နိုင်ငံရေးပါတီများနဲ့ ရွေးကောက်ပွဲတွေရဲ့ ကံကြမ္မာဟာ ဗိုလ်တင်အေး လက်ခုပ်ထဲမှာ

By | September 9, 2014

အခြေအနေက ဒိုင်အကြီးအကျယ်လျှော်ရမယ့်ပွဲ။ ထိုးသားတွေကလည်း တစ်ကွက်ထဲ အပိုင်ပုံအောထားကြတယ်။ ဖဲသုံးချပ် ဒိုင်ကလည်း သူအရှုံးကြီးရှုံးတော့မယ်ဆိုတာ အတွေ့အကြုံအရ ကောင်းကောင်းသိနေပြီ။ ထွက်ပေါက်ကလည်း တခြားမရှိတော့ဘူး။ ဒီတော့ ဖဲသုံးချပ်ဒိုင်ဟာ စားပွဲပေါ် ဓါးမြှောင်စိုက်တဲ့ လူမိုက်နည်းသုံးပြီး ဒီပွဲကိုမပျက် ပျက်အောင် ဖျက်ရတော့တာပေါ့။

မကြာမီ “ကြားဖြတ်ရွေးကောက်ပွဲကျင်းပပေးမယ်” လို့ လွှတ်တော်ထဲမှာ သူကိုယ်တိုင်ဖြေကြားပြောဆိုထားတဲ့ ဗိုလ်တင်အေးလည်း ဖဲသုံးချပ်ဒိုင်လိုပဲ “ ကြားဖြတ်ရွေးကောက်ပွဲ” ဖျက်သိမ်းလိုက်ပြီ။

တကယ်တော့ နိုင်ငံရေးပါတီများနဲ့ ရွေးကောက်ပွဲတွေရဲ့ ကံကြမ္မာဟာ ဗိုလ်တင်အေး လက်ခုပ်ထဲမှာ ရှိတာပါ။ “၂၀၀၈ အခြေခံဥပဒေ” ၊ ပုဒ်မ ၃၉၉ နဲ့ ပုဒ်မ ၄၀၂ တို့ဆိုတာဟာ ဗိုလ်တင်အေး စိတ်ကြိုက် စီရင်ပိုင်ခွင့်တွေ ဖြစ်တယ်။

တချို့တွေ ပြောနေကြသလို၊ ထင်မြင်ယူဆနေကြသလို “ဗိုလ်တင်အေးကော်မရှင်” ဖျက်သိမ်းပြီး အခြားကော်မရှင်တစ်ခုနဲ့ အစားထိုးရုံလောက်နဲ့ လုံးဝမဖြစ်နိုင်ဘူး။ “၂၀၀၈ အခြေခံဥပဒေ”တည်မြဲနေသမျှ “လွတ်လပ်ပြီးတရားမျှတတဲ့ ရွေးကောက်ပွဲ” ဆိုတာ ဘယ်လိုမှ ဖြစ်မလာနိုင်ပါဘူး။ နိုင်ငံရေးပါတီတိုင်းဟာ နိုင်ငံရေး၊ စည်းရုံးဖွဲ့စည်းနဲ့ ဘဏ္ဍာရေး အဖက်ဖက်က အမှီအခိုကင်းပြီး၊ လွတ်လပ်နေရမယ်။ ဗိုလ်တင်အေးကော်မရှင်က ငြိုငြင်မှာကို တထိထ်ထိတ်နဲ့ စိုးရိမ်သောကပွားနေရတဲ့ နိုင်ငံရေးပါတီဘဝမျိုးတော့ ဘယ်လိုမှ မဖြစ်သင့်/မဖြစ်ထိုက်ပါဘူး။

၂၀၁၄ ခုနှစ်၊ ဇူလိုင်လ ၁ ရက်၊ နေ့စွဲနဲ့ ထုတ်ခဲ့တဲ့ “ဗိုလ်တင်အေး ကော်မရှင်” ရဲ့ ညွန်ကြားချက်အမှတ် (၁/၂၀၁၄) ဆိုတာဟာ “ကြားဖြတ်ရွေးကောက်ပွဲ” မှာ သူတို့ ကြံ့ဖွံ့ပါတီ ပြတ်ပြတ်သားသား အရေးသာနိုင်ဖို့ အသေအချာပြင်ဆင်ခဲ့တဲ့ ခြေလှမ်းတွေထဲက တစ်ခုဖြစ်ပါတယ်။ ဒီခြေလှမ်းတွေ၊ ဆင်ကွက်တွေ ထွက်ပေါ်လာတော့လည်း နိုင်ငံရေးပါတီတွေဘက်က အကျိုးအကြောင်းပြပြီး ကော်မရှင်ထံ ကန့်ကွက်အရေးဆိုခဲ့ကြပြီပဲ။ အခုလည်း ဒီခြေလှမ်းတွေနဲ့တင် အရေးမလှတော့လို့ “ကြားဖြတ်ရွေးကောက်ပွဲ” ကို ကမန်းကတန်း ဖျက်သိမ်းပစ်လိုက်တာာပဲ ဖြစ်တယ်။

