ပူးဝင်နေတဲ့ သရဲ တစ္ဆေ ဆိုတာ
(စိုးထွန်းအောင်)
မယမင်း – အသက် ( ၈ လ ) (သေဆုံး)
မလှနှင်းရွှေ – အသက် (၂) နှစ် (သေဆုံး)
မောင်နေလလင်း (ခ) တစ်တို – အသက် (၃ ) နှစ် (သေဆုံး)
မသင်းသင်းစိုး – အသက် (၄) နှစ်
ဖော်ပြပါ ကလေးငယ် ၄ ယောက်ဟာ ပိန်းကြာဖက်ပေါ်က ရေစင်ရေပေါက်ကလေးတွေလို ပီဘိ ကလေးငယ်လေးများ သာ ဖြစ်ပါတယ်။ အဲဒီကလေး ၄ ယောက်အနက် မယမင်း၊ မလှနှင်းရွှေ၊ မောင်နေလလင်း (ခ) တစ်တိုတို့ကတော့ ကြေကွဲဖွယ် သေဆုံးသွား ခဲ့ကြရရှာပါပြီ။
(၄)နှစ်အရွယ် သမီးလေး သင်းသင်းစိုးတစ်ယောက်ပဲ မသေကောင်းမပျောက်ကောင်း အသက်ရှင်ကျန်ရစ်ခဲ့တာပါ။ အခုချိန်မှာ တော့ သမီးလေး သင်းသင်းစိုးဟာ တွံတေးမြို့နယ်ဆေးကနေတဆင့် ရန်ကုန်ဆေးရုံကြီးသို့ပြောင်းပြီး အတွင်းလူနာအဖြစ် ဆေးကုသခံ နေရပါတယ်။
အပြစ်ကင်းစင်တဲ့၊ ဖြူစင်လှတဲ့ သူတို့လေးတွေအပေါ် ဘယ်လို အငြိုးအတေးကြောင့်များ ဒီလိုကံဆိုးမိုးမှောင်ကျမှုက ဆိုက် ဆိုက်မြိုက်မြိုက်ကြီးကျရောက်လာခဲ့ရတာလဲ။
မုန်တိုင်းဘေး၊ ရေဘေး၊ မီးဘေးအန္တရာယ်ကျရောက်လို့လား၊ မဟုတ်ပါဘူး။ စစ်တပ်က ပစ်လိုက်တဲ့ လက်နက်ကြီး ကျည်ဆန် ကျရောက်ပေါက်ကွဲလို့လား၊ မဟုတ်ပါဘူး။ မြွေကိုက်ခံရတာလား၊ လျှပ်စစ်ဓာတ်လိုက်တာလား၊ မဟုတ်ပါဘူး။ လူမှန်းသူမှန်းမသိ တော့တဲ့ ဖခင်အရက်သမား/ဖခင်ဆေးသမားက အရက်ကြောင်/ဆေးကြောင်ပြီး သတ်ဖြတ်ပစ်လိုက်တာလား၊ ဒါမျိုးလည်း လုံးဝ မဟုတ် ပါဘူး။ ဒါဆို ဘာဖြစ်တာလဲ။
“သရဲတစ္ဆေဝင်ပူးတယ်” ဆိုတဲ့ သွေးဆာနေတဲ့ အစွဲအလမ်းဟောင်းရဲ့သားကောင်တွေအဖြစ် လည်စင်းပေးလိုက်ကြရတဲ့ အဖြစ် ဆိုးနဲ့ တည့်တည့်တိုးခဲ့ကြရတာပါ။
(၄)နှစ်နဲ့ (၈ လ) ဆိုတဲ့ လူမမယ်အအရွယ်လေးတွေကို ခြေထောက်နဲ့ကန်၊ တက်နင်း၊ လက်သီးနဲ့ထိုး၊ ပုဆိန်နဲ့ ထုခဲ့သတဲ့။
