နိုင်ငံရေးအခြေအနေ ဘာဖြစ်နေသလဲ

By | October 31, 2016

နိုင်ငံရေးအခြေအနေ ဘာဖြစ်နေသလဲ

(၁)

သြဇာနဲ့အာဏာ

ပြည်တွင်းပြည်ပ နှစ်နေရာလုံးမှာ ဒေါ်အောင်ဆန်းကြည် သြဇာရှိတယ်ဆိုတာ ဘယ်သူမှ မငြင်းကြပါ။ ရွေးကောက်ပွဲကလည်း နိုင်ထားပြီးဆိုတော့ နိုင်ငံတကာစံနှုန်းနဲ့ဆိုရင် သူအာဏာရပြီ….ပေါ့၊ ဒါပေမဲ့ ဗမာပြည်မှာ ဒါမျိုး ဖြစ်မလာခဲ့ဘူး။

သြဇာရှိလို့ အာဏာ ရှိတာလား၊ အာဏာရှိလို့ သြဇာရှိတာလား၊ ဗမာပြည် စစ်အုပ်စုကတော့ အာဏာရှိခဲ့လို့ သြဇာရှိခဲ့ကြတာ အထင်အရှားပဲ။ ဒေါ်အောင်ဆန်းစုကြည် အဖို့တော့ သြဇာရှိတာနဲ့ အာဏာရှိတာ တခြားစီဖြစ်နေတယ်၊ သူကိုယ်တိုင် သူ့ပါတီ NLD မှာ သြဇာလည်းရှိတယ်၊ အာဏာ လည်း ရှိတယ်၊ ဒါပေမဲ့ တိုင်းပြည် နိုင်ငံရေးမှာကျတော့ သြဇာက အာဏာကို လက်ညှိုး မညွှန်နိုင်ဘူး၊ ၂၀၀၈ ခြေဥက ဒါကို ခွင့်မပြုဘူး။

ဒါကို ဆုပ်မိကိုင်မိ ရှိကြတဲ့ ပြည်ပ နိုင်ငံတွေက (နိုင်ငံချင်းဆက်ဆံရေးမှာ) သတိထား ဆက်ဆံလာကြတာ တွေ့ရတယ်၊ ကာချုပ်ကို သမ္မတ၊ နိုင်ငံခြားရေးဝန်ကြီးတို့နဲ့ထပ်တူ ဦးတိုက်ခံစာရင်းထဲ ထည့်ထားကြရတယ်။ ကာချုပ်ကလည်း ၂၀၀၈ ခြေဥထဲက အနှစ်အသားဖြစ်တဲ့ တို့တာဝန် အရေးသုံးပါး၊ မြန်မာ့နိုင်ငံရေးမှာ တပ်မတော်ရဲ့ ဦးဆောင်မှု အခန်းအပြင် တပ်မတော်ရဲ့ မူ ၆ ချက်ဆိုတာတွေကို အလျဉ်းသင့်သလို ပြောလွှတ်တတ် တယ်။ သူတို့ကလည်း အစိုးရနဲ့ စစ်တပ်ကို အတွဲလိုက် လိုချင်နေကြတာဆိုတော့ အိနြေ္ဒရရ နားထောင်ပေးခဲ့ကြတယ်။

အာဏာဟာ ပြည်သူ့ဆီက ဆင်းလာတာ မဟုတ်။ ၂၀၀၈ ခြေဥက စီးဆင်းလာတာ ဖြစ်လို့ ဒီပြဿနာဟာ သောင်မတင်ရေမကျ ဖြစ်မြဲဖြစ်နေပါတယ်။
(၂)

