ဂရိကွန်မြူနစ်ပါတီသို့ ပေးပို့သည့်သဝဏ်လွှာ

By | April 3, 2017

ရက်စွဲ- ၂ဝ၁ရခုနှစ်၊ မတ်လ ၂၈ရက်။

သို့-
သဘာပတိအဖွဲ့
(၂ဝ)ကြိမ်မြောက်ပါတီကွန်ဂရက်
ဂရိကွန်မြူနစ်ပါတီ

မှ-
ဗဟိုစည်းရုံးရေးကော်မတီ
ဗမာပြည်ကွန်မြူနစ်ပါတီ

အကြောင်းအရာ။ ဂုဏ်ပြုသဝဏ်လွှာပေးပို့ခြင်း။

ချစ်လှစွာသောရဲဘော်များခင်ဗျား-

ရဲဘော်တို့နှင့်ကွန်ဂရက်ကိုတက်ရောက်လာသူများ၊ ဂရိကွန်မြူနစ်ပါတီဝင်များအား ဂုဏ်ယူ၊ ကျေနပ်မှုအပြည့်ဖြင့် ဤညီနောင်ချင်းဂုဏ်ပြုသဝဏ်လွှာကို ပေးပို့အပ်ပါသည်။

ကျွန်တော်တို့အနေဖြင့် ကမ္ဘာအဝှမ်းရှိညီနောင်ပါတီများ၏ လုပ်ဆောင်မှုများကို အတတ်နိုင်ဆုံး မျက်ခြေမပြတ်အောင် လုပ်နေပါသည်။ ဂရိကွန်မြူနစ်ပါတီကွန်ဂရက်တွင် ဖတ်ကြားမည့်စာတမ်းကို ဖတ်ရသောအခါ လွန်စွာမှ အားတက်ရပါသည်။

ဗမာနိုင်ငံမှ အဖိနှိပ်ခံပြည်သူများအတွက် နည်းနည်းမှ အကျိုးမရှိသော နိုင်ငံကြီးများအတွင်း အားပြိုင်မှုမှာ သိသိသာသာ ထင်ရှားလာနေပြီး ဤသည်က ကျွန်တော်တို့ပြည်သူများ၏ နေထိုင်မှုအဆင့်အတန်း၊ ပညာရေး၊ ကျန်းမာရေးစသည်တို့ကို ဇောက်ထိုးကျဆင်းစေခဲ့ပါတယ်။
အရှေ့အလယ်ပိုင်းနဲ့ အာဖရိကမြောက်ပိုင်းတို့မှာ အရင်းရှင်နိုင်ငံကြီးတွေက ထင်သလိုကြဲနေသကဲ့သို့ပင် ကျွန်တော်တို့နိုင်ငံက စစ်အုပ်စုနှင့် အုပ်စိုးသူလူတန်းစားသည်လည်း လူမျိုးပေါင်းစုံ၊ ဘာသာပေါင်းစုံဖြင့် ဖွဲ့စည်းထားသော ကျွန်တော်တို့လူ့အဖွဲ့အစည်းအတွင်း လူမျိုးရေး၊ ဘာသာရေး မုန်းတီးမှုတွေ လှုံ့ဆော်ဖန်တီးနေပါသည်။ အစိုးရနှင့် စစ်တပ်က“ငြိမ်းချမ်းရေး” စကားကို ပရိတ်ရွတ်သလို နေ့စဉ်ရွတ်နေကြသည့်အကြားမှပင် စစ်ပွဲများမှ ာအရင်ထက် ပိုများလာခဲ့သဖြင့် သောင်းနှင့်ချီသော လူထုတွေမှာ ကိုယ့်အိမ်ယာတွေကို စွန့်လွှတ်ပြီး အခြားနိုင်ငံတွေကို ပြေးဝင်ခုံလှုံနေကြရပါသည်။ ကျွန်တော်တို့နိုင်ငံ၏ နယ်စပ်တလျှောက်မှာ စစ်ပြေးဒုက္ခသည် ခိုလှုံရေးစခန်းတွေ ဗလပွကြဲနေပါသည်။ သို့ဖြင့် အင်န်ဂျီအိုများ၊ အထူးသဖြင့် အနောက်တိုင်းအင်န်ဂျီအိုများ၏အခန်းမှာ ကျွန်တော်တို့ပြည်သူလူထုတွေ၏ဘဝမှာ ပိုပိုပြီး နေရာယူ၊ အရေးပါလာနေပါသည်။