ဘယ်လောက်မိုက်မဲပြီးအသိဉာဏ်မွဲတေလှတဲ့လုပ်ရပ်ဖြစ်ပါသလဲ။ အခုတော့အဲဒီ ရက်စက်မိုက်မဲမှုကို ကျူးလွန်ခဲ့တဲ့ ထွန်းနိုင် ဆိုသူကို သက်ဆိုင်ရာက ဖမ်းဆီးထားပါပြီ။
ဒါဟာ ဒီပြစ်မှုကို ကျူးလွန်ခဲ့သူ “ထွန်းနိုင်” တဦးတယောက်ချင်းရဲ့ မိုက်မဲမှု၊ အသိဉာဏ်မရှိမှု သက်သက်ပဲလား။ မဟုတ် ပါဘူး။ တကယ်တော့ ထွန်းနိုင်ကျူးလွန်ခဲ့တဲ့ပြစ်မှုကနေ ကျွန်တော်တို့ ဗမာပြည်လူ့အဖွဲ့အစည်းဟာ အသိဉာဏ်မိုးမှောင်ကျမှု အောက်မှာ ကျ ရောက်နေပြီဖြစ်တယ်ဆိုတာကို အကျယ်လောင်ဆုံး ခေါင်းလောင်းထိုးဖော်ပြလိုက်တာသာဖြစ်ပါတယ်။
ကလေး (၄)ယောက်နဲ့ ထွန်းနိုင်တို့သာ ဒီမိုးမှောင်ကျမှုကြီးထဲ ကျရောက်နေတာမဟုတ်ပါဘူး။ ကလေးတွေရဲ့မိဘ၊ ကလေး မိဘတွေနေထိုင်တဲ့ ကျေးလက်တောရွာကလူတွေ အားလုံးမှာ ဒီမိုးမှောင်ကျမှုကြီး စိုးမိုးကျရောက်နေတာပါ။ ဒါဟာ တွံတေးမြို့ နယ်တစ်ခုတည်းရဲ့သီးခြားလက္ခဏာမဟုတ်ပါဘူး။
တကယ်တော့ ဗမာပြည်အနှံ့အပြား တောင်ပေါ်မြေပြန့် မကျန် ကျရောက်နေတဲ့ ဆင်းရဲမွဲတေမှုနဲ့ အသိပညာမဲ့မှုကနေ ပေါက်ဖွား လာတဲ့ မိုးမှောင်ကျမှုကြီးဖြစ်ပါတယ်။ အခုဖြစ်ရပ်ဟာ ဆင်းရဲမွဲတေမှုနဲ့အသိပညာမဲ့မှုက အဆက်မပြတ်မွေးထုတ်ပေးနေတဲ့ ကြေကွဲဖြစ်ရပ်တွေထဲက အချို့မျှသာဖြစ်ပါတယ်။ ဒီလိုမျိုး တုန်လှုပ်ကြေကွဲဖွယ်ဖြစ်ရပ်တွေ ဗမာပြည်အနှံ့ တောင်ပေါ်မြေပြန့် မတူတဲ့အတိုင်းအတာနဲ့ ဖြစ်ပွားနေတာပါ။ လူအများ သိရှိလိုက်ကြတာနဲ့ လူအများမသိလိုက်ကြတာပဲခြားနားပါတယ်။ (ခုတလောမှာကိုပဲ နဂါးပူးတယ်ဆိုပြီး ဘုရားရင်ပြင်မှာ မြင်မကောင်းရှုမကောင်း လူးလှိမ့်နေတဲ့ မိန်းမကြီးငယ်တွေကို ရေဖျန်းလောင်းပေးနေရတဲ့ ဖြစ်ရပ်တွေကလည်း တချိန်တည်း ထွက်ပေါ်လာနေတာ သတိပြုမိကြလိမ့်မယ် ထင်ပါတယ်။ ဧရာဝတီတိုင်းဒေသကြီး၊ မြောင်းမြမြို့နယ်။ ရှမ်းရေကျော်ကျေးရွာမှာ သူရဲစီးတယ်ဆိုတဲ့ အထက(ခွဲ)မှာ တာဝန်ရှိသူ အာဏာပိုင်တွေ လာရောက်၊ အမိန့်ပြန်တမ်းထုတ်၊ ရဲအဖွဲ့ သေနတ် ၁၈ ချက် ပစ်ဖောက်ပြီး ပရလောကသားတွေကို နှင်ထုတ်တဲ့ သတင်းကလည်း ဆက်တိုက် အကျယ်အပြန့် ပေါ်ထွွက် လာနေတယ်။ ဒါသာမက လောက်ကိုက်မြို့မှာ “သေသော် ငရဲမလား”ဆိုတဲ့ ကျဆုံးစစ်သည်တွေရော၊ ကျန် အရပ်သားတွေပါ မကျွတ်လွတ်သေးတဲ့သဘော ဖော်ပြတဲ့ သတင်းတွေလည်း ထွက်ပေါ်လာပြန်ပါတယ်။ )
“သရဲ၊ တစ္ဆေ” ဆိုတာ တကယ်တော့ မရှိပါဘူး။ ရှိတယ်လို့ ပြောနေတာဟာ ရိုးအပြီး အညှာလွယ်သူတွေထံကနေ လှည့်ဖြား လုယက်ဖို့ အကြံအစည်ရှိနေသူတွေ၊ လက်တွေ့လုပ်ကိုင်တွေသူတွေရဲ့ ဖြီးလုံးဖြန်းလုံး၊ ခြောက်လုံးလှန့်လုံးတွေသာဖြစ်ပါတယ်။
အုပ်စိုးသူအစိုးရအဆက်ဆက်၊ စစ်အုပ်စုနဲ့ချမ်းသာကြွယ်ဝသူတွေမှာ ကိုယ်ပိုင်ဆရာဝန်/မိသားစုဆရာဝန်သာ မရှိချင်နေမယ်။ ကိုယ်ပိုင်ဗေဒင်ဆရာ၊ ယတြာဆရာ၊ နတ်ဆရာ၊ ဂိုဏ်းဆရာတော့ကိုယ်စီရှိကြတာချည်းပါပဲ။ ဒါတော့ အာဏာရမ္မက်ကြီးနဲ့ အစွဲအလမ်း ဟောင်းတို့ရဲ့ မိုက်ဖော်ဆိုးဖက် မဟာမိတ်ပြုမူ လက္ခဏာချက်ပါပဲ။ အဆက်ဆက်သော အုပ်စိုးသူများရဲ့ တူညီတဲ့ ဘုံလက္ခဏာလို့ ပြောရမှာပါ။
တကယ်တော့ “သရဲ၊ တစ္ဆေတွေရှိနေတယ်၊ သရဲဝင်ပူးနေတယ်” ဆိုတာ ဆင်းရဲမွဲတေမှု၊ အသိပညာမဲ့မှု ဆိုတဲ့ သရဲတစ္ဆေတွေ ပဲဖြစ်ပါတယ်။
အဲဒီ ဆင်းရဲမွဲတေမှုနဲ့ အသိပညာမဲ့မှုဆိုတဲ့ သရဲတစ္ဆေတွေဟာ သေဆုံးသွားကြရတဲ့ ကလေးငယ်တွေကိုပူးဝင်နေ တာမဟုတ် ဘဲ။ ကလေးသူငယ်တွေရဲ့မိဘများနဲ့ ပယောဂကုပေးမယ်ဆိုတဲ့ (တကယ်တော့ လူသတ်သမား)ထွန်းနိုင် ဆိုသူရဲ့အသိဉာဏ်နဲ့ ဦးနှောက်ထဲမှာပါ ပူးဝင်စွဲကပ်နေတာပါ။ ဆင်းရဲမွဲတေလှတဲ့ ဗမာပြည်လူ့အဖွဲ့အစည်းတစ်ခုလုံးကို မတူတဲ့အတိုင်းအတာနဲ့ကို ပူးဝင်စွဲ နေတာလည်း ဖြစ်ပါတယ်။
