ဗမာပြည်ကွန်မြူနစ်ပါတီ ၈၅ နှစ်မြောက် ပါတီမွေးနေ့အထိမ်းအမှတ်အဖြစ် ထုတ်ဝေသည့် ပြည်သူ့အာဏာဂျာနယ်နှင့် အရေးတော်ပုံဂျာနယ်တို့အတွက် စာတည်းအဖွဲ့အမှာစာ

ဗမာပြည်ကွန်မြူနစ်ပါတီ ၈၅ နှစ်မြောက် ပါတီမွေးနေ့အထိမ်းအမှတ်အဖြစ် ထုတ်ဝေသည့် ပြည်သူ့အာဏာဂျာနယ်နှင့် အရေးတော်ပုံဂျာနယ်တို့အတွက် စာတည်းအဖွဲ့အမှာစာ

အပိုင်း(၁)

၂၀၂၄ ခုနှစ် ဩဂုတ်လ ၁၅ ရက်နေ့ရောက်လျှင် မိမိတို့ ဗမာပြည်ကွန်မြူနစ်ပါတီ၏ သက်တမ်းသည် ၈၅ နှစ်တင်းတင်း ပြည့်ပါတော့မည်။ မိမိတို့အနေနှင့် ဗမာပြည်နိုင်ငံရေးသမိုင်းတွင် သက်တမ်းအရှည်ဆုံးပါတီကြီးတရပ်အဖြစ် ဂုဏ်ပြုရင်း ဥဒါန်းရင့်ကျူးရမည့်ကာလ၊ တဆက်တည်း …ကျလာသည့်တာဝန်များကို ၂ ဆတိုး ကြိုးပမ်းရမည့်ကာလ၊ စစ်အာဏာရှင်စနစ်ကို အမြစ်ကလှန်ပစ်ရမည့်ကာလလည်း ဖြစ်နေသည်ကို သတိမူကြစေလိုသည်။

ဗမာပြည်ကဲ့သို့သော ခေတ်ပြောင်းခေတ်လွှဲ မင်းပြောင်းမင်းလွှဲများသော နိုင်ငံမျိုးတွင် ဤမျှ သမနိရှည်ကြာသော ပါတီကြီးတရပ်ကို ဘယ်လို ထူထောင်ထားပါသလဲ၊ ဘယ်လိုပုဂ္ဂိုလ်တွေက ထူထောင်ခဲ့သလဲဆိုတာကို ပထမဆုံး စောကြောပြပါရစေ။

မာ့က်စ်ဝါဒအခြေခံထားသည့် တိုင်းချစ်ပြည်ချစ်မျိုးဆက်လေးခုက တည်ထောင်ထားသည့်ပါတီဖြစ်နေခြင်းကို ပထမဆုံး တင်ပြထားပါမည်။

ပါတီသမိုင်းကို စိုက်ထူတိုက်ပွဲဝင်သူများအဖြစ် အစဉ်အဆက်ခေါင်းဆောင်များက မျိုးဆက်လေးခုအဖြစ် ခွဲခြမ်းသတ်မှတ်ပြောဆိုလေ့ရှိပါသည်။

(၁) ပထမမျိုးဆက်အဖြစ် ၁၃၀၀ ပြည့် အရေးတော်ပုံကာလတွင် လှုပ်ရှားခဲ့သူများကိုအခြေခံပြီး သတ်မှတ်ခဲ့သည်။

(၂) ဒုတိယမျိုးဆက်ကိုတော့ ၁၉၄၈/၄၉ (လက်နက်ကိုင်တိုက်ပွဲကာလ) ပါတီဝင်များကို ညွှန်းသည်။

(၃) တတိယမျိုးဆက်များဟူ၍- မဆလခေတ် ဗမာပြည်ကွန်မြူနစ်ပါတီဝင်ဖြစ်လာသူများကို အထွေထွေအတွင်းရေးမှူး ရဲဘော်ကြင်မောင်က သတ်မှတ်သည်။

(၄) စတုတ္ထမျိုးဆက်များအဖြစ် ရှစ်လေးလုံးနောက်ပိုင်း ပေါ်ထွန်းလာသည့်ပါတီဝင်များကို နေရာပေးသည်။

ဤမျိုးဆက်လေးခု၏ အဆက်မပြတ်မောင်းနှင်အားက ယနေ့ကာလအထိ အရှိန်မပျက်ချီတက်ဆဲ အင်အားစုကြီးအဖြစ် ရပ်တည်နေနိုင်ခြင်းဖြစ်ပါသည်။ ပါတီခေါင်းတွဲကို လက်ရှိမောင်းနှင်နေသည့် မျိုးဆက်များကတော့ တတိယနှင့် စတုတ္ထမျိုးဆက်များဟုပြောလျှင် ရမည်ထင်ပါသည်။

