ကာချုပ်နဲ့စစ်တပ်မျက်နှာကို ကြည့်နေရသော အစိုးရနဲ့လွှတ်တော်

By | October 23, 2016

ကာချုပ်နဲ့စစ်တပ်မျက်နှာကို ကြည့်နေရသော အစိုးရနဲ့လွှတ်တော်
(မင်းဝေ)

အရေးတော်ပုံဂျာနယ်၊ အတွဲ(၂) အမှတ် ၇

“ ရာနှုန်းပြည့်သာ အနိုင်ရအောင်မဲပေးပါ၊ ကျန်တာ ကျွန်မတို့ ကြည့်လုပ်ပါ့မယ်” ဆိုတဲ့ ဒီချုပ်အစိုးရ ကြည့်လုပ်နေရတဲ့ပုံပါပဲ။

လတ်တလော ပေါ်ပေါက်ဖြစ်ပွားလာနေတဲ့ အခြေအနေတွေရဲ့ဖိအားမျိုးစုံက ဒီချုပ်အစိုးရအဖို့ (ကာလုံ) အစည်းအဝေး မဟုတ်သော်လည်း ကာလုံကိစ္စတွေကို အဆုံးအဖြတ်ပေးကြတဲ့ အထူးအစည်းအဝေးခေါ်ကြရတဲ့ အနေအထားကို ဆိုက်ရောက်သွားစေပါတယ်။

အစည်းအဝေးအစီအစဉ်ကို ကြည့်ပြန်တော့လည်း စစ်တပ်နဲ့သက်ဆိုင်တာတွေချည်းအဓိက ဖြစ်နေတယ်။

ကြည့်ရတာ “အမျိုးသားကာကွယ်ရေးနှင့်လုံခြုံရေးဆိုင်ရာကိစ္စရပ်များနှင့်စပ်လျဉ်းသည့်အထူးအစည်းအဝေး”ဆိုတဲ့ ဒီအစီအမံကို ဒီချုပ် အစိုးရဘက်က အရေးပေါ် ထွင်လိုက်ရတာပဲလို့ယူဆပါတယ်။

ဒါဟာ လက်တွေ့အားဖြင့် ၁၁ ဦးပါ(ကာလုံ)ကို ရှောင်လွှဲလိုက်တဲ့ သဘောလို့ မြင်တယ်။ (ကာလုံ) အစည်းအဝေးသာခေါ်ရင် ဒီချုပ် အစိုးရရဲ့အဆုံးအဖြတ်အခန်းက အားနည်းလှတယ်မဟုတ်လား။ ၁၁ ဦး(ကာလုံ)မှာ သမ္မတ၊ လွှတ်တော်ဥက္ကဋ္ဌနှစ်ဦးနဲ့ နိုင်ငံခြားရေးဝန်ကြီးပဲ ဒီချုပ်အစိုးရဘက်က ပီပီပြင်ပြင် ရပ်တည်မယ့်သူရှိတာ မဟုတ်လား။

အကယ်၍ ၁၁ ဦးပါ (ကာလုံ) အစည်းအဝေးသာခေါ်လိုက်ရင် အစည်းအဝေးရလဒ်ဖြစ်တဲ့ “ သမ္မတရုံးသတင်းထုတ်ပြန်ချက် (၁/၂၀၁၆)” ထဲက ဝေါဟာရတွေ၊ အသုံးအနှုန်းတွေ၊ လေသံတွေက အခုလိုမဟုတ်ဘဲ၊ တမျိုးတမည်ပြောင်းလဲသွားနိုင်တယ်လေ။

စစ်တပ်ဘက်က“အကြမ်းဖက်တိုက်ခိုက်မှု”ကို မီးကုန်ယမ်းကုန်လုပ်ချင်ပုံရတယ်။ ဒါမျိုးတွေကို ဒီချုပ်အစိုးရက ပါးချပ်တပ်ပေး ရတာလား၊ အမြီးဆွဲရတာလား တစ်ခုခုပဲ။ ဒါတွေကို ညှိပြီးမှ ဒီသတင်းထုတ်ပြန်ချက် ထွက်လာတာပါ။ ဒီလိုညှိကြရတယ်ဆိုတာကို အစိုးရပြောခွင့်ရက ဖုံးကွယ်မထားပါဘူး။ “အစိုးရနဲ့ တပ်မတော် ကြေကြေလည် ဖြစ်အောင် ဆွေးနွေးပြီးမှ ထွက်လာတာ” လို့ဆိုပါတယ်။

ကြံ့ဖွံ့ပါတီဥက္ကဋ္ဌသစ် (ဗိုလ်) ဦးသန်းေဋ္ဌးရဲ့သဘောထား၊ အရေးအသားနဲ့ သုံးနှုန်းထားတဲ့စကားလုံးတွေကိုပဲ သာဓက ဆောင်ပါရစေ။

