“မျိုးစောင့်ဥပဒေ” သို့မဟုတ် မရိုးနိုင်သောလှည့်စားနည်းတစ်ခု (၂၀၁၄ ခုနှစ်၊ မတ်လ ၄ ရက်)

By | March 4, 2014

အုပ်စိုးသူများသည် ဘာသာရေး၊ လူမျိုးရေး အဓိကရုဏ်းတွေ ဖန်တီးပြီး လူမျိုးပေါင်းစုံပြည်သူများအကြား သွေးခွဲရန်တိုက်ပေးသည့် လုပ်ငန်းတွေ လုပ်ကြံဖန်တီးရန် အံခွနေသူတွေ၊ သွေးအေးလက်ယဉ်သူတွေ၊ လက်မရွံ့သူတွေ၊ လက်မြန်သူတွေ ဖြစ်သည်။ နိုင်ငံရေး၊ စီးပွားရေး၊ လူမှုရေး၊ ပညာရေး၊ ကျန်းမာရေးစသဖြင့် ဘက်ပေါင်းစုံခေတ်နောက်ကျ ချွတ်ခြုံကျနေသော အချက်ကလည်း အုပ်စိုးသူများအတွက် အခါကောင်း၊ အခွင့်ကောင်းတစ်ခုသဖွယ် ဖြစ်နေပါသည်။

ယင်းတို့အနက် ဘာသာရေးနဲ့လူမျိုးရေး သွေးခွဲရန်တိုက်လှည့်စားခြင်းသည် ဖောက်ပြန်သော အုပ်စိုးသူများအတွက် မရိုးနိုင်သော လက်သုံးနည်းလမ်းတစ်ခုလည်း ဖြစ်သည်။

ယခုအခါ “မျိုးစောင့်ဥပဒေ” သည် သမ္မတ (ဗိုလ်)ဦးသိန်းစိန် ကိုယ်တိုင် လွှတ်တော်တင်ပေးသည့် အဆင့်ထိ ပုံပေါ်လာခဲ့ပြီ။ ဗိုလ်ရွှေမန်းလွှတ်တော်နဲ့ ဗိုလ်သိန်းစိန်ကြံ့ဖွံ့အစိုးရ၊ ဥပဒေပြုရေးနှင့်အုပ်ချုပ်ရေး အပြန်အလှန်ဘောလီဘောပုတ်နေကြပြီလည်း ဖြစ်သည်။

“မျိုးစောင့်ဥပဒေ” ယခုလို လွှတ်တော်ထဲရောက်လာနိုင်ရန် (ဗိုလ်) ဦးသိန်းစိန်တို့ ကြံ့ဖွံ့အစိုးရနဲ့ ကြံ့ဖွံ့ပါတီဟာ ရခိုင်ပြည်နယ်၊ ရမ်းဗြဲမြို့နယ်၊ သပြေချောင်းကျေးရွာက ရာဇဝတ်မှုတစ်ခုကို အရင်းပြုပြီး သံတွဲ ၊ တောင်ကုတ်၊ မိတ္တီလာ၊ ဥက္ကံ၊ လားရှိုး၊ ထန်းကုန်းကျေးရွာတို့မှ အပြစ်မဲ့ပြည်သူတွေရဲ့ သွေးတွေ၊ အသက်တွေ၊ နေအိမ်အဆောက်အအုံများကို သတ်ဖြတ်၊ မီးတိုက်၊ ရက်ရက်စက်စက်စတေးပြီး ပုံဖော်ခဲ့ကြခြင်း ဖြစ်သည်။

“၂၀၀၈အခြေခံဥပဒေ” အတည်ပြုနိုင်ရေးနှင့် “၂၀၁၀ နိုဝင်ဘာ ၇ ရက်အထွေထွေ ရွေးကောက်ပွဲ” တွင် ကြံ့ဖွံ့ပါတီ အနိုင်ရရေးအတွက် ရိုဟင်ဂျာများကို မဲပေးခွင့်ပြုပြီး အသုံးချခဲ့သည့်နည်းတူ ယခုလည်း “မျိုးစောင့်ဥပဒေ” ဆိုသည့်ကိစ္စတွင် အစ္စလာမ်ဘာသာဝင်၊ မူဆလင်များ၏ အသက်အိုးအိမ်စည်းစိမ်များကို စတေးနေခြင်းဖြစ်သည်။

