သွေးစုပ်ကောင်တွေ မောင်းထုတ်ကြ

သွေးစုပ်ကောင်တွေ မောင်းထုတ်ကြ

ရဲဘော် ထွန်းလှ

ဦး(ဗိုလ်)သိန်းစိန် အစိုးရလက်ထက်ကစလို့ပဲ ဒေါ်အောင်ဆန်းစုကြည် တယောက် ပြည်တွင်း
ပြည်ပ ခရီးတွေ မကြာခဏ သွားပါတယ်။ အာရှ၊ ဥရောပ၊ အမေရိက ကမ္ဘာအနှံ့ခြေဆန့်ပါ
တယ်။ အခုလို အသက်အရွယ်နဲ့မလိုက် ကျန်းမာရေး အထိခိုက်ခံပြီး အားကြိုးမာန်တက် လုပ်ကိုင်သွားလာနေတာ ကရုဏာသက်စရာပါ။ အိုပေမယ့် စွမ်းသလောက် လုပ်ကိုင်ရှာတယ်။ သူကျန်းမာသန်စွမ်းတုန်း သူလုပ်နိုင်သရွေ့လုပ်သွားမယ်လို့ ပိုင်းဖြတ်ထားပုံရပါတယ်။ ဒါပေ မဲ့ သူလုပ်နေတာတွေက ဘယ်သူတွေအတွက် ဖြစ်နေလဲ။ သူ့ကြိုးစားအားထုတ်မှုတွေကနေ ဘယ်သူတွေ ဘယ်လောက် အမြတ်ရနေသလဲ။ သူ့ကြိုးစား အားထုတ်မှုတွေ အပေါ်မှာ ဘယ်သူတွေ ဘယ်လို သွေးစုပ် အမြတ်ထုတ်နေကြပါသလဲ။

“လူထုအတွက် အနစ်နာခံဖို့လိုရင် အနစ်နာခံမယ်”လို့သူဆိုခဲ့တဲ့အတိုင်း လုပ်ကိုင်နေပုံ ရပါ
တယ်။ သို့ပေမဲ့ အခုအချိန်ထိတော့ သူ့အနစ်နာခံမှုတွေ၊ သူ့အားထုတ်မှုတွေရဲ့အသီးအပွင့် တွေကို လူထုက မရရှိမခံစားနိုင်သေးပါဘူး။ နောင်အခါမှာလည်း ရရှိခံစားနိုင်မယ့် အလားအ လာသိပ်မရှိပါဘူး။ နိုင်ငံရေး၊ စီးပွားရေး ဘက်ပေါင်းစုံမှာ လက်ဝါးကြီးအုပ် ချုပ်ကိုင်ထားတဲ့ စစ်အုပ် စု တည်မြဲနေသရွေ့၊ သူတို့အချိန်ယူပြင်ဆင် ဖန်တီးခဲ့တဲ့ ၂၀၀၈ အခြေခံဥပဒေနဲ့ ခုတ်မောင်းတဲ့ စစ်ဗျူရိုကရေစီယန္တရား လည်ပတ်နေသရွေ့ဖိနှိပ်သွေးစုပ်မှုတွေကိုသာ လူထုက ခါးစည်းခံ နေရမှာပါ၊ တိုင်းပြည်လည်း ချွတ်ခြုံကျနေဦးမှာပဲ ဖြစ်ပါတယ်။

စစ်တပ်ရဲ့အာဏာလက်ဝါးကြီးအုပ်မှုကို မတိုက်ဖျက်နိုင်ဘဲ စီးပွားရေး၊ လူမှုရေး တရားမျှတမှု တွေ ဖော်ဆောင်ပေးနိုင်မှာ မဟုတ်ပါဘူး။ ဖိနှိပ်အုပ်စိုးတဲ့ ယန္တရားဟောင်းကို အလုံးစုံ ဖြိုချ ဖျက်ဆီးမှု မပြုဘဲ ပိုကောင်းအောင် ပြုပြင်မွမ်းမံမယ်ဆိုတာ စိတ်ကူးယဉ်တာပါ။ ပြုပြင်ပြောင်း လဲရေး နဖူးစည်းအောက်မှာ စစ်ဗျူရိုကရေစီ ယန္တရားဟောင်းက ပိုမိုခိုင်မာလာတာပဲ ရှိပါလိမ့် မယ်။ လက်ရှိအခြေအနေနဲ့ အခင်းအကျင်းကို စစ်အုပ်စုဝင်တွေနဲ့သူတို့အပေါင်းအပါ ခရိုနီ ဓနရှင်ကြီးတွေ အင်မတန် သဘောကျပါတယ်။ အခြေမပျက် အနေမပျက်တဲ့အပြင် အာဏာ၊ ဥစ္စာနဲ့အခွင့်ထူးတွေ၊ အခွင့်အလမ်းတွေ တိုးပွားသထက် တိုးပွားလာနေတာကြောင့် ပျော်မ ဆုံး မော်မဆုံး ဖြစ်နေကြတာပါ။