– “ပဒေသရာဇ်ခေတ်ပြည်ထောင်စုတပ်မတော်က ရာမူးပန်းဝါဒေသထိ အောင်မြေချဲ့ကာ ကုလားဖြူကုလားနက်တို့၏ခန့်ညား လေးစားမှုရ ယူခဲ့သည် ”— တဲ့။

– “မြန်မာအင်္ဂလိပ်တတိယစစ်ပွဲကာလ၊ ကျူးးကျော်သူကို ခုခံချေမှုန်းရန် စနစ်တကျ စုဖွဲ့စစ်ပြင်နေသည့် မြန်မာ့တပ်မတော် ရှေ့တန်း တပ်မှူးတပ်သားများထံ ရွှေနန်းတော်က အမိန့်စာတစ်စောင် ရောက်ရှိခဲ့သည်၊ ‘အင်္ဂလိပ်တပ်များကို ခုခံတိုက်ခိုက်ခြင်း မပြုရ ၊ ခုခံသူကို သူပုန်ဟုသတ်မှတ်မည်’ နယ်ချဲ့ပရိယာယ်စစ်ပရိယာယ်များကို နားမလည်သော နိုင်ငံရေးသမား၏ မိုက်မဲ မှားယွင်းသော အဆုံးအဖြတ်နှင့်ညွှန်ကြားမှုက တစ်မျိုးသားလုံးကို အလွယ်တကူ ကျွန်ဖြစ်စေခဲ့သည်” တဲ့။

ဗိုလ်သန်းေဋ္ဌး ဒီသဘောထားနဲ့ အသုံးအနှုန်းတွေက ဗိုလ်သန်းေဋ္ဌး တစ်ဦးချင်းရဲ့ သဘောထားသာမကဘူး၊ စစ်အုပ်စုဝင် အားလုံးရဲ့ သဘောထားကိုပါ တိုက်ရိုက်ထင်ဟပ်ပြနေတာဖြစ်ပါတယ်။ ဒါဟာ စစ်အုပ်စုရဲ့ အခြေခံသဘောထားပါပဲ။ ကြံ့ဖွံ့ပါတီဟာ ဒီသဘောထားကို ကိုင်စွဲပြီး လှုပ်ရှားနေမှာလည်း သေချာပါတယ်။

ကြံ့ဖွံ့ပါတီသာ အာဏာရထားချိန်ဆိုရင် ကြံ့ဖွံ့ပါတီဥက္ကဋ္ဌရဲ့ဒီသဘောထားတွေဟာ ကြံ့ဖွံ့အစိုးရသဘောထားနဲ့ လက်တွေ့ ကျင့်သုံးမယ့် ပေါ်လစီတွေ ဖြစ်လာမှာ သေချာပါတယ်။ ဒီသဘောထားနဲ့ ပေါ်လစီတွေကို စစ်တပ်ဘက်ကလည်း နှစ်ကိုယ့်တစ်စိတ် ပစ် ထောက်ခံမှာဖြစ်ပါတယ်။

ရွေးကောက်ပွဲရှုံးနိမ့်ထားရတဲ့အနေအထားမို့သာ ဆိုရှယ်မီဒီယာပေါ်ကနေ အခုလိုမဖြစ်ညစ်ကျယ် ရေးသားနေတာပါ။ စစ်အုပ်စု ချင်းဆိုတော့ ဘယ်စကားလုံး သုံးရမယ်ဆိုတာ သိတယ်။ သူရေးတာထဲမှာ ဖုံးကွယ်မထားနိုင်တဲ့အချက်တစ်ခုကတော့ နိုင်ငံရေးသမားတွေကို မုန်းတီးတဲ့ အာဃာတကို ဖုံးကွယ်မထားဘူးဆိုတဲ့အချက်ပါပဲ။
ဗိုလ်သန်းေဋ္ဌးတို့ အာဃတထားတဲ့ နိုင်ငံရေးသမားဆိုတာတွေထဲမှာတော့ “ဂျီဟတ်စစ်ပွဲ”လို့ သဘောထားထုတ်ပြန်ချက်ထဲ ထည့်ရေးတဲ့ နိုင်ငံရေးပါတီနဲ့ နိုင်ငံရေးသမားတွေတော့ မပါဘူးထင်ပါတယ်။ ဒီပါတီက ကြံ့ဖွံပါတီနဲ့ ညီနောင်မဟာမိတ်တွေမဟုတ်လား။

