ကွန်မြူနစ်တို့ရဲ့ ကြီးမြတ်ဂုဏ်ပြောင်တဲ့သမိုင်းကို လက်ဆင့်ကမ်းကြစို့
နိုင်ငံတကာသတင်းတွေမှာ နော်မန်ဒီကမ်းတက်တိုက်ပွဲ (ဒီ-ဒေး) အနှစ် ၈၀ ပြည့် အထိမ်းအမှတ်သတင်းတွေ ဖော်ပြတာ တွေ့ရပါတယ်။ အနောက်အုပ်စုခေါင်းဆောင်များက ရုရှား-ယူကရိန်းစစ်ပွဲကိုအကြောင်းပြပြီး ဒုတိယကမ္ဘာစစ်အတွင်းက ကြီးမြတ်ဂုဏ်ပြောင်တဲ့ ဆိုဗီယက်ယူနီယံရဲ့အခန်းကို တညီတညွတ်တည်း ချန်လှပ်ဖုံးကွယ်ထားကြတယ်။ သမိုင်းကို ပုံဖျက်ပြောဆိုတာ ဖုံးကွယ်တာတွေလုပ်လို့ရနိုင်ပေမယ့် ဖြစ်တည်ပြီးခဲ့တဲ့အရှိတရားကိုတော့ ပြန်ပြင်ချင်လို့မရပါဘူး။
ဆိုဗီယက်တပ်နီတော်သာ အသက်သွေးချွေး အမြောက်အမြားပေးဆပ်ပြီးမတိုက်ခဲ့ရင် နော်မန်ဒီက အနောက်အုပ်စု စစ်သင်္ချိုင်းဟာ အခုထက် ပိုကြီးမယ့်အပြင် ရှုံးပွဲကြီးအဖြစ် သမိုင်းတွင်ကျန်ရစ်ခဲ့မှာပါ။ စတာလင်က အရှေ့နဲ့အနောက် စစ်မျက်နှာနှစ်ခုဖွင့်ပြီး ဂျာမနီကိုညှပ်တိုက်ဖို့ အကြိမ်ကြိမ်ပြောခဲ့ပေမယ့် အနောက်အုပ်စုမဟာမိတ်တွေ ကမ်းတက်တိုက်ပွဲ တိုက်ကြတော့ အတော်နောက်ကျပါတယ်။ သူတို့ မတိုက်လည်း ရုရှားတနိုင်ငံတည်းက နာဇီဂျာမနီကို အနိုင်ယူဖို့ လက်တကမ်း ရောက်နေတဲ့အခြေအနေပါ။ ဂျာမနီ စစ်ရှုံးဖို့သေချာသလောက်ရှိချိန်မှာ နှမ်းဖြူးတာက တချက်၊ ကွန်မြူနစ်လှိုင်း တားဆီးရေးကတချက် ဒီနှစ်ချက်နဲ့ ဝင်တိုက်တာပါ။
ဒီ-ဒေးတိုက်ပွဲမှာ မဟာမိတ်တပ်တွေ ကျဆုံးမှုကြီးမားပေမယ့် ဥရောပမှာ နာဇီဂျာမနီကို အပြုတ်တိုက်နိုင်ခဲ့တာ ဆိုဗီယက် ကွန်မြူနစ်တပ်မတော်ကြောင့်ပဲ။ တပ်နီတော် ကွန်မြူနစ်ရဲဘော် ၁၁ သန်းခန့် အသက်ပေးလှူခဲ့ရတယ်။ ရုရှားအရပ်သား သေကြေထိခိုက်မှုတွေပါပေါင်းလိုက်ရင် ရုရှားပြည်သူ ၂၆ သန်းခန့် ကြွေပြုန်းခဲ့ရတာပါ။ “ကမ္ဘာကြီးကို ဟစ်တလာ လက်ထဲကနေ ကယ်ခဲ့တာ ဆိုဗီယက်ယူနီယံဆိုတာ မမေ့ကြနဲ့” ဆိုတဲ့ ဆောင်းပါးတပုဒ်ကို လွန်ခဲ့တဲ့ နှစ်အနည်းငယ်က ဝါရှင်တန်ပို့စ် သတင်းစာမှာတောင် ဖော်ပြထားပါတယ်။ သူတို့ မငြင်းဝံ့ပါဘူး။