ဖင်တကြွကြွ ဟန်တပြင်ပြင်နဲ့ရှေ့ဆက်ရလာမယ့် အကျိုးအမြတ်တွေကိုလည်း သွားရည်တ မြားမြား ဖြစ်နေကြတယ်။ လက်ရှိဒီအခြေအနေ ပျက်ဆီးသွားမှာ၊ ဆုံးရှုံးသွားမှာကို သူတို့သိပ် ကြောက်ပါတယ်။ ဒါကြောင့်လည်း အစွယ်တဖွေးဖွေးနဲ့စားမာန်ခုတ်ကြ မာန်ဖီကြတယ်။ ဟို ရမ်းသည်ရမ်း ရမ်းကြတယ်။ ဒေါ်အောင်ဆန်းစုကြည်ကို အမျိုးမျိုးအဖုံဖုံ ချီးကျူးဂုဏ်ပြုကြ တယ်။ ဒါပေမဲ့ သူတို့က လူခွဲပြီး ကစားတာပါ။ ဆဲဆိုအပုပ်ချ၊ အပြစ် ရှာ၊ အမှား စောင့်ဖမ်းပြီး ဘယ်အချိန် ကန်ထုတ်ရမလဲ ဆိုတာကိုလည်း ချောင်းနေတာပါ။

တယောက်တလှည့် ပင့်လိုက် မြှောက်လိုက် သွားဖြဲပြလိုက်နဲ့ချော့ခိုင်းတဲ့အခါခိုင်း၊ တဖက် လှည့်နဲ့ဆဲလိုက်ဆိုလိုက်၊ ခြိမ်းခြောက်လိုက်နဲ့ခိုင်းလို့ခိုင်း လုပ်နေတာပါ။ တကယ်တော့ သူ တို့ဘယ် လောက်ပဲ အကျိုးအမြတ်ထွက်ထွက် မကျေနပ်ဘူး၊ အကောင်းမမြင်ပါဘူး။ ရန်သူ လို့ပဲ မြင်တယ်၊ ရန်ငြိုးဖွဲ့ကလဲ့စားချေသလို သဘောထားတယ်။ ကနေ့စစ်အုပ်စုရဲ့လုပ်ရပ်က ခိုင်း လည်းစားသေး၊ ခေါင်းပုံလည်းဖြတ်သေး၊ ဆဲဆိုရိုက်ပုတ်လည်း လုပ်သေးတဲ့ လူရမ်းကား တွေရဲ့လုပ်ရပ်နဲ့အလားတူပါတယ်။

လူထုခေါင်းဆောင်ကို ငွေကြေးတောင့်တင်းပြီး မကောင်းမှု ဒုစရိုက်မျိုးစုံလုပ်တဲ့၊ သတ်ရဲ ဖြတ်
ရဲ ဘာမဆိုလုပ်ရဲတဲ့ ကမ္ဘာ့လူမိုက် လမ်းသရဲတွေဆီ လှည့်လည်ဖြားယောင်းခိုင်းတဲ့ အလုပ်ကို လုပ်စေတယ်။ သူတို့နှစ်ပေါင်းများစွာ လုပ်လာတဲ့ ဖောက်ပြန်တဲ နိုင်ငံရေး လုပ်ငန်းထဲကို ဆွဲသွင်း လိုက်တာလို့ပဲ အားနာနာနဲ့ရှင်းရှင်းပဲ ပြောပါ့မယ်။ အားနာတာက သူတို့ကို အလုပ်အကျွေး ပြုသလို ဖြစ်နေရှာတဲ့ လူထု ခေါင်းဆောင်ကိုပါ။ နိုင်ငံရေး အမြတ်ထုတ်ပြီး ကိုယ်ကျိုးစီးပွားအတွက် သွေးစုပ်နေတဲ့ သူတို့ ကိုတော့ အားနာစရာ ဘာအကြောင်းမှ မရှိပါ။