သမ္မတရုံးသတင်းထုတ်ပြန်ချက်မှာ အချက် ၁၂ ချက်ပါသော်လည်း တိတိကျကျ ကိန်းဂဏန်းနဲ့ဖော်ပြတာဆိုလို့ သေကျေ ဒဏ်ရာစာရင်း၊ လက်နက်ဆုံးရှုံးစာရင်း၊ ဖမ်းမိသူ၊ သိမ်းဆည်းရတဲ့ လုပ်သေနတ်ပစ္စတို (သုံးမရ) တစ်လက်ဆိုတာမျိုးတွေလောက်သာ ပါရှိတာပါ။ ကျန်တာတွေ ကတော့ ဝေဝေဝါးဝါးပဲ။

အရှေ့ အလယ်ပိုင်း နိုင်ငံအချို့ရှိ အစွန်းရောက်ပုဂ္ဂိုလ်များ၏ ငွေကြေးထောက်ပံ့မှုအလုံးအရင်း ယူခဲ့တယ်လို့ ဆိုသော်လည်း ဘယ်နိုင်ငံ၊ ဘယ်သူလို့ တိတိကျကျမဖော်ပြပါဘူး။ ငွေကြေးထောက်ပံ့မှု ဆိုတာမှာလည်း လူတဦးဆက်သွယ်မှုဖြင့် လျို့ဝှက် ဆောင်ရွက် ခဲ့တယ်လို့ လုံးထားပြန်တယ်။ သိမ်းဆည်းရမိတဲ့လက်နက်တွေဆိုလို့ ကြည့်ပြန်တော့လည်း ဓားတွေပဲ တွေ့ရပါတယ်။

အရှေ့အလယ်ပိုင်းနိုင်ငံတချို့ကနေ ငွေကြေးထောက်ပံ့မှု အလုံးအရင်းနဲ့ယူထားတယ် ဆိုတဲ့ “(RSO) အကြမ်းဖက်အဖွဲ့နဲ့ ဆက်နွယ်သော အကာလ်မူလ် မူဂျာဟီဒင်န် (Aqa Mul Mujahidin ) အဖွဲ့” ဟာ ဒီလို ဓားလွတ်တွေပဲ ကိုင်နိုင်သလား လို့မေးခွန်း ထုတ်စရာနဲ့ ရယ်ပွဲ ဖွဲ့စရာဖြစ်လို့ နေပါတယ်။

ဓားလွတ်ကိုင်ပြီး စခန်းဝင်စီး၊ လူသတ်၊ သေနတ်သိမ်းသွားတယ်ဆိုတဲ့ အဖြစ်ကလည်း ဗိုလ်သန်းေဋ္ဌး၊ ဗိုလ်ခင်ရီ၊ တက္ကသိုလ်မြတ်သူ တု့ိရဲ့ ရာမူးပန်းဝါဇာတိမာန်ကို အိုးမဲသုတ်ခံရတာမို့ အလွန်ကိုပဲ မချိမခံသာဖြစ်ကြမှာပါ။

ဒီချုပ်အစိုးရနဲ့စစ်တပ် အကြားမှာ အမြင်မတူတာတွေ၊ ပွတ်တိုက်မှုတွေက ပြဿနာတိုင်း၊ ဖြစ်ရပ်တိုင်းမှာ ရှောင်လွှဲမရနိုင်ဘဲ ထိပ်တိုက်ကို ကြုံနေရတာပါ။ ဆက်ပြီးတော့လည်း ကြုံနေကြရဦးမှာပါ။

ဒီချုပ်အစိုးရဘက်က “သင့်မြတ်ရေး/သဟဇာတဖြစ်ရေးမူ” ဆိုတာနဲ့ လျှော့လျှော့ ပေါ့ပေါ့လုပ်ပြီး ကိုင်တွယ်နေတာကိုလည်း သတိပြု မိပါတယ်။ လွှတ်တော်ထဲမှာလည်း အလားတူပါပဲ။ “ တပ်မတော်သားတွေ ပါဝင်နေမှုကြောင့် လွှတ်တော်လုပ်ငန်းတွေ အခက်အခဲမရှိပါဘူး” ဆိုတဲ့ လွှတ်တော်ဥက္ကဋ္ဌကြီး ဦးဝင်းမြင့်ရဲ့လေပြေထိုးသံကိုလားကြားလိုက်ကြရမှာပါ။

အစိုးရနဲ့လွှတ်တော်ဟာ “ ကာချုပ်နဲ့ စစ်တပ်” ရဲ့ မျက်နှာကို ကြည့်ပြီးလုပ်နေရတယ်ဆိုတာကလည်း စည်းကမ်းပြည့်ဝသော ဒီမို ကရေစီ စည်းဝိုင်းထဲမှာ လွှဲရှောင်လို့မရတဲ့ ပကတိအခြေအနေတစ်ရပ်ပဲ မဟုတ်ပါလား။

Leave a Reply

Your email address will not be published. Required fields are marked *