ဗမာပြည်ကွန်မြူနစ်ပါတီ ဗဟိုစည်းရုံးရေးကော်မီတီ ၏ရခိုင်ဒေသအတွင်း ပျံ့နှံ့လာနေသော Covid – 19 ကူးစက်မြန်ရောဂါနှင့် ပတ်သက်၍ထုတ်ပြန်ကြေညာချက်
၁။ ယခုအခါ COVID-19 ကူးစက်မြန်ရောဂါသည် ရခိုင်ဒေသအတွင်း အလျှင်အမြန်ပျံ့နှံ့နေကြောင်းသတင်းများ ကြားသိနေရပါသည်။ ဩဂုတ်လ ၁၆ မှ ၂၃ ရက်နေ့ည ၈ နာရီအထိ ရောဂါပိုးတွေ့ရှိသူ ၅၉ ဦးအထိရှိလာပြီ။ တပြည်လုံး ကူးစက်ခံရသူစုစုပေါင်း ၄၅၀ ဦး ရှိခဲ့ပြီ။ ကျန်းမာရေးဝန်ကြီးဌာနသတင်းများအရ ယခုကူးစက်မှုမှာ မျိုးဗီဇပြောင်းလဲနေသော ဗိုင်းရပ်စ်အမျိုးအစား ဖြစ်နိုင်သောကြောင့် ကူးစက်မှုနှုန်း ဆယ်ဆမြန်ကြောင်းနှင့် ဒုတိယလှိုင်း တကြော့ပြန်လာတာဖြစ်နိုင်ကြောင်း သတိပေးနှိုးဆော်ထားသည်။ WHO ကမ္ဘာ့ကျန်းမာရေးအဖွဲ့ကြီးမှလည်း ကာကွယ်ဆေးစမ်းသပ်ခြင်းနှင့် ကာကွယ်ဆေးလူတိုင်းစေ့ဖြန့်နိုင်ရေးမှာ နှစ်ချီကြာဦးမှာဖြစ်ကြောင်း သတိပေးထားသည်။
၂။ ယခုအခါ ရခိုင်ဒေသတွင်း ရောဂါထိန်းချုပ်ရေးအတွက် ရပ်ကွက် မြို့ရွာအလိုက် ပိတ်ဆို့ထားခြင်း Lockdown- နေထိုင်မှု ကန့်သတ်ထားခြင်း၊ ညမထွက်ရအမိန့်ထုတ်ထားခြင်းများကို ဆောင်ရွက်ထားကြောင်း ကြားသိရပါသည်။ ရခိုင်မြောက်ပိုင်းတွင် အင်တာနက်ဆက်သွယ်ရေးလိုင်း ဖြတ်တောက်ထားသည်မှာလည်း ကြာလှပါပြီ။ ရခိုင်နှင့်မွတ်စလင် ဒုက္ခသည်စခန်းများနှင့် လတ်တလော စစ်ဘေးရှောင်စခန်းများတွင်လည်း သိန်းနဲ့ချီသောလူများ ပြွတ်သိပ်လျက်ရှိနေသည်။ သူတို့၏ဒုက္ခများကိုလည်း နားလည်ပေးသင့်ပါသည်။
၃။ ကမ္ဘာနှင့်ချီဖြစ်ပွားနေသော စီးပွားရေးအကျပ်အတည်းနှင့် ကိုဗစ်ကပ်အောက်တွင် ပြည်တွင်းစစ်ပြဿနာ၊ ဆင်းရဲမွဲတေမှုပြဿနာ စသော အသည်းအသန်ပြဿနာပေါင်းစုံနှင့် လုံးထွေးနေရကာ စိန်ခေါ်မှုများစွာနှင့်ကြုံတွေ့နေရသော ဗမာပြည်လို ဖွံ့ဖြိုးဆဲနိုင်ငံ တနိုင်ငံတွင် ရောဂါပြန့်ပွားမှုမြင့်တက်လာပါက အများပြည်သူတို့၏ အသက်အိုးအိမ် ကြောက်ခမန်းလိလိ ဆုံးရှုံးသွားနိုင်သည်။
ရောဂါပြန့်ပွားမှုမြင့်တက်လာပါက (အထူးသဖြင့် ကျန်းမာရေးပြဿနာများ) ထိန်းမနိုင်သိမ်းမရ ဖြစ်သွားနိုင်သည်။
၄။ ယနေ့ကာလသည် စစ်ဘေး၊ ရောဂါဘေး၊ အငတ်ဘေးနှင့် အဖိနှိပ်ခံနေရသော ဘေးစသော ဘေးဒုက္ခအမျိုးမျိုးတို့အကြား ဆူးကြားထဲကဘူးကဲ့သို့ အန္တရာယ်မျိုးစုံ ဝန်းရံခြင်းခံနေရပြီး ဒုက္ခဖိစီးမှုများစွာရင်ဆိုင်နေရသော ရခိုင်ပြည် ပြည်သူလူထုအပါအဝင် တပြည်လုံးပြည်သူလူထု၏ ဘေးဒုက္ခနှင့်အသက်အန္တရာယ်ကင်းရှင်းစေရေးကို အစိုးရနှင့်အစိုးရစစ်တပ်တို့သည်လည်းကောင်း အေအေ AA တပ်တော်သည်လည်းကောင်း၊ အဓိက ရှေးရှုဦးတည်သွားရမည့် အချိန်ကာလဖြစ်သည်ဟု ကျွန်ုပ်တို့ယူဆမိသည်။ သို့ဖြစ်၍ ရခိုင်ပြည်သူလူထု၏ ကောင်းကျိူးချမ်းသာကိုဦးထိပ်ပန်ကာ လက်နက်ကိုင်အင်အားနှစ်ဖွဲ့စလုံးမှ မည်သည့် စစ်နေရာ တိုးချဲ့မှု၊ စစ်ရေးလှုပ်ရှားမှုများများကိုမဆို ဆက်လက်မလုပ်ဆောင်သင့်တော့ပါ။ ထိုကြောင့် နှစ်ဖက်စလုံး တပြိုင်တည်း ချက်ချင်း အပစ်အခတ်ရပ်စဲပြီးကြိုတင်စည်းကမ်းသတ်မှတ်ချက် မထားရှိဘဲ ရခိုင်ပြည်နယ် စစ်မီးငြိမ်းအေးစေရေးအတွက် တွေ့ဆုံဆွေးနွေးမှုများ ဆက်လက်လုပ်ဆောင်သွားကြရန် ဗမာပြည်ကွန်မြူနစ်ပါတီ အနေဖြင့် အလေးအနက် တိုက်တွန်းအပ်ပါသည်။
ဗဟိုစည်းရုံးရေးကော်မတီ
ဗမာပြည်ကွန်မြူနစ်ပါတီ
၂၀၂၀ ခုနှစ်၊ သြဂုတ်လ၊ ၂၄ ရက်။
(၁၃၈၂ ခုနှစ်၊ ဝါခေါင်လဆန်း ၆ ရက်။)