ကျွန်တော်တို့နိုင်ငံနှင့် ကပ်နေသော ပင်လယ်ထဲတွင် အင်အားကြီးနိုင်ငံများက စစ်ရေးလေ့ကျင်နေခြင်းသည် ကျွန်တော်တို့နိုင်ငံနှင့်ဒေသတို့၏ ငြိမ်းချမ်းတည်ငြိမ်မှုကို အထောက်အကူဖြစ်လိမ့်မည်ဟု ကျွန်တော်တို့ဘယ်တုန်းကမှ မယူဆခဲ့ပါ။ တကယ်တွင် ဤလုပ်ရပ်များမှာ ကျွန်တော်တို့နိုင်ငံ ပြည်သူများ၏ နေထိုင်မှုဘဝနှင့် ငြိမ်းချမ်းရေးတို့ကို ခြိမ်းခြောက်နေတာသာ ဖြစ်ပါသည်။ ဤအချင်းအရာများက ဗမာပြည်က စစ်ဗိုလ်ချုပ်များအား စစ်လက်နက်ပစ္စည်းများ ဝယ်ယူရန်၊ စစ်စရိတ်တိုးချဲ့ရန် ဆင်ခြေရစေပါသည်။

မနာလိုစရာကောင်းလောက်အောင် သဘာဝအရင်းအမြစ်နှင့်လူအရင်းအမြစ်ပေါကြွယ်သော ဆင်းရဲနောက်ကျသည့် ကျွန်တော်တို့နိုင်ငံမှာ အခြားနိုင်ငံများနှင့်ပြည်တွင်းခရိုနီ အမျိုးမျိုးတို့၏ သားကောင်ဖြစ်လာနေပါသည်။ သူတို့က ပြည်ပရင်းနှီးမြှုပ်နှံမှုတွေ တိုးပွားအောင် လုပ်ဆောင်နေပါသည်ဟု ပြောနေကြသော်လည်း လက်တွေ့မှာ ကိုယ့်နိုင်ငံသားတွေ ပြည်ပထွက်ပြီး အလုပ်ရှာဖွေနေကြခြင်းမှာ တားမနိုင်ဆီးမရဖြစ်နေပြီး ကျေးလက်ဒေသတွေမှာတော့ လုပ်အားမလုံမလောက် ဖြစ်လာနေပါသည်။

ကျွန်တော်တို့အနေဖြင့် နိုင်ငံတကာကွန်မြူနစ်များနှင့် အလုပ်သမားလူတန်းစား၏ နိုင်ငံလွန်လှုပ်ရှားမှုများတွင် ကိုယ့်အကန့်အသတ်များကြောင့် ပါဝင်နိုင်ခြင်းမရှိသော်လည်း ကျွန်တော်တို့အနေဖြင့် ဗမာပြည်၏ လက်တွေ့အခြေအနေနှင့်အညီ ပစ္စည်းမဲ့လူတန်းစားလှုပ်ရှားမှုများ သက်ဝင်တိုးပွားအောင် လုပ်ဆောင်နေပါသည်။ ကျွန်တော်တို့သည် ဖိနှိပ်သူမျိုးစုံ၏ ဖိနှိပ်မှုမျိုးစုံကို ရဲဝံ့စွာတိုက်ပွဲဝင်သည့် အစဉ်အလာရှိသည့် ဗမာပြည်မှ လူမျိုးပေါင်းစုံပြည်သူများအပေါ် ခိုင်မြဲစွာအားပြုပြီး ကမ္ဘာအဝှမ်းမှ ပစ္စည်းမဲ့များ၏ ဘုံတိုက်ပွဲကို အကျိုးပြုရန် အစွမ်းကုန်အားထုတ်သွားကြပါမည်။ ကျွန်တော်တို့သည် နိုင်ငံတကာအလုပ်သမားများနှင့်သွေးစည်းကာ နယ်ချဲ့သမားများနှင့် ဧရာမနိုင်ငံစုံကုမ္ပဏီကြီးများ၏ လက်ချောင်းများကို ခုတ်ထစ်ဖြစ်တောက်သည့် တိုက်ပွဲတွင် ပါဝင်သွားပါမည်။

ဂရိကွြန်မူနစ်ပါတီ၏ နှစ်ဆယ်ကြိမ်မြောက်ကွန်ဂရက်အောင်မြင်ရမည်။
ဂရိကွန်မြူနစ်ပါတီနှင့်ဗမာပြည်ကွန်မြူနစ်ပါတီတို့အကြားမှ ညီနောင်ဆက်ဆံရေးအဓွန့်ရှည်ပါစေ။
ပစ္စည်းမဲ့နိုင်ငံတကာ့ဝါဒအဓွန့်ရှည်ပါစေ။

ဗဟိုစည်းရုံးရေးကော်မတီ
ဗမာပြည်ကွန်မြူနစ်ပါတီ

Leave a Reply

Your email address will not be published. Required fields are marked *