လွှတ်တော်နဲ့ အစိုးရ

လွှတ်တော်ပိုင်းမှာ ကိုယ်စားလှယ်တချို့ ဥပဒေအသစ်ပြဋ္ဌာန်းတာ၊ ဥပဒေဟောင်း အချို့ ပယ်ဖျက်တာ။ ပြင်တာ ဖြည့်စွက်တာတွေ အားသွန်ခွန်စိုက် လုပ်ကြပါတယ်။ အကျိုးရှိတန်သလောက်လည်း ရှိပါတယ်၊ ဒါပေမဲ့ မလုံလောက်ပါဘူး။ ဆင့်ပါးစပ် နှမ်းပက်ပဲ။ အခြေအနေကြည့်ရတာက လွှတ်တော် လမ်းကြောင်းပေါ်က အာဏာကို တိုးချဲ့ယူလို့ရတယ်လို့ တရားသေသတ်မှတ်ထားပုံပဲ။ စန္ဒဂုတ် စစ်တိုက်ထုံး ပုံပြုပြီး ၂၀၀၈ ခြေဥကို မုန့်ပျားသလက် စားသလို အဖျားအနားသားက လှည့်ပတ်ဝါးနေလို့ကတော့ စစ်အာဏာရှင်စနစ်က ဒူးနှန့်နေပါလိမ့်မယ်။

ကြာရင် ရ’ထားပါတယ်ဆိုတဲ့ ပရုပ်လုံး လေသလပ်တာနဲ့ လုံးပါးပါးတော့မှာပါ။

အစိုးရယန္တရားမှာလည်း ဘာမှ လုပ်မရတဲ့ အခြေအနေပဲ။ NLD ပြောရေးဆိုခွင့်ရှိသူကိုယ်တိုင်က အမြဲတမ်း အတွင်းဝန်တွေ တရွတ်ဆွဲ ကန့်လန့် တိုက်နေတာကို နတ်သံနှောပြောထွက်လာတယ်။ ဖြုတ်လည်း မပစ်ရဲဘူး။ အများစုက စစ်ဗိုလ်လူထွက်တွေဖြစ်လို့ ဓာတ်လိုက်ခံရမှာ စိုးရိမ်ပုံ ရတယ်။

ဒါ့အပြင် အချိန်မရွေးနဲ့ အချိန်ကိုက် ပေါက်ကွဲလာနိုင်တဲ့ ဗုံးတွေက အစီအရီ ရှိနေသေးတယ်။ မြစ်ဆုံကိစ္စ၊ အနောက်ခြမ်းမှာ ရိုဟင်ဂျာ/ ဘင်္ဂါလီ/ အကြမ်းဖက်ဆိုတဲ့ အရေး။ တောင်၊ အရှေ့၊ မြောက်ခြမ်းက တိုက်ပွဲတွေ စိပ်လာတဲ့ အရေး၊ NCA လက်မှတ်ထိုးကြရေးနဲ့ ဒုတိယအကြိမ် ၂၁ ရာစု ပင်လုံညီလာခံကိစ္စတွေ တန်းစီနေပါတယ်၊ ဒါတွေဟာ စစ်တပ်ဘက်က သူတို့ဖြစ်စေချင်သလို ဖွထားလိုက်တဲ့ပြဿနာတွေပဲ။ NLD က ဖြေရှင်း နိုင်ရင် ဖြေရှင်းပေတော့ပဲ၊ မဖြေရှင်းနိုင်ရင်တော့ တပ်မတော်ကပဲ တိုင်းပြည်ကို ငြိမ်အောင် ထိန်းပြပါလိမ့်မယ်။ စစ်အုပ်ချုပ်ရေး နယ်မြေတွေ၊ ပုဒ်မ ၁၄၄ ထုတ်ပြန်တာတွေ များသထက် များလာမှာပါ၊ ခု ဝ-မိုင်းလားကိစ္စ ရာဇသံပေးပြီး အကဲစမ်းထားတာ ရှိတယ်၊ စောစောပိုင်းကတည်းက ‘ဘော့စနီး ယားလို ဖြစ်သွားမယ်’၊ ‘ဘော်လကန်လို ဖြစ်သွားမယ်’ဆိုတဲ့ ခြောက်လုံးလှန့်လုံးတွေလည်း မမေ့ဖို့လိုတယ်။