အပိုင်း(၂)

ဘိုးသက်ရှည်၏ ခရီးကို နောက်ကြောင်းပြန်ကြည့်ပြီး ဖြည့်စွက်တင်ပြမှ ဤပါတီကြီး၏ တိုက်ပွဲဝင်ဖြတ်သန်းမှုကို ပြည်သူများ- ရဲဘော်များ- စာဖတ်သူများ တန်ဖိုးဖြတ်နိုင်ကြပါလိမ့်မည်။

၈၅ နှစ်ကြာခရီးသည် လေတဖြူးဖြူးနှင့် သက်သက်သာသာ ရွက်လွှင့်နေသည့်ခရီးမဟုတ်။

– တောင်ဆင်းတောင်တက် အနိမ့်အမြင့် အကွေ့အကောက်များသည့် မီးရထားခရီးနှင့်နှိုင်းပါမှ ပိုမို နီးစပ်နိုင်ပါမည်။

– လက်နက်ကိုင်တော်လှန်ရေးဆင်နွှဲပြီးမှ အောင်ပွဲခံနိုင်သည့် ညီနောင်ပါတီများကဲ့သို့ပင် လက်ဝဲစွန်းလက်ယာစွန်း ပွတ်တိုက်မှုများ လမ်းစဉ်တိုက်ပွဲများအပြင် ပုန်ကန်မှုများ၊ ခွဲထွက်မှုများ ကြုံခဲ့ရသည်။ တရွတ်ဆွဲ ဖြတ်ကျော်ခဲ့ရသည်။

ပါတီဗဟိုသည် တခါတရံ လမ်းစဉ်မှားများ ချခဲ့မိပြီး ကိုယ်လည်ပင်းကိုယ် ကြိုးကွင်းစွပ်မိသလို မျိုးလည်း ရှိခဲ့သည်။ သို့သော် အရင်းခံမူဖြစ်သည့်“ ပါတီကို ယုံကြည်ရမယ်၊ ပြည်သူကို ယုံကြည်ရမယ်”ဆိုသည့် တရား ၂ ပါးကိုဆုပ်ကိုင်ပြီး ဆက်လက်ချီတက်နိုင်ခဲ့သည်။

၆၀ ခုနှစ်များတွင် ပဲခူးရိုးမ၌ ဥက္ကဋ္ဌ သခင်သန်းထွန်းက “ပါတီတည်ဆောက်ရေးသည် သော့ချက်”ဟူသည့်ဆောင်ပုဒ်ကို တင်ပြခဲ့သည်။ ယခုလည်း ရဲဘော်တို့၏လေ့လာရေးဆွေးနွေးပွဲတွင် အချိန်ပေးပြီး ပါတီတည်ဆောက်ရေးခေါင်းစည်းနှင့် ဆွေးနွေးနေကြပြန်လေပြီ။

တဆက်တည်းပြောလိုသည်မှာ ဗမာပြည်ကွန်မြူနစ်ပါတီဆိုတာ မိုးပေါ်ကကျလာသည့်ပါတီမဟုတ်၊ (၁) လူတန်းစားတိုက်ပွဲဆင်နွှဲရင်းက စနစ်တကျဖွဲ့စည်းလာသည့်ပါတီ(၂) ဖွဲ့စည်းအုပ်ချုပ်ပုံစည်းမျဉ်းစည်းကမ်းများနှင့် ဖွဲ့စည်းထားသည့်ပါတီ၊(၃) ယနေ့ကာလတွင် မာ့က်စ်ဝါဒ၊ လီနင်ဝါဒ မော်စီတုန်းအတွေးအခေါ်ကို လမ်းညွှန်သဘောတရားအဖြစ်ကိုင်စွဲကာ ဗမာပြည်လက်တွေ့နှင့် ပေါင်းစပ်ချီတက်နေသည့် ပါတီ။ (၄) နိုင်ငံနှင့် ပြည်သူအပေါ် တာဝန်ကျေခဲ့သောပါတီ ဤနေရာတွင် မည်သို့မည်ပုံ တာဝန်ကျေခဲ့သည်ကို ရှင်းပြဖို့လိုလာပါသည်။

(က) ဗြိတိသျှ ကိုလိုနီခေတ်တွင် အလုပ်သမား လယ်သမား မြို့နေဆင်းရဲနှင့် အမျိုးသားအရင်းရှင်- လူတန်းစားလေးရပ်အတွက် ရပ်ခံတိုက်ပွဲဝင်ခဲ့သောပါတီ။

(ခ) ဖက်ဆစ်ဂျပန်ခေတ်၌ ပြည်သူကို စည်းရုံးလှုံ့ဆော်ပြီး လက်တွေ့တိုက်ပွဲခွင်တွင် ခေါင်းဆောင်ကာ အောင်ပွဲရယူပေးနိုင်သောပါတီ