လက်ရှိအခြေအနေဟာ တိုင်းပြည်နဲ့လူထုအတွက်တော့ အခြေအနေကောင်း မဟုတ်ပါဘူး။ ကောင်းမွန်တဲ့ အနာဂတ်ကို ဦးတည်နေတာလည်း မဟုတ်ပါဘူး။ စစ်တိုက်စားပြီး ကြီးပွား
ချမ်းသာလာတဲ့ စစ်အာဏာရှင် အဟောင်းအသစ်တွေက ဘယ်တုန်းကမှ စစ်မှန်တဲ့ ငြိမ်းချမ်း ရေးကို လိုလားခဲ့တာ မဟုတ်ပါဘူး။ မျက်ဖြူဆိုက်လေ ဆရာကြိုက်လေပါ။ ပြည်တွင်းစစ်ကို ရှည်သထက်ရှည်အောင် ဆွဲဆန့်မယ်၊ တိုင်းပြည်အနံှ့မှာလည်း လူထု ကျီးလန့်စာစား ဖြစ်နေ
အောင် နည်းမျိုးစုံသုံးပြီး ပြဿနာ ပဋိပက္ခမျိုးစုံကို ဖန်တီးမယ်။ အခုလို အတိုက်အခံပါတီက အာဏာတချို့တဝက် ရယူထားချိန်မှာ ပိုလို့တောင် ကသောင်းကနင်းဖြစ်အောင် လုပ်ပါလိမ့်
ဦးမယ်။

တကယ်တော့ ဒေါ်အောင်ဆန်းစုကြည်ကို ဗန်းပြ၊ ‘အမျိုးသား ပြန်လည်သင့်မြတ်ရေး’ ကို ခုတုံး လုပ်ပြီး ကိုယ်ကျိုးစီးပွားအတွက် ရင်ကြားစေ့ချင်သူတွေ၊ သွေးစုပ် အမြတ်ထုတ်လိုသူတွေမှာ ပြည်တွင်းက စစ်ဗိုလ်ချုပ် အဟောင်းအသစ်တွေ၊ သူတို့ရောင်းရင်း ခရိုနီတွေ၊ သူတို့သားသ မီး၊ မြေးမြစ်တွေ၊ မကပါဘူး။ နိုင်ငံခြားသားအရင်းရှင်၊ ဓနရှင်ကြီးတွေ၊ ကမ္ဘာ့လူမိုက်ဗိုလ် လုပ်နေတဲ့ အနောက်အုပ်စု ဂိုဏ်းဆရာကြီးတွေ နဲ့သူတို့လက်ဝေခံ နိုင်ငံရေးလုပ်စားနေတဲ့ ကြေးစား တွေလည်း ပါပါတယ်။

ပြည်တွင်းပြည်ပ အချောင်သမားပေါင်းစုံရဲ့နိုင်ငံရေး လုပ်ငန်းကြီး အင်အား ကောင်း ကြီးထွားလာနေတဲ့ အချိန်လို့ဆိုရမှာပါ။ ဒီလုပ်ငန်းကြီး ပိုမိုကြီးထွား ခိုင်မာလာအောင် နည်းမျိုးစုံသုံးကြတယ်။ လူတော်လူကောင်းတွေ၊ လူမှန်တွေကို နည်းမျိုးစုံသုံးပြီး မြူဆွယ်ဖြား ယောင်းတယ်၊ ဖျက်ဆီးတယ်။ ရပ်တည်ချက် ခိုင်မာသူတွေကို ဘက်ပေါင်းစုံကနေ ထိုးနှက် တိုက်ခိုက်တယ်။ အနောက်အုပ်စုနဲ့စစ်အုပ်စုက သူတို့ရဲ့ ဘုံရန်သူဖြစ်နေတဲ့၊ သူတို့သွေးစုပ် အမြတ်ထုတ်မယ့် လမ်းခရီးမှာ အတားအဆီး၊ အနှောင့်အယှက် ဖြစ်နေတဲ့ လူပုဂ္ဂိုလ်တွေ၊ အဖွဲ အစည်းတွေကို ပူးပေါင်း ထိုးစစ်ဆင်တယ်။