ဒီလို ပူးဝင်စွဲကပ်ခံရမှုဟာ တွံတေးက လူတချို့မှာတင်မဟုတ်ဘူး၊ ဗမာပြည်အနှံ့ကျေးလက်မြေပြန်တောင်ပေါ်အားလုံးမှာ ပုံစံ မျိုးစုံနဲ့ပူးဝင်စွဲကပ်နေတာပါ။
ဒါကြောင့် ဒီဖြစ်ရပ်မှာ ထွန်းနိုင် တစ်ဦးချင်းကို အပြစ်ပေးအရေးယူလိုက်တာမှာတင် ကျွန်တော်တို့လူ့အဖွဲ့အစည်းဟာ ရပ်နား နေလို့မရပါဘူး။ ဒီလိုမသိနားမလည်မှုကို အခွင့်ကောင်းယူအမြတ်ထုတ်နေမှုတွေရဲ့ ဇာစ်မြစ်ဖြစ်တဲ့ ဆင်းရဲမွဲတေမှုနဲ့ အသိပညာမဲ့မှုကို ဘက်ပေါင်းစုံကနေ တွန်းလှန်တိုက်ဖျက်ပစ်ဖို့လိုပါတယ်။ ဆင်းရဲမွဲတေမှုနဲ့ အသိပညာမဲ့မှုကို ရေလောင်းပေါင်းသင်ပေးနေတာဟာ ပြည်တွင်း စစ်ပါပဲ။ ပြည်တွင်းစစ်နဲ့ ကျိကျိတက်ချမ်းသာကြွယ်ဝလာသူတွေဟာ အဓိကအားဖြင့်အုပ်စိုးသူအစိုးရအဆက်ဆက်နဲ့စစ်အုပ်စု မျိုး ဆက် သားစဉ်မြေးဆက်ပါပဲ။ ဒီဇာစ်မြစ်ကို အကုန်အစင် တူးထုတ်ရှင်းလင်းပစ်ရပါလိမ့်မယ်။
စစ်အုပ်စုနဲ့ ပြည်တွင်းစစ်ဆိုတဲ့ ဒီပယောဂ၊ ဒီသရဲတစ္ဆေကို မရှင်းနိုင်သရွေ့၊ မောင်းထုတ်မပြစ်နိုင်သရွေ့၊ ဒီသရဲတစ္ဆေတွေရဲ့ ပူးဝင်စွဲကပ်မှု၊ သွေးစုပ်လုယက်မှု၊ သတ်ဖြတ်မှုတွေကို လည်စင်းခံနေကြဦးမှာပဲဖြစ်ပါတယ်။ ဒါကို “တရားဥပဒေစိုးမိုးမှု” တစ်ခုတည်းနဲ့ မတိုက်ဖျက်နိုင်သလို၊ “ပြန်လည်သင်မြတ်ရေး ရေစင်ရေမန်း” နဲ့လည်း မောင်းထုတ်ဖယ်ရှားပစ်နိုင်လိမ့်မယ်မဟုတ်ပါဘူး။
အစွဲအလမ်းဟောင်းဖြစ်တဲ့ သရဲတစ္ဆေလုပ်ကြံဇာတ်လမ်းတွေ၊ မူးယစ်ဆေးဝါးနဲ့ဘာသာရေး လူမျိုးရေး သွေးခွဲ ရန်တိုက်ပေးမှု တွေဟာစစ်အုပ်စုနဲ့ပြည်တွင်းစစ်ဆိုတဲ့ သရဲ တစ္ဆေသွေးစုပ်ဖုတ်ကောင်ကြီးတွေရဲ့ ဆိုးဖော်မိုက်ဖက် အပေါင်းအဖော်တွေပဲဖြစ်တယ်ဆိုတဲ့ အချက်ကိုလည်း လူမျိုးပေါင်းစုံပြည်သူများ နိုးနိုးကြားသတိရှိကြဖို့နဲ့ တညီတညွတ်တည်း ဝိုင်းဝန်းဆန့်ကျင်တိုက်ဖျက်ကြဖို့ဖြစ်ပါတယ်။