(ဂ) စစ်ပြီးခေတ်တွင် နယ်ချဲ့အလိုတော်ရိနယ်ချဲ့နှင့် အပေးအယူလုပ်လိုသောအဖွဲ့အစည်း လူပုဂ္ဂိုလ်များနှင့် ဖဆပလ လက်ယာဂိုဏ်းကိုဆန့်ကျင်တိုက်ပွဲဝင်ပြီး လွတ်လပ်ရေးရယူရာတွင် အရေးပါသောကဏ္ဍမှ ထင်ထင်ရှားရှားပါဝင်ခဲ့သော ပါတီ။

(ဃ) နယ်ချဲ့အလိုကျ ပြည်တွင်းစစ်ဖန်တီးလာသော ဖဆ/ဆိုရှယ်လစ်များကို အညံ့မခံ ၊ လက်နက်နှင့်ဖိနှိပ်လာသည်ကို ရရာလက်နက်နှင့် ပြန်လည်တိုက်ပွဲဝင်ခဲ့သောပါတီ၊ မျက်မှောက်တွင်လည်း စစ်သုံးစစ်ကို ကိုယ်စားပြပြီး လက်နက်နှင့်ဖိနှိပ်နေသည့်ရန်သူကို လက်နက်နှင့်ပြန်လည်တိုက်ပွဲဝင်နေဆဲပါတီ….ဤလိုမျိုးပါတီအဖြစ် သမိုင်းမှတ်တမ်းတင်ခဲ့ပြီးသော ပါတီဖြစ်သည်။

အထက်ဖော်ပြပါ ကြန်အင်လက္ခဏာများကြောင့် ဖိနှိပ်အုပ်စိုးသူအဆက်ဆက်က ဗမာပြည်ကွန်မြူနစ်ပါတီကို ဦးတည်ရန်သူအဖြစ် ကာလရှည်ကြာစွာ သတ်မှတ်ထားခဲ့ခြင်းဖြစ်သည်။

ထို့ကြောင့် ယနေ့အချိန်တွင် ဘိုးသက်ရှည်ပါတီကြီး၏ ၈၅ နှစ်မြောက် အထိမ်းအမှတ်ပွဲကို ပြည်သူနှင့်အတူ ကျွန်ုပ်တို့မျိုးဆက်များက ဂုဏ်ယူဝင့်ကြွားစွာဆင်နွှဲနေနိုင်ခြင်း ဖြစ်ပါသည်။ သို့သော် သတိပြုသင့်သည်မှာ ဤ ၈၅ နှစ်ခရီးသည် သမိုင်းသဘောအရ အချိန်တိုလေးမျှသာ ဖြစ်သည်။ ရှေ့ဆက်ရမည့်ခရီးစဉ် ကျန်ပါသေးသည်။ ကျွန်ုပ်တို့အနေနှင့် တတိုင်းပြည်လုံးလွတ်မြောက်ဖို့ တိုက်ပွဲဝင်ရပါဦးမည်။ ၎င်းအပြင် ငြိမ်းချမ်း၊ သာယာ၊ စည်ပင်ဝပြောသော နိုင်ငံတော်သစ်ကြီး တည်ဆောက်ရဦးမည့်တာဝန်ကြီးများ ရှိနေသေးသည်ကိုလည်း သတိချပ်ကြစေလိုသည်။

အပိုင်း(၃)

တဖက်ကို ကြည့်ကြဦးစို့။

စစ်ပြီးခေတ်သမိုင်းတလျှောက်လုံးတွင် ကပ်ပါး မွှားကောင်အဖြစ်ပါလာသော စစ်အုပ်စု(သို့မဟုတ်) စစ်ဓနရှင်လူတန်းစားတရပ်သည် ဖောက်ပြန်ရေးအင်အားစုများ၏ ကျောထောက်နောက်ခံဖြင့် အားပြည့်အင်ရွဲ ဗမာပြည်နိုင်ငံရေးဇာတ်ခုံပေါ်သို့တက်ကာ နေရာယူလာခဲ့သည်။ အစွယ်ပေါက်စ ဗိုလ်နေဝင်းအစပြုသော စစ်အုပ်စုက ၁၉၆၂ ခုတွင် ဗြောင်ကြေညာကာ အာဏာသိမ်းယူချိန်ကစပြီးတွက်ပါက ယနေ့ဆိုလျှင် ၆၂ နှစ် ရှိခဲ့ပါပြီ။ ဤအနှစ် ၆၀ ကျော်အတွင်း အာဏာလောဘနှင့် ဆရာမွေး တပည့်မွေးပြီး တယောက်ကိုတယောက်ဖြုတ်ချကာ မသတီစရာ စစ်အာဏာရှင်များ တယောက်ပြီးတယောက်ပေါ်ထွက်လာခဲ့သည်။

