ကာချုပ်ရဲ့ ဒီလိုသဘောထားမျိုးနဲ့ ပြည်တွင်းငြိမ်းချမ်းရေးရဖို့ ဝေးလွန်းပါတယ်။
(ကိုထွေး)
အရေးတော်ပုံဂျာနယ်၊ အတွဲ(၃) အမှတ်(၄)မှာ ဖော်ပြမယ့်ဆောင်းပါး
ဗမာပြည်ရဲ့ တပ်မတော်ကာကွယ်ရေးဦးစီးချုပ်က ပြည်တွင်းလက်နက်ကိုင်တိုက်ခိုက်မှုများ ဆက်လက်ဖြစ်ပေါ်နေမှု မတားဆီးနိုင်ခြင်းမှာ ပြည်ပက ကူညီမှုတွေရှိနေတာကြောင့်လို့ သူ့ရဲ့ ရုရှားမီဒီယာတခုနဲ့အင်တာဗျူးမှာ ပြောသွားပါတယ်။ ဒီပြောဆိုပုံဟာ ကိုယ့်ကြောင့် ဖြစ်နေတာဆိုတဲ့အကြောင်းရင်းကို ဖုံးကွယ်ပြီး ကိုယ့်အပြစ်ကိုသူများတွေအပေါ် ပုံချလိုက်တဲ့ အပြောပဲဖြစ်တယ်ဆိုတာ ရှင်းပါတယ်။
ဒီလိုစကားကို ရုရှားနိုင်ငံမှာ၊ မီဒီယာမှာ၊ ခုလို ရွေးကောက်ပွဲ အကြိုကာလမှာ ပြောလိုက်တယ်ဆိုတော့ သူ့မှာ တခြားရည်ရွယ်ချက် တွေလည်း ရှိလိမ့်မယ်ဆိုတာ အားလုံးက သဘောပေါက်ကြမှာပါပဲ။ ဒီမှာ သူ့ရဲ့တခြားရည်ရွယ်ချက်များအကြောင်းမပြောဘဲ ငြိမ်းချမ်းရေးမရ ရတဲ့အကြောင်းကိုပဲ ပြောချင်ပါတယ်။
အင်တာဗျူးမှာပြောတဲ့သူ့စကားကို အဓိပ္ပာယ်ကောက်ရရင် ပြည်ပက ကူညီမှုတွေမရှိခဲ့ရင်တော့ စစ်တပ်က ပြည်တွင်းရှိ လက်နက် ကိုင်အင်အားစုအားလုံးကို အပြတ်ချေမှုန်းနိုင်ပြီး သူတို့လိုချင်တဲ့ပုံစံနဲ့ခင်းပေးထားတဲ့ ငြိမ်းချမ်းရေးဆိုတာကို တည်ဆောက်နိုင်မှာပဲလို့ ပြောလိုက်တာဖြစ်ပါတယ်။
အဓိက- က ဒီစိတ်ဓာတ်၊ ဒီစိတ်နေသဘောထား၊ ဒီအတွေးအခေါ်ကြောင့်ပဲ ပြည်တွင်းစစ် အဆုံးမသတ်နိုင်ဘဲ ငြိမ်းချမ်းရေး မတည်ဆောက်နိုင်တာဖြစ်ပါတယ်။ ဒီစိတ်ဓာတ်မျိုးကိုကိုင်စွဲနေသမျှ ခုခံဆန့်ကျင်တိုက်ပွဲဝင်နေသူများက ဆက်လက်တိုက်ပွဲဝင် နေမှာဖြစ်ပြီး၊ ငြိမ်းချမ်းရေး ရဖို့ကလည်း အလှမ်းဝေးနေဦးမှာသာဖြစ်ပါတယ်။
ပြည်တွင်းစစ်ဖြစ်ရတာရဲ့ အရင်းခံပြဿနာဟာ ဒီမိုကရေစီရေးနဲ့အမျိုးသားတန်းတူရေးမရှိလို့ဆိုတာ စစ်အုပ်စုက မှန်ကန်တဲ့ စိတ်ရင်းသဘောထားနဲ့ လက်ခံတာမျိုး မရှိပါ၊ ဖြေရှင်းဖို့လည်း မကြိုးစားပါ။ စစ်အုပ်စုဟာ စစ်အာဏာရှင်စနစ် သားစဉ်မြေးဆက် ထာဝရအာဏာရှိနေစေဖို့ ၂၀၀၈ အခြေခံဥပဒေကိုရေးဆွဲပြီး စစ်ဗျူရိုကရက် အရင်းရှင်လူတန်းစားနဲ့ သူတို့လက်သပ်မွေးထားတဲ့ စစ်ခရိုနီများကိုသာ လက်ဝါးကြီးအုပ်ခွင့် အပြည့်အဝ ပေးထားနေတာဖြစ်ပါတယ်။ ဒီအခြေအနေမှာ အင်အားစုတချို့နဲ့ လူပုဂ္ဂိုလ်တချို့ အလျှော့ပေးသွားကြတာရှိပေမယ့် စစ်မှန်တဲ့ဒီမိုကရေစီ အပြည့်အဝရရှိလိုသူများနဲ့ အမျိုးသားတန်းတူမှု အပြည့်အဝ ရရှိလိုသူများ ကတော့ ဒီပြဿနာရဲ့အဓိကတရားခံ စစ်အာဏာရှင်စနစ်ကို မလျှော့သောဇွဲနဲ့ ဆက်လက်တိုက်ပွဲဝင်နေကြပါတယ်။ ဒါကြောင့် ပလောင်၊ ကိုးကန့်၊ ရခိုင်လူမျိုးများရဲ့ လက်နက်ကိုင်တိုက်ပွဲများဟာ အနီးခေတ်မှာ ပြန်လည်ပေါ်ပေါက် ကြီးထွားလာတာ ဖြစ်ပါတယ်။
ခုခံဆန့်ကျင်တိုက်ပွဲဝင်သူတွေဟာ ကိုယ့်အင်အားကို တည်ဆောက်နိုင်အောင် ကြိုးစားတာဟာ တရားနည်းလမ်းကျပါတယ်။ ပြည်သူ့ဘဏ္ဍာငွေကို ဗုံးပေါလအောသုံးကာ တရားဝင်လူသတ်ခွင့်လိုင်စင် ကိုင်ဆောင်ခွင့်ရထားပြီး၊ သူတို့ ရမ်းကားခဲ့သမျှအားလုံးကို နိုင်ငံတော်အကျိုးစီးပွားကာကွယ်မှုအဖြစ် ပြောခွင့်ရနေတဲ့ အာဏာရစစ်တပ်ကို ခုခံဆန့်ကျင်တိုက်ပွဲဝင်လိုတဲ့ အင်အားစုတွေဟာ၊ သူတို့ရဲ့တိုက်အား ပိုမိုကောင်းမွန်လာစေရေးအတွက် အကူအညီရမယ်ဆိုရင် ရယူဖို့စဉ်းစားမှာပါပဲ။ ဗမာပြည်သမိုင်းမှာ ၄၈-၄၉ ခုနှစ်က ရန်ကုန်အစိုးရဖြစ်နေတဲ့ ဖဆပလအစိုးရဟာ လက်နက်ခဲယမ်း အခက်အခဲတွေ့နေချိန်မှာ အိန္ဒိယနေရူးအစိုးရဆီက အကူအညီ သွားတောင်းခဲ့ပြီး အသက်ဆက်ခဲ့ရတယ်မဟုတ်ပါလား။ ပြည်တွင်းစစ် နှစ်(၇၀)ကျော်အတွင်းမှာ သူပုန်ရော၊ အစိုးရပါ ဝယ်နိုင်သမျှ၊ ရှာရသမျှ၊ ရှိသမျှ၊ ကြုံသမျှ အကူအညီကို ရယူခဲ့ကြပြီး ကိုယ်နိုင်ဖို့ ကြိုးစားမှုတွေ လုပ်ခဲ့ကြတာပဲမဟုတ်ပါလား။ ဒီ အင်တာဗျူး ကလည်း ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က ရုရှားရဲ့အကူအညီရချင်လို့၊ ရတဲ့အကူအညီနဲ့ ပြည်တွင်း လက်နက်ကိုင်တိုက်နေသူများကို အပြုတ်ချေမှုန်းနိုင်ဖို့ ကြိုးစားလိုက်တဲ့ လုပ်ဆောင်မှုတခုပဲ မဟုတ်ပါလား။