လူမှန်တွေ၊ လူကောင်းတွေ နည်းလာမှ လူမှားတွေ၊ လူဆိုးတွေ နေရာရမယ် မဟုတ်ပါလား။ အခုအခါမှာ လူထုအများစုကြီးရဲ့ဘဝက ကျီးလန့်စာစားနဲ့ငိုရခက် ရယ်ရခက် ဖြစ်နေတယ်။ အရင်က အုပ်စိုးသူကို ကြောက်လို့ငုံ့ခံရ၊ အခုတော့ ချစ်လို့ငုံ့ခံရမလို ဖြစ်နေတယ်။ သည်းခံ တယ်ဆိုတာ အတိုင်းအတာတခု အထိသာ ဖြစ်ပါတယ်။ သည်းမခံနိုင်တဲ့ အဆုံးမှာ ဘာတွေ ဖြစ်လာမလဲ။ ဖြစ်သမျှ ပြဿနာတွေကိုလည်း လူထုအခွင့်အရေးကို ဦးတည်တဲ့၊ လူ့အဖွဲ့အ စည်း တခုလုံး တရားမျှတရေးကို ဦးတည်တဲ့ ဖြေရှင်းမှု မပြုနိုင်ဘဲ ‘လူ့အခွင့်အရေး’ ဆိုတဲ့ တသီးပုဂ္ဂလ အခြေပြု ဖြေရှင်းဖို့သာ အားသန်တာ တွေ့ရတယ်။ တစတစ အားကောင်းလာ နေတဲ့ စစ်ဗျူရိုကရက် အရင်းရှင်းလူတန်းစား စိုမိုးအုပ်ချုပ်မှု လွှမ်းမိုးနေတဲ့ လူ့အဖွဲ့အစည်းမှာ စစ်ဗျူရိုကရက် အရင်းရှင်လူတန်းစား အလိုကျ တရားမျှတမှုပဲ ရမှာပါ။ ဒီအုပ်စိုးသူ အလိုကျ တန်းတူမှုပဲ ရမှာပါ။

နိုင်ငံရေး အာဏာမညီမျှမှု၊ ဓနအင်အား မညီမျှမှုတွေနဲ့တိုင်းပြည်မှာ ငြိမ်းချမ်းရေး၊ ဒီမိုကရေစီ
ရေး၊ တန်းတူရေးတွေ ဘယ်နည်းနဲ့မှ မထွန်းကားနိုင်ပါ။ မတရားမှုမျိုးစုံ တင်းကျမ်းပြည့်နေဦး မှာပဲ ဖြစ်ပါတယ်။ အာဏာပိုင်ရှင်အစစ်တွေက ထင်တိုင်းကြဲနေဦးမယ့်အပြင် ဆထက်ထမ်းပိုး တိုးပြီး သွေးစုပ်ခြယ်လှယ်ကြဦးမယ်၊ အမြတ်ထုတ်ကြပါဦးမယ်။ ဗျူရိုကရက် လက်ဝေခံ အရင်းရှင်တွေနဲ့ နိုင်ငံခြား သား ဓနရှင်ကြီးတွေပေါင်းပြီး တိုင်းပြည်မှာ ကုန်းကောက်စရာ ဘာတခုမှ မကျန်တဲ့အထိ သွေး စုပ်ကြပါလိမ့်ဦးမယ်။ နိုင်ငံရေး၊ စီးပွားရေး ဘက်ပေါင်းစုံမှာ လက်ဝါးကြီးအုပ် ချုပ်ကိုင်ထားသူ တွေကို မောင်းထုတ်ရပါလိမ့်မယ်။ ၂၀၀၈ အုတ်မြစ်ကို မြေလှန်ဖြိုဖျက်ပြီး စစ်ဗျူရိုကရေစီ ယန္တရားကို ရိုက်ချိုးရပါလိမ့်မယ်။ လူထုအားနဲ့ ဖြိုဖျက်ရမှာပါ။ အုတ်မြစ်ချ တည်ဆောက်ခဲ့သူ တွေကို စည်းရုံးပြီး သူတို့ကိုယ်တိုင် ဖျက်သိမ်းတာကို စောင့်မယ်ဆိုရင်တော့ ‘ဒီဘဝအတွက်တော့ နှမလက်လျှော့ နေလေတော့’ လို့သာ။

သွေးစုပ်ကောင်တွေကို လူထုအားနဲ့မောင်းထုတ်ကြပါစို့။

၃ အောက်တိုဘာ ၂၀၁၆။