လက်တဆုပ်စာ စစ်အုပ်စုဝင်မိသားစုများနှင့် အပေါင်းအပါခရိုနီတစုက တိုင်းပြည်၏ ဓနဥစ္စာများကို လက်ဝါးကြီးအုပ်အပိုင်စီးကာ ချမ်းသာကြွယ်ဝနေပြီး ကျန်တတိုင်းပြည်လုံးမှာမူ ဆင်းရဲတွင်းနက်သထက်နက်နေရပြီ ဖြစ်သည်။

ယနေ့ မင်းအောင်လှိုင်ခေတ်ရောက်လာတော့ တချိန်တည်း သူပဲ ယာယီသမ္မတ၊ သူပဲ ဝန်ကြီးချုပ်၊ သူပဲ စစ်ဦးစီးချုပ် ၊ သူပဲစစ်ကောင်စီဥက္ကဋ္ဌ ရာထူးတွေယူဝံ့သည့်အထိ မျက်နှာပြောင်တိုက်လာခဲ့ချေပြီ။“ ယိုသူမရှက်- မြင်သူရှက်” ဖြစ်ရပ်ပါပေ။

စစ်အုပ်စုတွင်းမှာလည်း တယောက်ထက်တယောက် ပိုအရှက်နည်းလာ ၊ ပိုပြောင်ပြောင်တင်းတင်းတင်း ပြည်သူကို သတ်ရဲဖြတ်ရဲလာတာတွေ တွေ့လာရသည်။

မင်းအောင်လှိုင်ကိုယ်တိုင်က “ဘာမဆိုလုပ်ရဲတယ်လို့ ကြွေးကြော်ထားသည်နှင့်အညီပဲ ပြည်သူကို ရန်သူလို့ ကြေညာရဲကာ” … လူမျိုးစုများအပါအဝင် ပြည်သူတွေကို စစ်လေယာဉ်များနှင့် အခေါက်ခေါက်အခါခါ ဗုံးကြဲရဲ စက်သေနတ်နှင့် ပစ်သတ်ရဲတာ၊ လက်နက်ကြီးများဖြင့် နေ့မအိပ် ညမအိပ် အဆက်မပြတ်ပစ်ခတ်သတ်ဖြတ်ရဲတာ ၊ စစ်လမ်းကြောင်းကျရာရွာတွေကို ရွာလုံးကျွတ် မီးဝင်ရှို့ရဲတာတွေက အိပ်မက်မဟုတ်၊ နေ့စဉ်ရက်ဆက် မြင်တွေ့နေရသည့် ကိစ္စတွေပဲ မဟုတ်လား။

မိမိတို့က ၈၅ နှစ်ခရီးကို သမိုင်းသဘောအရ အချိန်တိုလေးလို့ ပြောထားခဲ့ပြီ။ အခု ရန်သူစစ်အုပ်စုဘက် ပြန်ကြည့်တော့ သူတို့အချင်းချင်း အာဏာရွှေထီး လုဆောင်းနေကြပုံကိုဖြင့် “ခွေးရူးကောင်းစား တမွန်းတည့်”အဖြစ်ပဲ ကြည့်မြင်ထားဖို့ လိုပါမည်။

စစ်အုပ်စုဝင်များအတွက် မက်ဆေ့ချ် တခုတော့ ပေးလိုသည်။ တယောက်ခေါင်းပေါ် တယောက်နင်းပြီး တက်လာသည့်အထဲမှာဖြင့် မင်းအောင်လှိုင်ကတော့ ယုတ်မာရက်စက်မှုအပေါင်းတွင် သရဖူဆောင်းသွားခဲ့လေပြီ။ ရိုကျိုးစွာ သင်တို့နာခံနေရပေမည်တကား။ – ဟူ၍…………

ထပ်ဆိုပါမည်။ သင်တို့က ဤမျှယုတ်မာရက်စက်သော မင်းအောင်လှိုင်၏ ခြေဖဝါးအောက်၌ ရိုကျိုးစွာ ဆက်လက်ပြီး နာခံသွားကြတော့မည်လား။ ကျွန်ဇာတ်ကို ဆက်ခင်းသွားကြမည်လား။

ပြည်သူများကတော့ ဒီစစ်အာဏာရှင်များနဲ့လမ်းခွဲဖို့ ယတိပြတ်ဆုံးဖြတ်ပြီးကြပါပြီ။

စစ်အာဏာရှင်စနစ် အမြစ်ဖြတ်ကြစို့။

ကြီးမြတ်သော ဗမာပြည်ကွန်မြူနစ်ပါတီ အဓွန့်ရှည်ရမည်။

စာတည်းအဖွဲ့

၅-၈- ၂၀၂၄