ဒီသမိုင်းဟာ ဖုံးကွယ်ဖျောက်ဖျက်လို့မရတဲ့ သမိုင်းပါ။ ဆိုဗီယက်ယူနီယံ၊ အမေရိကန်၊ ဗြိတိန် သုံးနိုင်ငံ “မဟာမိတ်အဖွဲ့ကြီး” ရဲ့ ကျဆုံးစစ်သည် ၉၅ ရာခိုင်နှုန်းဟာ ဆိုဗီယက် တပ်နီတော်က ဖြစ်ပါတယ်။ အမေရိကန်နဲ့ ဗြိတိန်ရဲ့ ကျဆုံးစစ်သည်က ၄ သိန်းစီလောက်ပဲ ရှိတယ်။ အရပ်သား သေကြေထိခိုက်မှုကတော့ ထောင်ဂဏန်းပဲရှိတယ်။ အာရှစစ်မြေပြင်မှာ တရုတ်ပြည်က စစ်သည် ၄ သန်းခန့် အသက်ပေးခဲ့ရတယ်။ တရုတ်ပြည်မှာ အရပ်သားနဲ့ စစ်သားစုစုပေါင်း သေကြေထိခိုက်မှု သန်း ၂၀ ခန့်ရှိတယ်။ နိဂုံးချုပ်လိုက်ရင် ဒုတိယကမ္ဘာစစ်မှာ ဖက်ဆစ်နာဇီကို စွန့်လွတ်ပေးဆပ်မှုအကြီးမားဆုံးနဲ့ ဆန့်ကျင် တိုက်ပွဲဝင်သွားတာ ရုရှားနဲ့တရုတ်ကွန်မြူနစ်တွေပဲ ဖြစ်ပါတယ်။
ကမ္ဘာစစ်ကြီးအတွင်းမှာ အနိုင်နိုင်ငံက ကွန်မြူနစ်များနဲ့ တိုးတက်တဲ့အင်အားစုများရဲ့ခေါင်းဆောင်မှုအောက်မှာ အဖိနှိပ်ခံ ပြည်သူများက ဖက်ဆစ်တွေကို အပြင်းအထန်ဆန့်ကျင်တိုက်ခိုက်ခဲ့ကြပါတယ်။ ကမ္ဘာစစ်ကြီးပြီးတော့လည်း ကမ္ဘာ့ငြိမ်းချမ်းရေးနဲ့ (ဗီယက်နမ်စစ် ဆန့်ကျင်ရေးလို) နယ်ချဲ့စစ် ဆန့်ကျင်ရေးလှုပ်ရှားမှုတွေမှာ အနိုင်နိုင်ငံက ကွန်မြူနစ်များက ရှေ့တန်းက ဦးဆောင်ပြီး အဖိနှိပ်ခံပြည်သူတွေက တက်တက်ကြွကြွနဲ့ ပါဝင်လှုပ်ရှားခဲ့ကြပါတယ်။ အခု အခါမှာလည်း အမေရိကန် နဲ့ နေတိုး တို့က ဦးဆောင် ရန်စထိုးဆွနေတဲ့ စစ်ရှိန်မြှင့်မှုတွေကို အမေရိကန်နဲ့ဥရောပအပါအဝင် ကမ္ဘာအဖိနှိပ်ခံပြည်သူများက ဆန့်ကျင်နေကြပါတယ်။ သူတို့ထက် စစ်ကို ဘယ်သူမုန်းဦးမလဲ၊ ဘယ်သူ နားကြည်းဦးမလဲ။ သူတို့ထက် ငြိမ်းချမ်းရေးလိုလားသူ ဘယ်သူ ရှိဦးမလဲ။ ဒါပေမဲ့ တောမီးလောင်မှ တောကြောင်လက်ခမောင်းခတ်လို့ရတာမို့ နယ်ချဲ့သမားနဲ့အပေါင်းပါတွေက စစ်အေးရော၊ စစ်ပူရော မနားတမ်းတိုက်နေတာ ယနေ့ထိတိုင်ပဲ။
