြုံမှု အာမခံချက်မရှိဘဲ ခရိုနီတွေရဲ့ အမြတ်အစွန်း မထိခိုက်ရေးအတွက် ကိုဗစ်စက်ရုံတွေထဲ မောင်းပို့နေတယ်။ ကိုဗစ်နဲ့နပန်းလုံးပြီး အရင်းရဲ့ထမ်းပိုးကို ထမ်းမလား၊ ဒါမှမဟုတ် ငတ်သေမလား ရွေးခိုင်းနေတယ်။ လမ်းဘေးမှာသေနေသူတွေ ကိုယ့်ကိုယ်ကိုယ်သတ်သေသူတွေ များလာတယ်။ ရာဇဝတ်မှုတွေလည်း တိုးပွားလာတယ်။ ကူးစက်မှုတွေ တိုးပွားမှုနဲ့အတူ ဆေးဝန်ထမ်းတွေလည်း မနိုင်မနင်းဖြစ်လာနေတယ်။

ရခိုင်ပြည်နယ် မြို့နယ်အများစု အပါအဝင်၊ ရှမ်းပြည်နယ် (ဝနဲ့မိုင်းလားအပါ) မြို့နယ်အများအပြား၊ ကချင်ပြည်နယ် ပဲခူးတိုင်းမွန်ပြည်နယ် မြို့နယ်နှင့်ကျေးရွာအုပ်စုတချို့တွင် ရွေးကောက်ပွဲ ကျင်းပမည်မဟုတ်ကြောင်း ရွေးကောက်ပွဲကော်မရှင်က (၁၆ အောက်တိုဘာ ၂၀၂၀) သတင်းထုတ်ပြန်တယ်။ ဒါဟာ ယခင်ရွေးကောက်ပွဲများထက် မကျင်းပနိုင်တဲ့နေရာ ပိုများပါတယ် (လုပ်လည်း ရှုံးမယ့်နေရာတွေမို့လို့ မလုပ်တာလို့ ဝေဖန်မှုတွေလည်း ရှိပါတယ်)။

ဒါပေမဲ့ ရင်ကြားစေ့ပါတီကြီး နှစ်ရပ်ကတော့ ကျန်ဒေသများမှာ ကိုဗစ်ရွေးကောက်ပွဲ မဲဆွယ်ပွဲသဘင်ကို ဟေးလားမောင်တို့ဝါး လုပ်လို့ကောင်းနေကြပါတယ်။

စစ်ခရိုနီ+လစ်ဘရယ် ရင်ကြားစေ့အစိုးရအဖို့ လူထုအုံကြွမှုမဖြစ်ရင်ပြီးရော ကိုဗစ်ကြောင့် လူဘယ်လောက်သေသေ ဘယ်လောက်ငတ်ငတ် အာဏာလက်မလွတ်ရေးအတွက် ရွေးကောက်ပွဲလောက် အရေးမကြီးဘူးလို့ သဘောထားပုံချင်း တူကြပါတယ်။

ဆင်သေကောင်ကိုဖက်တွယ်နေတဲ့ ကျီးမိုက်လို ပင်လယ်ပြင်နဲ့တူတဲ့ လူထုအုံကြွလာရင် မင်းရဲသိင်္ခသူလည်း မကယ်နိုင်ဘူး။ ဗိုလ်ချုပ်ရုပ်ရှင်လည်း ကယ်နိုင်မှာမဟုတ်ဘူး။

မြစမ်းအေး (၂၀ အောက်တိုဘာ ၂၀၂၀)

Leave a Reply

Your email address will not be published. Required fields are marked *