အခုလည်း အစိုးရ နာမည်ခံထားတဲ့ သမ္မတနဲ့ နိုင်ငံခြားရေးဝန်ကြီးတို့က ခြေတိုအောင် နိုင်ငံတကာထွက် ချေးငှားတောင်းရမ်း လက်ခံ နေကြချိန်မှာ သူတို့က အိမ်မှာနေရင်း ဖြုန်းမလောက် စစ်ကို တိုက်နေကြတယ်၊ ရလာသမျှ ဘဏ္ဍာငွေကြေးနဲ့ အထောက်အပံ့မှန်သမျှဟာ စစ် တပ်ထိုင်ဖြုန်းနေတာနဲ့တင် သဲထဲရေသွန်ဖြစ်နေပါပြီ။
(၃)

တနိုင်ငံလုံး အပစ်ရပ်ရေးကိစ္စ

ဒေါ်အောင်ဆန်းစုကြည် ခုနောက်ပိုင်း ပြောတဲ့စကားတွေအပေါ် တိုင်းရင်းသားတွေ အာရုံစိုက်နေကြတယ်။ လက်တွေ့ကျ မကျကြည့်ကြတယ်။ စစ်တပ်အပေါ် သူဘယ်လောက် တာဝန်ခံနိုင်မလဲ သိချင်ကြတယ်။ စစ်တပ်ဟာ ဒေါ်အောင်ဆန်းစုကြည် သဘောထားနဲ့ ဆန့်ကျင်ပြီး တိုက်ပွဲတွေ တိုးချဲ့နေတာလို့ ထင်သူက အများစုဖြစ်တယ်။ စစ်တပ်ကိုတော့ မယုံကြဘူး။ စစ်အုပ်စုဟောင်း/ သစ်တွေနဲ့ ခရိုနီတွေအပေါ် ချမှတ်ထားတဲ့ ဆိုင်ရှင် တွေ ရုပ်သိမ်းပြီးပြီးချင်း ပြည်ထဲရေးဝန်ကြီးက လက်လွှတ်ထားပြီးသား အုပ်ချုပ်ရေးအာဏာတွေ ပြန်တောင်းယူတဲ့ကိစ္စ ကြည့်တာနဲ့ ဗလောင်းဗလဲစစ်တပ်ဆိုတာ ရှင်းနေပြီပဲ။

တကယ်က စစ်တပ်နဲ့ အစိုးရရဲ့ အကျိုးစီးပွားဟာ တခါတရံ တထပ်တည်းကျတယ်။ တခါတရံ ဖြောင့်ဖြောင့်ကြီး ဆန့်ကျင်နေတတ်တယ်။ ဒီအခါ စစ်တပ်အလိုကျ လိုက်လုပ်ပေးရတာတွေ ရှိခဲ့တယ်။ ဒေါ်အောင်ဆန်းစုကြည်က အရာရာကို အေးအေးချမ်းချမ်း ဖြစ်စေချင်တဲ့သဘောထား ဖော်ပြတယ်။ စစ်တပ်က မလိုက်နာဘူး။ ပြဿနာရဲ့ ဆုံချက်က အဲဒီမှာ ရှိတယ်။ ဘာလုပ်နိုင်သလဲ။ ဘာမှ လုပ် မပြနိုင်ဘူး။

ပြောချင်တာက-

နိုင်ငံအနေနဲ့ တလုံးတစည်းတည်း ဆက်လက်တည်ရှိရေးမှာ ခုလို သွားနေလို့ကတော့ အလုပ်မဖြစ်ဘူး။ စစ်တပ်က နောက်ဆုတ်ချင်ဆုတ်- NLD က ရှေ့တိုးချင်တိုး၊ ဒါပဲရှိတော့တယ်။

လက်ရှိအနေအထားကြီးကိုဖြင့် စစ်တပ်ကလွဲပြီး ဘယ်သူမှ မကြိုက်ပါကြောင်း တင်ပြလိုက်ပါတယ်။
စာတည်းအဖွဲ့
(၂၈၊ ၁၀၊ ၂၀၁၆)

Leave a Reply

Your email address will not be published. Required fields are marked *