ဒုတိယကမ္ဘာစစ်ရဲ့ နှုတ်ခမ်းဝမှာတည်ထောင်ခဲ့တဲ့ ဗမာပြည်ကွန်မြူနစ်ပါတီလည်း လာမယ့် သြဂုတ်လမှာ ၈၅ နှစ် ပြည့်ပါတော့မယ်။ နိုင်ငံတကာ အဖိနှိပ်ခံပြည်သူများဆင်နွှဲခဲ့တဲ့ ဖက်ဆစ်ဆန့်ကျင်ရေး၊ နယ်ချဲ့ဆန့်ကျင်ရေး၊ အမျိုးသား လွတ်လပ်ရေးတိုက်ပွဲတွေမှာ နိုင်ငံတကာ့ ကွန်မြူနစ်ရဲဘော်များနဲ့အတူ ဗမာ့ကွန်မြူနစ်များလည်း ပေးဆပ်စွန့်လွတ်မှုများစွာနဲ့ သူရဲကောင်းပီသစွာ တိုက်ပွဲဝင်ခဲ့ကြတယ်။ အဖိနှိပ်ခံပြည်သူများ အကျိုးအတွက် အထောင်အသောင်းသော အာဇာနည် ရဲဘော်များရဲ့ အဲသလို စွန့်လွှတ်စွန့်စားမှုတွေကြောင့် ပါတီအလံတော်ကို အနှစ် ၈၀ ကျော် မြင့်မြင့်မားမား လွှင့်ထူလာနိုင်ခဲ့တာ ဖြစ်တယ်။ အဆုံးသတ်မှာတော့ စစ်ဖြစ်ပေါ်မှုဆိုင်ရာ အရင်းခံအကြောင်းအချက်ဖြစ်တဲ့ နယ်ချဲ့စနစ်ရော၊ နယ်ချဲ့စနစ်ရဲ့ လူမှု အခြေခံဖြစ်တဲ့အရင်းရှင်စနစ်ပါကျဆုံးရမှာဖြစ်ပြီး ကွန်မြူနစ်ဝါဒက အောင်ပွဲခံမှာဖြစ်ပါတယ်။ ဒါကြောင့် ကွန်မြူနစ်များဟာ ကမ္ဘာ့အရင်းရှင်စနစ်ကျဆုံးရေးတည်းဟူသော အဆုံးသတ်ဦးတည်ချက်ကို အာရုံပြု တိုက်ပွဲဝင်သွားကြမည့်သူများ ဖြစ်ကြပါတယ်။
ကမ္ဘာ့ကွန်မြူနစ်များရဲ့ ကြီးမြတ်ကာ ဂုဏ်ပြောင်တဲ့သမိုင်းနဲ့အတူ ဗမာ့ကွန်မြူနစ်များရဲ့သမိုင်းဟာလည်း ထာဝရ ထွန်းပြောင်နေမှာပါ။ ဖက်ဆစ်နာဇီကို အလဲထိုး အပြုတ်တိုက်နိုင်တာကွန်မြူနစ်တွေဆိုတဲ့ သမိုင်းအမွေကို ဗမာပြည်ကွန်မြူနစ်ပါတီနဲ့အတူ ပါတီရဲဘော်များက အလေးအမြတ် လက်ဆင့်ကမ်းပြီး သမိုင်းမော်ကွန်းထိုးကြဦးမှာသာ ဖြစ်ပါတယ်။