ကွန်မြူနစ်ဆန့်ကျင်ရေးနှင့် သူ့ပါတီမဲရရေးအတွက် တစ်နပ်စားစဉ်းစားနည်းဖြင့် “နိုင်ငံတော်ဘာသာ” ဆိုသည့် လုပ်ရပ်ကို ဦးနု စိတ်ကူးယဉ်ခဲ့ဖူးသည်။ ရလဒ်မှာ (KIO/KIA) လှုပ်ရှားမှုသာပေါ်ပေါက်လာခဲ့ပြီး၊ နောက်ဆုံး၌ ဦးနုအာဏာလက်လွတ်ခဲ့ရသည်။ ဦးနု၏ ဤသို့အမြင်တို မိုက်မဲသည့် လုပ်ရပ်ဟောင်းကို (ဗိုလ်) ဦးသိန်းစိန်ကြံ့ဖွံ့အစိုးရက “မျိုးစောင့်ဥပဒေ”အမည်ဖြင့် အစွံထုတ်လာခြင်း ဖြစ်သည်။ “ဘာသာရေး” ကို ဒီမိုကရေစီဆန့်ကျင်ရေးနှင့် ကြံ့ဖွံ့ပါတီမဲရရေးအတွက် ခုတုံးလုပ်အသုံးချခြင်းပင်။ သမ္မတ(ဗိုလ်) ဦးသိန်းစိန်က ဥပဒေအဖြစ် မည်သို့ ပြဋ္ဌာန်းနိုင်မည်ကို ဗိုလ်ရွှေမန်းထံပေးသည့် သူ့ သဝဏ်လွှာဆိုသည်ထဲမှာပင် လမ်းပြထားသေးသည်။ ဤအချက်ကပင် ကြံ့ဖွံ့အစိုးရနှင့်အတူ ပေါ်ပေါက်လာသော လူမျိုးရေး၊ ဘာသာရေး၊ အကြမ်းဖက်သတ်ဖြတ်မှုများ၏ နောက်ကွယ်တွင် မည်သူတွေ ကြိုးကိုင်စီမံနေသည်ဆိုသော အချက်ကို အတိအလင်းသက်သေပြသနေပါသည်။

အမျိုးသားနိုင်ငံရေးဦးဆောင်မှု အခန်းဆိုသည်ကို စစ်အုပ်စုက “၂၀၀၈ အခြေခံဥပဒေ” ဖြင့် အကွက်စေ့စေ ဗိုလ်ကျလွှမ်းမိုးချုပ်ကိုင်ထားသည်။ စစ်တပ်ကြီးတစ်ခုလုံးကိုလည်း စစ်အုပ်စုက ကုပ်ခွစီးထားပြီး တစ်လက်ကိုင်တပ်အဖြစ် ချုပ်ကိုင်ထားသည်။ တိုင်းပြည်၏ အဓိကအသက်သွေးကြောစီးပွားရေး လုပ်ငန်းမှန်သမျှကိုလည်း “မြန်မာ့စီးပွားရေးဦးပိုင်လီမီတက်” ဖြင့် စစ်ဗျူရိုကရက်များက လက်ဝါးကြီးအုပ်ချုပ်ကိုင်ထားခဲ့ပြီးပြီ။ ထိုနည်းတူပင် “ဘာသာရေး”တွင်လည်း ဘာသာကြီးဝါဒ (ဝါ) ဘာသာရေးရှော်ဗင်ဝါဒအဖြစ် ဗြောင်အသုံးချလာခြင်း ဖြစ်သည်။

“မြန်မာနိုင်ငံအတွင်း၌ လက်ရှိဖြစ်ပေါ်လျက်ရှိသော ပဋိပက္ခများကို ဖြေရှင်းရာတွင် အဓိကအကြောင်းရင်းဖြစ်သော လူမှုရေးမညီမျှမှုများကို ပြေလည်စေရန် ဥပဒေ ၄ ရပ်မဖြစ်မနေပြဋ္ဌာန်းပေးရမည်” ဟူ၍ (မဘသ) အမျိုးဘာသာသာသနာစောင့်ရှောက်ရေးအဖွဲ့ (ဗဟို) ဥက္ကဋ္ဌ အဂ္ဂမဟာပဏ္ဍိတ နိုင်ငံတော်သြဝါဒါစရိယ ဘဒ္ဒန္တတိလောကဘိဝံသက ဆို၏။

ဤသို့ပြောဆိုချက်မှာ အဖြစ်မှန်ကို တမင်တကာလိမ်ညာဖုံးကွယ်ခြင်းနှင့် လမ်းလွှဲခြင်းသက်သက်မျှသာ ဖြစ်သည်။
ယနေ့ဗမာပြည်၌ ဆေးယဉ်နေသော တီဘီအဆုတ်နာရောဂါကဲ့သို့ ပေါ်ပေါက်ဖြစ်ပွားနေသော လူမှုရေးမညီမျှမှုများ၏ အဓိက လက်သည် တရားခံမှာ (နဝတ-နအဖ) စစ်အစိုးရ၏ အမွေခံကြံ့ဖွံအစိုးရအပါအဝင် ဖောက်ပြန်သောအုပ်စိုးသူ အစိုးရအဆက်ဆက်၏ မှားယွင်းညံ့ဖျင်းသော ပေါ်လစီများ ၊ အကြမ်းဖက်ဖိနှိပ်သွေးစုတ်များ၏တိုက်ရိုက်အကျိုးဆက်ရလဒ်သာဖြစ်သည်။