မနိုင်မယ့် “၂၀၁၄ကြားဖြတ်ရွေးကောက်ပွဲ” မနွှဲတော့ဘူး။ ၁၉၉၀ မှာ တစ်ခါ၊ ၂၀၁၂ မှာ တစ်ခါ ရှုံးထားဖူးတဲ့ အတွေ့အကြုံ ရှိထားပြီ။ ၂၀၁၅ ပွဲကြီးအတွက် အတိတ်က ရှုံးပွဲတွေကို သုံးသပ်ပြီး ပိုင်မယ့်နိုင်မယ့် သတ်ကွင်းမှာ ဉာဏ်နီဉာဏ်နက်မျိုးစုံသုံးပြီး ပြင်ဆင်ရွေးချယ်တိုက်မယ်။

ဗိုလ်တင်အေးရဲ့ စက်တင်ဘာ ၇ ရက်၊ ရှင်းလင်းချက် “အချက်အမှတ် ၆” အရဆိုရင်တော့ ၂၀၁၅ မှာ “အချိုးကျ ကိုယ်စားပြုစနစ်” (PR) ဆိုတာ မုချပေါ်ပေါက်လာမှာ သေချာသလောက်ဖြစ်နေပြီ။ ဒါ့အပြင် နိုင်ငံရေးပါတီအတွက် ရွေးကောက်ပွဲကော်မရှင်က ထပ်မံရေးသားအုံးမယ့် ခလုတ်ကန်သင်းအသစ်တွေ၊ ထောင်ချောက်အသစ်အဆန်းတွေ ပေါ်လာဖို့ကလည်း အသေအချာပါပဲ။

“၂၀၀၈ အခြေခံဥပဒေ” တည်မြဲနေသမျှ နိုင်ငံရေးပါတီများနဲ့ ရွေးကောက်ပွဲတွေရဲ့ကံကြမ္မာဟာ (ဗိုလ်တင်အေး မရှိတော့ရင် တောင်မှ) နောက်လာမယ့် မောင်ပုလဲကော်မရှင်လက်ထဲမှာ ရှိမြဲရှိနေပါလိမ့်မယ်။

“နိုင်ငံတော်၏ အချုပ်အခြာအာဏာသည် နိုင်ငံသားများထံမှ ဆင်းသက်သည်”တဲ့။ ထိုအာဏာကို (၄ နှစ်သို့မဟုတ် ၅ နှစ် တကြိမ်) ရွေးကောက်ပွဲများ ကျင်းပ၍ ရယူရမယ်တဲ့။ အခုတော့ ထိုရွေးကောက်ပွဲများ ကျင်းပခြင်း/ဖျက်သိမ်းခြင်းတို့အတွက် တချက်လွှတ်အာဏာကို ဗိုလ်တင်အေးက ပိုင်ဆိုင်နေပါကလား။ ကာချုပ်ဗိုလ်မင်းအောင်လှိုင်က “၂၀၀၈ အခြေခံဥပဒေ” အရ အချိန်မရွေး အာဏာသိမ်းနိုင်သလို၊ ဗိုလ်တင်အေးကလည်း “၂၀၀၈ အခြေခံဥပဒေ” အရ ရွေးကောက်ပွဲတွေကို အချိန်မရွေး ကျင်းပစေနိုင်တယ်/ ဖျက်သိမ်းပစ်နိုင်တဲ့ အာဏာပိုင်တယ်။

ဒီတော့“၂၀၀၈ အခြေခံဥပဒေ” ကို ပြင်ဆင်ရုံလောက်နဲ့ မရနိုင်၊ အကုန်အစင်ဖျက်သိမ်းရလိမ့်မယ်။

Leave a Reply

Your email address will not be published. Required fields are marked *