ဗမာပြည်က လက်နက်ကိုင်ခုခံတိုက်ပွဲဝင်နေသူတွေဟာ၊ ဝါသနာပါလို့ စစ်တိုက်နေကြတာမဟုတ်ပါဘူး၊ ရသင့်တဲ့နိုင်ငံရေး အခွင့်အရေးတွေကို ငြိမ်းချမ်းစွာတင်ပြတောင်းယူလို့မရဘဲ၊ ဖမ်းဆီးနှိပ် စက်တာခံကြရလွန်းလို့၊ လက်နက်ကိုင်ခုခံတဲ့ နည်းသာရှိတော့လို့ ဖြစ်ပါတယ်။ အလားတူပဲ ဗမာ့တပ်မတော်မှာ စစ်မှုထမ်းနေကြတဲ့ အောက်ခြေက အကြပ်တပ်မှူးနဲ့ တပ်သားတွေဟာလည်း ပျော်လွန်းလို့စစ်တိုက်နေကြတာ မဟုတ်ပါဘူး။ တဝမ်းတခါးအတွက် ရရာအလုပ်ရှာမရလို့ စစ်တပ်ထဲရောက်ကာ အသက်မွေး ဝမ်းကျောင်းနေကြရသူကအများကြီးပါ။ အထက်စစ်အုပ်စုက သူတို့အကျိုးစီးပွားကာကွယ်ချင်လို့ သူတို့ကို ဆန့်ကျင်တိုက်ပွဲဝင် သူတွေကို တိုက်ခိုက်သတ်ဖြတ်ရန် အမိန့်ပေးမှုများကို တာဝန်အရသာ လုပ်နေကြရသူတွေသာ ဖြစ်ပါတယ်။ စစ်တပ်အောက်ခြေ တပ်မှူးတပ်သားတွေက စစ်အုပ်စုနဲ့ စစ်ဗျူရိုကရက်အရင်းရှင်တွေအုပ်စိုးမှု အဓွန့်ရှည်ရေးအတွက် အဓိပ္ပာယ်မရှိ စစ်တိုက်ပေးနေ ကြရတာကို သဘောပေါက်ပြီး အမိန့်ဖီဆန်လာကြရင်တော့ စစ်အုပ်စုပြိုပျက်တာ ပိုမြန်သွားစေမှာ မုချပါပဲ။ အောက်ခြေ တပ်မှူးတပ်သားတွေရဲ့လက်ထဲမှာ သူတို့အသက်တွေ ရှိနေတာ မဟုတ်ပါလား။
တကယ်က ပြည်တွင်းစစ်လုံးဝပြီးသွားဖို့ နိုင်ငံရေးအရ အင်အားစုအားလုံးပါဝင်ပြီး တန်းတူရည်တူ၊ဒီမိုကရေစီပြည့်အဝနဲ့ ဆွေးနွေး ညှိနှိုင်းဆုံးဖြတ်ရမှာဖြစ်ပါတယ်။ အခုဖြစ်ခဲ့သလို စစ်အာဏာသိမ်း၊ စစ်အစိုးရကသူ့စိတ်ကြိုက်စီစဉ်၊ ညောင်နှစ်ပင်ညီလာခံလုပ်ပြီး သူတို့လိုချင်သမျှယူ- သူတို့ပေးချင်သလောက်ပဲပေးလိုက်တဲ့ ၂၀၀၈အခြေခံဥပဒေမျိုး တဖက်သတ်ရေးဆွဲချမှတ် ကျင့်သုံးကာ၊ အတင်းအကျပ်လက်ခံခိုင်းတဲ့နည်းလမ်းမျိုးနဲ့ စစ်မှန်တဲ့ဒီမိုကရေစီနဲ့ အမျိုးသားတန်းတူညီမျှမှု ရှိအောင် အကောင်အထည် မဖော်နိုင်ပါဘူး။ လက်မခံသူတွေကိုရန်သူ၊ အကြမ်းဖက်သူများအဖြစ် သတ်မှတ်ပြီး၊အခုလို စစ်ရေးအရ ချေမှုန်းတဲ့ပေါ်လစီ ကျင့်သုံးနေသမျှတော့ တိုင်းပြည်အခြေအနေ ပိုဆိုးပြီး စစ်ပွဲရှည်ကြာသထက်ရှည်ကြာဖို့သာ ရှိပါတော့တယ်။
၇-၇-၂၀