တိုင်းပြည်နှင့်ပြည်သူလူထုဘဝသည် ချွတ်ခြုံကျမွဲတေဆင်းရဲခဲ့ရပြီး အုပ်စိုးသူအစိုးရအဆက်ဆက်ထိပ်သီးစစ်ဗိုလ်ကြီးများမှာ မူ ကုဋေကြွယ်သူဌေးကြီးများ ဖြစ်လာပါသည်။ တိုင်းပြည်ဘဏ္ဍာဥစ္စာမှန်သမျှ လုယက်သိမ်းပိုက်သွားကြသူများမှာ ဒင်းတို့သာလျှင်ဖြစ် သည်။ ဤအဖြစ်မှန်ကို (မဘသ) ဥက္ကဋ္ဌသည်အဘယ့်ကြောင့် တမင်ဖုံးကွယ်ထားပါသနည်း၊ တမင်ရှောင်လွှဲခဲ့ပါသနည်း။

ထို့အပြင် “မျိုးစောင့်ဥပဒေ” ၏ အခြားရည်ရွယ်ချက်တစ်ခုမှာ ဘာသာခြားကိုးကွယ်သူနိုင်ငံသားများ၏ ဥစ္စာဓနကို ဖျက်ဆီးရန် နှင့်လုယက်ရန် ရည်ရွယ်ခြင်းဖြစ်သည်။

“အစ္စလာမ်ဘာသာဝင်၊ မူဆလင်ဖြစ်လို့ ဟောပြောခွင့်မပြုရ”၊ ခရစ်ယာန်ဘာသာကို “စီပိုး” စသဖြင့် ခွဲခြားနှိမ့်ချ၊ ခြိမ်းခြောက် ရမ်းကား အတင့်ရဲလာနေသည်။

လက်ရှိဖြစ်ပေါ်နေသော လူမျိုးရေး၊ ဘာသာရေးအကြမ်းဖက်ရန်ပြုမှုတွေ ဆက်ပြီး မဖြစ်ပွားစေလိုလျှင် “မျိုးစောင့်ဥပဒေ” ကို “မဖြစ်မနေပြဋ္ဌာန်း”ပေးရမည်ဟုပင် ခြိမ်းခြောက်ပြောဆိုထားသည်။

ယင်းသို့ အခြေခံဒီမိုကရေစီအခွင့်အရေးများကို ဗြောင်ခြိမ်းခြောက်နေသော်လည်း ဒီချုပ်အပါအဝင် အတိုက်အခံဒီမိုကရေစီ ပါတီများသည်“ပြုပြင်ရေးမှိုင်း”မိနေပြီး၊ အကြမ်းဖက်၊အနိုင်ကျင့်ခြိမ်းခြောက်လာမှုမှန်သမျှအပေါ်အလျှော့ပေးချော့မြူရေး ချိန်ဘာလိန်ဝါဒကိုသာ ကျင့်သုံးလျက်ရှိနေပါသည်။ ပြတ်သားသည့် သဘောထား ကြေညာချက်ပင် မထုတ်ဝံ့ပါချေ။

“၂၀၀၈အခြေခံဥပဒေ” တည်မြဲနေသမျှ၊ စစ်အုပ်စုက နိုင်ငံရေး၊ စီးပွားရေးနှင့်စစ်တပ်ကို လက်ဝါးကြီးချုပ် ကိုင်ထားနိုင်သမျှ ကာလပတ်လုံး ဤကဲ့သို့သောနိုင်ငံရေး၊လူမျိုးရေး၊ ဘာသာရေး အစရှိသော အကြမ်းဖက်ဖိနှိပ်မှုများ သည် တစ်ခုမဟုတ် တစ်ခု ဆက် တိုက် ပေါ်ပေါက်နေမည်သာဖြစ်သည်။ “၂၀၀၈ အခြေခံဥပဒေ” ကို ဖျက်သိမ်းပစ်ရမည်။ နိုင်ငံရေး၊ စီးပွားရေးနှင့်စစ်တပ်ကို စစ်အုပ်စုက အခွင့်ထူးခံလွှမ်းမိုးချုပ်ကိုင်ထားမှုကို ပြတ်ပြတ်သားသားဖယ်ရှားပစ်ရမည်။

Leave a Reply

Your email address will not be published. Required fields are marked *